ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓾ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ ꓟ‐ꓘꓳ 9ꓽ41‐50 ꓗꓪ ꓢꓲ ꓒ ꓬꓰ‐ꓢꓴ ꓡꓰ ꓕꓱ ꓡꓱ ꓐꓯ ꓔ ꓡꓳ꓿ “ꓮꓽ ꓟ ꓥˍ ꓟꓲ ꓥꓪ ꓔꓯ ꓙꓵꓻˍ ꓟ ꓤ ꓠꓱ ꓤ ꓕꓱ ꓟꓬ ꓟ ꓔꓯ ꓡꓱ. ꓗꓷ ꓝꓲ ꓢꓴ ꓔꓯ ꓠꓬ꓾ ꓬꓲ ꓗꓶ. ꓝꓲ. ꓗꓪ ꓡꓳ ꓙꓱ ꓓꓽ ꓟ ꓞꓳ, ꓔ ꓢꓲ꓾ ꓬꓲꓻ ꓡꓴꓽ ꓐꓱ ꓗꓪ ꓡꓳ ꓧꓳꓽ ꓗꓷˍ ꓟ ꓠꓽ ꓬꓲ ꓐꓱ ꓶ ꓟꓬꓽ ꓠꓬꓲ ꓙꓲˍ ꓡꓳ꓿” ꓐꓰ ꓬꓰ‐ꓢꓴ ꓡꓰ ꓐꓯ ꓔ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓗꓪ ꓢꓲ ꓒ ꓬꓰ‐ꓢꓴ ꓡꓰ꓾ ꓬꓲ ꓔꓯ ꓙꓵꓻ ꓢꓴ ꓮ ꓟꓬ, ꓗꓪ ꓕꓲ ꓣꓳ ꓐꓯˍ ꓟ ꓠꓬ ꓮ ꓡꓲ ꓫꓵꓽ ꓔꓯ ꓐꓯ ꓟ ꓥ ꓡ ꓐꓯ ꓠꓬ꓾ ꓤ ꓠꓱ ꓤ ꓖꓳ ꓟ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻ ꓢꓴ ꓥ ꓢꓲ ꓠꓬꓲ ꓣꓳ ꓟꓬ ꓛꓲˍ ꓟꓲ ꓢꓷ. ꓠꓲ, ꓟꓽ ꓙꓳ꓾ ꓣꓳ ꓡꓰ ꓛꓲˍ ꓟꓲ ꓒꓴ ꓫꓵ ꓟꓽ ꓙꓳ꓾ ꓣꓳ ꓡꓰ ꓛꓲˍ ꓟꓲ ꓙꓵꓽ ꓪ ꓟꓽ ꓙꓳ꓾ ꓣꓳ ꓡꓰ ꓛꓲˍ ꓟꓲ ꓢꓯꓼ ꓪ ꓟꓽ ꓙꓳ꓾ ꓣꓳ ꓡꓰ ꓛꓲˍ ꓟꓲ ꓣꓱꓽ ꓬꓰ ꓟꓽ ꓐ ꓡ ꓟ ꓮ ꓙꓵꓽ ꓔꓯ ꓠꓬ ꓣꓳꓺ ꓓꓰ ꓡꓰˍ ꓟ ꓤ ꓠꓱ ꓤ ꓐꓰ꓾ ꓢꓲ ꓒ ꓬꓰ‐ꓢꓴ ꓡꓰ ꓐꓯ ꓔ ꓡꓳ꓿
ꓖꓳ ꓡꓱ ꓠꓬꓲ ꓣꓳ ꓡꓰ ꓛꓲˍ ꓟꓲ ꓟꓽ ꓐ ꓡ ꓟ ꓤ ꓠꓱ ꓤ ꓔꓯ ꓡꓱ. ꓗꓷ ꓝꓲˍ ꓥꓳ ꓐꓯ ꓠꓬ꓾ ꓣꓳ ꓠꓽ ꓮ ꓢꓳ ꓕꓯ ꓢꓲ ꓒ ꓬꓰ‐ꓢꓴ ꓐꓯ ꓟ ꓡꓰ ꓣꓳ ꓗꓶ. ꓝꓲ. ꓗꓪ ꓡꓳ ꓓꓰ ꓓꓽ ꓟ ꓞꓳ, ꓔ ꓢꓲ ꓠꓬꓲ ꓬꓲꓻ ꓡꓴꓽ ꓐꓱ ꓠꓯꓸꓼ ꓗꓪ ꓡꓳ ꓧꓳꓽ ꓗꓷˍ ꓟ ꓠꓬ ꓪ ꓜꓲ ꓙꓲˍ ꓥꓳ꓾ ꓐꓰ ꓣꓳ ꓔꓯ ꓐꓯ ꓖꓶ ꓡˍ ꓥꓳ꓿
ꓖꓳ ꓡꓱ ꓠꓬꓲ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓤ ꓠꓱ ꓤ ꓕꓱ ꓕꓶ, ꓔꓯ ꓣꓳ ꓮ ꓡꓲ ꓐꓰ ꓡꓱ. ꓗꓷ ꓝꓲˍ ꓡ ꓐꓯ ꓠꓬ꓾ ꓣꓳ ꓟꓬ ꓢꓶꓽ ꓗꓪ ꓐꓰ ꓥˍ ꓟꓲ꓾ ꓣꓳ ꓟꓷꓽ ꓠꓷ, ꓣꓳ ꓡꓯ ꓒꓯ,꓾ ꓣꓳ ꓛꓲ ꓒꓯ, ꓣꓳ ꓧꓪꓽ ꓖꓳ ꓓꓱꓽ ꓗꓪ ꓐꓰ ꓕꓱ ꓤ ꓠꓱ ꓤ ꓐꓴ ꓔꓯ ꓣꓳ ꓡꓱ. ꓗꓷ ꓝꓲˍ ꓥꓳ꓿
ꓟꓬ ꓢꓶꓽ ꓗꓪ ꓐꓰ ꓠꓬ꓾ ꓕꓱ ꓕꓲ ꓣꓳ ꓠꓬ ꓥꓪ ꓡꓰ ꓛꓲˍ ꓟꓲ ꓢꓷ. ꓠꓲ, ꓟꓽ ꓙꓳ꓾ ꓥꓪ ꓡꓰ ꓛꓲˍ ꓟꓲ ꓒꓴ ꓫꓵ ꓟꓽ ꓙꓳ ꓐꓯˍ ꓟ ꓟꓬ ꓢꓶꓽ ꓗꓪ ꓐꓰ ꓬꓲ ꓪ ꓕꓯꓽ ꓢꓲ ꓗꓪ ꓠꓬꓲ. ꓤꓲ ꓢꓲ ꓠꓬꓲ ꓡꓳ. ꓠꓬꓲˍ ꓟ ꓟꓬ ꓢꓶꓽ꓿ ꓡꓯ ꓒꓯ, ꓥˍ ꓟꓲ ꓛꓲ ꓒꓯ, ꓗꓪ ꓐꓰ ꓥˍ ꓟꓲ꓾ ꓖꓳ ꓓꓱꓽ ꓗꓪ ꓐꓰ ꓥˍ ꓟꓲ ꓣꓳꓺ ꓓꓰ ꓡꓰˍ ꓟ ꓞꓳ ꓤ ꓐꓴ ꓔꓯ ꓠꓬꓲ. ꓤꓲ ꓪ ꓡꓰ ꓟ ꓔꓯ ꓐꓯˍ ꓟ ꓥ ꓡꓳ꓿ ꓖꓳ ꓡꓱ ꓬꓰˍ ꓕꓯ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓐꓯ ꓔ ꓟ ꓡꓰ ꓛꓬ ꓒꓵꓽ ꓟꓶˍ ꓥꓳ꓿
ꓮ ꓡꓲ ꓘꓶ ꓛꓲ ꓢꓲ ꓒ ꓬꓰ‐ꓢꓴ ꓐꓯ ꓔ ꓡ ꓐꓯ ꓠꓬ꓾ ꓤ ꓠꓱ ꓤ ꓖꓳ ꓟ ꓔꓯ ꓟꓬ ꓢꓶꓽ ꓗꓪ ꓐꓰ ꓡꓳ. ꓛꓬ ꓡꓰ ꓠꓬ꓾ ꓛꓬ ꓡꓰ ꓟ ꓖꓳ ꓕꓲ ꓐꓽ ꓔꓯ ꓗꓳ. ꓓꓳ ꓗꓷ꓿ ꓡꓯꓽ ꓒꓯ, ꓮ ꓡꓲ ꓕꓲ ꓐꓽ ꓠꓬ ꓤ ꓠꓱ ꓤ ꓔꓯ ꓡꓱ. ꓗꓷ ꓝꓲˍ ꓠꓬ ꓖꓳ ꓕꓲ ꓐꓽ ꓔꓯ ꓓꓶ ꓩꓴ ꓗꓷ꓿ ꓛꓲ ꓒꓯ, ꓮ ꓡꓲ ꓕꓲ ꓐꓽ ꓡꓰ ꓬꓰ ꓛꓬ ꓗꓷ ꓠꓬ ꓖꓳ ꓕꓲ ꓐꓽ ꓔꓯ ꓓꓶ ꓞꓷ, ꓗꓷ꓿ ꓮ ꓡꓲꓳ ꓐꓯ ꓠꓬ ꓠꓴ ꓪ ꓟꓬ ꓢꓶꓽ ꓕꓲ ꓐꓽ ꓟꓽ ꓙꓳ꓾ ꓡꓯꓽ ꓒꓯ, ꓕꓲ ꓐꓽ ꓟꓽ ꓠꓷꓼ ꓞ,꓾ ꓛꓲ ꓒꓯ, ꓕꓲ ꓐꓽ ꓟꓽ ꓠꓷꓼ ꓞ, ꓞ, ꓐꓰ ꓟꓴꓽ ꓗꓪ ꓗꓴꓷꓼ ꓗꓪ ꓙꓰ ꓪˍ ꓟ ꓠꓬ꓾ ꓠꓴ ꓪ ꓛꓲ ꓒꓯ, ꓡꓯꓽ ꓒꓯ, ꓟꓬ ꓢꓶꓽ ꓮ ꓙꓵꓽ ꓐꓲ ꓞ, ꓢꓲ ꓠꓬꓲ ꓮ ꓔꓳ. ꓛꓬꓼ ꓟꓵꓽ ꓪꓳꓼ ꓟꓵꓽ ꓗꓪ ꓙꓰ ꓪˍ ꓟ ꓕꓯꓽ ꓢꓲ ꓪ ꓜꓲ ꓙꓲˍ ꓡꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓢꓲꓽ ꓢꓲꓽ ꓡꓰꓽ ꓫꓬꓽ ꓫꓬꓽ ꓡꓰꓽ ꓐꓯ ꓟ. ꓖꓶ ꓡ ꓔꓬ ꓟ ꓥ ꓡꓳ꓿
ꓖꓳ ꓟ ꓑꓶ. ꓓꓴ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓠꓬ꓾ ꓣꓳ ꓠꓯ. ꓘꓪ ꓔꓬ ꓢꓴ ꓔꓯ ꓠꓬ ꓫꓱ. ꓤ ꓠ, ꓟ꓾ ꓣꓳ ꓠꓯ. ꓘꓪ ꓔꓬ ꓢꓴ ꓔꓯ ꓣꓳꓽ ꓟꓽ ꓡꓱ. ꓐꓱꓽ ꓗꓷ ꓠ, ꓟ꓾ ꓟꓽ ꓗꓶ. ꓠ, ꓟ꓾ ꓣꓳ ꓡꓰ ꓟꓽ ꓘꓶ ꓙꓵꓻ ꓠ, ꓟ꓾ ꓬꓲ ꓪ ꓔꓯ ꓣꓳ ꓬꓰ ꓠꓲ, ꓫꓵˍ ꓟ ꓡꓰ ꓟꓽ ꓬꓰ ꓠ, ꓟ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓐꓯ ꓟ. ꓖꓶ ꓡ ꓔꓬ ꓡꓳ꓿
ꓕꓱ ꓡꓱ ꓟꓽ ꓥ ꓕꓯ ꓣꓳ ꓠꓯꓸꓼ ꓗꓪ ꓔꓬ ꓢꓴ ꓔꓯ ꓣꓳ ꓡꓱ. ꓗꓷ ꓝꓲˍ ꓥꓳ ꓐꓯ ꓠꓬ꓾ ꓮ ꓔꓳ. ꓛꓬꓼ ꓟꓵꓽ ꓪꓳꓼ ꓟꓵꓽ꓾ ꓥ ꓠꓬ꓾ ꓗꓶ. ꓝꓲ. ꓗꓪ ꓡꓳ ꓓꓰ ꓓꓽ ꓟ ꓞꓳ, ꓔ ꓢꓲ ꓬꓲꓻ ꓡꓴꓽ ꓐꓱ ꓠꓯꓸꓼ ꓗꓪ ꓡꓳ ꓧꓳꓽ ꓗꓷˍ ꓟ ꓠꓬ ꓪ ꓜꓲ ꓙꓲˍ ꓥꓳ꓾ ꓐꓰ ꓣꓳ ꓔꓯ ꓐꓯ ꓖꓶ ꓡˍ ꓥꓳ꓿
