“ꓥꓪ ꓠꓬ ꓪꓴ‐ꓢ ꓬꓲ ꓚꓳ ꓟ ꓥꓳ꓿ ꓠꓴ ꓐꓯˍ ꓟ ꓡꓰ ꓥꓪ ꓖꓳ ꓓꓱꓽ ꓗꓪ ꓒꓬꓱꓼ ꓡ ꓝꓲ”
ꓡꓴ‐ꓘ ꓕꓳꓽ ꓶ 1ꓽ26‐38 ꓗꓪ꓾ ꓚꓬꓴ. ꓙˍ ꓟ ꓚꓺ ꓟꓲꓽ ꓠꓯꓸꓼ ꓗꓪ ꓮ ꓘꓶ. ꓬꓳ. ꓚꓵˍ ꓟ ꓠꓯ.ˍ ꓟ ꓬꓲ ꓙꓵ, ꓥ ꓟ “ꓶꓼ ꓓꓳꓽ ꓫꓱ, ꓓꓳꓽ ꓐꓯ ꓟ. ꓖꓶ ꓡˍ ꓟ” ꓔꓯ ꓣꓳꓽ ꓟꓳꓻ ꓪˍ ꓡꓳ꓿ ꓟꓴ ꓗꓪ ꓝꓲ ꓓꓴ ꓚꓬ‐ꓑꓷ‐ꓡꓰ ꓠꓬ ꓟꓲ ꓠꓯ ꓔꓯ ꓕꓲ ꓞꓲꓼ ꓕꓲ ꓑ ꓒꓳ, ꓡꓶ. ꓙꓰ ꓝꓲˍ ꓟ ꓓꓳꓽ ꓔꓯ꓾ ꓠ‐ꓢ‐ꓡꓱ ꓡꓳ ꓒꓱ ꓗꓪ ꓟ ꓤ ꓟꓶ ꓡꓯ. ꓚꓵ ꓟ‐ꓡꓲ ꓔꓬ ꓗꓪ ꓐꓯ ꓖꓶ ꓡˍ ꓡꓳ꓿ ꓤ ꓟꓶ ꓤ ꓠꓬ ꓪꓴ‐ꓢ ꓤ ꓔꓲ. ꓔꓯ ꓶꓻ ꓞ, ꓢꓲ꓾ ꓤ ꓕꓲ ꓣꓳ ꓦꓵꓻ ꓡˍ ꓥꓳ꓾ ꓐꓰ ꓐꓯ ꓖꓶ ꓗꓷˍ ꓕꓯ꓾ ꓬꓲ ꓠꓬ ꓙꓽ ꓣꓳ ꓠꓲ,꓾ ꓙꓵꓻ ꓠꓲ, ꓐꓰ꓾ ꓡꓯꓼ ꓙꓱ ꓠꓲ, ꓡꓰ ꓒꓳ, ꓖꓶˍ ꓡꓳ꓿ “ꓥꓪ ꓠꓬ ꓪꓴ‐ꓢ ꓬꓲ ꓚꓳ ꓟ ꓥ ꓡꓳ꓿ ꓠꓴ ꓐꓯˍ ꓟ ꓡꓰ ꓥꓪ ꓖꓳ ꓓꓱꓽ ꓗꓪ ꓒꓬꓱꓼ ꓡ ꓝꓲ” ꓐꓰ ꓒꓳ, ꓖꓶˍ ꓡꓳ꓿
ꓟ‐ꓡꓰ ꓡꓰ “ꓠꓴ ꓐꓯˍ ꓟ ꓡꓰ ꓒꓬꓱꓼ ꓡ ꓝꓲ” ꓐꓰ ꓪꓴ‐ꓢ ꓔꓯ ꓐꓯ ꓖꓶ ꓗꓷ ꓐꓯ ꓘꓶꓽ ꓕꓱ ꓟ ꓠꓬ꓾ ꓣꓳ ꓮ ꓙꓵꓽ ꓐꓱ ꓶ ꓔꓯꓺ ꓢꓳ ꓓꓴ ꓕꓲ ꓟ ꓥ ꓡꓳ꓿ ꓟ‐ꓡꓲ ꓔꓯ ꓒꓳ, ꓖꓶ ꓓꓴ ꓮ ꓟꓬ, ꓟꓽ ꓙꓳ꓿ ꓟꓲ ꓕꓯꓽ ꓢꓲ ꓗꓪ ꓮ ꓡꓲ ꓒꓬꓱꓼ ꓡˍ ꓟ ꓔꓯ ꓬꓲ ꓟꓽ ꓢꓷ.꓿ ꓖꓳ ꓡꓱ ꓥ ꓟꓲ ꓪꓴ‐ꓢ ꓬꓲ ꓣꓱꓽ ꓛꓰꓽ ꓠꓬ ꓬꓲ ꓔꓯ ꓕꓶꓻ ꓞ, ꓝꓲˍ ꓥꓳ ꓐꓰ ꓙꓵꓻ ꓢꓲ꓾ ꓪꓴ‐ꓢ ꓙꓽ ꓖꓶ ꓔ ꓟ ꓔꓯ ꓕꓲ ꓖꓳ ꓓꓱꓽ ꓕꓲ ꓠꓲ, ꓟ ꓡꓱꓸꓼ ꓙꓵꓻ ꓗꓷꓳ꓿
ꓠꓬꓲ. ꓠꓬꓲ ꓟ ꓦꓬꓼ ꓠꓬꓲ ꓗꓪ꓾ ꓣꓳ ꓠꓬ ꓓꓵꓽ ꓙꓽ ꓟꓬˍ ꓟ ꓚꓬ, ꓟꓽ ꓪ ꓟ (ꓢ. ꓠꓯ ꓪ ꓠꓬꓲ ꓕꓯ ꓮ ꓡꓲ ꓫꓵꓽ ꓒꓬꓱꓼ ꓡˍ ꓟ ꓔꓯ ꓟꓽ ꓢꓷ. ꓟ) ꓬꓲ ꓙꓵ, ꓔꓯ ꓣꓳ ꓟꓽ ꓠꓽ ꓠꓽ ꓔꓳ, ꓜꓳꓽ ꓔꓬ ꓡꓳ꓿ ꓪꓴ‐ꓢ ꓠꓬ ꓣꓳ ꓔꓯ ꓣꓳ ꓟꓽ ꓥꓳ ꓡꓳ. ꓔ ꓟ ꓚꓱ, ꓗꓪ ꓐꓰ꓾ ꓣꓳ ꓪ ꓙꓵꓽ ꓪꓽ꓾ ꓣꓳ ꓔꓳ, ꓜꓳꓽˍ ꓟ ꓫ. ꓙꓵ ꓓꓴ꓾ ꓟꓽ ꓥ ꓠꓬ ꓣꓳ ꓠꓲ, ꓟ ꓘꓴꓽ ꓠꓯꓸꓼ ꓗꓪ ꓐꓰ ꓮ ꓤ ꓤ ꓐꓯˍ ꓟ ꓕꓱ ꓡꓱ ꓫꓵꓽ ꓗꓪ ꓐꓰ ꓣꓳ ꓔꓯ ꓪꓴ‐ꓢ ꓘꓴ ꓔꓬ ꓡꓳ꓿ ꓕꓱ ꓡꓱ ꓘꓴꓻ ꓟꓶˍ ꓟ ꓠꓯꓸꓼ ꓗꓪ ꓣꓳ ꓐꓴ ꓠꓬ ꓣꓳ ꓢꓷ. ꓠꓲ, ꓬꓰ ꓐ ꓡˍ ꓟ ꓢꓯꓼ ꓪ ꓟꓽ ꓡꓳꓼ ꓟ꓾ ꓐꓰ ꓙꓳꓺ ꓛꓱꓽ ꓓꓴ ꓣꓳ ꓠꓯꓸꓼ ꓗꓪ ꓙꓳ ꓡˍ ꓥꓳ꓿ ꓟ‐ꓡꓲ ꓡꓰ ꓐꓰ꓾ ꓕꓱ ꓟ ꓠꓬ ꓮ ꓡꓲ ꓒꓬꓱꓼ ꓡ ꓓ, ꓢꓰꓽ ꓐꓰ ꓓꓵꓽ ꓙ ꓟꓶ ꓡˍ ꓥꓳ꓿ ꓖꓳ ꓡꓱ ꓥ ꓟꓲ ꓙꓵꓻ ꓠꓲ, ꓐꓯ ꓟ ꓠꓬ ꓙꓲ ꓙꓲ ꓟꓴ ꓟꓴ ꓮ ꓙꓵꓽ ꓔꓯ ꓙꓽ ꓜꓲꓼ ꓟꓽ ꓛꓵ ꓐꓯ ꓟ ꓔꓯ ꓟ‐ꓡꓲ ꓬꓲ ꓤꓶꓻ ꓡꓰ ꓣꓳ ꓔꓯ ꓟ. ꓖꓶ ꓡ ꓔꓬ ꓡꓳ꓿ ꓬꓳ. ꓚꓵˍ ꓟ ꓠꓬ ꓣꓳ ꓔꓯ ꓘꓴꓻ ꓢꓴ ꓖꓳ ꓕꓲ ꓣꓳ ꓔꓯ ꓙꓵꓻ ꓠ, ꓟ꓾ ꓦ ꓡꓱ ꓐꓳ ꓠ, ꓟ ꓡꓰꓽ ꓣꓱꓽ ꓞ, ꓡꓳ꓿
ꓣꓳ ꓠꓬ “ꓠꓴ ꓐꓯˍ ꓟ ꓡꓰ ꓒꓬꓱꓼ ꓡ ꓝꓲ”ꓐꓰ ꓪꓴ‐ꓢ ꓔꓯ ꓐꓯ ꓖꓶ ꓗꓷ ꓕꓯ꓾ ꓣꓳ ꓠꓬ ꓣꓳ ꓤꓶꓻ ꓔꓯ ꓢꓲ ꓒ ꓬꓲ ꓒꓳ, ꓡꓶ. ꓖꓶ ꓐ ꓡˍ ꓟ ꓢꓯꓼ ꓪꓽ ꓗ, ꓘꓶꓽ ꓔꓯ ꓒꓴ ꓖꓶˍ ꓟ ꓥ ꓡꓳ꓿ ꓬꓲ ꓠꓬ ꓟ‐ꓡꓲ ꓔꓯ ꓬꓲ ꓦꓻ ꓡꓰ ꓑꓲ. ꓔ ꓪ. ꓔ ꓖꓶˍ ꓟ ꓡꓰ ꓐꓰ꓾ ꓒꓬꓱꓼ ꓡ ꓟꓽ ꓓꓻ ꓟ ꓔꓯ ꓬꓰ ꓐ ꓡ ꓠ, ꓟ ꓪꓴ‐ꓢ ꓠꓬ ꓣꓳ ꓐꓴ ꓔꓯ ꓬꓲ ꓣꓱꓽ ꓛꓰꓽ ꓡꓰ ꓐꓲꓻ ꓡꓶꓽ ꓡꓰ ꓝꓲˍ ꓡꓳ꓿ ꓣꓳ ꓡꓰ ꓐꓯˍ ꓟ “ꓠꓴ ꓐꓯˍ ꓟ ꓡꓰ ꓒꓬꓱꓼ ꓡ ꓝꓲ” ꓐꓰ ꓐꓯˍ ꓟ ꓠꓬ ꓟ‐ꓡꓲ ꓐꓯ ꓗꓷ ꓟ ꓡꓰ ꓐꓰ ꓟꓲ ꓠꓯ ꓔꓯ ꓒꓳ, ꓡꓶ. ꓗꓷˍ ꓟ ꓪꓽ ꓠꓬꓲˍ ꓟ ꓟꓽ ꓒꓬꓱꓼ ꓡ ꓥˍ ꓟꓲ꓾ ꓣꓳ ꓡꓰ ꓪꓴ‐ꓢ ꓘꓴꓻ ꓢꓯꓼ ꓔꓯ ꓓꓽ ꓔꓳ, ꓗꓷ ꓟ ꓠꓬ ꓣꓳ ꓠꓵꓻ ꓠꓲ,꓾ ꓣꓳ ꓫꓱ. ꓤ ꓠꓲ,꓾ ꓦ ꓡꓱ ꓐꓳ ꓠꓲ, ꓗꓪ ꓐꓰ ꓕꓲꓽ ꓝ. ꓢꓲ ꓒ ꓬꓰ‐ꓢꓴ ꓔꓯ ꓟꓲ ꓠꓯ ꓞꓳ ꓤ ꓗꓳ ꓡꓳ ꓗꓪ ꓣꓳ ꓧꓳꓽ ꓔꓯ, ꓙꓰ ꓐ ꓡˍ ꓡꓳ꓿
ꓟ‐ꓡꓲ ꓬꓲ ꓚ ꓟꓲꓽ ꓠꓬ ꓪꓴ‐ꓢ ꓬꓲ ꓠꓯ.ˍ ꓟ ꓠꓵꓻ ꓠꓲ, ꓐꓰ ꓕꓲ ꓠꓲ, ꓕꓲ ꓪˍ ꓬꓰ ꓠ, ꓟ ꓘꓴꓻˍ ꓟ ꓬꓲ ꓢꓷ. ꓡꓰ ꓓꓴ ꓕꓲ ꓟˍ ꓟꓲ ꓥ ꓡꓳ꓿ ꓢꓲ ꓒ ꓠꓬ ꓬꓲ ꓠꓲ, ꓫꓵˍ ꓟ ꓒꓬꓱꓼ ꓠꓲ, ꓫꓵˍ ꓟ ꓔꓯ ꓟꓽ ꓟ. ꓖꓶꓽ꓾ ꓣꓳ ꓠꓬ ꓬꓲ ꓐꓰ ꓕꓲ ꓡꓰ, ꓟꓬꓱꓽ ꓬꓰ ꓠ, ꓟ ꓔꓯ ꓓꓰꓽˍ ꓡꓳ꓿ ꓪꓴꓽ ꓓꓰˍ ꓟ ꓟꓬꓱꓽ ꓐꓬꓱꓽ ꓘꓶꓽ ꓠꓬ꓾ ꓪꓴ‐ꓢ ꓬꓲ ꓠꓲ, ꓡꓶꓽ ꓔꓯ ꓛꓳ ꓫꓱꓽˍ ꓟ ꓐꓰ ꓬꓲ ꓙ ꓟꓳ ꓘꓶꓽ ꓔꓯ ꓙꓵꓻˍ ꓟ ꓗꓪ ꓐꓰ ꓡˍ ꓟ ꓔꓯ ꓢꓲꓽ ꓫꓬ ꓕꓳꓽ ꓶ ꓕꓱ ꓟ ꓗꓪ ꓐꓰ ꓣꓳ ꓔꓯ ꓖꓴ ꓟꓳ. ꓖꓶ ꓡ ꓔꓬ ꓡꓳ꓿
ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓗꓪ꓾ ꓟ‐ꓡꓲ ꓬꓲ ꓚꓱ, ꓔꓯ ꓣꓳ ꓐꓴ ꓓꓵꓽ ꓙꓽ ꓠꓬꓲˍ ꓕꓯ꓾ ꓣꓳ ꓠꓬ “ꓠꓴ ꓐꓯˍ ꓟ ꓡꓰ ꓒꓬꓱꓼ ꓡ ꓝꓲ” ꓐꓯ ꓢꓲ ꓓꓽ ꓔꓳ, ꓠ, ꓟ꓾ ꓪꓴ‐ꓢ ꓠꓬ ꓣꓳ ꓔꓯ ꓮ ꓡꓲ ꓗꓪ ꓐꓰ ꓘꓴꓻ ꓔꓬ ꓡ? ꓘꓴꓻ ꓢꓯꓼ ꓕꓱ ꓟ ꓠꓬ ꓮ ꓡꓲ ꓗꓪ ꓥ ꓡ? ꓚꓬ, ꓟꓽ ꓠ ꓚꓬ, ꓟꓽ ꓪ ꓟ ꓤꓶꓻ ꓗꓪ ꓢꓲ ꓒ ꓔꓯ ꓮ ꓡꓲ ꓬꓰ ꓢꓲ ꓪ ꓜꓲ ꓦ ꓡꓱ ꓐꓳ ꓐ ꓡˍ ꓡ?
ꓟ‐ꓡꓲ ꓡꓰ ꓐꓰ ꓣꓳ ꓥˍ ꓟꓲ ꓕꓲ ꓣꓳ ꓔꓵꓸꓼ ꓟꓽ ꓥ ꓐꓯ ꓟ ꓔꓯ ꓣꓳ ꓢꓯꓼ ꓪ ꓣꓴ ꓡꓯ꓿ ꓪꓴ‐ꓢ ꓬꓲ ꓦ ꓠꓬ ꓣꓳ ꓐꓰ ꓕꓲ ꓪ ꓔꓬ ꓢꓲ꓾ ꓬꓲ ꓙꓽ ꓖꓶ ꓔ ꓟ ꓠꓬ ꓣꓳ ꓙꓲꓻ ꓖꓴ ꓐꓱ ꓶ ꓮ ꓕꓯ ꓟꓲ ꓥ ꓡꓳ꓿ ꓢꓲ ꓒ ꓡꓰ ꓘꓴˍ ꓟ ꓔꓯ ꓙꓵꓻ ꓠꓲ, ꓡꓰ ꓘꓳ ꓣꓴ ꓡꓯ꓿ ꓪꓴ‐ꓢ ꓠꓯꓸꓼ ꓗꓪ ꓦ ꓡꓱ ꓐꓳˍ ꓟ ꓠꓬ ꓬꓲ ꓠꓬꓲ ꓟꓳꓻ ꓓꓴ ꓔꓯ ꓟꓲ ꓠꓯ ꓕꓱ ꓟ ꓗꓪ ꓡꓬ. ꓡꓰ ꓝꓲˍ ꓟ ꓔꓯ ꓣꓳ ꓢꓷ. ꓔ ꓡꓯ꓿ “ꓮ ꓡꓲꓳ ꓐꓯ ꓠꓬ ꓪꓴ‐ꓢ ꓬꓰ ꓟꓽ ꓐ ꓡ ꓟ ꓮ ꓫꓵꓽˍ ꓟꓲ ꓟꓽ ꓙꓳ꓿” (ꓡꓴ‐ꓘ 1ꓽ37)
