ꓟꓴ ꓡꓳꓹ ꓬꓰ ꓢꓴ ꓬꓲ ꓛ ꓗꓴꓸ ꓗꓪ ꓔꓬ ꓢꓲ꓾ ꓮ ꓫꓵꓽˍ ꓟꓲ ꓬꓰ ꓐ ꓡ ꓢꓴ ꓬꓲ ꓶꓻ ꓥꓳꓽ ꓠꓯꓸ ꓘꓪ ꓔꓬ ꓢꓴ ꓠꓬ ꓪꓴ-ꓢ ꓔꓯ꓾ꓠꓴ ꓠꓬ ꓥꓪ ꓫ ꓑꓬ ꓖꓴˍ ꓐꓰ ꓥꓪ ꓧꓪ. ꓒꓱ꓾ ꓥꓪ ꓦ ꓡꓱ ꓖꓴ ꓪꓴ‐ꓢ ꓥꓳ꓾ ꓐꓰ ꓐꓯˍ ꓥꓳ= ꓮ ꓡꓲꓳ ꓐꓯ ꓠꓬ ꓬꓲ ꓡꓰ ꓚꓵ. ꓞꓹ ꓟ ꓪˍ ꓐꓰ꓾ ꓥꓶˍ ꓟ ꓠꓻ ꓓꓱꓽ ꓠꓻ ꓧꓶ ꓗꓪ ꓐꓰ ꓠꓴ ꓔꓯ ꓚꓬꓴ ꓓꓳ ꓡˍ ꓥꓳ=
ꓬꓲ ꓓꓴ ꓡꓯꓼ ꓡꓰ ꓠꓴ ꓔꓯ ꓑꓲꓸ ꓔ ꓖꓶˍ ꓥꓳ= ꓬꓲ ꓓꓴ ꓡꓯꓼ ꓠꓯꓸ ꓘꓪ ꓠꓴ ꓫ. ꓑꓬ ꓖꓴ ꓬꓰˍ ꓥꓳ= ꓬꓲ ꓦ ꓡꓱ ꓐꓳ ꓠꓲꓹ ꓠꓬ ꓠꓴ ꓚꓬ ꓠꓲ,ˍ ꓐꓰ ꓔ ꓙ ꓓꓴ ꓥ ꓡꓳ= ꓢ ꓘꓪ ꓕꓯ ꓟ ꓙꓳꓺ ꓦꓲꓸ ꓓꓴˍ ꓐꓰ꓾ ꓟꓳꓼ ꓡꓳ ꓕꓯ ꓐꓶ ꓩꓴ ꓡˍ ꓟ ꓚꓬ ꓚꓱꓹ ꓔꓯ ꓠꓴ ꓙꓳꓺ ꓟꓽ ꓛꓵ= ꓠꓯ ꓞꓲꓹ ꓟ ꓗꓪ ꓠꓯ ꓔꓬ ꓟ ꓠꓻ ꓓꓱꓽ ꓠꓻ ꓧꓶ ꓔꓯˍ ꓟꓲ ꓠꓴ ꓙꓳꓺ ꓟꓽ ꓛꓵ= ꓟꓳꓼ ꓡꓳ ꓕꓯ ꓟ ꓐꓬ ꓡꓰ ꓓꓴ ꓔꓯˍ ꓟꓲ ꓠꓴ ꓛꓲꓸ ꓟꓽ ꓛꓵ=
ꓠꓴ ꓖꓼ ꓙꓬ ꓗꓪ ꓞꓳ ꓤ ꓐꓱꓽ ꓙꓰ ꓢꓲ꓾ ꓠꓴ ꓡꓯꓼ ꓙ ꓗꓪ ꓡ ꓞꓳ ꓕꓲ ꓟꓶꓽ ꓓꓳꓽ ꓡꓰ ˍ ꓟꓲ꓾ ꓠꓴ ꓠꓽ ꓮ ꓡꓲ ꓟꓽ ꓗꓷ ꓡꓰ= ꓞꓳ ꓥꓶ ꓐꓴ ꓔꓯ ꓪꓽ ꓛꓴꓽ ꓚꓱꓹ ꓖꓶˍ ꓟ ꓔꓯ ꓠꓴ ꓟꓬ ꓢꓶꓽ ꓡꓰ ꓟꓳˍ ꓥꓳ= ꓪꓴ-ꓢ ꓠꓯꓸꓼ ꓗꓪ ꓠꓴ ꓫ. ꓑꓬ ꓖꓴ ꓬꓰ ꓢꓲ꓾ ꓟꓴ ꓡꓳꓹ ꓬꓰ ꓢꓴ ꓔꓯ ꓠꓴ ꓔ ꓙ ꓢꓴ ꓬꓰ ꓝꓲˍ ꓠꓬꓲ꓾ ꓥꓶˍ ꓟ ꓮ ꓫꓵꓽˍ ꓟꓲ ꓠꓴ ꓔꓯ ꓟꓽ ꓗꓷ ꓡꓰ= ꓮ ꓫꓵꓽ ꓫ. ꓘꓶ ꓓꓴˍ ꓟꓲ ꓠꓴ ꓦꓲ ꓗꓪ ꓟꓽꓠꓶꓽ ꓡ= ꓮ ꓡꓲꓳ ꓐꓯ ꓠꓬ ꓬꓲ ꓡꓰ ꓠꓴ ꓚꓱꓹ ꓮ ꓙꓵꓽ ꓗꓪ ꓠꓴ ꓔꓯ ꓔ ꓙ ꓠꓹ ꓟ꓾ ꓬꓲ ꓟꓴ ꓗꓪ ꓝꓲ ꓓꓴ ꓐꓴ ꓔꓯ ꓕꓵꓼ ꓪ ꓖꓶˍ ꓥꓳ=
ꓠꓴ ꓛꓲ ꓒꓯꓹ ꓔꓯ ꓭꓸ ꓛꓲ ꓗꓪ ꓟꓽ ꓕꓯꓼ ꓡꓰ ꓝꓲ ꓠꓹ ꓟ꓾ ꓬꓲ ꓪ ꓡꓯꓽ ꓒꓯꓹ ꓡꓰ ꓠꓴ ꓔꓯ ꓓꓽ ꓔ ꓖꓶˍ ꓥꓳ= ꓠꓴ ꓠꓬ ꓡꓽ ꓢꓯꓹˍ ꓐꓰ ꓩꓴ ꓔꓯ ꓕꓳꓼ ꓢꓰꓼ ꓗꓷˍ ꓥꓳ= ꓪꓳꓹˍ ꓟ ꓡꓽ ꓢꓯꓹˍ ꓐꓰ ꓓꓳꓼ ꓩꓴ ꓔꓯˍ ꓟꓲ ꓠꓴ ꓡꓰ ꓕꓳꓼ ꓑꓬꓼ ꓗꓷˍ ꓥꓳ= YI NY ꓥꓪ ꓔꓯ ꓠꓲꓹ ꓠꓵ ꓢꓲ ꓥꓪ ꓔꓯ ꓠꓳꓽ ꓞꓹ ꓠꓬꓲ꓾ ꓬꓲ ꓔꓯ ꓥꓪ ꓚꓬꓴ. ꓗꓷˍ ꓥꓳ= ꓥꓪ ꓟꓬꓱ ꓔꓯ ꓬꓲ ꓢꓷꓸˍ ꓠꓬꓲ꓾ ꓥꓪ ꓡꓰ ꓬꓲ ꓔꓯ ꓔ ꓙˍ ꓥꓳ= ꓬꓲ ꓥꓪ ꓔꓯ ꓘꓴˍ ꓕꓯ ꓥꓪ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓫˍ ꓟ ꓗꓪ ꓥꓪ ꓬꓲˍ ꓐꓰ ꓔꓬ ꓥꓳ= ꓥꓪ ꓬꓲ ꓔꓯ ꓚꓬꓴ. ꓙ ꓢꓲ ꓟꓬꓱ ꓓꓳꓽ ꓖꓶˍ ꓥꓳ= ꓥꓪ ꓡꓰ ꓬꓲ ꓔꓯ ꓤꓶꓻ ꓫꓵ ꓟꓯ ꓫꓵˍ ꓟ ꓡꓰ ꓠꓲꓹ ꓘꓪꓽ ꓫꓵ ꓡꓰ ꓝꓲˍ ꓥꓳ= ꓥꓪ ꓚꓬꓴˍ ꓟ ꓣꓱꓽ ꓛꓰꓽˍ ꓟꓲ ꓬꓲ ꓔꓯ ꓟꓳꓸ ꓖꓶˍ ꓥꓳ=
