ꓪꓴ-ꓢ ꓠꓬ ꓙꓵꓻ ꓠꓲꓹ ꓕꓱ ꓟ ꓒꓬꓱꓼ ꓡ ꓠꓹ ꓟ ꓐꓱ ꓶ ꓬꓲ ꓚꓲ ꓛꓬ ꓬꓲ ꓟꓷꓽ ꓠꓷꓹ ꓘꓶꓽ ꓒꓴ ꓢꓲ ꓠꓬꓲ ꓞꓳ ꓤ ꓔꓯ ꓟꓳꓸ ꓖꓶ_ ꓟ ꓚꓱꓹ ꓔꓯ ꓣꓳ ꓠ ꓠꓹ ꓓꓴ ꓬꓰ ꓡꓯ=
ꓪꓴ-ꓢ ꓠꓬ ꓬꓲ ꓚꓲ ꓛꓬ ꓡꓰ ꓬꓲ ꓟꓬꓱꓺ ꓮꓽ ꓟ ꓥ ꓟ ꓕꓱ ꓡꓱ ꓐꓰ ꓞꓳ ꓤ ꓔꓯ ꓐꓯ ꓟꓳꓸ ꓖꓶ ꓡ ꓡꓳ= ꓬꓲ ꓟꓽ ꓐꓯ ꓟꓳꓸ ꓖꓶ ꓡ ꓠꓬ ꓮ ꓡꓰ ꓥ ꓟꓲ ꓢꓷꓸ ꓟꓽ ꓓ꓾ ꓮ ꓫꓵ ꓑꓶ ꓓꓴ ꓥ ꓐꓯ ꓠꓬ꓾ ꓣꓳ ꓠꓬ ꓚꓰꓼ ꓔ ꓟ ꓟꓶ ꓢꓴ ꓥ ꓟ ꓑꓶ ꓓꓴ ꓣꓳ ꓓꓵ ꓙ ꓚꓱꓹ ꓠꓬ ꓖꓳ ꓗꓪ ꓛꓲ ꓟꓽ ꓑꓲ ꓓ꓾ ꓖꓳ ꓡꓱ ꓠꓬꓲ ꓪꓴ-ꓢ ꓬꓲ ꓟꓽ ꓟꓳꓸ ꓖꓶ꓾ ꓠꓬꓲ ꓟꓳ ꓓꓴ ꓟꓽ ꓟꓳꓸ ꓖꓶ ꓠꓬ ꓣꓳ ꓮ ꓡꓰ ꓥ ꓟꓲ ꓬꓲ ꓔꓯ ꓢꓷꓸ ꓟꓽ ꓓ꓾ ꓬꓲ ꓔꓯ ꓙꓵꓻ ꓟꓽ ꓐ ꓡ꓾ ꓖꓳ ꓡꓱ ꓐꓯ ꓥ ꓟꓲ ꓪꓴ-ꓢ ꓠꓬ ꓫꓱꓸ ꓤ ꓠꓲꓹ ꓡꓰ ꓣꓳ ꓔꓯ ꓬꓲ ꓠꓬ ꓮꓽ ꓟ ꓥ ꓡ꓾ ꓐꓯ_ ꓟ ꓐꓯ ꓟꓳꓸ ꓖꓶ ꓡ ꓡꓳ= ꓟꓳ-ꓫꓲ ꓔꓯ ꓪꓴ-ꓢ ꓟꓳꓸ ꓖꓶ ꓡ ꓟ ꓗꓪ ꓥꓪ ꓠꓬ ꓕꓲ ꓞꓲꓼ ꓕꓲ ꓑ ꓪꓴ-ꓢ ꓥ ꓡꓳ꓾ ꓐꓰ ꓟꓳꓸ ꓖꓶ ꓡ ꓕꓯ ꓬꓲ ꓠꓬ ꓬꓲ ꓟꓬꓱꓺ ꓐꓯ ꓖꓶ_ ꓡꓳ= ꓬꓲ ꓠꓬ ꓮ ꓕꓯ ꓥ ꓟꓲ ꓙꓳ ꓔꓬ ꓟ ꓪꓴ-ꓢ ꓥ ꓐꓯ ꓢꓲ ꓠꓬꓲ ꓬꓲ ꓟꓬꓱꓺ ꓐꓯ ꓖꓶ ꓡ ꓡꓳ=
ꓣꓳ ꓥ ꓟꓲ ꓢꓷꓸ_ ꓡꓳ꓾ ꓬꓲꓴꓼ ꓤ ꓠꓬꓲ ꓤ ꓐꓴꓳ꓾ ꓡ ꓞꓳ ꓕꓲ ꓣꓳ ꓟ ꓣꓳ ꓔꓯ ꓬꓲ ꓚꓱꓹ ꓬꓲ ꓟꓬꓱꓺ ꓝꓮꓲ ꓬꓲ ꓮ ꓫꓵ ꓬꓰ ꓔꓬ ꓟ ꓐꓯ ꓟꓳꓸ ꓖꓶ ꓡ ꓕꓯ ꓬꓲ ꓠꓬ ꓣꓳ ꓐꓰ ꓕꓱ ꓡꓱ ꓗꓳꓸ ꓙꓰ ꓙꓳ ꓠꓲꓹ ꓫꓵ_ ꓟ ꓑꓶ ꓓꓴ ꓣꓳ ꓔꓯ ꓠꓲꓹ ꓠꓵ_ ꓟ ꓑꓶ ꓓꓴ ꓥ ꓠꓬ꓾ ꓕꓱ ꓡꓰ ꓐꓰ ꓛꓳ ꓒꓯꓹ ꓬꓰ ꓠꓹ ꓟ ꓕꓱ ꓡꓱ ꓬꓲ ꓔꓶꓻ ꓙꓱꓼ ꓙꓳ_ ꓡꓳ= ꓣꓳ ꓥ ꓟꓲ ꓕꓱ ꓡꓱ ꓥꓳ= ꓣꓳ ꓚꓱꓹ ꓮ ꓙꓵ ꓐꓯ ꓟꓳꓸ ꓖꓶ ꓢꓴ ꓖꓳ ꓕꓲ ꓣꓳ ꓠꓬ ꓣꓳ ꓠꓲꓹ ꓠꓵ ꓟ꓾ ꓣꓳ ꓗꓳꓸ ꓙꓰ ꓙꓳ ꓢꓴ ꓔꓯ ꓡꓰ ꓣꓳ ꓐꓯ ꓟꓳꓸ ꓖꓶ_ ꓡꓳ= ꓕꓱ ꓟ ꓡꓰ ꓐꓰ ꓪꓴ-ꓢ ꓥ ꓟꓲ ꓞꓳ ꓤ ꓐꓰ ꓗꓳꓸ ꓙꓰ ꓙꓳ ꓠꓲꓹ ꓫꓵ_ ꓟ ꓑꓶ ꓓꓴ ꓞꓳ ꓤ ꓔꓯ ꓠꓲꓹ ꓠꓵ ꓟ ꓑꓶ ꓓꓴ ꓞꓳ ꓤ ꓐꓴ ꓬꓲ ꓔꓯ ꓢꓷꓸ ꓠꓹ ꓟ ꓐꓱ ꓶ ꓬꓲ ꓟꓬꓱꓺ ꓔꓯ ꓐꓯ ꓟꓳꓸ ꓖꓶ_ ꓡꓳ= ꓬꓲ ꓟꓶꓽ ꓕꓯ ꓠꓬ ꓬꓲ ꓤ ꓔꓲ ꓔꓯ ꓝꓲ ꓩꓴ ꓗꓷ ꓢꓲ ꓠꓬꓲ ꓕꓱ ꓡꓰ ꓐꓰ ꓪꓴ-ꓢ ꓮ ꓡꓰ ꓥ ꓟ ꓬꓲ ꓚꓲ ꓛꓬ ꓐꓯ ꓟꓸ ꓖꓶ ꓡ ꓡꓳ= ꓕꓱ ꓟ ꓠꓬ ꓣꓳ ꓐꓱ ꓶ ꓓꓵ ꓙ ꓟꓶ ꓓꓴ ꓪꓴ-ꓢ ꓚꓱꓹ ꓕꓲꓽ ꓟ ꓥ ꓡꓳ=
ꓖꓳ ꓡꓰ ꓠꓬ ꓪꓴ-ꓢ ꓠꓬ ꓬꓲ ꓔꓯ ꓢꓷꓸ ꓠꓹ ꓟ꓾ ꓬꓲ ꓔꓯ ꓙꓵꓻ ꓠꓹ ꓟ꓾ ꓬꓲ ꓚꓲ ꓛꓬ ꓒꓶ ꓟꓸ ꓖꓶ ꓗꓸ ꓠꓯꓸ ꓞꓳ ꓤ ꓠꓬ ꓮ ꓡꓰ ꓗꓷ ꓡꓰ_ ꓡ꓾ ꓐꓯ_ ꓟ ꓣꓳ ꓡꓳꓸ ꓠꓬꓲ ꓓꓴ ꓬꓰ ꓡꓯ= ꓟꓳ-ꓫꓲ ꓔꓯ ꓪꓴ-ꓢ ꓟꓳꓸ ꓖꓶ_ ꓕꓯ ꓓꓳ ꓙꓰ 3ꓽ 6 ꓗꓪ ꓟꓳ-ꓫꓲ ꓠꓬ ꓙꓲ ꓫꓬ ꓓꓲ ꓡꓰ ꓟ ꓪꓴ-ꓢ ꓔꓯ ꓟꓳ ꓡꓰ ꓟ ꓑꓶ ꓓꓴ ꓙꓳ ꓡꓰ ꓢꓲ ꓠꓬꓲ ꓒꓬꓱꓽ ꓟꓬ ꓔꓯ ꓑꓲꓸ ꓔ ꓢꓲ ꓠꓬꓲ ꓟꓲ ꓠꓯ ꓗꓪ ꓟꓳꓼ ꓡꓰ_ ꓡꓳ= ꓮ ꓫꓵ ꓑꓶ ꓓꓴ ꓥ ꓐꓯ ꓠꓬ ꓪꓴ-ꓢ ꓠꓬ ꓙꓲ ꓫꓬ ꓓꓰ ꓡꓰ ꓟ꓾ ꓪꓴ-ꓢ ꓠꓬ ꓢꓲ ꓫꓬ ꓓꓰ ꓡꓰ ꓟ꓾ ꓪ ꓠꓬꓲ ꓓꓰ ꓡꓰ_ ꓟ ꓪꓴ-ꓢ ꓥ ꓟ ꓑꓶ ꓓꓴ ꓬꓲ ꓠꓬ ꓡꓳꓸ ꓟꓽ ꓑꓶꓸ꓾ ꓖꓳ ꓡꓱ ꓠꓬꓲ ꓚꓬꓴ ꓙꓳ ꓢꓴ ꓥ ꓟ ꓬꓲ ꓢꓷꓸ_ ꓠꓬꓲ ꓬꓲ ꓒꓬꓱꓽ ꓟꓬ ꓠꓬ ꓟꓲ ꓠꓯ ꓗꓪ ꓟꓳꓼ ꓡꓰ ꓢꓲ ꓠꓬꓲ ꓪꓴ-ꓢ ꓟꓲ ꓙꓬ ꓗꓪ ꓟꓳꓼ ꓡꓰ_ ꓡꓳ=
ꓖꓳ ꓟ ꓡꓰ ꓐꓰ ꓬꓲ-ꓢ-ꓬ ꓕꓳ ꓶ 6ꓽ 5 ꓝꓲꓸ ꓗꓪ ꓬꓲ-ꓢ-ꓬ ꓠꓬ ꓥꓪ ꓠꓬ ꓙꓱ ꓘꓶꓽ ꓟꓶ ꓢꓴ ꓥ ꓡꓳ= ꓥꓪ ꓟꓶꓽ ꓠꓷꓹ ꓠꓬ ꓟꓽ ꓫꓬ ꓥ ꓡꓳ꓾ ꓪꓴ-ꓢꓳ꓾ ꓐꓯ ꓢꓲ ꓠꓬꓲ ꓬꓲ ꓠꓬ ꓪꓴ-ꓢ ꓔꓯ ꓱ’ ꓠꓵꓽ ꓔ ꓡꓳ= ꓪꓴ-ꓢ ꓙꓲ ꓫꓬ ꓓꓰ ꓡꓰ_ ꓟ ꓔꓯ ꓬꓲ ꓦ ꓐꓬꓱ ꓟꓳ ꓕꓯ ꓬꓲ ꓠꓬ ꓟꓽ ꓢꓲ ꓫꓬ ꓟ ꓔꓯ ꓬꓲ ꓡꓳꓸ ꓟꓳ ꓡꓰ_ ꓡꓳ= ꓖꓳ ꓡꓱ ꓠꓬꓲ ꓬꓲ ꓠꓬ ꓥꓪ ꓠꓬ ꓟꓷ ꓠꓷꓹ ꓟꓽ ꓫꓬ ꓢꓴ ꓥ ꓡꓳ= ꓥꓪ ꓠꓬ ꓙꓱ ꓔ ꓟ ꓟꓶ ꓢꓴ ꓥ ꓡꓳ ꓪꓴ-ꓢꓳ꓾ ꓐꓯ ꓢꓲ ꓠꓬꓲ ꓙ ꓣꓳ ꓠꓲꓹ ꓡꓰ ꓘꓴ ꓔꓴ ꓩꓴ ꓡ_ ꓡꓳ= ꓕꓱ ꓟ ꓡꓰ ꓐꓰ ꓢꓲ ꓒꓽ ꓬꓰ-ꓢꓴ ꓬꓲ ꓛꓳ ꓒꓯꓹ ꓒꓲ-ꓕꓱ ꓥ ꓟꓲ ꓢꓲ ꓒꓽ ꓬꓰ-ꓢꓴ ꓡꓰ ꓓꓵꓽ ꓙ ꓟꓶ ꓓꓴ ꓬꓲ ꓟꓳꓸ ꓖꓶ ꓡ ꓕꓯ ꓒꓲ-ꓕꓱ ꓠꓬ ꓬꓲ ꓙꓬ ꓘꓴꓽ ꓗꓪ ꓔꓷꓹ ꓞꓰ ꓢꓲ ꓢꓲ ꓒꓽ ꓬꓰ-ꓢꓴ ꓔꓯ ꓬꓲ ꓗꓪ ꓐꓰ ꓧꓹ ꓙꓰ ꓠꓹ ꓟ ꓬꓲ ꓓꓰꓽ_ ꓡꓳ= ꓮ ꓫꓵ ꓑꓶ ꓓꓴ ꓥ ꓐꓯ ꓠꓬ ꓬꓲ ꓠꓬ ꓝꓴꓲ ꓙꓳ ꓢꓴ ꓥ ꓟ ꓑꓶ ꓓꓴ ꓢꓲ ꓒꓽ ꓬꓰ-ꓢꓴ ꓔꓯ ꓖꓼ ꓓꓳ ꓡꓳ= ꓕꓱ ꓟ ꓣꓳ ꓔꓯ ꓐꓯ ꓟꓳꓸ ꓖꓶ ꓡ ꓟ ꓠꓬ ꓪꓴ-ꓢ ꓠꓬ ꓬꓲ ꓟꓬꓱꓺ ꓬꓲ ꓢꓲ ꓫꓬ ꓓꓰ ꓡꓰ_ ꓟ ꓪ ꓠꓬꓲ ꓓꓰ ꓡꓰ_ ꓟ ꓟꓳꓸ ꓖꓶ ꓡ ꓕꓯ ꓞꓳ ꓤ ꓠꓬ ꓬꓲ ꓝꓴꓲ ꓙꓳ_ ꓟ꓾ ꓞꓳ ꓤ ꓠꓬ ꓟꓽ ꓫꓬ ꓟ꓾ ꓞꓳ ꓤ ꓠꓬ ꓪꓴ-ꓢ ꓟꓽ ꓥ ꓠꓬ ꓮ ꓫꓵ ꓟꓽ ꓒꓬꓱꓼ ꓡ ꓟ꓾ ꓔꓯ ꓡꓳꓸ ꓟꓳ_ ꓡꓳ= ꓕꓱ ꓟ ꓠꓬ ꓮ ꓘꓶꓸ ꓐꓲ_ ꓟ ꓪꓴ-ꓢ ꓐꓰ ꓞꓳ ꓤ ꓠꓬꓲꓽ ꓗꓳ ꓚꓸ ꓗꓪ ꓐꓲ_ ꓟ ꓕꓲ ꓫꓵ ꓥ ꓡꓳ=
ꓕꓱ ꓟ ꓗꓪ ꓐꓰ ꓠꓬꓲꓸ ꓠꓬꓲ ꓣꓳ ꓣꓦꓮ ꓔꓯ ꓠ ꓠꓹ ꓢꓴ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓤꓶꓻ ꓗꓪ ꓪ ꓠꓬꓲ ꓓꓰ ꓡꓰ_ ꓟ ꓪꓴ-ꓢ ꓢꓲ ꓫꓬ ꓓꓰ ꓡꓰ_ ꓟ ꓪꓴ-ꓢ ꓔꓯ ꓣꓳ ꓙꓵꓻ ꓔꓬ ꓡꓳ꓾ ꓪꓽ ꓘꓴ ꓔꓬ ꓡꓳ꓾ ꓕꓱ ꓡꓱ ꓬꓰ_ ꓟ ꓦꓬꓼ ꓠꓬꓲ ꓗꓪ ꓣꓳ ꓠꓬ ꓝꓴꓲ ꓙꓳ ꓢꓴ ꓥ ꓟ ꓑꓶ ꓓꓴ ꓟꓽ ꓒꓵꓽ ꓟꓽ ꓚꓬꓹ ꓗꓷ ꓡꓰ_ ꓥꓳ= ꓖꓳ ꓡꓱ ꓥ ꓟꓲ ꓪꓴ-ꓢ ꓠꓬ ꓫꓱꓸ ꓤ ꓠꓲꓹ ꓙꓳ_ ꓟ ꓑꓶ ꓓꓴ ꓪꓴ-ꓢ ꓠꓬ ꓬꓲ ꓟꓬꓱꓺ ꓔꓯ ꓡꓲ ꓐꓯ ꓟꓳꓸ ꓖꓶ ꓡ_ ꓟ ꓪꓴ-ꓢ ꓠꓬ ꓬꓲ ꓤ ꓔꓲ ꓔꓯ ꓡꓲ ꓝꓲ ꓩꓴ ꓡ ꓟ ꓣꓳ ꓠꓬ ꓪꓴ-ꓢ ꓟꓲ ꓙꓬ ꓗꓪ ꓠꓲꓹ ꓪꓴꓽ ꓪꓴꓽ ꓡꓰ ꓦꓲꓼ ꓞ ꓐ ꓡ_ ꓡꓳ= ꓖꓳ ꓡꓱ ꓠꓬꓲ ꓣꓳ ꓪꓴ-ꓢ ꓔꓯ ꓫꓱꓸ ꓖꓶ ꓡꓯ= ꓓꓳ ꓟꓳ ꓡꓯ꓾ ꓪꓴ-ꓢ ꓬꓲ ꓔꓶꓻ ꓙꓱꓼ ꓥ ꓟ ꓬꓲ ꓚꓲ ꓛꓬ ꓬꓲ ꓟꓬꓱꓺ ꓐꓰ ꓬꓲ ꓚꓱꓹ ꓐꓯ ꓟꓳꓸ ꓖꓶ ꓡ ꓟ ꓑꓶ ꓓꓴ ꓬꓲ ꓐꓰ ꓗꓳꓸ ꓙꓰ ꓙꓳ ꓠꓹ ꓟ ꓐꓱ ꓶ ꓣꓳ ꓔꓯ ꓠꓲꓹ ꓫꓵ ꓟ ꓑꓶ ꓓꓴ ꓣꓳ ꓕꓱ ꓕꓲ ꓠꓬꓲ ꓛꓳ ꓙꓳ_ ꓟ ꓦꓬꓼ ꓠꓬꓲ ꓗꓪ ꓪꓴ-ꓢ ꓐꓰ ꓗꓳꓸ ꓙꓰ ꓙꓳ ꓢꓲ ꓠꓬꓲ ꓬꓲ ꓔꓯ ꓠꓲꓹ ꓠꓵ ꓢꓲ ꓠꓬꓲ ꓬꓲ ꓔꓯ ꓙꓵꓻ ꓢꓲ꓾ ꓬꓲ ꓔꓯ ꓫꓸ ꓕꓱ ꓢꓲ ꓠꓬꓲ ꓛꓳ ꓙꓳ ꓠꓹ ꓟ ꓙꓲ ꓫꓬꓹ ꓟ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓗꓪ ꓐꓰ ꓣꓳ ꓔꓯ ꓟꓳꓸ ꓖꓶ ꓡ ꓡꓳ=
