ꓮ ꓫꓵ_ ꓟꓲ ꓬꓰ ꓐ ꓡ ꓢꓴ ꓪꓴ-ꓢ꓾ ꓫꓱ ꓤ ꓠꓲꓹ ꓙꓳ ꓢꓴ ꓪꓴ-ꓢ ꓠꓬ ꓠꓬꓲꓸ ꓠꓬꓲ ꓣꓳ ꓟꓲ ꓕꓯ ꓗꓪ ꓒꓬꓱꓼ ꓡꓰ ꓔꓬ ꓟ ꓫꓵ ꓪꓴ ꓔꓯ ꓬꓲ ꓟꓽ ꓟꓳ ꓡ? ꓥꓶ_ ꓟ ꓞꓳ ꓤ ꓡꓰ ꓥꓶ ꓟ ꓬꓰ ꓔꓬ ꓟ꓾ ꓝꓴꓲ ꓟꓽ ꓙꓳ ꓢꓴ ꓞꓳ ꓤ ꓡꓰ ꓫꓵꓻ ꓔꓬ ꓟ꓾ ꓟꓯꓼ ꓢꓰꓼ ꓡꓯꓽ ꓘꓳ_ ꓟ ꓗꓪ ꓐꓰ ꓥꓶ_ ꓟ ꓗꓪ ꓐꓰ ꓞꓳ ꓤ ꓫꓵꓻ ꓔꓬ ꓟ꓾ ꓕꓱ ꓟ ꓔꓯ ꓪꓴ-ꓢ ꓗꓽ ꓕꓸ ꓟꓽ ꓐ ꓡ ꓡ꓾ ꓐꓰ ꓣꓳ ꓓꓵꓽ ꓙ ꓠꓬꓲ ꓓꓴ ꓙꓳ_ ꓡꓳ꓾ ꓪꓴ-ꓢ ꓬꓲ ꓢꓯꓼ ꓟꓽ ꓙꓳ ꓡꓰ ꓔ ꓟ꓾ ꓮ ꓫꓵ ꓟꓲ ꓬꓰ ꓐ ꓡ ꓢꓴ ꓪꓴ-ꓢ ꓬꓲ ꓢꓯꓼ ꓪ ꓡꓰ ꓟꓽ ꓙꓳ ꓡꓰ ꓔ ꓟ ꓚꓱꓹ ꓗꓸ ꓚꓵ ꓐꓯ ꓢꓲ ꓬꓲ ꓥ ꓡꓳ꓾ ꓚꓮꓔꓰꓚꓧꓲꓢꓟ ꓳꓝ ꓔꓧꓰ ꓚꓮꓔꓧꓳꓡꓲꓚ ꓚꓧꓴꓣꓚꓧ ꓠꓳ 272 ꓗꓪ ꓕꓱ ꓡꓱ ꓐꓰ ꓐꓳ ꓔ ꓡꓳ=
ꓪꓴ-ꓢ ꓠꓬ ꓮ ꓫꓵ ꓟꓲ ꓬꓰ ꓐ ꓡ ꓢꓴ ꓫꓱꓸ ꓤ ꓠꓲꓹ ꓙꓳ ꓢꓴ ꓪꓴ-ꓢ ꓥ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓬꓲ ꓚꓱꓹ ꓐꓰ ꓣꓳ ꓚꓱꓹ ꓠꓬ ꓟꓽ ꓪ꓾ ꓬꓲ ꓠꓬ ꓪꓴ-ꓢ ꓥ ꓡꓳ= ꓣꓳ ꓠꓬ ꓞꓳ ꓤ ꓥ ꓡꓳ= ꓣꓳ ꓮ ꓡꓲ ꓗꓪ ꓪꓴ-ꓢ ꓠꓲꓹ ꓡꓶꓽ ꓔꓯ ꓫꓬ ꓫꓬ ꓡꓰ ꓟꓳ ꓓ_ ꓡ꓾ ꓐꓰ ꓐꓯ ꓕꓯ ꓮ ꓫꓵ ꓟꓲ ꓬꓰ ꓐ ꓡ ꓢꓴ ꓪꓴ-ꓢ ꓠꓬ ꓥꓶ_ ꓟ ꓔꓯ ꓓꓶ ꓧꓪꓸ ꓡꓰ ꓠꓹ ꓟ ꓐꓱ ꓶ ꓞꓳ ꓤ ꓕꓲ ꓣꓳ ꓒꓬꓱꓼ ꓡ_ ꓡꓳ= ꓬꓲ ꓠꓬ ꓛꓴ ꓙꓳ ꓢꓴ ꓥ ꓠꓬ꓾ ꓞꓳ ꓤ ꓡꓯꓽ ꓒꓯꓹ ꓗꓪ ꓫꓵꓻ ꓢꓲ ꓠꓬꓲ ꓔꓴꓸ ꓗꓷꓳ= ꓢꓽ ꓠꓬꓲ ꓗꓸ ꓠꓯ ꓝꓮꓲ ꓢꓯꓸ ꓬꓲꓼ ꓡ_ ꓡꓳ= ꓮ ꓫꓵ ꓟꓲ ꓬꓰ ꓐ ꓡ ꓢꓴ ꓪꓴ-ꓢ ꓠꓬ ꓥꓶ_ ꓟ ꓔꓯ ꓬꓲ ꓢꓯꓼ ꓪ ꓗꓪ ꓐꓰ ꓟꓽ ꓓꓶ꓾ ꓮ ꓡꓰ ꓐꓰ ꓧꓪꓸ ꓡꓰ_ ꓡ꓾ ꓬꓲ ꓢꓯꓼ ꓪ ꓗꓪ ꓐꓰ ꓟꓯꓼ ꓓꓶ_ ꓟ ꓗꓪ ꓐꓰ ꓧꓪꓸ ꓡꓰ_ ꓟ ꓟꓽ ꓙꓳ ꓙꓳ ꓐꓰ ꓙ ꓣꓳ ꓢꓲ ꓠꓬꓲ ꓫꓵꓻ ꓗꓷ ꓢꓲ ꓠꓬꓲ ꓥꓶ_ ꓟ ꓔꓯ ꓬꓲ ꓧꓪꓸ ꓡꓰ_ ꓡꓳ=
ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓣꓳ ꓒꓬꓱꓽ ꓕꓯ ꓗꓪ ꓣꓳ ꓟꓳ_ ꓟ ꓠꓬ ꓣꓳ ꓙꓵꓻ ꓠꓲꓹ ꓟꓽ ꓙꓳ ꓥꓳ ꓐꓯ ꓠꓬ ꓮ ꓡꓲ ꓡꓲ ꓣꓳ ꓪꓴ-ꓢ ꓔꓯ ꓠ ꓠꓹ ꓗꓴꓸ ꓟꓽ ꓐ ꓡ꓾ ꓙꓵꓻ ꓠꓲꓹ ꓟꓽ ꓙꓳ ꓕꓯ ꓣꓳ ꓪꓴ-ꓢ ꓟꓬꓱꓽ ꓔꓯ ꓢꓷꓸ ꓟꓽ ꓐ ꓡ꓾ ꓮ ꓫꓵ ꓑꓶ ꓓꓴ ꓥ ꓡ ꓐꓰ ꓐꓯ ꓕꓯ ꓟꓴ ꓡꓳꓹ ꓬꓰ ꓟ ꓪꓴ-ꓢ ꓠꓬ ꓥꓶ_ ꓟ ꓔꓯ ꓟꓯꓼ ꓜꓴ ꓗꓪ ꓐꓰ ꓓꓶ ꓧꓪꓸ ꓡꓰ ꓟ ꓟꓽ ꓥ ꓥ꓾ ꓬꓲ ꓠꓬ ꓫꓸ ꓙꓵ ꓜꓲ ꓢꓲ ꓫꓵꓻ ꓢꓲ ꓠꓬꓲ ꓢꓯꓸ ꓬꓲꓼ ꓡ ꓟ ꓗꓪ ꓐꓰ ꓕꓱ ꓟ ꓔꓯ ꓬꓲ ꓧꓪꓸ ꓡꓰ_ ꓡꓳ= ꓠꓬꓲ ꓠꓬꓲ ꓕꓱ ꓡꓱ ꓫꓵ ꓪꓴ-ꓢ ꓔꓯ ꓣꓳ ꓦ ꓡꓱ ꓔꓬ ꓡꓳ= ꓥꓶ_ ꓟ ꓔꓯ ꓙꓲ_ ꓟ ꓗꓪ ꓐꓰ ꓢꓯꓼ ꓖꓶ ꓢꓴ ꓪꓴ-ꓢ ꓥ ꓡꓳ= ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓟꓽ ꓙꓲ ꓟ꓾ ꓟꓽ ꓜꓳ ꓟ꓾ ꓥꓶ_ ꓟ ꓬꓲ ꓗꓸ ꓚꓵ ꓔꓯ ꓔꓳꓹ ꓜꓳ ꓡ ꓕꓯ ꓪꓴ-ꓢ ꓔꓯ ꓣꓳ ꓟꓽ ꓙꓲ ꓟꓽ ꓬꓰ꓾ ꓬꓲ ꓟꓶꓽ ꓕꓯ ꓠꓬ ꓪꓴ-ꓢ ꓧꓪꓸ ꓡꓰ_ ꓡꓳ꓾ ꓐꓰ ꓐꓯ ꓟ ꓔꓯ ꓓꓵꓽ ꓙ ꓢꓲ ꓠꓬꓲ ꓣꓳ ꓪꓼ ꓘꓴ ꓢꓲ ꓠꓬꓲ ꓛꓳ ꓙꓳ ꓠ ꓔ ꓡꓳ= ꓟꓽ ꓥ ꓠꓬ ꓣꓳ ꓟꓳ_ ꓟ ꓔꓯ ꓡꓳꓸ ꓠꓬꓲ ꓢꓲ ꓠꓬꓲ ꓪꓴ-ꓢ ꓔꓯ ꓟꓽ ꓙꓲ ꓗꓷ ꓡꓰ ꓗꓴꓸ_ ꓡꓳ= ꓪꓴ-ꓢ ꓚꓱꓹ ꓠꓬ ꓙꓲ_ ꓟ ꓗꓪ ꓐꓰ ꓟꓽ ꓙꓲ_ ꓟ ꓔꓯ ꓧꓪꓸ ꓡꓰ_ ꓟ ꓚꓱꓹ ꓥ ꓡꓳ= ꓬꓲꓸ ꓟꓶꓽ ꓗꓪ ꓠꓬ ꓧꓪꓸ ꓡꓰ_ ꓡꓳ= ꓞꓳ ꓤ ꓐꓴ ꓠꓬ ꓢꓲ ꓒꓽ ꓬꓰ-ꓢꓴ ꓔꓯ ꓢꓰꓼ ꓕꓯ ꓬꓲ ꓪ ꓠꓬ ꓧꓪꓸ ꓡꓰꓳ꓾ ꓬꓲ ꓪ ꓠꓬ ꓓ ꓡꓰꓳ ꓐꓯ ꓢꓲ ꓠꓬꓲ ꓠꓲꓹ ꓟ ꓠꓯꓼ ꓘꓴꓽ ꓗꓪ ꓓꓵꓽ ꓙ ꓔꓬ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓢꓽ ꓠꓬꓲ ꓗꓪ ꓠꓬ ꓢꓲ ꓒꓽ ꓬꓰ-ꓢꓴ ꓢꓯꓸ ꓬꓲꓼ ꓡꓳ= ꓮ ꓡꓰ ꓟ ꓡꓲ ꓬꓲ ꓔꓯ ꓢꓰꓼ ꓟꓽ ꓓ꓾ ꓕꓱ ꓟ ꓡꓰ ꓐꓰ ꓟꓲ ꓠꓯ ꓕꓱ ꓟ ꓗꓪ ꓛꓳ ꓙꓳ ꓔꓬ ꓟ ꓗꓪ ꓕꓲ ꓠꓬꓲ ꓙꓳ ꓠꓬ ꓪꓴ-ꓢ ꓢꓯꓼ ꓪ ꓧꓪꓸ ꓡꓰ_ ꓥꓳ꓾ ꓕꓲ ꓠꓬꓲ ꓙꓳ ꓠꓬ ꓙꓲ_ ꓟ ꓧꓪꓸ ꓡꓰ_ ꓥꓳ꓾ ꓐꓯ_ ꓟ ꓔꓯ ꓥꓳ ꓡꓳꓸ ꓢꓲ ꓠꓬꓲ ꓪꓴ-ꓢ ꓬꓲ ꓙꓵꓽ ꓗ ꓐꓰ ꓪꓴ-ꓢ ꓔꓯ ꓕꓷ ꓕꓷ ꓞ ꓞ ꓡꓰ ꓙꓵꓻ ꓢꓲ ꓠꓬꓲ ꓛꓳ ꓙꓳ ꓥꓳ ꓐꓯ ꓠꓬ ꓣꓳ ꓠꓬꓲ ꓠꓬꓲꓸ ꓠꓬꓲ ꓠꓴ ꓥꓪ ꓓꓵꓽ ꓙ ꓟꓬ ꓓꓴ ꓟꓽ ꓙꓳ ꓡꓰꓳ꓾ ꓖꓳ ꓡꓱ ꓠꓬꓲ ꓮ ꓙꓵ ꓢꓴ ꓙꓵꓻ ꓠꓲꓹ ꓔꓯ ꓕꓷ ꓞ ꓡꓰ ꓠꓹ ꓟ ꓐꓹꓱ ꓶ ꓪꓽ ꓘꓵ ꓢꓯꓼ ꓕꓵꓼ ꓓꓴ ꓬꓰ ꓡꓯ=
