ꓟ‐ꓘꓳ 9ꓽ30‐37
ꓬꓲ ꓪ ꓠꓬ ꓖꓳ ꓗꓪ ꓐꓰ ꓓꓳ ꓙꓰ ꓢꓲ꓾ ꓖ‐ꓡꓲ‐ꓡꓲ ꓟꓵ ꓗꓪ ꓗꓳ. ꓙꓰˍ ꓡꓳ꓿ ꓬꓰ‐ꓢꓴ ꓠꓬ ꓬꓲ ꓛꓳꓽ ꓒꓯ, ꓐꓴˍ ꓐꓰ ꓬꓲ ꓮ ꓡꓲ ꓗꓪ ꓔꓬ ꓟ ꓮꓽ ꓟ ꓔꓯˍ ꓟꓲ ꓢꓷ. ꓡꓰ ꓝꓲ ꓠꓲ, ꓟꓽ ꓫꓵ꓿ ꓬꓲ ꓠꓬ ꓬꓲ ꓛꓳꓽ ꓒꓯ, ꓐꓴ ꓔꓯ ꓟ. ꓖꓶ ꓢꓲ꓾ ꓡ‐ꓞꓳ‐ꓮ‐ꓐꓲ ꓔꓯ ꓠꓽ ꓞꓳ ꓤ ꓡꓯꓽ ꓒꓯ, ꓗꓪ ꓡꓯꓼ ꓙꓱ ꓗꓷˍ ꓥꓳ꓿ ꓖꓳ ꓡꓱ ꓢꓲ ꓬꓲ ꓪ ꓡꓰ ꓬꓲ ꓔꓯ ꓢꓰꓼ ꓗꓷˍ ꓥꓳ꓿ ꓢꓰꓼ ꓗꓷ ꓗ ꓠꓯ. ꓢꓽ ꓠꓬꓲ ꓠꓬ ꓢꓯ. ꓬꓲꓼ ꓡˍ ꓥꓳ꓾ ꓐꓯ ꓖꓶˍ ꓡꓳ꓿ ꓖꓳ ꓡꓱ ꓥ ꓟꓲ ꓐꓯ ꓘꓶ ꓕꓱ ꓟ ꓔꓯ ꓬꓲ ꓪ ꓟꓽ ꓙꓽ ꓜꓲꓼ꓿ ꓬꓲ ꓔꓯ ꓠˍ ꓟꓲ ꓠ ꓠꓬꓲ ꓟꓽ ꓑꓶ.꓿
ꓬꓲ ꓪ ꓘ,‐ꓒꓱ‐ꓠꓴ ꓗꓪ ꓛꓲ ꓬꓰ ꓢꓲ꓾ ꓦꓲ ꓠꓯꓸꓼ ꓗꓪ ꓔꓬ ꓕꓯ ꓬꓰ‐ꓢꓴ ꓡꓰ ꓬꓲ ꓪ ꓔꓯ꓾ ꓮꓽ ꓢꓳ ꓕꓯ ꓙ ꓖꓴ ꓗꓪ ꓠꓴ ꓪ ꓮ ꓫꓵꓽ ꓔꓯ ꓟꓳ. ꓧꓳꓺ ꓡꓯ ꓘꓳ ꓡ? ꓐꓯˍ ꓡꓳ꓿ ꓬꓲ ꓪ ꓠꓽ ꓙ ꓖꓴ ꓗꓪ꓾ ꓬꓲ ꓪ ꓗꓳ ꓡꓳ ꓗꓪ ꓪ ꓜꓲ ꓪꓴꓽˍ ꓟ ꓮꓽ ꓟ ꓥ ꓟ ꓔꓯ ꓟꓳ. ꓧꓳꓺ ꓡꓯ ꓘꓳ ꓗꓷ ꓠꓬꓲ ꓟꓽ ꓪꓳ, ꓔꓬ ꓡꓳ꓿ ꓖꓳ ꓡꓱ ꓠꓬ ꓬꓰ‐ꓢꓴ ꓠꓬꓲ. ꓠ. ꓢꓲ꓾ ꓬꓲ ꓛꓳꓽ ꓒꓯ, ꓞꓲ ꓠꓬꓲꓽ ꓣꓳ ꓔꓯ ꓘꓴ ꓔꓯ, ꓡ ꓢꓲ ꓠꓬꓲ꓾ ꓓꓽ ꓪꓴ. ꓬꓰ ꓠꓲ, ꓫꓵ ꓢꓴ ꓠꓬ꓾ ꓓꓽ ꓓꓰˍ ꓐꓰ ꓮ ꓙꓵꓽ ꓢꓴ ꓔꓯ ꓣꓱꓽ ꓙ ꓢꓴ ꓬꓰ ꓠꓯ, ꓡꓳ꓾ ꓐꓯ ꓖꓶˍ ꓡꓳ꓿
ꓬꓲ ꓡꓰ ꓤ ꓠꓱ ꓤ ꓕꓲ ꓣꓳ ꓧꓳꓽ ꓔꓯ, ꓡ ꓢꓲ꓾ ꓬꓲ ꓪ ꓗꓳ ꓡꓳ ꓗꓪ ꓦꓰꓼ ꓔꓬ ꓝꓲ ꓢꓲ ꓠꓬꓲ꓾ ꓬꓲ ꓡꓯꓼ ꓖꓳꓼ ꓗꓪ ꓬꓲ ꓔꓯ ꓢꓳ. ꓔ ꓢꓲ ꓬꓲ ꓪ ꓔꓯ꓾ ꓮꓽ ꓟ ꓥˍ ꓟꓲ ꓥꓪ ꓟꓬꓱ ꓗꓪ ꓐꓰ ꓕꓱ ꓡꓱ ꓫꓵ ꓤ ꓠꓱ ꓤ ꓔꓯ ꓘꓳ ꓣꓴˍ ꓠꓬ ꓥꓪ ꓔꓯ ꓘꓳ ꓣꓴˍ ꓟ ꓥ ꓡꓳ꓿ ꓥꓪ ꓔꓯ ꓘꓳ ꓣꓴˍ ꓟ ꓠꓬ ꓥꓪ ꓔꓯ ꓘꓳ ꓣꓴˍ ꓟˍ ꓡꓰꓽ ꓟꓽ ꓞꓲ꓾ ꓥꓪ ꓔꓯ ꓝꓲ ꓩꓴ ꓡ ꓢꓴ ꓔꓯ ꓘꓳ ꓣꓴˍ ꓟ ꓥ ꓡꓳ꓾ ꓐꓯˍ ꓡꓳ꓿
+++++++++++++++++++
ꓢꓲꓽ ꓫꓬ ꓕꓳꓽ ꓶ ꓔꓱ, ꓕˍ ꓟ
“ꓢꓲ ꓒ ꓟꓲꓽ ꓙꓬ ꓗꓪ ꓠꓴ ꓪ ꓙ ꓣꓳꓽˍ ꓠꓬ꓾ ꓬꓲ ꓡꓰ ꓠꓴ ꓪ ꓔꓯ ꓓꓳ, ꓟꓴ ꓖꓶ ꓡˍ ꓥꓳ” ꓐꓰ ꓝꓲ ꓓꓴ ꓬ‐ꓗꓴ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓯ ꓔ ꓡꓳ꓿ (ꓬ‐ꓗꓴ 4ꓽ10)
ꓖꓳ ꓡꓱ ꓠꓬꓲ ꓙ ꓣꓳꓽˍ ꓐꓯ ꓟ ꓮ ꓫꓵꓽ ꓥ ꓡ? ꓢꓲꓽ ꓫꓬ ꓕꓳꓽ ꓶ ꓗꓪ ꓠꓬ “ꓙ ꓣꓳꓽˍ ꓟ” ꓐꓯˍ ꓟ ꓠꓬ ꓚꓲ. ꓛꓬ ꓓꓻˍ ꓟ ꓙꓳˍ ꓟ꓾ ꓚꓲ. ꓛꓬ ꓢꓷ.ˍ ꓟ ꓔꓯ ꓟꓽ ꓘꓪꓼ ꓟ ꓟꓽ ꓢꓯ,ˍ ꓟ꓾ ꓠ ꓡꓳ. ꓗꓴ.ˍˍ ꓟ꓾ ꓚꓲ. ꓛꓬ ꓙꓲꓻ ꓖꓴ ꓐꓱ ꓶˍ ꓡꓰꓽ ꓟꓽ ꓓꓵꓽ ꓙ ꓟ꓾ ꓠꓱ. ꓐꓯ ꓢꓴ ꓔꓯ ꓣꓱꓽ ꓙˍ ꓟ꓾ ꓕꓱ ꓟ ꓔꓯ ꓐꓯˍ ꓟ ꓥ ꓡꓳ꓿
ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ (ꓟ‐ꓘꓳ= 9ꓽ30‐37) ꓗꓪ ꓠꓬ꓾ ꓢꓲ ꓒ ꓬꓰ‐ꓢꓴ ꓬꓲ ꓝꓲ ꓓꓴ ꓐꓴ ꓗꓳ ꓡꓳ ꓗꓪ ꓔꓯꓺ ꓡꓯ ꓘꓳ,ˍ ꓟ ꓠꓲ, ꓟ꓾ ꓪꓴꓽ ꓓꓰ ꓢꓴ ꓬꓰ ꓠꓲ, ꓫꓵˍ ꓟ ꓠꓲ, ꓟ ꓔꓯ ꓟꓳꓻ ꓪ ꓓˍ ꓡꓳ꓿ ꓬꓲ ꓪ ꓐꓴ ꓠꓬ ꓬꓲ ꓪ ꓗꓳ ꓡꓳ ꓗꓪ ꓮꓽ ꓟ ꓠꓬ ꓪ ꓜꓲ ꓪꓴꓽ ꓓꓰ ꓢꓴ ꓥ ꓡ꓾ ꓐꓰ ꓐꓯ ꓡꓯ ꓘꓳ ꓔꓬ ꓡꓳ꓿ ꓦꓬꓼ ꓠꓬꓲ ꓖꓳ ꓟ ꓗꓪ ꓪꓴꓽ ꓓꓰ ꓢꓴ ꓠꓬ (ꓬꓲ ꓕꓲ. ꓙꓳˍ ꓟ꓾ ꓙꓵꓽ ꓪ ꓙꓳˍ ꓟ꓾ ꓐꓳ ꓶ ꓙꓳˍ ꓟ꓾ ꓮ ꓡꓲ ꓗꓪ ꓛꓲ ꓬꓰˍ ꓥ ꓟꓲ ꓢꓴ ꓡꓰ ꓠꓬꓲ ꓠ. ꓖꓴ ꓖꓶˍ ꓟ) ꓠꓬ ꓪꓴꓽ ꓓꓰ ꓢꓴ ꓥ ꓡꓳ꓾ ꓐꓰ ꓞꓳ ꓤ ꓮ ꓟꓬ, ꓓꓵꓽ ꓙꓽ ꓔꓬ ꓟ ꓕꓲ ꓡꓰ, ꓝꓲ ꓓꓴ ꓐꓴ ꓥ ꓟꓲ ꓖꓳ ꓡꓱ ꓓꓵꓽ ꓙꓽ ꓔꓬ ꓡꓳ꓿ ꓖꓳ ꓡꓱ ꓠꓬꓲ ꓬꓰ‐ꓢꓴ ꓠꓬ ꓬꓲ ꓪ ꓔꓯ ꓪꓴ‐ꓢ ꓗꓴꓷꓼ ꓗꓪ ꓪꓴꓽ ꓓꓰˍ ꓟ ꓠꓬ ꓮ ꓡꓲ ꓫꓵꓽ ꓔꓯ ꓐꓯ ꓟ ꓔꓯ ꓬꓲ ꓪ ꓔꓯ ꓟ. ꓖꓶˍ ꓡꓳ꓿ ꓪꓴ‐ꓢ ꓗꓴꓷꓼ ꓗꓪ ꓪꓴꓽ ꓓꓰ ꓢꓴ ꓬꓰ ꓠꓲ, ꓫꓵ ꓢꓴ ꓠꓬ ꓮ ꓙꓵꓽ ꓢꓴ ꓔꓯ ꓣꓱꓽ ꓙ ꓠ ꓗ, ꓡꓳ꓾ ꓐꓰ ꓟ. ꓖꓶˍ ꓡꓳ꓿
ꓤ ꓠꓱ ꓤ ꓐꓴˍ ꓡꓰ ꓐꓰ ꓟꓲ ꓠꓯ ꓗꓪ ꓟꓽ ꓓ ꓢꓯꓼ ꓐꓽ ꓢꓴ꓾ ꓢꓯꓼ ꓐꓽ ꓓꓰ ꓡꓰ ꓢꓴ ꓐꓴ ꓐꓰ ꓠꓬꓲ. ꓞ, ꓟ ꓟꓶ ꓢꓴ ꓐꓴ ꓔꓯ ꓣꓱꓽ ꓙ ꓠ, ꓟ ꓟ. ꓖꓶˍ ꓡꓳ꓿ ꓖꓳ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓠꓬ ꓝꓲ ꓓꓴ ꓐꓴ ꓗꓳ ꓡꓳ ꓗꓪ ꓤ ꓠꓱ ꓤ ꓕꓲ ꓣꓳ ꓧꓳꓽ ꓔꓯ, ꓡ ꓢꓲ ꓠꓬꓲ꓾ ꓬꓲ ꓕꓲ. ꓟꓽ ꓙꓳ ꓟ ꓮ ꓫꓵꓽ ꓙꓵꓽ ꓪˍ ꓟꓲ ꓟꓽ ꓙꓳ ꓟ ꓤ ꓠꓱ ꓤ ꓐꓴ ꓔꓯ ꓘꓳ ꓣꓴˍ ꓟ ꓠꓬ꓾ ꓢꓲ ꓒ ꓬꓰ‐ꓢꓴ ꓔꓯ ꓘꓳ ꓣꓴˍ ꓟ ꓡꓰꓽ ꓟꓽ ꓞꓲꓺ꓾ ꓬꓲ ꓔꓯ ꓝꓲ ꓩꓴ ꓡ ꓢꓴ ꓐ, ꓐ ꓪꓴ‐ꓢ ꓔꓯ ꓥˍ ꓟꓲ ꓘꓳ ꓣꓴˍ ꓟ ꓥ ꓡꓳ꓾ ꓐꓰ ꓐꓯ ꓖꓶˍ ꓡꓳ꓿ ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓥˍ ꓟꓲ ꓟ. ꓖꓶ ꓡ ꓔꓬ ꓟ ꓠꓬ꓾ ꓪꓴ‐ꓢ ꓗꓴꓷꓼ ꓗꓪ ꓚꓵ ꓚꓵ ꓪꓴꓽ ꓓꓰ ꓢꓴ ꓒꓬꓱꓼ ꓡ ꓠ, ꓟ ꓠꓬ꓾ ꓙ ꓣꓳꓽ ꓠꓲ, ꓙꓳ ꓢꓲ ꓠꓱ. ꓐꓯ ꓢꓴ ꓔꓯ ꓣꓱꓽ ꓙ ꓠ ꓗ, ꓟ ꓐꓰ꓾ ꓤ ꓠꓱ ꓤ ꓐꓴˍ ꓡꓰ ꓐꓰ ꓮ ꓫꓵꓽ ꓙꓵꓽ ꓪˍ ꓟꓲ ꓟꓽ ꓙꓳ ꓢꓴ꓾ ꓮ ꓫꓵꓽ ꓬꓲ ꓕꓲ.ˍ ꓟꓲ ꓟꓽ ꓙꓳ ꓢꓴ ꓔꓯ ꓘꓳ ꓣꓴ ꓢꓴ ꓮꓽ ꓟ ꓥˍ ꓟꓲ꓾ ꓢꓲ ꓒ ꓬꓰ‐ꓢꓴ ꓔꓯ ꓘꓳ ꓣꓴ ꓢꓴ ꓥ ꓡꓳ꓾ ꓐꓰ ꓐꓯ ꓟ. ꓖꓶ ꓡ ꓔꓬ ꓡꓳ꓿ ꓚꓵ ꓚꓵ ꓪꓴ‐ꓢ ꓗꓴꓷꓼ ꓗꓪ ꓔꓱ, ꓜꓳꓽˍ ꓟ ꓪꓴꓽ ꓓꓰˍ ꓟ ꓐꓯ ꓟ ꓠꓬ꓾ ꓙꓵꓽ ꓪ ꓾ꓥ ꓠꓬ꓾ ꓬꓲ ꓕꓲ. ꓔꓯ ꓟꓽ ꓧꓪ ꓧꓪ ꓐꓰ꓾ ꓣꓳˍ ꓟ ꓞꓳ ꓤ ꓐꓴ ꓔꓯ ꓣꓱꓽ ꓙˍ ꓟ ꓗꓪ ꓐꓰ ꓡˍ ꓟ ꓥ ꓡꓳ꓾ ꓐꓰ ꓣꓳ ꓔꓯ ꓟ. ꓖꓶ ꓡ ꓔꓬ ꓟ ꓥ ꓡꓳ꓿
