ꓟ‐ꓘꓳ 10ꓽ28‐31
ꓗ, ꓛꓲꓽ ꓠꓲ, ꓡꓰ ꓬꓰˍ ꓕꓯ ꓠꓽ꓾ ꓪꓴ‐ꓢ ꓔꓯ ꓔꓲ ꓖꓶˍ ꓟ ꓮ ꓙꓵꓽ ꓠꓬ ꓮ ꓘꓶ. ꓒꓵꓽˍ ꓟ ꓥ ꓡꓳ꓿ ꓖꓳ ꓡꓱ ꓔꓲ ꓖꓶˍ ꓟ ꓔꓲ ꓓꓴ ꓮ ꓙꓵꓽ ꓠꓯꓸꓼ ꓗꓪ ꓪꓴꓽ ꓓꓰ ꓡꓰˍ ꓟ ꓠꓬ꓾ ꓪꓴ‐ꓢ ꓙꓵꓽ ꓗ ꓔꓯ ꓛꓳ ꓫꓱꓽ ꓢꓲ ꓠꓬꓲ ꓟꓽ ꓙꓳ ꓞꓳ ꓫ. ꓐꓴ ꓔꓯ ꓫꓱ. ꓤ ꓠꓲ, ꓟꓳ. ꓖꓶˍ ꓟ ꓥ ꓡꓳ꓿ ꓪꓽ ꓘꓴˍ ꓟ ꓠꓬ ꓫ. ꓟꓳ ꓠꓲ, ꓡꓰ ꓔꓲ ꓖꓶˍ ꓟ ꓔꓲꓺ ꓓꓴ ꓓꓽ ꓟ ꓥ ꓡꓳ꓿
ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓙꓳˍ ꓟ ꓮ ꓙꓵꓽ ꓡꓳ ꓗꓷ ꓢꓲ ꓢꓲ ꓒ ꓔꓯ ꓛꓳꓻ ꓢꓴ ꓮ ꓙꓵꓽ ꓟꓶˍ ꓟ ꓣꓱꓽ ꓛꓰꓽ ꓐꓴ ꓔꓯ ꓬꓰ‐ꓢꓴ ꓡꓰ ꓖꓴ ꓟ. ꓖꓶ ꓔ ꓡꓳ꓿
ꓢꓲꓽ ꓫꓬ ꓕꓳꓽ ꓶ ꓕꓱ ꓟ ꓠꓬ ꓖꓴꓽ ꓙꓴꓽ ꓑꓶ. ꓓꓴ ꓬꓰ‐ꓢꓴ ꓗ ꓠꓯ. ꓛꓳ ꓟꓽ ꓐ ꓡ ꓟ ꓞꓳ ꓐꓳ ꓤ ꓖꓴ ꓡꓯ. ꓬꓲ ꓟ. ꓟꓲꓽ ꓗ ꓠꓯ. ꓗꓪ ꓟ ꓢꓲꓽ ꓫꓬ ꓕꓳꓽ ꓶ ꓝꓲ. ꓥ ꓡꓳ꓿ ꓬꓰ‐ꓢꓴ ꓡꓰ ꓞꓳ ꓐꓳ ꓕꓲ ꓣꓳ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓡꓰ ꓫ.ˍ ꓡꓳ꓾ ꓐꓰ ꓐꓯ ꓖꓶˍ ꓡꓳ꓿
ꓢꓲ ꓒ ꓬꓰ‐ꓢꓴ ꓬꓲ ꓝꓲ ꓓꓴ ꓐꓴ ꓠꓬ ꓬꓲ ꓪ ꓔꓯ ꓙꓳˍ ꓟ ꓮ ꓙꓵꓽ ꓡꓳ ꓔ ꓬꓰ ꓢꓲ ꓬꓰ‐ꓢꓴ ꓗ ꓠꓯ. ꓛꓳ ꓙꓰˍ ꓡꓳ꓿ ꓖꓳ ꓡꓱ ꓠꓬꓲ ꓬꓰ‐ꓢꓴ ꓠꓬ꓾ ꓙꓳˍ ꓟ ꓮ ꓙꓵꓽ ꓐꓰ꓾ ꓚꓲ. ꓛꓬ ꓕꓲ ꓦꓲꓻ ꓢꓴ ꓮ ꓬꓲꓼ ꓠꓬꓲ ꓤ ꓐꓴ ꓔꓯ ꓡꓳ ꓗꓷ ꓢꓲ ꓬꓲ ꓗ ꓠꓯ. ꓛꓳ ꓢꓴ ꓐꓴ ꓠꓬ ꓕꓲꓽ ꓦꓬꓻ ꓝ. ꓡꓯꓼ ꓫꓴ ꓟꓶˍ ꓥꓳ꓾ ꓐꓰ ꓐꓯ ꓖꓶˍ ꓡꓳ꓿ ꓖꓳ ꓟ ꓡꓰꓽ ꓟꓽ ꓞꓲꓺ ꓡ ꓠ, ꓟ ꓕꓲ ꓤꓶꓻ ꓗꓪ ꓥˍ ꓟꓲ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓟꓶˍ ꓥꓳ꓾ ꓐꓰ ꓙ ꓟꓳ ꓘꓶꓽ ꓖꓶˍ ꓡꓳ꓿
ꓒꓲ‐ꓕꓱ ꓐꓰ ꓛꓳꓽ ꓒꓯ, ꓐꓴ ꓠꓬ ꓬꓰ‐ꓢꓴ ꓗ ꓠꓯ. ꓛꓳ ꓠ, ꓟ ꓐꓱ ꓶ ꓬꓲ ꓪ ꓠꓬ ꓙꓳˍ ꓟ ꓮ ꓙꓵꓽ ꓔꓯ ꓡꓳ ꓔꓲ. ꓗꓷ ꓟ ꓑꓶ. ꓓꓴ꓾ ꓬꓲ ꓪ ꓐꓱ ꓶ ꓮ ꓫꓵꓽ ꓡꓯꓼ ꓪ ꓙꓳˍ ꓡ꓿ ꓮ ꓡꓲ ꓫꓵꓽ ꓒꓵꓽ ꓶꓻ ꓔꓯ ꓫ ꓔ ꓟꓶˍ ꓡ꓿ ꓠ ꓠꓬꓲ ꓘꓶꓽ ꓕꓱ ꓟ ꓠꓬ ꓠꓬꓲ. ꓠꓬꓲ ꓣꓳ ꓐꓱ ꓶ ꓒꓬꓱꓼ ꓡˍ ꓟ ꓠ ꓠꓬꓲ ꓘꓶꓽ ꓥ ꓡꓳ꓿ ꓣꓳ ꓐꓴ ꓠꓬ ꓣꓳ ꓔꓯ ꓔꓳ, ꓢꓴ ꓐꓰ ꓫ. ꓙꓵ ꓟꓷꓼ ꓙꓵˍ ꓟ ꓔꓯ ꓔꓳ, ꓜꓳꓽ ꓠ, ꓟ ꓐꓱ ꓶ ꓮ ꓫꓵꓽ ꓑꓶ. ꓓꓴ ꓬꓰ‐ꓢꓴ ꓔꓯ ꓛꓳꓻ ꓔꓬ ꓡ꓿ ꓣꓳ ꓒꓵꓽ ꓶꓻ꓾ ꓣꓳ ꓡꓯꓼ ꓫꓴ ꓠꓬ ꓮ ꓫꓵꓽ ꓥ ꓡ꓾ ꓐꓰ ꓠ ꓠꓬꓲ ꓓꓴ ꓙꓳˍ ꓡꓳ꓿
ꓠ ꓠꓬꓲ ꓘꓶꓽ ꓕꓱ ꓟ ꓐꓱ ꓶ ꓬꓰ‐ꓢꓴ ꓔꓯ ꓒꓳ, ꓖꓶ ꓓꓴ ꓙꓳˍ ꓥꓳ꓿ ꓬꓲ ꓠꓬ ꓐ ꓧꓷꓼ ꓧꓷꓼ ꓡꓰꓽ ꓬꓰ ꓢꓲ꓾ ꓐ ꓫꓱ, ꓐ ꓠꓲꓽ ꓬꓰ ꓢꓲ꓾ “ꓥꓪ ꓤꓽꓳ꓾ ꓥꓪ ꓮ. ꓟꓲꓽꓳ꓾ ꓡꓯ꓿ ꓥꓪ ꓔꓯ ꓛꓳˍ ꓠꓬ ꓠꓴ ꓔꓯ ꓮ ꓫꓵꓽˍ ꓟꓲ ꓟꓽ ꓟꓶ ꓟꓽ ꓗꓷ ꓡꓰ꓿ ꓠꓴ ꓓꓵꓽ ꓙꓽ ꓔ ꓟ ꓥꓳ ꓡꓳ. ꓔ ꓟ ꓢꓶ. ꓟꓽ ꓞꓲꓺ ꓾ ꓥꓪ ꓠꓬ ꓠꓴ ꓔꓯ ꓡꓯꓼ ꓫꓴ ꓓꓽ ꓟ ꓖꓶˍ ꓥꓳ꓾” ꓐꓰ ꓐꓯ ꓖꓶ ꓡˍ ꓥꓳ꓿
ꓚꓵ ꓚꓵ ꓪꓴ‐ꓢ ꓠꓬ ꓮ ꓘꓶ. ꓖꓶ ꓠꓲ, ꓒꓴˍ ꓟ ꓪꓴ‐ꓢ ꓥ ꓢꓲ ꓠꓬꓲ꓾ ꓬꓲ ꓙ ꓟꓳ ꓘꓶꓽ ꓐꓴ ꓔꓯ ꓐꓲ ꓜꓲꓼ ꓡꓰ ꓝꓲ ꓢꓴ ꓥ ꓡꓳ꓿ ꓣꓳ ꓟꓶ ꓠ, ꓟ ꓡꓯꓼ ꓫꓴ ꓓꓽ ꓟ ꓠꓬ꓾ ꓟꓲ ꓠꓯ ꓕꓱ ꓟ ꓐꓰ ꓗꓴ. ꓙꓲꓽ ꓙꓳˍ ꓟ ꓟꓲ ꓠꓯ ꓐꓳ ꓶ ꓟꓽ ꓥ ꓥ ꓐꓰ꓾ ꓣꓳ ꓐꓴ ꓔꓯ ꓪꓴ‐ꓢ ꓡꓰ ꓖꓶˍ ꓟ ꓥꓳ ꓡꓳ. ꓓꓴ꓾ ꓗ, ꓛꓲꓽ ꓓꓴ ꓐꓰ ꓢꓲ ꓡꓲ ꓟ ꓐꓴ ꓠꓬ ꓬꓲ ꓒꓵꓽ ꓐꓯ ꓞꓷ, ꓟꓽ ꓓꓻ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓠꓬ ꓢꓲ ꓒ ꓔꓯ ꓝ. ꓢꓲ ꓠꓬꓲ ꓦ ꓡꓱ ꓐꓳ ꓓꓴ ꓬꓰ ꓡꓯ꓾ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓠꓬ ꓣꓳ ꓐꓱ ꓶ ꓒꓬꓱꓼ ꓡˍ ꓥꓳ꓿
