ꓢꓲ ꓒ ꓠꓯꓸꓼ ꓗꓪ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓙꓵꓽ ꓢꓴ ꓔꓯ ꓧꓪ. ꓧꓪ.꓾
ꓞꓳ ꓤ ꓕꓲꓽ ꓣꓳ ꓐꓬ ꓡꓰ ꓠꓲ, ꓫꓵˍ ꓕꓯ ꓞꓳ ꓤ ꓕꓲꓽ ꓣꓳ ꓥꓳꓽ ꓡꓰ ꓠꓲ, ꓫꓵˍ ꓕꓯ ꓠꓬ ꓬꓲ ꓠꓬ꓾ ꓮ ꓟꓶ ꓚꓲ. ꓛꓬ ꓔꓬ ꓟ ꓚꓲ. ꓛꓬ ꓬꓰ ꓔꓬ ꓟ ꓔꓯ ꓒꓵꓽ ꓗ ꓟꓽ ꓚꓰꓺ ꓚꓰꓺ ꓕꓱ ꓡꓱ ꓬꓰ ꓪꓴ. ꓔꓴ ꓡˍ ꓡꓳ꓾ ꓐꓯˍ ꓟ ꓣꓳꓽ ꓡꓳ. ꓟꓳˍ ꓡꓳ꓿ ꓡ ꓞꓳ ꓕꓲ ꓣꓳ ꓬꓲ ꓐꓬ ꓡꓰ ꓠꓲ, ꓫꓵˍ ꓕꓯ꓾ ꓛꓵꓽ ꓡꓰ ꓠꓲ, ꓫꓵˍ ꓕꓯ ꓥꓪ ꓔꓯ ꓖꓶꓽ ꓡꓯ꓾ ꓥꓪ ꓮ ꓫꓵꓽ ꓟꓶˍ ꓡ꓾ ꓥꓪ ꓮ ꓫꓵꓽ ꓪ ꓜꓽˍ ꓡ꓾ ꓕꓱ ꓟ ꓬꓰˍ ꓟ ꓗꓪ ꓐꓰ ꓥꓪ ꓕꓱ ꓗꓪ ꓔꓬ ꓟ ꓗꓪ ꓐꓰ ꓥꓪ ꓮ ꓫꓵꓽ ꓟꓶˍ ꓡ꓾ ꓥꓪ ꓐꓱ ꓶ ꓮ ꓫꓵꓽ ꓙꓲꓻ ꓖꓴ ꓙꓳˍ ꓡ ꓐꓯ ꓟ ꓓꓵꓽ ꓙ ꓟꓶ ꓔꓴ ꓡˍ ꓕꓯ ꓠꓬ꓾ ꓞꓳ ꓤ ꓠꓬ ꓐꓬ ꓡꓰˍ ꓟ ꓪꓴ. ꓔꓴ ꓡˍ ꓡꓳ ꓐꓯˍ ꓟ ꓢ. ꓠꓯ ꓢꓲꓽ ꓫꓬ ꓕꓳꓽ ꓶ ꓗꓪ ꓣꓳ ꓡꓳ. ꓟꓳˍ ꓡꓳ꓿
ꓢ. ꓠꓯ ꓠꓬ 4 ꓠꓽ ꓕꓲꓽ ꓠꓽ ꓟ ꓜꓻ ꓚꓲ. ꓧꓪꓽ ꓚꓲ. ꓦꓬꓼ ꓠꓬꓲ ꓥ ꓡꓳ꓿ ꓣꓳ ꓑ ꓙꓽ ꓪˍ ꓟ ꓢꓲꓽ ꓫꓬ ꓕꓳꓽ ꓶ ꓠꓬ ꓡꓴ‐ꓘ 15ꓽ1-3, 11-32 ꓗꓪ ꓥ ꓡꓳ꓿ ꓟ. ꓟꓲꓽ ꓗꓪ ꓠꓬ ꓤꓽ ꓠꓬꓲꓽ ꓣꓳ ꓔꓯꓺ ꓥꓳꓽ ꓔꓯ ꓣꓳ ꓠ ꓠ, ꓪ ꓓꓴ ꓥ ꓡꓳ꓿ ꓮꓽ ꓐꓽ ꓣꓱꓽ ꓢꓴ ꓔꓯ ꓠꓬ ꓤ ꓠꓬꓲꓽ ꓣꓳ ꓙꓳˍ ꓡꓳ꓿ ꓤ ꓣꓳ ꓠꓬ ꓬꓲ ꓟꓶ ꓙꓲꓽ ꓙꓳˍ ꓟ ꓮ ꓙꓵꓽ ꓥꓪ ꓔꓯ ꓖꓶꓽ ꓡꓯ ꓐꓯ ꓢꓲ ꓬꓲ ꓮꓽ ꓐꓽ ꓔꓬ ꓗꓪ ꓐꓰ ꓓꓰꓽ ꓔꓯ, ꓙꓰˍ ꓡꓳ꓿ ꓬꓲ ꓠꓬ ꓬꓲ ꓖꓴꓽ ꓙꓴꓽ ꓮ ꓙꓵꓽ ꓣꓴ ꓔꓯ, ꓙꓰ ꓢꓲ ꓠꓬꓲ꓾ ꓐꓶꓽ ꓞꓳ ꓔꓬ ꓗꓪ ꓙꓰ ꓢꓲ ꓬꓲ ꓙꓳˍ ꓟ ꓮ ꓙꓵꓽ꓾ ꓒꓴ ꓫꓵꓺ ꓮ ꓙꓵꓽ ꓮꓽ ꓔꓳ ꓒꓬ, ꓗꓷˍ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓠꓬ ꓬꓲ ꓙꓳˍ ꓟ ꓮ ꓙꓵꓽ ꓜꓽ ꓓꓳꓻ ꓗꓷ ꓗ ꓠꓯ. ꓫ. ꓙꓵ ꓟꓶ ꓙꓵ ꓡˍ ꓕꓯ ꓬꓴ‐ꓔ ꓡ ꓞꓳ ꓐꓱ ꓶ ꓠꓲ, ꓒꓳ ꓓꓰ ꓡꓰˍ ꓟ꓾ ꓟꓽ ꓙꓲꓻ ꓓꓰ ꓡꓰˍ ꓟ ꓮ ꓪꓯꓼ ꓡꓳ. ꓢꓴ ꓟꓬꓱꓽ ꓬꓰ ꓠ ꓗꓷ ꓡꓰꓳ꓿
ꓮ ꓪꓯꓼ ꓜ ꓔꓯ ꓜꓽ ꓠꓲ, ꓫꓵ ꓡˍ ꓟ ꓠꓲ, ꓟ ꓙꓳˍ ꓥ ꓟꓲ ꓦꓰꓼ ꓟꓷꓼˍ ꓥ ꓟꓲ ꓬꓲ ꓠꓬ ꓮ ꓫꓵꓽ ꓡꓰ. ꓟꓽ ꓪ ꓜꓽ꓿ ꓖꓳ ꓡꓱ ꓠꓬꓲ ꓬꓲ ꓠꓬ ꓓꓵꓽ ꓙꓽ ꓒꓳ, ꓬꓲꓼ ꓡ ꓢꓲ ꓠꓬꓲ꓾ ꓦꓲꓻ ꓗꓪ ꓬꓲꓼ ꓙꓰˍ ꓥꓳ ꓐꓰ ꓐꓯ ꓢꓲ ꓠꓬꓲ ꓓꓵꓽ ꓙꓽ ꓞꓷ, ꓗꓷ ꓗ ꓠꓯ. ꓬꓲꓼ ꓙꓰˍ ꓟ ꓟ. ꓟꓲꓽ ꓣꓳ ꓑ ꓙꓽˍ ꓡꓳ꓿ ꓬꓲ ꓮꓽ ꓐ ꓠꓬ ꓬꓲ ꓔꓯ ꓶꓽ ꓤ ꓗꓪ ꓐꓰ ꓟꓳꓻˍ ꓕꓯ ꓡꓰ ꓬꓲ ꓔꓯ ꓗꓶ. ꓝꓲ. ꓗꓪ ꓔꓷ, ꓪꓳ ꓢꓲ ꓠꓬꓲ꓾ ꓐꓳꓼ ꓢꓲ ꓠꓬꓲ ꓬꓲ ꓔꓯ ꓐꓵ ꓞꓶꓽ ꓟꓶ ꓛꓲ ꓡꓶ. ꓖꓶˍ ꓟ꓾ ꓮ ꓠꓬꓲꓽ ꓢꓰꓼ ꓢꓲ ꓠꓬꓲ ꓬꓲ ꓔꓯ ꓘꓳ ꓣꓴˍ ꓟ ꓔꓯ ꓣꓳꓽ ꓑ ꓙꓽˍ ꓡꓳ꓿
ꓟ. ꓟꓲꓽ ꓕꓱ ꓟ ꓗꓪ ꓐꓰ ꓣꓳ ꓔꓯ ꓬꓲ ꓪꓴ. ꓕꓲꓽ ꓫꓵꓽ ꓟꓳ. ꓖꓶ ꓡˍ ꓟ ꓠꓬ ꓞꓳ ꓤ ꓕꓲꓽ ꓣꓳ ꓐꓬ ꓡꓰ ꓠꓲ, ꓫꓵˍ ꓥꓳ ꓐꓯˍ ꓠꓬ ꓬꓲ ꓮ ꓟꓶ ꓔꓬ ꓟ ꓬꓰ ꓔꓬ ꓟ ꓟꓬꓱꓽ ꓔꓯ ꓬꓲ ꓠꓬ ꓟꓽ ꓠꓲ, ꓫꓵ ꓡ꓿ ꓝꓮꓲ ꓬꓲ ꓠꓬ ꓬꓲ ꓔꓯ ꓟꓶ ꓜꓲꓽ ꓙꓳˍ ꓟ ꓬꓲ ꓓꓰꓽˍ ꓡꓳ꓿ ꓒꓴ ꓫꓵ ꓗꓪ ꓐꓰ ꓪꓴ. ꓔꓴˍ ꓟ ꓣꓳ ꓟꓳꓻˍ ꓡꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓪꓴꓽ ꓜꓽ ꓒ ꓬꓴ‐ꓓ ꓘ‐ꓡꓲꓳ ꓥˍ ꓟꓲ ꓾ “ꓢꓲ ꓒ ꓬꓰ‐ꓢꓴ ꓠꓴ ꓪ ꓔꓯ ꓡꓯꓼ ꓙꓱ ꓖꓶˍ ꓠꓬꓲ꓿ ꓠꓴ ꓪ ꓥꓪ ꓔꓯ ꓮ ꓫꓵꓽ ꓖꓶˍ ꓡ” ꓐꓰ ꓐꓯ ꓢꓲ ꓠꓬꓲ ꓙꓵꓽ ꓗ ꓟ. ꓒ ꓐꓴ ꓔꓬ ꓗꓪ ꓙꓰ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓔꓯ ꓪꓴꓽ ꓜꓽˍ ꓡꓳ꓿
ꓥꓪ ꓔꓯ ꓮ ꓫꓵꓽ ꓖꓶˍ ꓡ꓾ ꓥꓪ ꓮ ꓫꓵꓽ ꓟꓶˍ ꓡ꓾ ꓐꓰ ꓓꓵꓽ ꓙꓽ ꓢꓴ ꓠꓬ ꓐꓬ ꓡꓰ ꓛꓵꓽ ꓡꓰˍ ꓟ ꓪꓴ. ꓔꓴ ꓡˍ ꓡꓳ꓾ ꓐꓯ ꓟ ꓣꓳ ꓔꓯ ꓢꓷ. ꓡꓰ ꓝꓲˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯˍ ꓠꓬ ꓟ. ꓟꓲꓽ ꓘꓴꓽ ꓗꓪ ꓮ ꓟꓶ ꓬꓲ ꓐꓰ ꓕꓲꓽ ꓪˍ ꓔꓬ ꓟ ꓮꓽ ꓐꓽ ꓔꓯ ꓬꓲ ꓟꓽ ꓠꓲ, ꓫꓵ ꓡ꓿ ꓬꓰ ꓔꓬ ꓟ ꓟꓬꓱꓽ ꓔꓯ ꓬꓲ ꓟꓽ ꓠꓲ, ꓒꓴ꓿ ꓖꓳ ꓡꓱ ꓠꓬꓲ ꓬꓲ ꓠꓬ ꓠꓱ. ꓐꓯ ꓗꓪ ꓪ ꓜꓲ ꓗ, ꓛꓲꓽˍ ꓟ꓾ ꓟꓽ ꓥ ꓟ ꓚꓱ, ꓗꓪ ꓓꓵꓽ ꓙꓽ ꓟꓶ ꓡˍ ꓡꓳ꓿ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓐꓰ ꓖꓳ ꓡꓱ ꓕꓱ ꓡꓱ ꓓꓵꓽ ꓙꓽ ꓢꓲ ꓠꓬꓲ ꓔꓷ, ꓠꓲ, ꓫꓵ ꓡˍ ꓡꓳ꓿
ꓠꓬꓲꓽ ꓫꓵꓽ ꓕꓲꓽ ꓫꓵꓽ ꓔꓯ ꓣꓳꓽ ꓡꓳ. ꓠꓬꓲˍ ꓕꓯ ꓬꓲ ꓠꓬ ꓠꓱ. ꓐꓯ ꓗꓪ ꓑꓬꓮꓪˍ ꓥꓳ꓾ ꓠꓱ. ꓐꓯ ꓗꓪ ꓗ, ꓛꓲꓽˍ ꓥꓳ ꓐꓯ ꓢꓲ ꓙꓰ ꓗꓷ ꓕꓯ ꓗ, ꓛꓲꓽ ꓓꓴ ꓖꓳ ꓟ ꓠꓬ ꓕꓲꓽ ꓒ, ꓤ ꓥ ꓐꓷ ꓐꓯˍ ꓟ ꓣꓳ ꓡꓳ. ꓟꓳˍ ꓡꓳ꓿ ꓕꓲꓽ ꓑ, ꓤ ꓗꓪ ꓡꓰꓽ ꓬꓲ ꓤꓶꓻ ꓠꓬ ꓐꓬ ꓡꓰꓳ꓿ ꓧꓶ. ꓕꓯ ꓬꓲ ꓓꓵꓽ ꓙˍ ꓟ ꓡꓰ ꓐꓰ ꓬꓲ ꓮꓽ ꓐ ꓦꓲ ꓠꓯꓸꓼ ꓘꓴꓽ ꓗꓪ ꓔꓬ ꓟ꓾ ꓮ ꓫꓵꓽ ꓜꓽ ꓓꓴ ꓛꓲ. ꓟꓽ ꓛꓵ ꓓꓳꓻ ꓓꓴ ꓛꓲ. ꓟꓽ ꓛꓵ ꓦꓬꓼ ꓠꓬꓲ ꓗꓪ ꓔꓬ, ꓟ ꓡꓰ ꓐꓰ ꓟꓽ ꓫꓱ.꓿ ꓬꓲ ꓓꓵꓽ ꓙꓽ ꓔ ꓟ ꓡꓰ ꓐꓰ ꓟꓽ ꓪꓽ ꓗꓷ ꓡꓰˍ ꓟ ꓣꓳ ꓡꓳ. ꓟꓳˍ ꓡꓳ꓿
ꓕꓲ ꓑ, ꓤ ꓕꓯ ꓡꓰꓽ ꓬꓲ ꓒꓴ ꓫꓵ ꓖꓴ ꓡꓰ ꓢꓲ ꓠꓬꓲ ꓫ. ꓙꓵ ꓟꓶ ꓙꓵ ꓓꓴ ꓬꓲ ꓔꓳ, ꓜꓳꓽ ꓡˍ ꓡꓳ꓿ ꓝꓴꓲ. ꓐꓯ ꓟ ꓠꓬ ꓕꓱ ꓡꓱ ꓥ ꓡꓳ꓿ ꓣꓳ ꓝꓴꓲ. ꓟꓽ ꓬꓰ ꓗꓷ ꓕꓯ ꓠꓬ ꓝꓴꓲ. ꓕꓱ ꓟ ꓬꓰˍ ꓟ ꓗꓪ ꓐꓰ ꓗ, ꓛꓲꓽˍ ꓥꓳ ꓐꓰ ꓓꓵꓽ ꓙˍ ꓡꓳ꓿ ꓖꓳ ꓗꓪ ꓙꓰˍ ꓟ ꓖꓳ ꓗꓪ ꓠꓬ ꓪ ꓜꓲ ꓙꓲˍ ꓡꓳ꓿ ꓖꓳ ꓟ ꓠꓬ ꓖꓳ ꓕꓲ ꓣꓳ ꓟ ꓠꓬ ꓪ ꓜꓲ ꓙꓲˍ ꓡꓳ ꓐꓯ ꓢꓲ ꓬꓲ ꓔꓯ ꓕꓱ ꓡꓱ ꓠꓲ, ꓦꓯ. ꓟ꓾ ꓕꓲ ꓚꓱ, ꓐꓯ ꓪˍ ꓠꓬ ꓠꓱ. ꓐꓯ ꓕꓲ ꓘꓴ ꓟ ꓠꓬ ꓪ ꓜꓲ ꓗ, ꓛꓲꓽ ꓓꓴ ꓥ ꓟꓲ ꓓꓵꓽ ꓙꓽ ꓡˍ ꓡꓳ꓿ ꓚꓵ ꓚꓵ ꓣꓳꓽ ꓕꓱ ꓡꓱ ꓞꓳ ꓙꓳ ꓔꓬ ꓠꓬ ꓣꓳ ꓓꓵꓽ ꓙꓽ ꓔˍ ꓟ ꓡꓰ ꓟꓽ ꓥ ꓐꓰ ꓗ, ꓗꓴ.ˍ ꓟ ꓬꓲ ꓔꓯ ꓢꓳꓺ ꓓꓴ ꓕꓲꓽ ꓟ ꓥ ꓡꓳ꓿
ꓝꓮꓲ. ꓟ. ꓟꓲꓽ ꓔꓯ ꓣꓳ ꓡꓳ. ꓠꓬꓲˍ ꓕꓯ ꓤ ꓣꓳ ꓖꓳ ꓟ ꓠꓬ ꓬꓲ ꓠꓬ ꓬꓲ ꓓꓵꓽ ꓙꓽ ꓔˍ ꓟ ꓡꓰ ꓐꓰ ꓟꓽ ꓒꓬꓱꓼ ꓡ ꓕꓯ ꓗ, ꓛꓲꓽˍ ꓥꓳ ꓐꓰ ꓐꓯ ꓔ ꓟ ꓡꓰ ꓐꓰ ꓟꓽ ꓒꓬꓱꓼ ꓡ ꓕꓯ ꓬꓲ ꓠꓬ꓾ ꓚꓵ ꓚꓵ ꓓꓵꓽ ꓙꓽ ꓒꓳ, ꓬꓲꓼ ꓡˍ ꓡꓳ꓿ ꓬꓲ ꓠꓬ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓐꓰ ꓥꓪ ꓠꓬ ꓥꓳꓽ ꓡꓰꓳ꓿ ꓥꓪ ꓦꓲꓻ ꓗꓪ ꓔꓬ ꓟ ꓮꓽ ꓐꓽ ꓪꓽ ꓤ ꓐꓴ ꓡꓰ. ꓜꓳꓽ ꓜꓳꓽ ꓪ ꓜꓽˍ ꓡꓳ ꓐꓰ ꓐꓯ ꓢꓲ ꓠꓬꓲ ꓬꓲ ꓠꓬ ꓓꓵꓽ ꓙꓽ ꓒꓳ, ꓬꓲꓼ ꓡˍ ꓡꓳ꓿
ꓖꓳ ꓡꓱ ꓠꓬꓲ ꓬꓲ ꓠꓬ ꓓꓵꓽ ꓙꓽ ꓒꓳ, ꓬꓰˍ ꓟ ꓗꓪ ꓐꓰ ꓓꓵꓽ ꓙꓽ ꓞꓷ, ꓓꓴ ꓕꓲꓽ ꓟ ꓬꓰˍ ꓡꓳ꓿ “ꓥꓪ ꓠꓬ ꓬꓲꓼ ꓙꓰˍ ꓥꓳ꓿ ꓥꓪ ꓮꓽ ꓐ ꓔꓯ ꓥˍ ꓟꓲ ꓟꓴꓽ ꓗꓪ ꓔꓯ ꓥˍ ꓟꓲ ꓥꓪ ꓛꓬ ꓗꓷꓳ ꓐꓰ ꓐꓯˍ ꓥꓳ꓾” ꓐꓯ ꓢꓲ ꓠꓬꓲ ꓬꓲ ꓠꓬ ꓦꓲꓻ ꓗꓪ ꓬꓲꓼ ꓙꓰ ꓠ, ꓟ ꓬꓰˍ ꓡꓳ꓿ ꓬꓲ ꓕꓱ ꓡꓱ ꓬꓲꓼ ꓙꓰˍ ꓕꓯ ꓶꓽ ꓤ ꓗꓪ ꓐꓰ ꓬꓲ ꓮꓽ ꓐꓽ ꓠꓬ ꓬꓲ ꓔꓯ ꓟꓳˍ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓮꓽ ꓐꓽ ꓠꓬ ꓬꓲ ꓔꓯ ꓔꓷ, ꓙꓰ ꓢꓲ ꓠꓬꓲ ꓬꓲ ꓔꓯ ꓪꓳ ꓫꓳ.ˍ ꓡꓳ ꓐꓯˍ ꓟ ꓟ. ꓟꓲꓽ ꓗꓪ ꓣꓳ ꓑ ꓙꓽˍ ꓡꓳ꓿
ꓟ. ꓟꓲꓽ ꓕꓱ ꓟ ꓗꓪ ꓐꓰ ꓪꓴ‐ꓢ ꓠꓬ ꓮ ꓡꓲ ꓫꓵꓽ ꓠꓲ, ꓟ ꓙꓳˍ ꓡ ꓐꓯˍ ꓟ ꓣꓳ ꓡꓳ. ꓟꓳˍ ꓡꓳ꓿ ꓬꓲ ꓮꓽ ꓐꓽ ꓠꓬ ꓤ ꓣꓳ ꓮ ꓫꓵꓽ ꓓꓰꓽˍ ꓥ ꓟꓲ ꓬꓲ ꓖꓶˍ ꓡꓳ꓿ ꓬꓲ ꓔꓯ ꓮ ꓡꓲ ꓫꓵꓽ ꓠꓲ, ꓫꓵˍ ꓠꓬ ꓮ ꓡꓲ ꓫꓵꓽ ꓬꓰ ꓝꓲˍ ꓡꓳ꓿ ꓬꓲ ꓠꓲ, ꓟ ꓠꓻˍ ꓥ ꓟꓲ꓾ ꓠꓲ, ꓟ ꓐꓶꓽ ꓗꓷˍ ꓥ ꓟꓲ ꓬꓲ ꓠꓬ ꓬꓲ ꓤ ꓔꓯ ꓠꓲ, ꓠꓵˍ ꓟ ꓑꓶ. ꓓꓴ ꓬꓲ ꓮ ꓡꓲ ꓠꓲ, ꓫꓵˍ ꓠꓬ ꓮ ꓡꓲ ꓒ ꓐꓲ ꓝꓣꓰꓰꓓꓳꓟ ꓐꓯˍ ꓟ ꓖꓶ ꓔ ꓡꓳ꓿ ꓠꓵꓻ ꓠꓲ, ꓐꓯˍ ꓟ ꓠꓬ ꓝꓣꓰꓰꓓꓳꓟ ꓮ ꓡꓲ ꓠꓲ, ꓫꓵˍ ꓟ ꓮ ꓡꓲ ꓕꓱ ꓡꓱ ꓬꓰ ꓙꓵꓽ ꓪ ꓙꓳˍ ꓟ ꓕꓱ ꓠꓬꓲꓽ ꓫꓵꓽ ꓗꓴ. ꓙꓲꓽ ꓙꓳˍ ꓡꓳ꓿
ꓖꓳ ꓡꓱ ꓠꓬꓲ ꓬꓲ ꓮꓽ ꓐꓽ ꓠꓬ ꓬꓲ ꓠꓲ, ꓟ ꓠꓯꓸꓼ ꓗꓪ ꓠꓻˍ ꓥ ꓟꓲ ꓬꓲ ꓤ ꓖꓳ ꓟ ꓛꓬ ꓗꓷ ꓟ ꓥꓳꓽ ꓗꓷ ꓟ ꓬꓲ ꓢꓷ.ˍ ꓟ ꓑꓶ. ꓓꓴ꓾ ꓕꓲꓽ ꓠꓬꓲ ꓕꓲꓽ ꓠꓬꓲ ꓬꓲ ꓠꓬ ꓬꓲ ꓤ ꓬꓲꓼ ꓡˍ ꓟ ꓔꓯ ꓡꓳ. ꓠꓬꓲ ꓔꓬ ꓡꓳ ꓐꓯˍ ꓟ ꓣꓳ ꓡꓳ. ꓟꓳˍ ꓡꓳ꓿ ꓠꓯꓼ ꓠꓯꓼ ꓟꓶꓽ ꓘꓶ ꓟꓳꓼ ꓡꓳ ꓢ ꓘꓪ ꓮ ꓕꓯ ꓥ ꓟꓲ ꓬꓲ ꓤ ꓬꓲꓼ ꓡˍ ꓟ ꓔꓯ ꓬꓲ ꓠꓬ ꓡꓳ. ꓠꓬꓲ ꓔꓬ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓤ ꓬꓲꓼ ꓡˍ ꓟ ꓟꓳꓻˍ ꓕꓯ ꓗ, ꓛꓲꓽ ꓢꓲ ꓠꓬꓲ ꓬꓲ ꓤ ꓔꓯ ꓪꓳ ꓙꓰ ꓟ ꓣꓳ ꓡꓳ. ꓟꓳꓻˍ ꓡꓳ꓿
ꓟ. ꓟꓲꓽ ꓕꓱ ꓟ ꓗꓪ ꓐꓰ ꓣꓳ ꓔꓯ ꓐꓯ ꓟꓳ. ꓖꓶ ꓡˍ ꓟ ꓠꓬ꓾ ꓠꓬꓲ. ꓠꓬꓲ ꓠꓴ ꓔꓬ ꓟ ꓔꓬ ꓔꓶ.꓾ ꓠꓴ ꓐꓰ ꓟꓬꓱꓽ ꓬꓰ ꓔꓬ ꓟ ꓠꓴ ꓐꓰ ꓔꓬ ꓟ ꓗꓪ ꓛꓳꓽ꓾ ꓬꓲꓼ ꓤ ꓠꓬꓲ ꓤ꓾ ꓠꓴ ꓦꓲ ꓢꓲ ꓒ ꓦꓲ ꓢꓲ ꓟ ꓔꓯ ꓒꓵꓽ ꓗ ꓚꓰꓺ ꓐꓯˍ ꓟ ꓣꓳ ꓔꓯ ꓟꓳ. ꓖꓶ ꓡˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓤ ꓣꓳ ꓠꓬ ꓬꓲ ꓮꓽ ꓐꓽ ꓐꓰ ꓕꓲ ꓪꓽ ꓔꓬ ꓕꓯ ꓮ ꓫꓵꓽ ꓥˍ ꓟꓲ ꓐꓲ ꓜꓲꓼˍ ꓥ ꓟꓲ꓾ ꓠꓱ. ꓐꓯ ꓗꓪ ꓟꓬꓽ ꓠꓬꓲ ꓗ, ꓛꓲꓽ ꓡꓳ ꓐꓰ ꓓꓵꓽ ꓙꓽ ꓞꓷ, ꓗꓷ ꓗ ꓠꓯ. ꓬꓲ ꓠꓬ ꓫ. ꓙꓵˍ ꓡꓳ꓿
ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓠꓴ ꓥꓪ ꓚꓲ. ꓛꓬ ꓬꓰˍ ꓟ ꓟꓬꓱꓽ ꓔꓯ ꓒꓵꓽ ꓗ ꓚꓰꓺ ꓢꓲ ꓠꓬꓲ ꓠꓱ. ꓐꓯ ꓗꓪ ꓠꓲ, ꓟ ꓟꓽ ꓡꓰꓽ ꓝꓲ ꓝꓲ ꓐꓰ꓾ ꓠꓱ. ꓐꓯ ꓗꓪ ꓠꓲ, ꓟ ꓟꓽ ꓚꓵ, ꓙꓰ ꓙꓰ ꓐꓰ ꓚꓵ ꓚꓵ ꓪꓴ‐ꓢ ꓕꓵꓼ ꓪ ꓔꓯ ꓞꓳ ꓙꓳ ꓢꓲ ꓠꓬꓲ꓾ ꓚꓲ. ꓛꓬ ꓦꓲꓻ ꓢꓲ ꓒ ꓦꓲꓻ ꓢꓲ ꓟ ꓚꓲ. ꓛꓬ ꓤ ꓠꓱ ꓔꓯ ꓠꓲ, ꓠꓵ ꓢꓲ ꓠꓬꓲ ꓞꓳ ꓙꓳ ꓠ, ꓟ ꓣꓳ ꓔꓯ ꓠꓲ, ꓠꓵ ꓢꓲ ꓠꓬꓲ ꓞꓳ ꓙꓳ ꓠ, ꓟ ꓣꓳ ꓔꓯ ꓟꓳ. ꓖꓶ ꓡˍ ꓡꓳ꓿
ꓝꓮꓲ ꓔꓯ ꓥꓳꓽ ꓣꓳ ꓥꓳꓽ ꓗꓷꓳ꓾ ꓣꓳ ꓛꓬ ꓗꓷꓳ꓾ ꓠꓱ. ꓐꓯ ꓗꓪ ꓟꓬꓽ ꓠꓬꓲ ꓗ, ꓛꓲꓽˍ ꓡꓳ ꓐꓰ ꓣꓳ ꓓꓵꓽ ꓙꓽ ꓞꓷ, ꓗꓳ. ꓙꓰ ꓟ ꓑꓶ. ꓓꓴ꓾ ꓮ ꓠꓱ ꓕꓯ ꓣꓳꓽ ꓟꓽ ꓙꓽ ꓜꓲꓼ ꓟ ꓑꓶ. ꓓꓴ ꓣꓳ ꓛꓬ ꓗꓷ ꓥꓳꓽ ꓗꓷ ꓥꓳ ꓐꓯ ꓠꓬ ꓠꓬꓲ. ꓠꓬꓲ ꓤ ꓣꓳˍ ꓡꓰ ꓐꓰ ꓣꓳ ꓠꓬ ꓚꓱ, ꓬꓲꓼ ꓙꓰ ꓢꓲ ꓠꓬꓲ ꓪꓴ‐ꓢ ꓟꓲꓽ ꓙꓬ ꓞꓳ ꓤ ꓟꓲꓽ ꓙꓬ ꓗꓪ ꓣꓳ ꓥꓳꓽ ꓗꓷꓳ ꓐꓯˍ ꓟ ꓓꓵꓽ ꓙꓽ ꓢꓲ ꓠꓬꓲ ꓞꓳ ꓙꓳ ꓡꓯ꓾ ꓐꓯ ꓢꓲ ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓟ. ꓖꓶ ꓡ ꓔꓬ ꓡꓳ꓿ ꓪꓴ‐ꓢ ꓠꓬ ꓠꓵꓻ ꓠꓲ, ꓥ ꓡꓳ꓿ ꓝꓴꓲ. ꓗꓪ ꓐꓰ ꓬꓲ ꓔꓬ ꓗꓪ ꓬꓲꓼ ꓡˍ ꓟ ꓔꓯ ꓬꓲ ꓠꓬ ꓮ ꓕꓯ ꓥ ꓟꓲ ꓥꓳ ꓡꓳ. ꓔꓬ ꓡꓳ ꓐꓯˍ ꓟ ꓔꓯ ꓙꓵꓻ ꓢꓲ ꓠꓬꓲ꓾ ꓠꓬꓲ. ꓠꓬꓲ ꓠꓴ ꓥꓪ ꓤꓶꓻ ꓗꓪ ꓚꓲ. ꓛꓬ ꓤꓶꓻ ꓔꓯ ꓒꓵꓽ ꓗ ꓚꓰ꓾ ꓚꓲ. ꓛꓬ ꓬꓰˍ ꓟ ꓔꓯ ꓒꓵꓽ ꓗ ꓚꓰ ꓢꓲ ꓠꓬꓲ ꓣꓳ ꓤꓶꓻ ꓐꓬ ꓡꓰ ꓛꓵꓽ ꓡꓰˍ ꓟ ꓠꓬ ꓥꓪ ꓮ ꓫꓵꓽ ꓟꓶˍ ꓡ꓾ ꓥꓪ ꓔꓯ ꓮ ꓫꓵꓽ ꓖꓶˍ ꓡ ꓐꓯ ꓟ ꓓꓵꓽ ꓙˍ ꓟ ꓕꓲꓽ ꓚꓱ, ꓟ ꓠꓬ ꓣꓳ ꓢꓯꓼ ꓟꓬ ꓖꓶˍ ꓟ ꓠꓬ ꓥꓪ ꓮ ꓫꓵꓽ ꓖꓶ ꓐ ꓡˍ ꓡ꓾ ꓥꓪ ꓮ ꓫꓵꓽ ꓬꓰ ꓙ ꓐ ꓡˍ ꓡ ꓐꓯ ꓟ ꓠꓬ ꓣꓳ ꓐꓱ ꓶ ꓢꓯꓼ ꓪ꓾ ꓣꓳ ꓐꓱ ꓶ ꓢꓯꓼ ꓟꓬ ꓖꓶ ꓡˍ ꓥꓳ ꓐꓰ ꓓꓵꓽ ꓙꓽ ꓟꓶˍ ꓡꓳ꓿ ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓮ ꓙꓵꓽ ꓢꓴ ꓣꓳ ꓚꓲ. ꓛꓬ ꓤꓶꓻ ꓔꓯ ꓒꓵꓽ ꓗ ꓚꓰ꓾ ꓚꓲ. ꓛꓬ ꓟꓬꓱꓽ꓾ ꓚꓲ. ꓛꓬ ꓦꓲꓻ ꓢꓲ ꓒ ꓦꓲꓻ ꓢꓲ ꓟ꓾ ꓚꓲ. ꓛꓬ ꓤ ꓠꓱ꓾ ꓚꓲ. ꓛꓬ ꓛꓳꓽ ꓒꓯ, ꓔꓯ ꓒꓵꓽ ꓗ ꓬꓰ ꓢꓲ ꓠꓬꓲ ꓚꓵ ꓘꓶꓽ ꓠꓯꓸꓼ ꓗꓪ꓾ ꓪꓴ‐ꓢ ꓕꓵꓼ ꓪ ꓠꓯꓸꓼ ꓗꓪ ꓞꓳ ꓙꓳ ꓙꓰ ꓡꓯ꓾ ꓐꓰ ꓮ ꓙꓵꓽ ꓢꓴ ꓔꓯ ꓢꓯꓼ ꓪ ꓖꓶ ꓠꓲ, ꓫꓵˍ ꓡꓳ꓿
