Yꓲꓼ ꓤ ꓠꓬꓲ ꓤ ꓐꓴꓳ꓾ ꓪꓴ‐ꓢ ꓬꓲ ꓠꓲ, ꓟ ꓠꓯꓸꓼ ꓗꓪ ꓮ ꓠꓯ. ꓠꓯ. ꓗꓪ ꓮ ꓫꓵꓽ ꓓꓵˍ ꓡ꓿ ꓮ ꓫꓵꓽˍ ꓟꓲ ꓢꓷ. ꓖꓴ ꓡꓰ ꓢꓴ꓾ ꓟꓴꓽ ꓗꓪ ꓟꓲ ꓠꓯ ꓔꓯ ꓚꓰꓼ ꓢꓴ꓾ ꓟꓳꓻ ꓓˍ ꓟ ꓐꓰ ꓟꓳꓻ ꓟꓽ ꓓꓻ ꓟ ꓔꓯ ꓚꓰꓼ ꓢꓴ ꓪꓽ ꓠꓬꓲ ꓓꓰ ꓡꓰˍ ꓟ ꓪꓴ‐ꓢ ꓬꓲ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓮ ꓫꓵꓽ ꓓꓯ,ˍ ꓡ꓾ ꓐꓰ ꓠꓴ ꓓꓵꓽ ꓙꓽ ꓠꓬꓲˍ ꓡ꓿ ꓠꓬꓲ. ꓠꓬꓲ ꓪꓴ‐ꓢ ꓬꓲ ꓠꓲ, ꓟ ꓠꓯꓸꓼ ꓗꓪ ꓮ ꓫꓵꓽ ꓓꓵˍ ꓡ ꓐꓯ ꓟ ꓔꓯ ꓣꓳꓽ ꓦ ꓢꓯꓼ ꓪ ꓣꓴ ꓓꓴ ꓬꓰ ꓡꓯ꓿

ꓢ. ꓠꓯ ꓜꓻ ꓚꓲ. ꓧꓪꓽ ꓚꓲ. ꓦꓬꓼ ꓠꓬꓲ (5) ꓠꓽ ꓕꓲꓽ ꓠꓽ ꓢꓲ‐ꓒ‐ꓦꓬꓼ‐ꓠꓬꓲ ꓗꓪ꓾ ꓪꓴ‐ꓢ ꓬꓲ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓮ ꓫꓵꓽ ꓓꓵˍ ꓡ꓾ ꓐꓯ ꓟ ꓔꓯ ꓟꓳ. ꓖꓶˍ ꓟ ꓫꓵꓽ ꓪꓴ ꓕꓲꓽ ꓟ ꓣꓳ ꓵꓻ ꓪˍ ꓡꓳ꓿ ꓕꓱ ꓟ ꓠꓬ (ꓬꓳ‐ꓦ 8ꓽ1‐11) ꓗꓪ ꓥ ꓡꓳ꓿ ꓪꓴ‐ꓢ ꓠꓬ ꓮ ꓛꓬ ꓪ ꓚꓲ ꓗꓪ ꓐꓰ ꓬꓯꓼ ꓡˍ ꓕꓯ ꓟ. ꓟꓲꓽ ꓚ ꓟ. ꓒ ꓐꓴ ꓐꓰ ꓢꓷ. ꓠꓲ, ꓙꓳ ꓒ ꓐꓴ ꓠꓬ ꓦꓬꓽ ꓛꓳꓽ ꓧꓪ ꓔꓬ ꓟ ꓤ ꓟꓶ ꓤ ꓕꓲ ꓣꓳ ꓔꓯ ꓘꓴ ꓔꓯ, ꓡ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓟꓲꓽ ꓙꓬ ꓗꓪ ꓡꓳ ꓓꓰ ꓡꓰ ꓡꓳ ꓢꓰꓼ ꓠ, ꓟ ꓬꓲ ꓔꓯ ꓤ, ꓠꓬꓲˍ ꓟ꓾ ꓟ. ꓟꓲꓽ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓓꓰ ꓖꓴ ꓧꓪ ꓠꓲ, ꓫꓵˍ ꓡꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓪꓻ ꓕꓴꓻ ꓠꓲ, ꓫꓵˍ ꓡꓳ꓿

ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓪ ꓔꓯ꓾ ꓠꓴ ꓪ ꓠꓯꓸꓼ ꓗꓪ ꓐꓰ ꓝꓴꓲ. ꓟꓽ ꓙꓳ ꓢꓴ ꓡꓰ ꓧꓶ. ꓕꓯ ꓬꓲ ꓔꓯ ꓡꓳ ꓓꓰ ꓡꓰ ꓡꓳ ꓝꓲ ꓐꓯ ꓢꓲ꓾ ꓟꓲ ꓛꓬ ꓗꓪ ꓗꓴ ꓗꓴ ꓟꓳꓼ ꓗꓷ ꓢꓲ ꓠꓬꓲ꓾ ꓬꓲ ꓡꓯꓽ ꓒꓯ, ꓡꓰ ꓟꓲ ꓛꓬ ꓗꓪ ꓧꓶꓽˍ ꓟ ꓟ. ꓟꓲꓽ ꓥ ꓡꓳ꓿ ꓐꓯ ꓘꓶꓽ ꓕꓱ ꓟ ꓔꓯ ꓑ ꓙꓽˍ ꓕꓯ ꓞꓲꓼ ꓪꓴꓽ ꓢꓴ ꓗꓪ ꓐꓰ ꓪꓴ. ꓔꓴ ꓢꓲ ꓮ ꓙꓵꓽ ꓓꓳ ꓙꓰˍ ꓡꓳ꓾ ꓐꓰ ꓣꓳ ꓟꓳꓻ ꓪˍ ꓡꓳ꓿

ꓟ. ꓟꓲꓽ ꓕꓱ ꓟ ꓠꓬ ꓪꓴ‐ꓢ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓮ ꓫꓵꓽ ꓓꓵˍ ꓡ꓾ ꓐꓯˍ ꓟ ꓣꓳ ꓔꓯ ꓟꓳ. ꓖꓶ ꓡˍ ꓟ ꓥ ꓡꓳ꓿ ꓬꓲ ꓠꓲ, ꓟ ꓠꓯꓸꓼ ꓗꓪ ꓠꓬ ꓫꓱ. ꓤ ꓠꓲ, ꓐꓰ ꓠꓵꓻ ꓠꓲ, ꓚꓳ. ꓗꓳ. ꓙꓰ ꓠꓬ ꓠꓱ. ꓐꓯ ꓮ ꓫꓵꓽˍ ꓟꓲ ꓟꓽ ꓓꓯ,꓾ ꓐꓯˍ ꓟꓲ ꓣꓳꓽ ꓡꓳ. ꓟꓳꓻˍ ꓡꓳ꓿ ꓞꓳ ꓤ ꓕꓲꓽ ꓣꓳ ꓔꓯ ꓬꓲ ꓡꓳ. ꓠꓬꓲˍ ꓕꓯ ꓫꓱ. ꓤ ꓓꓰ ꓡꓰˍ ꓟ꓾  ꓠꓲ, ꓟ ꓠꓻ ꓓꓰ ꓡꓰˍ ꓟ꓾ ꓠꓲ, ꓠꓵꓻ ꓓꓰ ꓡꓰˍ ꓟ ꓬꓲ ꓙꓳˍ ꓡꓳ꓿ ꓞꓳ ꓤ ꓮ ꓡꓲ ꓘꓶ ꓛꓲ ꓝꓴꓲ. ꓪꓴꓽˍ ꓥ ꓟꓲ ꓬꓲ ꓠꓲ, ꓟ ꓠꓯꓸꓼ ꓗꓪ ꓠꓬ ꓫꓱ. ꓤˍ ꓟ ꓡꓰꓽ ꓙꓳˍ ꓟ ꓔꓯ ꓣꓳ ꓡꓳ. ꓟꓳˍ ꓡꓳ꓿ ꓕꓱ ꓕꓲ ꓘꓴ ꓗꓰ ꓡꓰꓽ ꓟꓽ ꓞꓲ ꓢꓲ ꓒ ꓬꓰ‐ꓢꓴ ꓬꓰˍ ꓟ ꓮ ꓙꓵꓽ ꓔꓯ ꓣꓳ ꓡꓳ. ꓠꓬꓲˍ ꓕꓯ ꓬꓲ ꓠꓬ ꓫꓱ. ꓤ ꓠꓲ, ꓗꓪ ꓐꓰ ꓡꓰꓽ ꓬꓰˍ ꓟ ꓔꓯ ꓣꓳ ꓡꓳ. ꓟꓳˍ ꓡꓳ꓿

ꓞꓳ ꓜꓴ ꓞꓳ ꓟꓯꓼ ꓔꓯ ꓬꓲ ꓟꓳˍ ꓕꓯ꓾ ꓬꓲ ꓪ ꓠꓬ ꓡꓳ. ꓢꓴ ꓟꓽ ꓙꓳ ꓟ ꓮ ꓣꓳˍ ꓡꓰ ꓐꓰ ꓗ, ꓡꓳ꓾ ꓐꓯ ꓢꓲ ꓠꓬꓲ ꓬꓲ ꓫꓱ. ꓤˍ ꓡꓳ꓿ ꓕꓱ ꓟˍ ꓡꓰ ꓐꓰ ꓟꓶꓽ ꓛꓵꓼ ꓟ ꓤ ꓫꓵꓻ ꓘꓪꓽ ꓡꓰ ꓕꓯ꓾ ꓬꓲ ꓠꓬ ꓟꓶꓽ ꓛꓵꓼ ꓟ ꓔꓯ ꓫꓱ. ꓤˍ ꓟ ꓑꓶ. ꓓꓴ ꓬꓲ ꓤ ꓢꓯ. ꓬꓲꓼ ꓡ ꓠ, ꓟ ꓐꓱ ꓶ ꓬꓲ ꓠꓬ ꓕꓵꓼ ꓪ ꓖꓶˍ ꓡꓳ꓿

ꓕꓱ ꓟˍ ꓡꓰ ꓐꓰ ꓮ ꓡꓲ ꓗꓪ ꓥˍ ꓟꓲ ꓬꓲ ꓠꓬ ꓠꓲ, ꓟ ꓠꓯꓸꓼ ꓗꓪ ꓓꓵˍ ꓟ ꓫꓱ. ꓤ ꓠꓲ, ꓡꓰꓽ ꓬꓲ ꓟꓳ. ꓖꓶˍ ꓡꓳ꓿ ꓡꓳ, ꓬꓰˍ ꓕꓯ ꓗ‐ꓡ‐ꓪ‐ꓣꓲ ꓪꓽ ꓚꓲ ꓗꓪ ꓞꓳ ꓘꓴꓽ꓾ ꓒꓬ, ꓜꓽ ꓢꓴ ꓔꓯ ꓬꓲ ꓠꓬ ꓖꓽ ꓖꓶ ꓢꓲ ꓠꓬꓲ ꓟꓴꓽ ꓗꓪ ꓗꓴꓷꓼ ꓗꓪ ꓟꓳꓻˍ ꓥꓳ꓾ ꓐꓰ ꓐꓯ ꓖꓶˍ ꓡꓳ꓿ ꓕꓱ ꓟ ꓡꓰꓽ ꓟꓽ ꓞꓲ ꓬꓲ ꓔꓯ ꓔꓲ. ꓢꓴ꓾ ꓬꓲ ꓔꓯ ꓓꓶꓽ ꓢꓴ꓾ ꓬꓲ ꓔꓯ ꓟꓶꓽ ꓶ, ꓔꓲ. ꓧꓳꓽ ꓢꓴ꓾ ꓬꓲ ꓔꓯ ꓐꓽ ꓡꓯꓽ ꓛ ꓓꓶꓽ ꓢꓴ ꓔꓯ ꓥˍ ꓟꓲ ꓬꓲ ꓠꓬ꓾ ꓐ, ꓐꓽꓳ꓾ ꓬꓲ ꓪ ꓬꓰˍ ꓟ ꓝꓴꓲ. ꓬꓲ ꓪ ꓟꓽ ꓢꓷ. ꓠꓬꓲ ꓬꓲ ꓪ ꓝꓴꓲ. ꓔꓯ ꓖꓽ ꓖꓶ ꓐꓯ ꓢꓲ ꓠꓬꓲ ꓪꓽ ꓘꓴ ꓢꓴ ꓥ ꓡꓳ꓿ ꓕꓱ ꓘꓶ ꓛꓲ ꓠꓵꓻ ꓠꓲ, ꓪꓴꓽˍ ꓟ꓾ ꓕꓱ ꓘꓶ ꓛꓲ ꓪꓴ‐ꓢ ꓠꓲ, ꓟ ꓠꓯꓸꓼ ꓗꓪ ꓮ ꓫꓵꓽ ꓓꓯ, ꓡ ꓐꓯ ꓟ ꓣꓳ ꓔꓯ ꓟꓳ. ꓖꓶ ꓡˍ ꓟ ꓪꓴ‐ꓢ ꓔꓯ ꓣꓳꓽ ꓙꓵꓻ ꓔꓬ ꓡꓳ꓿ ꓣꓳ ꓗ, ꓛꓲꓽ ꓓꓴ ꓟꓽ ꓥ ꓡ꓿

ꓠꓬꓲ. ꓠꓬꓲ ꓣꓳꓽ ꓞꓳ ꓤ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓮ ꓫꓵꓽ ꓓꓯ, ꓡ ꓐꓯ ꓟ ꓣꓳ ꓡꓳ. ꓠꓬꓲ ꓡꓯ꓿ ꓞꓳ ꓤ ꓕꓲꓽ ꓣꓳ ꓔꓯ ꓣꓳꓽ ꓡꓳ. ꓠꓬꓲˍ ꓕꓯ꓾ ꓟꓬꓽ ꓠꓬꓲ ꓞꓳ ꓤ ꓕꓱ ꓕꓲ ꓣꓳ ꓠꓬ ꓢꓷ. ꓠꓲ, ꓡ꓾ ꓬꓲ ꓠꓬ ꓒꓬꓱꓽ ꓐꓲˍ ꓡ꓾ ꓬꓲ ꓠꓬ ꓠꓲ, ꓐꓲˍ ꓡ꓾ ꓬꓲ ꓠꓬ ꓒꓴ ꓫꓵ ꓙꓳˍ ꓡ꓾ ꓕꓱ ꓡꓱ ꓫꓵꓽ ꓠꓲ, ꓟ ꓘꓴꓽ ꓠꓯꓸꓼ ꓗꓪ ꓣꓳꓽ ꓟꓳˍ ꓡꓳ꓿ ꓞꓳ ꓤ ꓕꓲ ꓣꓳ ꓔꓯ ꓣꓳ ꓡꓳ. ꓠꓬꓲ ꓗꓷˍ ꓕꓯ ꓡꓰ ꓬꓲ ꓔꓯ ꓠꓲ, ꓠꓵ ꓠ, ꓟ ꓫꓱ. ꓤ ꓠ, ꓟ ꓟꓽ ꓙꓳ ꓙꓳ ꓐꓰ꓾ ꓕꓱ ꓟ ꓠꓬ ꓮ ꓡꓲ ꓫꓵꓽ ꓡ ꓞꓳ ꓥ ꓡ꓿ ꓥꓪ ꓐꓱ ꓶ ꓮ ꓫꓵꓽ ꓙꓲꓻ ꓖꓴ ꓙꓳˍ ꓡ꓾ ꓕꓱ ꓡꓱ ꓫꓵꓽ ꓓꓵꓽ ꓙꓽ ꓠꓬꓲ ꓓꓴˍ ꓡꓰꓽ ꓓꓵꓽ ꓙꓽˍ ꓡꓳ꓿

ꓔꓯ ꓥꓳꓽ ꓐꓯˍ ꓠꓬ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓒ‐ꓡꓲ‐ꓢꓷ ꓐꓴ ꓐꓰ ꓙꓵꓽ ꓗ ꓟ. ꓒ ꓐꓴ ꓠꓬ ꓦꓬꓽ ꓛꓳꓽ ꓧꓪ ꓔꓬ ꓟ ꓤ ꓟꓶ ꓤ ꓔꓯ ꓢꓲ ꓒ ꓬꓰ‐ꓢꓴ ꓔꓬ ꓗꓪ ꓚꓵ, ꓔꓯ, ꓡˍ ꓡꓳ꓿ ꓬꓲ ꓪ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓓꓰ ꓖꓴ ꓧꓪ ꓠ, ꓟ ꓤ ꓟꓶ ꓤ ꓔꓯ ꓕꓱ ꓡꓱ ꓫꓱ. ꓤ ꓠꓲ, ꓟꓽ ꓙꓳ ꓙꓳ ꓐꓰ꓾ ꓬꓲ ꓪ ꓠꓲ, ꓟ ꓗ, ꓛꓲꓽ ꓠ, ꓟ ꓐꓱ ꓶ ꓬꓰˍ ꓡꓳ꓿ ꓤ ꓟꓶ ꓤ ꓕꓲ ꓣꓳ ꓔꓯ ꓮ ꓫꓵꓽ ꓚꓬ, ꓟꓽ ꓟꓵ ꓬꓰˍ ꓡꓳ꓿

ꓦꓬꓽ ꓛꓳꓽ ꓧꓪ ꓔꓬ ꓕꓯ ꓟꓳꓻˍ ꓡꓳ ꓐꓯ ꓟ ꓠꓽ꓾ ꓤ ꓟꓶ ꓤ ꓡꓰꓽ ꓦꓬꓽ ꓛꓳꓽ ꓧꓪ ꓔꓬ ꓟ ꓟꓽ ꓠ꓿ ꓤ ꓑ ꓤ ꓥ ꓟꓲ ꓦꓬꓽ ꓛꓳꓽ ꓧꓪ ꓓꓴ ꓥꓳ꓾ ꓟꓽ ꓥ ꓡ꓿ ꓤ ꓑ ꓤ ꓔꓯ ꓩꓴ ꓗꓷ ꓢꓲ ꓠꓬꓲ ꓤ ꓟꓶ ꓤ ꓔꓯ ꓡꓰꓽ ꓘꓴꓻ ꓔꓯ, ꓡˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓾ ꓬꓲ ꓪ ꓠꓲ, ꓟ ꓠꓯꓸꓼ ꓗꓪ ꓠꓽ ꓫꓱ. ꓤ ꓠꓲ, ꓟꓽ ꓙꓳ ꓟ ꓑꓶ. ꓓꓴ ꓥ ꓡꓳ꓿ ꓬꓲ ꓪ ꓠꓲ, ꓟ ꓠꓯꓸꓼ ꓗꓪ ꓠꓬ ꓤ ꓟꓶ ꓤ ꓕꓱ ꓟ ꓔꓯ ꓥꓪ ꓮ ꓡꓲ ꓐꓰ ꓬꓰ ꓠꓯ, ꓡ꓿ ꓬꓰ‐ꓢꓴ ꓔꓯ ꓥꓪ ꓮ ꓡꓲ ꓬꓰ ꓠ ꓗ, ꓡ ꓐꓯ ꓟ ꓔꓯ ꓡꓰꓽ ꓬꓲ ꓪ ꓠꓲ, ꓟ ꓠꓯꓸꓼ ꓗꓪ ꓓꓵꓽ ꓙꓽ ꓔꓬ ꓡꓳ꓿

ꓖꓳ ꓡꓱ ꓠꓬꓲ ꓞꓳ ꓤ ꓟꓬꓽ ꓠꓬꓲ ꓠꓬ ꓠꓲ, ꓟ ꓠꓯꓸꓼ ꓗꓪ ꓥꓪ ꓮ ꓫꓵꓽ ꓟꓶˍ ꓡ꓿ ꓥꓪ ꓮ ꓫꓵꓽ ꓟꓶˍ ꓡ꓿ ꓥꓪ ꓐꓱ ꓶ ꓮ ꓫꓵꓽ ꓙꓲꓻ ꓖꓴ ꓙꓳˍ ꓡ꓾ ꓐꓯ ꓢꓲ ꓓꓵꓽ ꓙꓽ ꓢꓲ.ˍ ꓡꓰꓽ ꓠꓲ, ꓟ ꓓꓵꓽ ꓙˍ ꓡꓳ꓿ ꓫꓱ. ꓤ ꓠꓲ, ꓥˍ ꓟꓲ ꓮ ꓕꓯ ꓥ ꓟꓲ ꓙꓳ ꓟꓽ ꓐ ꓡ꓿ ꓚꓲ. ꓛꓬ ꓦꓲꓻ ꓘꓴꓽ ꓗꓪ ꓫꓱ. ꓤ ꓢꓴ ꓙꓳˍ ꓥꓳ꓿ ꓖꓳ ꓡꓱ ꓐꓯ ꓥ ꓟꓲ ꓠꓱ. ꓐꓯ ꓢꓴ ꓔꓯ ꓮ ꓕꓯ ꓥ ꓟꓲ ꓫꓱ. ꓤ ꓟꓽ ꓐ ꓡ꓿

ꓖꓳ ꓡꓱ ꓠꓬꓲ ꓣꓳ ꓠꓲ, ꓟ ꓠꓬ ꓠꓻ ꓓꓴ ꓑ ꓓꓴ ꓡꓰˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓓꓴ ꓡꓰˍ ꓡ ꓐꓯ ꓠꓬ꓾ ꓝꓴꓲ. ꓗꓪ ꓐꓰ ꓣꓳ ꓠꓲ, ꓟ ꓠꓬ ꓠꓻ ꓓꓴ ꓑ ꓓꓴ ꓡꓰˍ ꓡꓳ꓿ ꓢꓴ ꓔꓯ ꓗ.ˍ ꓟ ꓗꓪ ꓐꓰ ꓐꓰ ꓣꓳ ꓚꓲ. ꓛꓬ ꓗ. ꓬꓯꓼ ꓡꓰˍ ꓡꓳ꓿ ꓢꓴ ꓔꓯ ꓓꓶꓽˍ ꓟ ꓗꓪ ꓐꓰ ꓣꓳ ꓚꓲ. ꓛꓬ ꓓꓶꓽ ꓬꓯꓼ ꓡꓰˍ ꓡꓳ꓿ ꓕꓱ ꓟ ꓠꓬ ꓪꓴ‐ꓢ ꓡꓰ ꓫꓬ, ꓚꓰꓼ ꓔ ꓟ ꓗ. ꓚꓵ ꓕꓲꓽ ꓟ ꓥ ꓡꓳ꓿

ꓖꓳ ꓡꓱ ꓠꓬꓲ ꓣꓳꓽ ꓠꓲ, ꓟ ꓐꓶꓽ ꓡꓰ ꓟ ꓠꓲ, ꓟ ꓠꓻ ꓡꓰ ꓟ ꓔꓯ ꓠꓬ ꓮꓽ ꓟ ꓡꓰ ꓫꓬ, ꓖꓶˍ ꓡ꓿ ꓡꓯꓼ ꓐꓳ ꓔꓶ. ꓓꓴ ꓕꓯꓽ ꓢꓲ ꓗꓪ ꓠꓲ, ꓟ ꓠꓬꓲꓽ ꓛꓱꓽ ꓠꓲ, ꓟ ꓠꓬꓲꓽ ꓐꓶꓽ ꓗ.ˍ ꓟ ꓘꓳ ꓣꓴ ꓟꓶ ꓡꓰ ꓟ ꓢꓲ ꓒ ꓬꓰ‐ꓢꓴ ꓬꓲ ꓠꓲ, ꓟ ꓗꓪ ꓐꓰ ꓣꓳ ꓠꓬ ꓝꓮꓲ ꓫꓬ, ꓔꓱ,ˍ ꓟ ꓟꓶ ꓡˍ ꓡꓳ꓿

ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓙꓲ‐ꓢꓴ ꓗ ꓠꓯ. ꓖꓼ ꓛꓳ ꓢꓴ ꓙꓲ‐ꓢꓴ ꓢꓲ ꓤ ꓠꓴ ꓐꓰ ꓥꓪ ꓠꓬ ꓬꓲ ꓔꓯ ꓔꓯꓺ ꓢꓳ ꓠ, ꓟ ꓬꓮꓳ. ꓚꓰꓽˍ ꓡꓳ꓿ ꓞꓳ ꓤ ꓕꓲ ꓣꓳ ꓔꓯ ꓟꓳꓻˍ ꓕꓯ ꓬꓲ ꓔꓯ ꓐꓯ ꓟꓴ ꓞꓷ,ˍ ꓟ꓾ ꓒꓴ ꓫꓵ ꓙꓳˍ ꓟ ꓒꓬꓱꓽ ꓐꓲˍ ꓟ ꓔꓯ ꓡꓳ. ꓠꓬꓲ ꓢꓲ ꓠꓬꓲ ꓞꓳ ꓙꓳˍ ꓟ ꓟꓽ ꓥ ꓥ ꓐꓰ꓾ ꓪꓴ‐ꓢ ꓤ ꓮ. ꓟꓲꓽ ꓕꓲ ꓣꓳˍ ꓡꓰ ꓐꓰ ꓟꓳꓻ ꓢꓲ ꓠꓬꓲ ꓫꓱ. ꓤ ꓠꓲ, ꓧꓶ. ꓕꓯ ꓠꓲ, ꓟ ꓠꓯꓸꓼ ꓗꓪ ꓙꓳ ꓠ, ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳꓽ ꓔꓯ ꓐꓯ ꓟꓳ. ꓖꓶ ꓡ ꓔꓬ ꓟ ꓥ ꓡꓳ꓿ ꓬꓲꓼ ꓤ ꓠꓬꓲ ꓤ ꓐꓴꓳ꓾ (5) ꓠꓽ ꓜꓻ ꓚꓲ. ꓧꓪꓽ ꓚꓲ. ꓦꓬꓼ ꓠꓬꓲ ꓖꓴ ꓡꓰ ꓟ ꓑꓶ. ꓓꓴ꓾ ꓡꓯꓼ ꓫꓵ ꓢꓯ. ꓬꓲꓼ ꓡ ꓑꓮꓲꓽ ꓔꓯ ꓗ, ꓛꓲꓽ ꓛꓲꓽ ꓡꓰꓽ ꓘꓳ ꓣꓴ ꓟꓶ ꓠ, ꓟ ꓐꓱ ꓶ ꓢꓯꓼ ꓕꓵꓼ ꓙꓰ ꓡꓯ꓿ ꓫ. ꓟꓳ꓿