ꓤ ꓣꓳ ꓒꓲꓼ ꓬꓰˍ ꓟ ꓔꓯ ꓥꓳꓽ (Fourth Sunday of Lent reflection)
ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ ꓜꓽ ꓝꓲ. ꓝꓲ. ꓟ ꓙꓵ, ꓡꓲꓽ ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ 15ꓽ 1‐3, 11‐32 ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓒꓲꓽ ꓡꓰ ꓟ ꓤ ꓕꓲ ꓣꓳ ꓚꓱ, ꓥ ꓡꓳ꓿ ꓡ ꓞꓳ ꓕꓲ ꓣꓳ ꓗꓪ ꓤ ꓠꓬꓲꓽ ꓣꓳ ꓔꓬ ꓡꓳ꓿ ꓤ ꓣꓳ ꓠꓬ ꓬꓲ ꓐ, ꓐꓽ ꓔꓯ ꓐ, ꓐꓽꓳ ꓥꓪ ꓟꓶ ꓙꓲꓽ ꓙꓳˍ ꓟ ꓡꓯꓼ ꓪ ꓥꓪ ꓔꓯ ꓐꓱ ꓖꓶ ꓡꓯ ꓐꓰ ꓐꓯ ꓢꓲ ꓠꓬꓲ ꓠꓱ. ꓐꓯꓼ ꓟꓵꓽ ꓗꓪ ꓙꓰ ꓡꓰ ꓡꓳ꓿
ꓬꓲ ꓛꓲ ꓡꓰ ꓟ ꓟꓵꓽ ꓗꓪ ꓬꓲ ꓠꓬ ꓟꓽ ꓙꓲ ꓢꓴ ꓐꓴ ꓤ ꓟꓶ ꓐꓴ ꓡꓰ ꓕꓲ ꓪ ꓜ ꓠꓬꓲ ꓓꓳ ꓠꓬ ꓐꓰ ꓬꓲ ꓠꓯ, ꓗꓪ ꓙꓳˍ ꓟ ꓒꓴ ꓫꓵˍ ꓮ ꓙꓵꓽ ꓖꓴ ꓡꓰ ꓡꓳ꓿ ꓖꓳ ꓕꓯ ꓬꓲ ꓠꓬ ꓦꓲꓻ ꓕꓲ ꓦꓲꓻ ꓗꓪ ꓙꓰ ꓢꓲ ꓠꓬꓲ ꓟꓬꓱꓽ ꓬꓰ ꓡꓰ ꓡꓳ꓿ ꓕꓱ ꓗꓴꓷꓼ ꓗꓪ ꓦꓰꓼ ꓟꓷꓼ ꓘꓳꓼ ꓙꓳˍ ꓡ ꓠꓬꓲ ꓦꓲꓻ ꓢꓲꓺ ꓒ ꓡꓰ ꓬꓲ ꓔꓯ ꓮ‐ꓪꓯꓼ ꓡꓳ ꓝꓲ. ꓟ ꓥ ꓡꓳ꓿ ꓬꓲ ꓠꓬ ꓮ ꓪꓯꓼ ꓔꓯ ꓜ ꓠꓲ, ꓫꓵˍ ꓥ ꓟꓲ ꓬꓲ ꓔꓯ ꓖꓶ ꓜ ꓢꓴ ꓟꓽ ꓙꓳ ꓡꓳ꓿ ꓬꓴ‐ꓔ ꓡ ꓞꓳ ꓐꓴ ꓐꓱ ꓶ ꓮ‐ꓪꓯꓼ ꓠꓬ ꓮ ꓘꓶ. ꓛꓲ ꓟꓽ ꓫꓬ, ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓬꓲ ꓠꓬ ꓬꓲ ꓐ, ꓐ ꓦꓲꓻ ꓗꓪ ꓔꓬ ꓟ ꓪꓽ ꓤ ꓐꓴ ꓠꓬ ꓜ ꓓꓴ ꓓꓳ ꓓꓴ ꓮ ꓟꓬ, ꓙꓳˍ ꓟ ꓔꓯ ꓬꓲ ꓓꓵꓽ ꓙ ꓛꓲ ꓡ ꓢꓲ ꓲꓠꓬꓲ ꓠꓬ ꓬꓲ ꓠꓬ ꓬꓲ ꓐ, ꓐ ꓔꓬ ꓗꓪ ꓡ ꓙꓰ ꓠ, ꓟ ꓓꓵꓽ ꓙ ꓗꓷꓳ꓿ ꓬꓲ ꓠꓬ ꓬꓲ ꓐ, ꓐ ꓠꓯ, ꓗꓪ ꓡ ꓡ ꓟ ꓔꓯ ꓬꓲ ꓐ, ꓐ ꓡꓳ. ꓟꓳ ꓠꓬ ꓬꓲ ꓔꓯ ꓐ, ꓐ ꓠꓬ ꓔꓶ. ꓡ ꓢꓲ ꓠꓬꓲ ꓬꓲ ꓔꓯ ꓘꓳ, ꓣꓴ ꓟ ꓥ ꓡꓳ꓿ ꓝꓮꓲ ꓬꓲ ꓔꓯ ꓮ ꓘꓶ. ꓛꓲ ꓒꓵꓽ ꓟ ꓐꓴ ꓞꓶ ꓐꓰ ꓛꓲ ꓠꓬꓲ ꓔꓯ ꓖꓶ ꓖꓪ ꓟ ꓥ ꓡꓳ꓿ ꓝꓮꓲ ꓬ ꓔ ꓮ ꓠꓬꓲꓽ ꓔꓯ ꓟꓲ ꓢꓰꓼ ꓢꓲ ꓠꓬꓲ ꓑꓮꓲꓽ ꓓꓽ ꓟ ꓬꓰ ꓖꓶ ꓟ ꓥ ꓡꓳ
꓿ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓡꓰ ꓣꓳ ꓝꓴꓲ ꓙꓳ ꓢꓴ ꓟꓲ ꓠꓯ ꓡ ꓞꓳ ꓔꓯ ꓣꓳ ꓐ, ꓐ ꓪꓴ‐ꓢ ꓠꓬ ꓮ ꓟꓬ, ꓛꓲ ꓠꓲ, ꓟ ꓔꓯ ꓐꓯ ꓟ. ꓖꓶ ꓔ ꓟ ꓥ ꓡꓳ꓿ ꓣꓳ ꓟꓲ ꓠꓯ ꓡ ꓞꓳ ꓐꓴ ꓠꓬ ꓣꓳ ꓚꓲ. ꓛꓬ ꓝꓴꓲ ꓔꓯ ꓓꓵꓽ ꓙ ꓒꓳ, ꓡꓶꓽ ꓢꓲ ꓠꓬꓲ ꓪꓴ‐ꓢ ꓠꓯ, ꓗꓪ ꓡ ꓟ ꓙꓵ, ꓕꓯ ꓪꓴ‐ꓢ ꓡꓰ ꓣꓳ ꓔꓯ ꓘꓳ, ꓣꓴ ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓣꓳ ꓟꓲ ꓠꓯ ꓡ ꓞꓳ ꓠꓬ ꓣꓳ ꓢꓯ. ꓪ ꓔꓯ ꓡꓰ ꓙꓵꓽ ꓢꓴ ꓐꓴ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓢꓯꓼ ꓙꓳ ꓟ ꓙꓵ, ꓣꓳ ꓒꓴ ꓫꓵˍ ꓙꓳˍ ꓟ ꓙꓵ, ꓔꓯ ꓪꓴ‐ꓢ ꓔꓯ ꓟꓲ ꓡꓰ ꓗꓴ ꓢꓴ ꓐꓴ ꓥ ꓡꓳ꓿ ꓕꓱ ꓡꓱ ꓐꓰ ꓣꓳ ꓚꓲ. ꓛꓬ ꓓꓵꓽ ꓙ ꓔ ꓟ ꓟꓬꓱꓽ ꓬꓰ ꓟ ꓟꓽ ꓒꓬꓱꓼ ꓡ ꓟ ꓙꓵ, ꓔꓯ ꓢꓲ ꓠꓬꓲ ꓪꓴ‐ꓢ ꓔꓯ ꓙꓵꓻ ꓢꓴ ꓐꓴ ꓙꓳˍ ꓟ ꓥ ꓡꓳ꓿
ꓠꓬꓲ. ꓠꓬꓲ ꓣꓳ ꓔꓯ ꓝꓴꓲ ꓙꓳˍ ꓟ ꓟꓲ ꓠꓯ ꓡ ꓞꓳ ꓔꓯ ꓪꓴ‐ꓢ ꓮ ꓘꓶ. ꓛꓲ ꓠꓲ, ꓠꓵ ꓟ ꓥ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓔ ꓟ ꓥ ꓡꓳ꓿ ꓣꓳ ꓝꓴꓲ ꓙꓳˍ ꓢꓴ ꓟꓲ ꓠꓯ ꓡ ꓞꓳ ꓠꓬ ꓝꓴꓲ ꓠꓯ, ꓗꓪ ꓓꓵꓽ ꓡꓰ ꓗꓴ ꓟ ꓚꓱ, ꓗꓪ ꓐꓰ ꓤ ꓟꓳ ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓯ ꓧꓪ, ꓓꓴ ꓬꓰ ꓡꓯ꓿ ꓣꓳ ꓬꓰ ꓛꓬ, ꓗꓷ ꓟ ꓮ ꓙꓵꓽ ꓔꓯ ꓢꓲꓺ ꓒ ꓔꓯ ꓭ. ꓢꓲ ꓠꓬꓲ ꓢꓲꓺ ꓒ ꓔꓬ ꓗꓪ ꓡ ꓓꓴ ꓬꓰ ꓡꓯ꓿
ꓢꓲꓺ ꓒ ꓬꓰ‐ꓢꓴ ꓔꓯ ꓬꓲ ꓣꓳ ꓡꓳ. ꓔꓬ ꓟ ꓥ ꓡꓳ꓿ ꓟꓶ ꓡꓰ ꓟ ꓤ ꓐ, ꓐꓽ ꓡꓰ ꓐꓰ ꓣꓳ ꓝꓴꓲ ꓙꓳ ꓢꓴ ꓟꓲ ꓠꓯ ꓡ ꓞꓳ ꓐꓴ ꓝꓴꓲ ꓗꓪ ꓐꓰ ꓓꓵꓽ ꓙ ꓒꓳ, ꓡꓶꓽ ꓟ ꓔꓯ ꓢꓲꓺ ꓒ ꓣꓳ ꓔꓯ ꓡꓳ. ꓔꓬ ꓟ ꓥ ꓡꓳ꓿ ꓝꓴꓲ ꓠꓯ, ꓗꓪ ꓓꓵꓽ ꓡꓰ ꓗꓴ ꓟ ꓮ ꓙꓵꓽ ꓡꓳ ꓗꓷ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
Enter
