ꓟ‐ꓕꓲ 23ꓽ1‐12 ꓗꓪ ꓠꓬ꓾ ꓣꓳ ꓤꓶꓻ ꓗꓪ ꓮ ꓘꓶ. ꓠꓯ. ꓠꓯ.ˍ ꓡꓰꓽ ꓓꓵꓽ ꓙ ꓠꓬꓲ ꓠ ꓔ ꓟ ꓢ ꓙꓰꓽ ꓙꓳˍ ꓡꓳ꓿ ꓬꓲ ꓪꓴ. ꓕꓲꓽ ꓟ ꓠꓬ꓾ (ꓟ‐ꓕꓲ 23ꓽ2‐3) “ꓒ‐ꓡꓲ‐ꓢꓷ ꓐꓴ ꓐꓰ ꓙꓵꓽ ꓗ ꓟ. ꓒ ꓐꓴ ꓠꓬ ꓟꓳ‐ꓫꓲ ꓙꓵꓽ ꓗ ꓔꓯ ꓒꓶ ꓟ. ꓖꓶ ꓢꓴ ꓥꓳ꓿ ꓖꓳ ꓟ ꓑꓶ. ꓓꓴ ꓬꓲ ꓪ ꓟ. ꓖꓶˍ ꓟ ꓮ ꓙꓵꓽ ꓔꓯ ꓒꓵꓽ ꓛꓳ꓾ ꓖꓳ ꓡꓱ ꓥ ꓟꓲ ꓬꓲ ꓪ ꓬꓰˍ ꓟ ꓔꓯ ꓕꓽ ꓔꓯ ꓢꓳ꓿ ꓬꓲ ꓪ ꓠꓬ ꓬꓲ ꓪ ꓟ. ꓖꓶˍ ꓟ ꓡꓰ ꓟꓽ ꓛꓳ ꓫꓱꓽ” ꓐꓰ ꓐꓯ ꓔˍ ꓡꓳ꓿
ꓬꓲ ꓪ ꓟ. ꓖꓶˍ ꓟ ꓡꓰ ꓬꓲ ꓪ ꓟꓽ ꓛꓳ ꓫꓱꓽ ꓟ꓾ ꓐꓯˍ ꓟ ꓡꓰ ꓡꓯꓼ ꓕꓲꓺ ꓟꓽ ꓬꓰ ꓟ꓾ ꓕꓱ ꓡꓱ ꓫꓵꓽ ꓠꓲ, ꓟ ꓠꓬ ꓣꓳ ꓦꓬꓼ ꓠꓬꓲ ꓗꓪ ꓛꓲ ꓒꓬꓱꓼ ꓔꓬ ꓟ ꓥ ꓡꓳ꓿ ꓖꓳ ꓟ ꓑꓶ. ꓓꓴ “walk the talk’ ꓫ. ꓕꓱˍ ꓟ ꓡꓰ ꓛꓳ ꓫꓱꓽ꓾ ꓐꓰ ꓐꓯˍ ꓟ ꓔꓯ ꓣꓳ ꓟꓽ ꓠꓽ ꓠꓽ ꓑ ꓙꓽ ꓪˍ ꓟ ꓥ ꓡꓳ꓿ ꓣꓳ ꓠꓬ ꓢꓴ ꓔꓯ ꓙꓲꓻˍ ꓟ ꓚꓱ, ꓐꓯ ꓟ. ꓖꓶˍ ꓟ ꓡꓰ ꓣꓳ ꓥ ꓟꓲ ꓖꓳ ꓡꓱ ꓛꓳ ꓫꓱꓽ ꓠ ꓔ ꓡꓳ꓿ ꓣꓳ ꓚꓲ. ꓛꓬ ꓦꓲꓻ ꓘꓴꓽ ꓗꓪ ꓣꓳ ꓟꓬꓱꓽ ꓬꓰ ꓖꓴ ꓗꓪ꓾ ꓥ ꓠꓬ ꓣꓳ ꓗꓳ ꓡꓳ ꓗꓪ ꓔꓬ ꓢꓴ ꓐꓴ ꓔꓯ꓾ ꓙꓲꓻ ꓡ ꓠ ꓟ. ꓖꓶˍ ꓕꓯ ꓣꓳ ꓥˍ ꓟꓲ ꓣꓳ ꓐꓯˍ ꓟ ꓡꓰ ꓛꓳꓽ ꓫꓱꓽ ꓠ ꓔ ꓟ ꓥ ꓡꓳ꓿ ꓕꓱ ꓟ ꓗꓪ ꓐꓰ ꓣꓳ ꓐꓴ ꓠꓬ꓾ ꓣꓳ ꓐꓯˍ ꓟ ꓐꓯ ꓘꓶꓽ ꓙꓳˍ ꓟ ꓡꓰ ꓣꓳ ꓛꓳ ꓫꓱꓽˍ ꓕꓯ ꓣꓳ ꓐꓯ ꓘꓶꓽ ꓠꓽ ꓚꓵ ꓚꓵ ꓒꓬꓱꓼ ꓡˍ ꓡꓳ꓾ ꓐꓯˍ ꓟ ꓔꓯ ꓓꓵꓽ ꓙ ꓟꓶ ꓠ ꓗ, ꓡꓳ꓿
ꓠꓬꓲꓽ ꓙꓰꓽ ꓕꓲ ꓙꓰꓽ ꓠꓬ꓾(ꓟ‐ꓕꓲ 23ꓽ6‐7) “ꓬꓲ ꓪ ꓠꓬ ꓑꓮꓲˍ ꓐꓰ ꓜꓲꓼ ꓦꓲ ꓗꓪˍ ꓟꓲ ꓞꓳ ꓪꓴꓽ ꓠꓬꓲ. ꓠ. ꓖꓴ ꓗꓪ ꓡꓰꓽ ꓠꓬꓲ. ꓠ. ꓠꓲ, ꓫꓵˍ ꓡꓳ꓿ ꓙꓵꓺ ꓗꓪˍ ꓟꓲ ꓒꓵꓽ ꓗ ꓬꓰ ꓡˍ ꓟˍ ꓐꓰ꓾ ꓢꓴ ꓡꓰ ꓟ. ꓒ ꓐꓰ ꓘꓴ ꓡ ꓟ ꓔꓯ ꓠꓲ, ꓠꓵˍ ꓡꓳ꓾” ꓐꓰ ꓐꓯ ꓔ ꓡꓳ꓿
ꓕꓱ ꓟ ꓠꓬ ꓟꓬꓱ ꓓꓳꓽ ꓪꓴꓽˍ ꓟ꓾ ꓙꓵꓽ ꓪ ꓙꓳˍ ꓟ ꓐꓰ꓾ ꓠꓱ. ꓐꓯ ꓧꓪ. ꓡꓰ ꓓꓴ ꓬꓲ ꓪꓻ ꓘꓴꓽ ꓗꓪ ꓞꓰꓻ ꓓꓵꓽ ꓡꓰ ꓝꓲˍ ꓟ ꓙꓳꓺ ꓓꓴ ꓕꓲ ꓫꓵꓽ ꓥ ꓡꓳ꓿ ꓕꓱ ꓟ ꓠꓯꓸꓼ ꓗꓪ ꓞꓰꓻ ꓓꓵꓽ ꓡꓰ ꓠꓬ ꓓꓳꓺ ꓡ ꓟꓽ ꓓ ꓗꓷ ꓡꓰˍ ꓥꓳ꓿ ꓕꓱ ꓡꓱ ꓫꓵꓽ ꓡ ꓞꓳ ꓠꓬ ꓟꓬ ꓢꓶꓽ ꓠꓬꓲ ꓟꓽ ꓟꓳꓻ ꓢꓴ ꓡꓰ ꓐꓰ꓾ ꓡꓳ, ꓬꓰˍ ꓕꓯ ꓬꓲ ꓪ ꓙꓽ ꓜꓲꓼ ꓠꓲ, ꓠꓬ ꓟꓶꓽ ꓡꓰ ꓢꓲ ꓠꓬꓲ꓾ ꓬꓲ ꓪ ꓚꓲ. ꓛꓬ ꓬꓲ ꓪ ꓔꓱ, ꓜꓳꓽ ꓢꓴ ꓥ ꓡꓳ꓾ ꓐꓰ ꓓꓵꓽ ꓙ ꓟꓶ ꓡˍ ꓥꓳ꓿
ꓖꓳ ꓟ ꓑꓶ. ꓓꓴ ꓢ ꓙꓰꓽ ꓕꓲ ꓙꓰꓽ ꓟ ꓔꓯ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓕꓱ ꓡꓱ ꓐꓯ ꓖꓶˍ ꓡꓳ꓿ (ꓟ‐ꓕꓲ 23ꓽ8‐9) “ꓢꓴ ꓡꓰ ꓠꓴ ꓪ ꓔꓯ ꓟ. ꓒ ꓕꓽ ꓘꓴ ꓝꓲ꓿ ꓮ ꓡꓲꓳ ꓐꓯ ꓠꓬ ꓠꓴ ꓪ ꓟ. ꓒ ꓠꓽ ꓕꓲ ꓣꓳˍ ꓡꓰꓽ ꓙꓳˍ ꓡꓳ꓿ ꓠꓴ ꓪ ꓮ ꓙꓵꓽ ꓠꓬ ꓬꓲꓼ ꓤ ꓠꓬꓲ ꓤ ꓥ ꓡꓳ꓿ ꓟꓲ ꓠꓯ ꓗꓪ ꓠꓱ. ꓐꓯ ꓢꓴ ꓔꓯ ꓐ, ꓐꓽ ꓕꓽ ꓘꓴ ꓝꓲ꓿ ꓮ ꓡꓲꓳ ꓐꓯ ꓠꓬ ꓟꓴ ꓗꓪ ꓗꓪ ꓔꓬ ꓢꓴ ꓖꓳ ꓕꓲꓽ ꓣꓳˍ ꓡꓰꓽ ꓠꓴ ꓪ ꓐ, ꓐꓽ ꓥ ꓡꓳ꓾” ꓐꓰ ꓐꓯ ꓖꓶˍ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓐꓰ꓾ ꓘꓴ ꓜꓲꓼ ꓞꓳ ꓗꓪ ꓧꓳꓽ ꓣꓱꓽ ꓢꓴ ꓐꓴ ꓔꓯ ꓪꓴ‐ꓢ ꓐꓰ ꓪꓴ‐ꓢ ꓐꓯ ꓘꓶꓽ ꓔꓯ ꓑ ꓫꓬ ꓐꓴ ꓐꓰ ꓠꓶꓽ ꓙꓰ ꓠ, ꓟ ꓢꓯꓼ ꓕꓵꓼˍ ꓟ ꓢꓶ. ꓟꓽ ꓞꓲ꓾ ꓚꓲ. ꓛꓬ ꓟꓬꓱ ꓓꓳꓽ ꓪꓴꓽ ꓡ ꓠ, ꓟ ꓡꓰꓽ ꓧꓪˍ ꓟ ꓤ, ꓠꓬꓲ ꓓꓴ ꓔꓯ꓾ ꓙꓳꓺ ꓗꓽ ꓖꓶˍ ꓡꓳ꓿ ꓘꓶꓽ ꓘ, ꓟ꓾ ꓟꓬꓱ ꓓꓳꓽ ꓧꓪˍ ꓟ ꓠꓬ ꓠꓱ. ꓐꓯ ꓢꓴ ꓕꓯꓽ ꓢꓲ ꓚꓲ. ꓛꓬ ꓔꓯ ꓬꓲ ꓪꓴ. ꓠ ꓑ ꓕꓲꓽ ꓗꓪ ꓗꓷ ꓔ ꓠ, ꓟ ꓣꓳ ꓔꓯ ꓧꓳꓽ ꓪꓴ. ꓙꓰˍ ꓡꓳ꓿ ꓕꓲ ꓐꓱ ꓠꓬ ꓪꓴ‐ꓢ ꓟꓬꓱꓽ ꓬꓰ ꓔꓬ ꓥ ꓟꓲ ꓪꓴ‐ꓢ ꓟꓬꓱ ꓓꓳꓽ ꓢꓶ. ꓟꓽ ꓛꓲ ꓚꓲ. ꓛꓬ ꓟꓬꓱ ꓓꓳꓽ ꓪꓴꓽ ꓡ ꓠ, ꓟ ꓬꓰˍ ꓡꓳ꓿ ꓖꓳ ꓟ ꓑꓶ. ꓓꓴ ꓣꓳ ꓠꓬ ꓙꓲꓻˍ ꓟ ꓬꓰˍ ꓕꓯ꓾ ꓪꓴ‐ꓢ ꓟꓬꓱꓽ ꓬꓰˍ ꓕꓯ ꓚꓲ. ꓛꓬ ꓟꓬꓱ ꓓꓳꓽ ꓧꓪˍ ꓟ ꓟꓽ ꓬꓰ ꓬꓰ꓾ ꓪꓴ‐ꓢ ꓟꓬꓱ ꓓꓳꓽ ꓔꓯ ꓟꓬꓽ ꓠꓬꓲ ꓛꓵ ꓔꓴ ꓠ ꓗ, ꓡꓳ꓾ ꓐꓯˍ ꓟ ꓥ ꓡꓳ꓿ ꓠꓬꓲ. ꓠꓬꓲ ꓣꓳ ꓶꓼ ꓓꓳꓽ ꓫꓱ, ꓓꓳꓽ ꓕꓳꓽ ꓶ ꓬꓲ ꓐꓯ ꓘꓶꓽ ꓬꓲ ꓟ. ꓟꓲꓽ ꓠꓬ꓾ ꓘꓶꓽ ꓘ, ꓟ ꓐꓰ ꓚꓲ. ꓛꓬ ꓚꓳꓽ ꓚꓲ. ꓛꓬ ꓟꓴ ꓡꓰ ꓠ ꓬꓰˍ ꓟ ꓢꓶ. ꓟꓽ ꓞꓲꓺ꓾ ꓙ ꓣꓳꓽ ꓠꓲ, ꓐꓰ ꓣꓳ ꓠꓲ, ꓟ ꓗꓪ ꓓꓳ ꓡˍ ꓟ ꓔꓱ, ꓜꓳꓽˍ ꓟ ꓠꓲ, ꓟ ꓡꓰ ꓞꓳ ꓤ ꓐꓴ ꓔꓯ ꓣꓱꓽ ꓙ ꓠ, ꓟ ꓣꓳ ꓔꓯ ꓟ. ꓖꓶ ꓡ ꓔꓬ ꓡꓳ꓿ ꓣꓳ ꓫ. ꓕꓱˍ ꓟ ꓫ. ꓕꓱ ꓘꓶꓽ꓾ ꓣꓳ ꓐꓯˍ ꓟ ꓐꓯ ꓘꓶꓽ ꓠꓬ ꓬꓰ‐ꓢꓴ ꓙꓲ‐ꓢꓴ ꓐꓱ ꓶ ꓢꓯ. ꓔꓬ ꓟ ꓪꓴꓽ ꓡ ꓟꓴ ꓡ ꓔꓬ ꓟ ꓢꓷ. ꓙ ꓟꓳ ꓙ ꓓꓴ ꓒꓬꓱꓼ ꓡ ꓝꓲ꓿ ꓣꓳꓽ ꓠꓬ ꓙꓽ ꓣꓳ ꓠꓲ,꓾ ꓞꓳ ꓫ. ꓬꓰˍ ꓟ꓾ ꓜꓲꓽ ꓘꓴ ꓠꓲ, ꓐꓰ ꓠ ꓡꓳ,ˍ ꓟ ꓠꓲ, ꓟ ꓣꓱꓽ ꓢꓲ ꓢꓲ ꓒ ꓐꓱ ꓶ ꓢꓷ. ꓙ ꓟꓳ ꓙ ꓓꓴ ꓒꓬꓱꓼ ꓡ ꓝꓲ ꓠꓯ, ꓡꓳ꓾ ꓐꓰ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓥ ꓡꓳ꓿
