ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓗꓳ ꓡꓳ ꓗꓪ ꓞꓳ ꓤ ꓠꓬ ꓕꓲꓽ ꓫꓵꓽ ꓫꓵꓽ ꓗꓪ ꓐꓰ ꓫꓵꓻˍ ꓕꓯ꓾ ꓔꓯ ꓥꓳꓽ ꓟꓳ‐ꓓꓳ ꓕꓯꓼ ꓗꓷ ꓢꓲ ꓫꓵꓻꓻˍ ꓕꓯ꓾ ꓡꓳꓽ ꓓꓳ ꓧꓳ, ꓢꓲ ꓫꓵꓻˍ ꓕꓯ꓾ ꓥ ꓠꓬ ꓬꓲꓻ ꓙꓬ ꓗꓪ ꓐꓴ ꓙꓰ ꓢꓲ ꓫꓵꓻˍ ꓕꓯ ꓾ ꓕꓱ ꓡꓱ ꓫꓵꓽ ꓑ ꓙꓽˍ ꓕꓯ ꓕꓱ ꓟ ꓠꓬ ꓬꓲ ꓝꓴꓲ. ꓪꓴ. ꓠꓬꓲ ꓫ. ꓙꓵˍ ꓟ ꓥ ꓡꓳ꓾ ꓬꓲ ꓫꓵꓻ ꓠꓯ, ꓡꓳ꓾ ꓐꓰ ꓢꓻ ꓢꓻ ꓡꓰꓽ ꓓꓵꓽ ꓙꓽ ꓢꓴˍ ꓟꓲ ꓙꓳˍ ꓡꓳ꓿ ꓕꓱ ꓡꓱ ꓓꓵꓽ ꓙˍ ꓟ ꓠꓬ ꓟꓽ ꓜꓳꓽ ꓐꓰ ꓐꓯˍ ꓟ꓾ ꓢ. ꓠꓯ ꓠꓽ ꓦꓬꓼ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓣꓳ ꓑ ꓙꓽˍ ꓥꓳ꓿
ꓢ. ꓠꓯ ꓠꓬ ꓜꓻ ꓚꓲ. ꓧꓪꓽ ꓚꓲ.ˍ ꓟ ꓦꓬꓼ ꓠꓬꓲ (3) ꓠꓽ ꓕꓲꓽ ꓠꓽ ꓟ ꓢꓲ ꓒ ꓦꓬꓼ ꓠꓬꓲ ꓥ ꓡꓳ꓿ ꓡꓴ‐ꓘ 13ꓽ1‐9 ꓗꓪ꓾ ꓢꓲꓽ ꓒ ꓑꓲ‐ꓡ‐ꓔꓴ ꓪ ꓔꓲ. ꓠꓬ ꓬꓲ ꓠꓲꓽ ꓔꓯ ꓛꓴꓻ ꓔꓲ.ˍ ꓟ ꓘꓴꓽ ꓗꓪ ꓖ‐ꓡꓲ‐ꓡꓲ ꓟꓵꓽ ꓢꓴ ꓕꓲ ꓐꓱ ꓔꓯ ꓢꓰꓼ ꓢꓲ ꓠꓬꓲ ꓬꓲ ꓫꓵꓽ ꓔꓯ ꓛꓴꓻ ꓔꓲ.ˍ ꓡꓳ ꓐꓰ꓾ ꓬꓲ ꓓꓳꓽ ꓕꓱ ꓟ ꓢꓲ ꓒ ꓬꓰ‐ꓢꓴ ꓔꓬ ꓗꓪ ꓑ ꓙꓽ ꓙꓰˍ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓪ ꓔꓯ ꓠꓺ ꓠꓬꓲ ꓘꓶꓽ ꓠꓺ ꓠꓬꓲˍ ꓡꓳ꓿ ꓢꓲꓽ ꓒ ꓑꓲ‐ꓡ‐ꓔꓴ ꓢꓰꓼ ꓗꓷˍ ꓟ ꓗꓪ ꓐꓰ ꓫꓵꓻ ꓗꓷ ꓢꓴ ꓐꓴ ꓠꓬ ꓠꓱ. ꓐꓯ ꓢꓴ ꓕꓯꓽ ꓢꓲ ꓗꓪ ꓝꓴꓲ. ꓙꓳˍ ꓡꓳ ꓐꓰ ꓠꓴ ꓪ ꓓꓵꓽ ꓙꓽˍ ꓡ꓾ ꓬꓲ ꓪ ꓔꓯ ꓠꓺ ꓠꓬꓲˍ ꓡꓳ꓿ ꓠꓴ ꓪ ꓥˍ ꓟꓲ ꓓꓵꓽ ꓙꓽ ꓒꓳ, ꓬꓲꓼ ꓡˍ ꓟ ꓟꓽ ꓙꓳ꓾ ꓠꓲ, ꓟ ꓡꓶ.ˍ ꓟ ꓟꓽ ꓙꓳ ꓠꓬ ꓠꓴ ꓪ ꓥˍ ꓟꓲ ꓕꓱ ꓟ ꓕꓯꓽ ꓢꓲ ꓫ. ꓙꓵˍ ꓥꓳ ꓐꓰ꓾ ꓢꓲ ꓒ ꓬꓰ‐ꓢꓴ ꓒꓳ, ꓖꓶˍ ꓡꓳ꓿
ꓕꓱ ꓟꓳ ꓡꓰ ꓐꓰ ꓢꓲ‐Lꓳ ꓟꓵꓽ ꓔꓳ, ꓤꓲꓻ ꓐꓱꓽ ꓙꓰˍ ꓟ ꓗꓪ ꓐꓰ ꓞꓳ ꓤ 18 ꓣꓳ ꓫꓵꓳ꓿ ꓕꓱ 18 ꓣꓳ ꓠꓬ ꓠꓱ. ꓐꓯ ꓕꓯꓽ ꓢꓲ ꓗꓪ ꓝꓴꓲ. ꓙꓳˍ ꓡ꓾ ꓐꓰ ꓢꓲꓺ ꓒ ꓬꓰ‐ꓢꓴ ꓠꓺ ꓠꓬꓲˍ ꓡꓳ꓿ ꓟꓽ ꓙꓳ꓾ ꓠꓴ ꓪ ꓥˍ ꓟꓲ ꓟꓽ ꓓꓵꓽ ꓙꓽ ꓒꓳ, ꓬꓲꓼ ꓡ ꓕꓯ ꓕꓱ ꓟ ꓕꓯꓽ ꓢꓲ ꓫ. ꓙꓵˍ ꓥꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓐꓯ ꓖꓶˍ ꓡꓳ꓿
ꓟ. ꓟꓲꓽ ꓕꓱ ꓟ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓠꓬ꓾ ꓣꓳ ꓔꓯ ꓓꓵꓽ ꓙꓽ ꓒꓳ, ꓬꓲꓼ ꓡ ꓠ, ꓟ꓾ ꓢꓴ ꓫꓵꓽ ꓪꓴ ꓔꓯ ꓙꓻ ꓟꓳ ꓘꓶꓽˍ ꓟ ꓢꓶ. ꓟꓽ ꓞꓲ꓾ ꓕꓲꓽ ꓫꓵꓽ ꓫꓵꓽ ꓫ. ꓙꓵ ꓟꓶ ꓙꓵ ꓓꓴ ꓔꓳ, ꓜꓳꓽ ꓡ ꓕꓯ꓾ ꓣꓳ ꓐꓱ ꓶ ꓓꓵꓽ ꓙ ꓟꓶ ꓓꓴ ꓔꓳ, ꓜꓳꓽ ꓡˍ ꓕꓯ ꓣꓳ ꓠꓲ, ꓟ ꓒꓳ, ꓡꓶ. ꓗꓴ. ꓠ, ꓟ ꓣꓳ ꓔꓯ ꓟꓳ. ꓖꓶ ꓡˍ ꓡꓳ꓿
ꓖꓳ ꓡꓱ ꓠꓬꓲ ꓟ. ꓟꓲꓽ ꓔꓯ ꓣꓳ ꓡꓯꓼ ꓫꓵ ꓡꓳ. ꓠꓬꓲˍ ꓕꓯ ꓢꓲ ꓒ ꓬꓰ‐ꓢꓴ ꓠꓬ ꓔꓯꓺ ꓥꓳꓽ ꓕꓲꓽ ꓟ ꓡꓰ ꓣꓳ ꓔꓯ ꓐꓯ ꓟꓳ. ꓖꓶ ꓡˍ ꓡꓳ꓿ ꓔꓯ ꓥꓳꓽ ꓖꓳ ꓟ ꓠꓬ꓾ ꓐꓱ ꓕꓲ ꓐꓱ ꓗꓪ ꓘꓶꓽ ꓢꓶꓽ ꓜꓲ ꓔꓶ ꓔ ꓡꓳ꓿ ꓘꓶꓽ ꓢꓶꓽ ꓜꓲ ꓖꓳ ꓟ ꓠꓬ ꓬꓲ ꓢꓶꓽ ꓟꓽ ꓓꓱꓼ꓿ ꓖꓳ ꓡꓱ ꓠꓬꓲ ꓬꓲ ꓢꓲ ꓒ ꓠꓬ ꓘꓶꓽ ꓢꓶ ꓜꓲ ꓖꓳ ꓟ ꓔꓯ ꓡꓶ. ꓑ ꓠ, ꓟ ꓐꓱ ꓶ ꓐꓱ ꓡꓳ. ꓢꓴ ꓔꓯ ꓐꓯ ꓖꓶˍ ꓡꓳ꓿ ꓐꓱ ꓡꓳ. ꓢꓴ ꓠꓬ “ꓕꓽ ꓘꓷ, ꓢꓰꓽ꓾ ꓬꓲ ꓪ ꓔꓯ ꓥꓪ ꓡꓰ ꓕꓱ ꓕꓲ ꓧꓪ, ꓗꓪ ꓟꓲ ꓛꓬ ꓗꓪ, ꓫꓴ ꓖꓶ꓾ ꓩꓲ. ꓛꓵꓽ ꓧꓳꓽ ꓖꓶ ꓬꓰˍ ꓥꓳ꓿ ꓠ. ꓦꓬ ꓬꓲ ꓢꓶꓽ ꓓꓱꓼ ꓡ ꓗꓴ.ˍ ꓠꓬ ꓙꓲꓻˍ ꓡꓳ ꓐꓰ ꓐꓯ ꓖꓶˍ ꓟ ꓢꓲꓽ ꓫꓬ ꓕꓳꓽ ꓶ ꓥ ꓡꓳ꓿
ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓐꓯ ꓟꓳ. ꓖꓶ ꓡˍ ꓟ ꓠꓬ ꓢꓲ ꓒ ꓬꓰ‐ꓢꓴ ꓠꓲ, ꓟ꓾ ꓪꓴ‐ꓢ ꓠꓲ, ꓟ ꓔꓯ ꓣꓳ ꓫꓬꓽ ꓫꓬꓽ ꓡꓰꓽ ꓡꓳ. ꓟꓳˍ ꓡꓳ꓿ ꓮ ꓫꓵꓽ ꓥ ꓡ ꓐꓯ ꓠꓬ꓾ ꓪꓴ‐ꓢ ꓠꓬ “Divine Justice ꓐꓯˍ ꓟ ꓐꓰ Divine Mercy ꓐꓰ ꓐꓯˍ ꓟ ꓠꓬꓲꓽ ꓫꓵꓽ ꓙꓳˍ ꓡꓳ ꓐꓰ ꓣꓳ ꓡꓳ. ꓟꓳꓻˍ ꓡꓳ꓿ Divine Justice ꓐꓯˍ ꓟ ꓠꓬ ꓪꓴ‐ꓢ ꓠꓬ ꓔꓱ, ꓜꓳꓽˍ ꓡꓳ꓿ ꓬꓲ ꓠꓬ ꓔꓱ, ꓜꓳꓽˍ ꓟ ꓑꓶ. ꓓꓴ ꓮ ꓫꓵꓽ ꓔꓯ ꓥˍ ꓟꓲ ꓔꓱ, ꓔꓱ, ꓜꓳꓽ ꓜꓳꓽ ꓬꓰ ꓠꓲ, ꓫꓵˍ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓢꓲ ꓒ ꓠꓬ ꓘꓶꓽ ꓢꓶꓽ ꓜꓲ ꓔꓯ ꓘꓷ, ꓠꓲ, ꓫꓵˍ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓖꓳ ꓗꓪ ꓐꓱ ꓡꓳ. ꓢꓴ ꓠꓬ꓾ ꓬꓲ ꓔꓯ ꓕꓽ ꓘꓷ, ꓢꓰꓽ ꓐꓰ ꓐꓯˍ ꓟ ꓥˍ ꓟꓲ ꓪꓴ‐ꓢ ꓥ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓲ, ꓠ ꓠꓯꓸꓼ ꓗꓪ ꓪꓴ‐ꓢ ꓠꓲ, ꓟ ꓠꓯꓸꓼ ꓗꓪ Divine Justice ꓐꓰ Divine Mercy ꓐꓰ ꓐꓯˍ ꓟ ꓠꓬꓲꓽ ꓙꓰꓽ ꓓˍ ꓡꓳ꓿ ꓕꓲꓽ ꓛꓱꓽ ꓟ ꓠꓬ ꓔꓱ, ꓔꓱ, ꓜꓳꓽ ꓜꓳꓽ ꓡꓰ ꓬꓰ꓾ ꓕꓲꓽ ꓛꓱꓽ ꓟ ꓠꓬ ꓫꓱ. ꓤˍ ꓡꓳ꓿
ꓖꓳ ꓡꓱ ꓠꓬꓲ ꓣꓳ ꓔꓯ ꓟꓳ. ꓖꓶ ꓡˍ ꓟ ꓠꓬ꓾ ꓮ ꓟꓶ ꓜꓻ ꓚꓲ. ꓧꓪꓽ ꓚꓲ. ꓦꓬꓼ ꓠꓬꓲ ꓠꓬ ꓬꓲ ꓢꓶꓽ ꓓꓱꓼ ꓡ ꓠ, ꓟ ꓐꓱ ꓶ ꓣꓳ ꓢꓯꓼ ꓕꓵꓼ ꓠ, ꓟ ꓦꓬꓼ ꓠꓬꓲ ꓥ ꓡꓳ꓿ ꓮ ꓟꓶ ꓜꓻ ꓚꓲ. ꓧꓪꓽ ꓚꓲ. ꓦꓬꓼ ꓠꓬꓲ ꓗꓪ ꓣꓳꓽ ꓪꓽ ꓘꓴˍ ꓟ ꓗꓪ ꓐꓰ꓾ ꓜꓻ ꓚꓲ. ꓧꓪꓽ ꓚꓲ.ˍ ꓟ ꓗꓪ ꓐꓰ꓾ ꓒꓴ ꓤ ꓫꓵꓺ ꓤ ꓡꓴˍ ꓟ ꓗꓪ ꓐꓰ ꓣꓳ ꓠꓬ꓾ ꓣꓳ ꓙꓵꓻ ꓠꓲ, ꓢꓲ, ꓜꓲ ꓔꓯ ꓬꓲꓻ ꓙꓬ ꓧꓳꓽ ꓖꓶ ꓩꓲ. ꓧꓳꓽ ꓖꓶ ꓬꓰ ꓔꓬ ꓟ ꓥ ꓡꓳ꓿ ꓬꓲ ꓢꓶꓽ ꓓꓱꓼ ꓡ ꓠ, ꓟ ꓣꓳ ꓢꓯꓼ ꓕꓵꓼ ꓠ, ꓟ ꓥ ꓡꓳ꓿
ꓪꓴ‐ꓢ ꓠꓬ ꓠꓲ, ꓟ ꓫꓵ ꓢꓴ ꓥ ꓡꓳ꓿ ꓕꓲꓽ ꓞꓲꓼ ꓠꓲ, ꓟ ꓫꓵ ꓢꓴ ꓥ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓬꓲ ꓠꓲ, ꓟ ꓫꓵˍ ꓟ ꓔꓯ ꓠꓬ ꓣꓳꓽ ꓮꓽ ꓔꓳ ꓔꓳ ꓟꓽ ꓬꓰ ꓬꓳ. ꓚꓰꓽˍ ꓡꓳ꓿ ꓙꓲꓻ ꓫꓬ ꓢꓴ ꓒꓳ‐ꓡꓳ 2 ꓘꓳ‐ꓡꓱ‐ꓕꓴ 6ꓽ2 ꓗꓪ꓾ ꓮ ꓟꓶ ꓠꓬ ꓣꓱꓽ ꓛꓰꓽ ꓦꓬꓼ ꓠꓬꓲ ꓥ ꓡꓳ꓿ ꓚꓬꓴ. ꓟꓶˍ ꓟ ꓦꓬꓼ ꓠꓬꓲ ꓥ ꓡꓳ꓿ ꓮ ꓙꓵꓽ ꓗ, ꓛꓲꓽ ꓡꓯ꓾ ꓐꓰ ꓐꓯ ꓔ ꓡꓳ꓿ ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓪꓴ‐ꓢ ꓖꓶ ꓔ ꓟ ꓬꓲ ꓙꓵ,꓾ ꓪꓴ‐ꓢ ꓡꓰ ꓣꓳ ꓔꓯ ꓢꓲ ꓚꓰ. ꓔ ꓟ ꓬꓲ ꓙꓵ, ꓕꓱ ꓕꓲꓽ ꓟ ꓗꓪ ꓣꓳꓽ ꓠꓬ ꓚꓵ ꓚꓵ ꓠꓲ, ꓟ ꓒꓳ, ꓡꓶ. ꓗꓷ ꓢꓲ ꓠꓬꓲ꓾ ꓣꓳꓽ ꓠꓲ, ꓟ ꓔꓯ ꓪꓴ‐ꓢ ꓔꓯ ꓟꓳ. ꓛꓱ, ꓔꓴ ꓢꓲ ꓠꓬꓲ꓾ ꓕꓲ ꓠꓬꓲ ꓕꓲ ꓠꓬꓲ ꓞꓳ ꓙꓳˍ ꓟ ꓗꓪ ꓣꓳꓽ ꓙꓵꓻ ꓠꓲ, ꓢꓲ, ꓜꓲ ꓥ ꓟ꓾ ꓣꓳ ꓦꓻ ꓐꓱ ꓶ ꓥ ꓟ ꓣꓳꓽ ꓙꓵꓻ ꓠꓲ, ꓔꓯ ꓕꓲꓽ ꓠꓬꓲ ꓕꓲꓽ ꓠꓬꓲ ꓪꓽ ꓘꓴˍ ꓟ ꓗꓪ ꓐꓰ꓾ ꓝꓮꓲ ꓜꓻ ꓚꓲ. ꓧꓪꓽ ꓚꓲ.ˍ ꓟ ꓗꓪ ꓐꓰ ꓕꓱ ꓡꓱ ꓗꓪꓼ ꓫꓵꓼ ꓢꓲ ꓠꓬꓲ꓾ ꓪꓴ‐ꓢ ꓟꓲꓽ ꓙꓬ ꓗꓪ ꓣꓳꓽ ꓞꓳ ꓙꓳ ꓙꓰ ꓡꓯ꓿ ꓮ ꓙꓵꓽ ꓢꓴ ꓢꓯꓼ ꓕꓵꓼ ꓙꓰ ꓡꓯ꓿
