ꓪꓽ ꓘꓴˍ ꓟ ꓠꓬ ꓮ ꓫꓵꓽ ꓥ ꓡ? ꓪꓽ ꓘꓴˍ ꓟ ꓬꓲ ꓟ. ꓟꓲꓽ꓾ ꓬꓲ. ꓬꓲ ꓢꓲ ꓠꓬ ꓫ. ꓕꓱˍ ꓟ ꓐꓰ ꓠ ꓠ, ꓟ ꓥ ꓡꓳ꓿ ꓕꓱ ꓫ. ꓕꓱˍ ꓟ ꓐꓰ ꓠ ꓠ, ꓟ ꓠꓬ꓾ ꓞꓳ ꓤ ꓠꓬꓲꓽ ꓣꓳ ꓙꓻ ꓡꓯ ꓘꓳ ꓚꓱ, ꓥ ꓡꓳ꓿ ꓣꓳ ꓠꓬ ꓪꓴ‐ꓢ ꓔꓯ ꓫ. ꓕꓱ ꓢꓲ ꓪꓴ‐ꓢ ꓐꓯ ꓘꓶ ꓠ ꓠ, ꓡꓳ꓿ ꓖꓳ ꓡꓱ ꓥ ꓟꓲ ꓞꓳ ꓤ ꓮ ꓟꓬ, ꓠꓬ ꓮ ꓡꓲ ꓪꓽ ꓘꓴ ꓠꓯ, ꓟ ꓔꓯ ꓟꓽ ꓢꓷ. ꓠꓬꓲ꓾ ꓪꓽ ꓟꓽ ꓘꓴ ꓘꓴ ꓔꓬ ꓢꓴ ꓕꓲ ꓐꓱˍ ꓟꓲ ꓙꓳ ꓔꓬ ꓟ ꓥ ꓡꓳ꓿
ꓣꓳ ꓪꓽ ꓘꓴˍ ꓕꓯ ꓐꓯ ꓘꓶꓽ ꓮ ꓟꓬ, ꓟꓽ ꓣꓱꓽ ꓣꓱꓽ꓾ ꓠꓬꓱ. ꓠꓬꓱ. ꓤ ꓡꓰꓽ ꓣꓱꓽ ꓢꓲ ꓮ ꓡꓲ ꓪꓽ ꓘꓴ ꓠꓯ, ꓟ ꓔꓯ (ꓟ‐ꓕꓲ 6ꓽ7‐15) ꓢꓲ ꓒ ꓬꓰ‐ꓢꓴ ꓡꓰ ꓣꓳꓽ ꓔꓯ ꓟ. ꓖꓶ ꓔ ꓡꓳ꓿ ꓣꓳ ꓣꓱꓽ ꓞ, ꓔꓬ ꓟ ꓮ ꓙꓵꓽ ꓔꓯ ꓪꓴ‐ꓢ ꓠꓬ ꓣꓳꓽ ꓟꓽ ꓓꓰꓽ ꓕꓯ ꓡꓰ ꓢꓷ. ꓔ ꓟ ꓑꓶ. ꓓꓴ꓾ ꓣꓳ ꓔꓯ ꓣꓱꓽ ꓞ, ꓔꓬ ꓟ ꓮ ꓙꓵꓽ ꓡꓱꓸꓼ ꓪꓴ‐ꓢ ꓔꓯ ꓐꓯ ꓖꓶ ꓟꓽ ꓛꓵꓻ꓿ ꓚꓵ ꓚꓵ ꓪꓴ‐ꓢ ꓠꓬ꓾ ꓣꓳ ꓐꓱ ꓶ ꓗ, ꓛꓲ ꓓꓴ ꓚꓵ꓾ ꓐꓳ ꓶ ꓚꓵ꓾ ꓔꓬ, ꓢꓻ ꓓꓴ ꓚꓵ ꓠꓬ ꓮ ꓫꓵꓽ ꓥ ꓟ ꓔꓯ ꓬꓲ ꓡꓰ ꓢꓷ. ꓔ ꓟ ꓥ ꓡꓳ꓿ ꓬꓲ ꓠꓬ ꓮ ꓫꓵꓽˍ ꓟꓲ ꓢꓷ. ꓖꓴ ꓡꓰˍ ꓟ ꓪꓴ‐ꓢ ꓥ ꓡꓳ꓿ ꓬꓲ ꓠꓬ ꓣꓳ ꓮꓽ ꓟ ꓥ ꓟ ꓐꓰ꓾ ꓕꓲ ꓟꓲ ꓠꓯ ꓡꓱꓸꓼ ꓔꓯ ꓥˍ ꓟꓲ ꓢꓷ. ꓖꓴ ꓡꓰˍ ꓟ ꓪꓴ‐ꓢ ꓥ ꓡꓳ꓿
ꓪꓴ‐ꓢ ꓬꓲ ꓠꓲ, ꓡꓶꓽ ꓠꓬ ꓮ ꓕꓯ ꓟꓲ ꓙꓲꓻ ꓖꓴ ꓡꓰˍ ꓟ ꓑꓶ. ꓓꓴ ꓬꓲ ꓠꓲ, ꓡꓶ ꓐꓲꓻ ꓡꓰ ꓠ, ꓟ ꓪꓽ ꓘꓴ ꓡꓯ꓿ ꓟꓴ ꓗꓪ ꓗꓪ ꓔꓬ ꓟ ꓣꓳ ꓐ, ꓐ ꓠꓬ ꓮ ꓕꓯ ꓟꓲ ꓙꓲꓻˍ ꓟ ꓥ ꓡꓳ꓿ ꓡ ꓠ, ꓟ ꓤꓶꓻ ꓐꓱ ꓶ ꓣꓳ ꓠꓬ ꓙꓳꓺ ꓛꓱꓽ ꓔꓬ ꓐꓯˍ ꓥ ꓟꓲ꓾ ꓪꓴ‐ꓢ ꓡꓰ ꓣꓳ ꓐꓱ ꓶ ꓙꓽ ꓖꓶ ꓔ ꓟ ꓮ ꓙꓵꓽ ꓠꓬ ꓙꓲꓻˍ ꓟ ꓥ ꓡꓳ꓿ ꓖꓳ ꓟ ꓪꓴ. ꓠꓬꓲ ꓙꓵꓻ ꓠꓲ, ꓒ ꓐꓲꓻ ꓡꓰ ꓪꓽ ꓘꓴ ꓡꓯ꓾ ꓬꓲ ꓠꓬ ꓣꓳ ꓐ, ꓐ ꓥ ꓢꓲ꓾ ꓬꓲ ꓠꓬ ꓣꓳ ꓮ ꓙꓵꓽ ꓔꓯ ꓠꓲ, ꓠꓵ ꓔꓬ ꓟ ꓥ ꓡꓳ꓿
(ꓬꓳ‐ꓦ 14ꓽ14) ꓗꓪ꓾ ꓬꓰ‐ꓢꓴ ꓟꓬꓱ ꓗꓪ ꓐꓰ ꓓꓰꓽˍ ꓟ ꓮ ꓫꓵꓽ ꓔꓯ ꓥ ꓟꓲ꓾ ꓐ, ꓐ ꓪꓴ‐ꓢ ꓠꓬ ꓖꓶ ꓡˍ ꓥꓳ꓾ ꓐꓰ ꓬꓰ‐ꓢꓴ ꓡꓰ ꓐꓯ ꓔ ꓡꓳ꓿ ꓝꓮꓲ ꓕꓲ ꓧꓪ, ꓬꓰ‐ꓢꓴ ꓠꓬ ꓟꓬ ꓔꓶ ꓕꓲ ꓣꓳ ꓔꓯ “ꓠꓴ ꓐꓱ ꓶ ꓥꓪ ꓔꓯ ꓮ ꓫꓵꓽ ꓬꓰ ꓝꓲ ꓠꓲ, ꓫꓵˍ ꓡ(ꓟ‐ꓘꓳ 10ꓽ51)” ꓐꓰ ꓠ ꓠꓬꓲˍ ꓡꓳ꓿ ꓟꓬ ꓔꓶ ꓮ ꓫꓵꓽ ꓠꓲ, ꓫꓵˍ ꓟ ꓔꓯ ꓬꓲ ꓢꓷ.ˍ ꓥ ꓟꓲ꓾ ꓬꓲ ꓔꓯ ꓓꓰꓽ ꓝꓲ ꓠꓲ, ꓫꓵˍ ꓟ ꓑꓶ. ꓓꓴ꓾ ꓬꓰ‐ꓢꓴ ꓠꓬ ꓬꓲ ꓟꓽ ꓢꓷ. ꓔ ꓟ ꓡꓰ ꓠ ꓠꓬꓲˍ ꓡꓳ꓿
ꓪꓴ‐ꓢ ꓠꓬ ꓣꓳ ꓣꓱꓽ ꓞ, ꓔꓬ ꓟ ꓔꓯ ꓬꓲ ꓢꓷ.ˍ ꓥ ꓟꓲ꓾ ꓣꓳ ꓔꓯ ꓬꓲ ꓐꓰ ꓟꓽ ꓠꓽ ꓠꓽ ꓙꓻ ꓡꓯ ꓘꓳ ꓝꓲ ꓠꓲ, ꓫꓵˍ ꓡꓳ꓿ ꓬꓲ ꓔꓯ ꓫ. ꓕꓱ ꓡ ꓝꓲ ꓠꓲ, ꓫꓵˍ ꓡꓳ꓿ ꓬꓲ ꓔꓯ ꓠ ꓠ, ꓝꓲ ꓠꓲ, ꓫꓵˍ ꓡꓳ꓿ ꓖꓳ ꓟ ꓡꓰꓽ ꓟꓽ ꓞꓲ ꓬꓲ ꓔꓯ ꓦ ꓡꓱ ꓐꓳ ꓝꓲ ꓠꓲ, ꓫꓵˍ ꓡꓳ꓿ ꓬꓲ ꓠꓬ ꓣꓳ ꓮꓽ ꓐ ꓥ ꓟ ꓑꓶ. ꓓꓴ꓾ ꓣꓳ ꓠꓬ ꓬꓲ ꓔꓬ ꓗꓪ ꓮ ꓫꓵꓽ ꓔꓯ ꓥˍ ꓟꓲ ꓓꓰꓽ ꓐ ꓡˍ ꓡꓳ꓿ ꓖꓳ ꓡꓱ ꓥ ꓟꓲ ꓟꓲ ꓠꓯ ꓞꓳ ꓤ ꓥ ꓟ ꓣꓳ ꓠꓬ꓾ ꓣꓳ ꓐꓱ ꓶ ꓮ ꓡꓲ ꓕꓲ ꓫꓵꓽ ꓠꓬ ꓙꓲꓻˍ ꓡ꓾ ꓐꓯˍ ꓟ ꓔꓯ ꓣꓳ ꓚꓲ. ꓛꓬ ꓟꓽ ꓢꓷ.꓿ ꓣꓳ ꓠꓬ ꓣꓳ ꓠꓲ, ꓫꓵˍ ꓟ ꓣꓱꓽ ꓞ, ꓔꓬ ꓟ ꓔꓯ ꓟꓷꓽ ꓠꓷ, ꓗꓪ ꓐꓰ ꓐꓯ ꓓꓳˍ ꓟ ꓗꓪ ꓐꓰ꓾ ꓣꓳ ꓐꓱ ꓶ ꓚꓵ ꓚꓵ ꓣꓱꓽ ꓬꓯꓼ ꓣꓱꓽ ꓞ, ꓟ ꓕꓲ ꓐꓱ ꓔꓯ ꓢꓷ. ꓡˍ ꓡꓳ꓿ ꓣꓳ ꓠꓲ, ꓟ ꓠꓯꓸꓼ ꓗꓪ ꓚꓵ ꓔ ꓟ ꓫ ꓔ ꓟ꓾ ꓣꓳ ꓠꓲ, ꓟ ꓠꓯꓸꓼ ꓗꓪ ꓙꓳˍ ꓟ ꓔꓯ꓾ ꓪꓴ‐ꓢ ꓔꓯ ꓐꓯ ꓟ. ꓖꓶˍ ꓟ ꓗꓪ ꓐꓰ꓾ ꓣꓳ ꓠꓬ ꓢꓲ ꓒ ꓐꓰ ꓟꓬꓽ ꓠꓬꓲ ꓠꓶꓽ ꓙꓰˍ ꓟ ꓔꓯ ꓟꓳ. ꓖꓶˍ ꓡꓳ꓿
ꓣꓳ ꓪꓽ ꓘꓴˍ ꓕꓯ ꓬꓲ. ꓬꓲ ꓢꓲ ꓟꓽ ꓙꓳ ꓟ ꓬꓲ ꓖꓻ ꓟꓽ ꓙꓳ ꓟ ꓐꓯ ꓘꓶꓽ ꓣꓱꓽ ꓢꓲ ꓪꓽ ꓟꓽ ꓘꓴ ꓠ, ꓟ ꓬꓰ‐ꓢꓴ ꓡꓰ ꓣꓳ ꓔꓯ ꓙꓳꓺ ꓗꓽ ꓖꓶ ꓔ ꓡꓳ꓿ ꓖꓳ ꓟ ꓑꓶ. ꓓꓴ ꓬꓲ ꓠꓬ ꓣꓳ ꓐꓱ ꓶ ꓐꓲ ꓜꓲꓼˍ ꓟ ꓪꓽ ꓘꓴ ꓓꓴ ꓥ ꓟ꓾ “ꓢꓲ ꓒ ꓡꓰ ꓟ. ꓔ ꓟ ꓪꓽ ꓘꓴ ꓓꓴ” ꓔꓯ ꓖꓶ ꓔꓲ. ꓬꓰ ꓟ ꓥ ꓡꓳ꓿ ꓕꓱ ꓟ ꓠꓬ ꓮ ꓘꓶ ꓐꓲꓻˍ ꓟ ꓪꓽ ꓘꓴ ꓓꓴ ꓕꓲ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓪꓽ ꓘꓴ ꓡꓯ꓿
“ꓟꓴꓽ ꓗꓪ ꓕꓯꓽ ꓢꓲ ꓗꓪ ꓔꓬ ꓟ ꓥꓪ ꓠꓴꓽ ꓐ, ꓐꓽꓳ꓾ ꓥꓪ ꓠꓴꓽ ꓠꓬ ꓠꓴ ꓢꓲ ꓫꓬˍ ꓟ ꓟꓬꓱ ꓔꓯ ꓒꓵꓽ ꓗꓴ. ꓝꓲ꓿ ꓠꓴ ꓗꓴꓷꓼ ꓓꓳ ꓡ ꓝꓲ꓿ ꓟꓴꓽ ꓗꓪ ꓕꓯꓽ ꓢꓲ ꓗꓪ ꓠꓴ ꓠꓲ, ꓡꓶꓽ ꓒꓬꓱꓼ ꓡ ꓟˍ ꓡꓰ ꓐꓰ ꓟꓲ ꓠꓯ ꓗꓪˍ ꓟꓲ ꓒꓬꓱꓼ ꓡ ꓝꓲ꓿
ꓕꓲ ꓠꓬꓲ ꓡꓰ ꓕꓲ ꓠꓬꓲ ꓥꓪ ꓠꓴꓽ ꓣꓱꓽ ꓬꓯꓼˍ ꓟ ꓜꓽ ꓓꓴ ꓠꓬꓲ. ꓠꓬꓲ ꓥꓪ ꓠꓴꓽ ꓔꓯ ꓖꓶ ꓜꓽ ꓡꓯ꓿ ꓥꓪ ꓠꓴꓽ ꓔꓯ ꓛꓬ ꓡ ꓢꓴ ꓔꓯ ꓥꓪ ꓠꓴꓽ ꓖꓽ ꓖꓶˍ ꓟˍ ꓡꓰ ꓐꓰ꓾ ꓠꓴ ꓡꓰ ꓥꓪ ꓠꓴꓽ ꓛꓬ ꓗꓷ ꓟ ꓖꓽ ꓖꓶ ꓡꓯ꓿ ꓫꓵꓽ ꓠꓬꓲˍ ꓟ ꓗꓪ ꓥꓪ ꓠꓴꓽ ꓔꓯ ꓕꓽ ꓧꓳꓽ ꓓꓵꓽ ꓙꓰ꓿ ꓥꓶˍ ꓟ ꓖꓳ ꓕꓲ ꓣꓳ ꓗꓪ ꓐꓰ ꓠꓽ ꓥꓪ ꓠꓴꓽ ꓔꓯ ꓚꓬꓴ ꓙ ꓡꓯ꓿
ꓮ ꓡꓲꓳ ꓐꓯ ꓠꓬ ꓗꓴꓷꓼˍ ꓐꓰ ꓪꓽ ꓠꓬꓲˍ ꓟˍ ꓐꓰ ꓟꓬꓱ ꓓꓳꓽ ꓠꓬ꓾ ꓕꓲ ꓞꓲꓼ ꓕꓲ ꓑ ꓠꓴ ꓔꓯ ꓟ ꓥꓳ꓿ ꓕꓱ ꓡꓱ ꓒꓬꓱꓼ ꓡ ꓝꓲ꓿ ꓮꓟꓰꓠ꓿
