ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓱꓽ ꓛꓰꓽ ꓦꓬꓼ ꓠꓬꓲ ꓛꓲ ꓡꓺꓳ꓾ ꓙꓵꓽ ꓗ ꓦꓬꓼ ꓠꓬꓲ ꓖꓴ ꓡꓰꓳ꓾ ꓕꓱ ꓟ ꓣꓳ ꓑ ꓙꓽ ꓠꓬꓲˍ ꓥꓳ꓿ ꓙꓵꓽ ꓗ ꓦꓬꓼ ꓠꓬꓲ ꓠꓬ ꓖꓴ ꓡꓰꓳ꓿ ꓙꓵꓽ ꓗ ꓗꓪ ꓐꓰ ꓚꓬꓴ. ꓟꓶˍ ꓟ꓾ ꓐꓯ ꓟ ꓠꓬ ꓖꓴ ꓡꓰꓳ꓿ ꓖꓳ ꓡꓱ ꓐꓯ ꓥ ꓟꓲ ꓣꓱꓽ ꓛꓰꓽ ꓦꓬꓼ ꓠꓬꓲ꓾ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓐꓱ ꓶ ꓢꓯꓼ ꓟꓬ ꓖꓶ ꓗꓷ ꓢꓲ ꓠꓬꓲ ꓣꓳ ꓐꓱ ꓶ ꓬꓲ ꓡꓰ ꓚꓬꓴ. ꓓꓳ ꓗꓷꓳ꓿ ꓖꓳ ꓡꓱ ꓠꓬꓲ ꓣꓳ ꓮ ꓙꓵꓽ ꓠꓬ ꓚꓬꓴ. ꓟꓶ ꓡꓰꓳ꓾ ꓐꓰ ꓐꓯ ꓟ ꓣꓳ ꓑ ꓙꓽ ꓠꓬꓲˍ ꓡꓳ꓿
ꓣꓱꓽ ꓛꓰꓽ ꓦꓬꓼ ꓠꓬꓲ ꓗꓪ ꓣꓳ ꓠꓬ ꓣꓳ ꓟꓽ ꓒꓵꓽ ꓥˍ ꓟꓲ꓾ ꓣꓳ ꓟꓽ ꓒꓵꓽ ꓟ ꓞꓳ ꓤ ꓥˍ ꓟꓲ ꓪꓴ‐ꓢ ꓠꓬ ꓫꓱ. ꓤ ꓠꓲ, ꓗꓪ ꓐꓰ ꓣꓳ ꓔꓯ ꓬꓲ ꓣꓱꓽ ꓛꓰꓽ ꓬꓲ ꓠꓵꓻ ꓠꓲ,꓾ ꓫꓴ ꓣꓴˍ ꓟ ꓣꓱꓽ ꓛꓰꓽ ꓖꓶ ꓡꓺꓳ꓿ ꓖꓳ ꓡꓱ ꓐꓯ ꓥ ꓟꓲ ꓣꓱꓽ ꓛꓰꓽ ꓦꓬꓼ ꓠꓬꓲ ꓗꓪ ꓣꓱꓽ ꓛꓰꓽ ꓢꓲ ꓒ ꓥ ꓟ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓖꓼ ꓛꓳ ꓠ, ꓟ ꓐꓱ ꓶ ꓣꓱꓽ ꓛꓰꓽ ꓟꓶ ꓢꓴ ꓡ ꓞꓳ ꓮ ꓡꓲ ꓐꓰ ꓞꓳ ꓙꓳ ꓠ, ꓟ꓾ ꓣꓱꓽ ꓛꓰꓽ ꓠꓯꓸꓼ ꓗꓪ ꓓꓯ, ꓢꓴ ꓡ ꓞꓳ ꓕꓲ ꓣꓳ ꓮ ꓡꓲ ꓐꓰ ꓫ. ꓕꓱ ꓠ, ꓟ ꓣꓳ ꓔꓯ ꓟꓳ. ꓖꓶ ꓡˍ ꓡꓳ꓿
ꓢ. ꓠꓯ (7) ꓠꓽ ꓕꓲ ꓠꓽ ꓢꓲ ꓒ ꓦꓬꓼ ꓠꓬꓲ ꓗꓪ꓾ (ꓡꓴ‐ꓘ 6ꓽ27‐38) ꓗꓪ ꓣꓱꓽ ꓛꓰꓽ ꓢꓲ ꓒ ꓠꓬ ꓣꓳ ꓔꓯ ꓮ ꓡꓲ ꓐꓰ ꓐꓯ ꓔ ꓡ꓿ ꓠꓴ ꓛꓴꓽ ꓙꓳ ꓢꓴ ꓔꓯ ꓠꓲ, ꓠꓵ꓿ ꓠꓴ ꓔꓯ ꓟꓽ ꓔꓱ, ꓟꓽ ꓜꓳꓽ ꓟ ꓬꓰ ꓖꓶ ꓢꓴ ꓔꓯ ꓪꓽ ꓘꓴ ꓙ꓿ ꓠꓴ ꓒꓬꓱꓽ ꓟꓬ ꓕꓲ ꓛꓱꓽ ꓓꓶꓽ ꓢꓴ ꓔꓯ ꓝꓮꓲ ꓕꓲ ꓛꓱꓽ ꓥˍ ꓟꓲ ꓟꓳ. ꓖꓶ꓿ ꓠꓴ ꓐꓵ ꓞꓶꓽ ꓕꓯꓽ ꓢꓲ ꓕꓲ ꓘꓳ, ꓣꓴ ꓗꓷ ꓠꓬ ꓠꓯ. ꓘꓪ ꓕꓲ ꓘꓳˍ ꓟˍ ꓟꓲ ꓖꓶꓽ꓿ ꓠꓴ ꓔꓯ ꓝꓮꓲ ꓕꓲ ꓧꓪ, ꓡꓲ. ꓖꓶ ꓐ ꓡ ꓢꓴ ꓔꓯ ꓡꓰꓽ ꓕꓽ ꓛꓵꓽ ꓖꓶ ꓕꓽ ꓥꓪ. ꓖꓶ꓿ ꓠꓴ ꓔꓯ ꓝꓮꓲ ꓕꓲ ꓧꓪ, ꓚꓱ, ꓖꓶ ꓟꓽ ꓐ ꓡ ꓢꓴ ꓔꓯ ꓥꓪ. ꓖꓶ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓐꓯ ꓔ ꓡꓳ꓿ ꓣꓱꓽ ꓛꓰꓽ ꓢꓲ ꓒ ꓠꓬ ꓬꓲ ꓗ ꓠꓯ. ꓗꓪ ꓖꓼ ꓢꓴ ꓔꓯ ꓥˍ ꓟꓲ ꓕꓱ ꓡꓱ ꓐꓰ ꓢꓯꓼ ꓕꓵꓼ ꓠ, ꓟ ꓐꓱ ꓶ ꓣꓳꓽ ꓔꓯ ꓬꓲꓼ ꓠꓬꓲ. ꓖꓶ ꓔꓬ ꓡꓳ꓿
ꓥ ꓡꓳ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓙꓵꓽ ꓗ ꓦꓬꓼ ꓠꓬꓲ ꓗꓪ ꓟꓬ ꓢꓶꓽ ꓕꓲ ꓢꓶꓽ ꓐꓱ ꓶ ꓟꓬ ꓢꓶꓽ ꓕꓲ ꓢꓶꓽ꓾ ꓢꓶꓽ ꓛꓲ ꓕꓲ ꓛꓲ ꓐꓰ ꓶ ꓢꓶꓽ ꓛꓲ ꓕꓲ ꓛꓲ꓾ ꓕꓱ ꓡꓱ ꓬꓲ ꓡꓲꓽ ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓔꓱ, ꓜꓳꓽˍ ꓟ ꓔꓱ, ꓚꓵˍ ꓟ ꓙꓵꓽ ꓗ ꓠꓯꓸꓼ ꓗꓪ ꓠꓬ ꓕꓱ ꓡꓱ ꓐꓰ ꓥꓳ꓿ ꓖꓳ ꓡꓱ ꓐꓯ ꓥ ꓟꓲ ꓣꓱꓼ ꓛꓰꓽ ꓦꓬꓼ ꓠꓬꓲ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓗ ꓠꓯ. ꓢꓲ ꓛꓳ ꓢꓴ ꓔꓯ ꓙꓵꓽ ꓗ ꓕꓯꓽ ꓢꓲ ꓪꓴꓽˍ ꓟ ꓢꓯ. ꓔꓬ ꓟ ꓚꓱ꓾ ꓙꓵꓽ ꓗ ꓕꓯꓽ ꓢꓲ ꓗꓪ ꓐꓲ ꓜꓲꓼˍ ꓟ꓾ ꓙꓵꓽ ꓗ ꓕꓯꓽ ꓢꓲ ꓗꓪ ꓙ ꓙꓰˍ ꓟ ꓬꓲ ꓚꓱ, ꓕꓲ ꓚꓱ, ꓣꓳ ꓔꓯ ꓟꓳ. ꓖꓶ ꓔꓲ, ꓬꓰˍ ꓡꓳ꓿ ꓕꓱ ꓟ ꓠꓬ ꓘ‐ꓣꓲ‐ꓢ‐ꓔꓴ ꓢꓲ ꓤ꓾ ꓢꓲ ꓒ ꓬꓰ‐ꓢꓴ ꓔꓯ ꓛꓳ ꓢꓴ ꓥ ꓕ ꓑꓳꓸꓼ ꓛꓳ ꓫꓱꓼ ꓠ, ꓟ ꓢꓯꓼ ꓕꓵꓼ ꓠ, ꓟ ꓬꓲ ꓚꓱ, ꓕꓲ ꓚꓱ, ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿
ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓣꓳ ꓑ ꓙꓽ ꓡꓰꓳ꓿ ꓢꓲ ꓒ ꓬꓰ‐ꓢꓴ ꓗ ꓠꓯ. ꓖꓼ ꓢꓴ ꓠꓬ ꓟꓲ ꓠꓯ ꓕꓱ ꓟ ꓗꓪ ꓬꓲ ꓪ ꓚꓰ, ꓔ ꓟ ꓗ ꓚꓵ ꓢꓶ. ꓟꓽ ꓞꓲ꓾ ꓠꓲ, ꓟ ꓠꓯꓸꓼ ꓗꓪ ꓐꓰ ꓓꓳ ꓡˍ ꓟ ꓠꓵꓻ ꓠꓲ, ꓗꓪ ꓐꓰ ꓢꓯꓼ ꓕꓵꓼ ꓠ, ꓟ ꓬꓲ ꓡꓰ ꓣꓳ ꓔꓯ ꓐꓯ ꓟꓳ. ꓖꓶ ꓔ ꓡꓳ꓿ ꓣꓱꓽ ꓛꓰꓽ ꓦꓬꓼ ꓠꓬꓲ ꓗꓪ ꓣꓱꓽ ꓛꓰꓽ ꓗ ꓠꓯ. ꓖꓼ ꓢꓴ꓾ ꓠꓬꓲ ꓟꓳ ꓓꓴ ꓠꓯꓸꓼ ꓗꓪ ꓔꓬ ꓢꓴ ꓣꓳ ꓠꓬ ꓛꓴꓽ ꓙꓳ ꓢꓴ ꓔꓯ ꓠꓲ, ꓠꓵ ꓠ, ꓟ ꓪꓴ‐ꓢ ꓡꓰ ꓣꓳ ꓔꓯ ꓕꓵꓼ ꓪ ꓖꓶ ꓔ ꓡꓳ꓿ ꓛꓴꓽ ꓙꓳ ꓢꓴ ꓔꓯ ꓠꓲ, ꓠꓵ ꓠ, ꓟ ꓠꓬ ꓟꓽ ꓢꓻ꓿
ꓣꓳ ꓡꓲ‐ꓢꓴ ꓥꓳꓽ ꓗꓪ “ꓛꓴꓽ ꓙꓳ ꓢꓴ ꓐꓯ ꓟ ꓠꓬ ꓬꓲ ꓬꓲ ꓢꓲ ꓙꓳˍ ꓡꓳ꓿ ꓚꓵ ꓚꓵ ꓛꓴꓽ ꓙꓳˍ ꓡꓳ꓿ ꓬꓲ ꓔꓯ ꓕꓲꓺ ꓗꓷ ꓠꓬ ꓗ. ꓡˍ ꓡꓳ꓿ ꓬꓲ ꓔꓯ ꓕꓲꓺ ꓗꓷ ꓠꓬ ꓔꓶ. ꓡˍ ꓡꓳ꓿ ꓖꓳ ꓡꓱ ꓫꓵꓽ ꓡ ꓞꓳ ꓣꓳ ꓔꓯ ꓕꓲꓺ ꓡˍ ꓕꓯ ꓣꓳ ꓠꓬ ꓠꓻ ꓜꓲꓽ ꓢꓲ ꓠꓬꓲ ꓡꓲ, ꓓꓳ ꓠ, ꓟ ꓠꓬ ꓣꓳ ꓢꓯꓼ ꓪ ꓗꓪ ꓐꓰ ꓟꓬꓽ ꓠꓬꓲ ꓒꓬꓱꓼ ꓡ ꓟꓽ ꓓꓻ꓿ ꓢꓲꓽ ꓫꓬ ꓟ ꓦ ꓢꓯꓼ ꓪ ꓟꓽ ꓚꓬꓼ ꓠꓬ꓾ ꓙꓵꓻ ꓠꓲ, ꓟꓽ ꓚꓬꓼ ꓠꓬ ꓣꓳ ꓠꓬ ꓕꓱ ꓟ ꓔꓯ ꓬꓰ ꓟꓽ ꓐ ꓡ꓿
ꓖꓳ ꓡꓱ ꓠꓬꓲ ꓪꓴ‐ꓢ ꓡꓰ ꓣꓳ ꓔꓯ ꓬꓲ ꓢꓲꓽ ꓫꓬ ꓟ ꓦ ꓝꓲ ꓩꓴ ꓠ, ꓟ ꓐꓱ ꓶ꓾ ꓣꓳ ꓠꓲ, ꓟ ꓗꓪ ꓢꓲꓽ ꓫꓬ ꓟ ꓦ ꓗꓪ ꓐꓰ ꓢꓯꓼ ꓕꓵꓼ ꓠ, ꓟ ꓞꓳ ꓙꓳ ꓠ, ꓟ ꓐꓱ ꓶ ꓣꓳ ꓶꓼ ꓓꓰꓽ ꓪꓽ ꓘꓴ ꓠ ꓔ ꓡꓳ꓿ ꓟꓴ ꓗꓪ ꓗꓴꓷꓼ ꓗꓪ ꓠꓴ ꓪ ꓐ, ꓐ ꓐꓲ ꓜꓲꓼˍ ꓟ ꓡꓰ ꓠꓴ ꓪ ꓥˍ ꓟꓲ ꓐꓲ ꓜꓲꓼ꓿ ꓟꓴ ꓗꓪ ꓗꓴꓷꓼ ꓗꓪ ꓠꓴ ꓪ ꓐ, ꓐ ꓫꓱ. ꓤ ꓗꓴ.ˍ ꓟ ꓡꓰ ꓐꓰ ꓠꓴ ꓪ ꓥˍ ꓟꓲ ꓕꓲ ꓣꓳ ꓛꓳꓽ ꓕꓲ ꓣꓳ ꓫꓱ. ꓤ ꓡꓯ ꓘꓳ꓾ ꓐꓰ ꓣꓳ ꓔꓯ ꓐꓯ ꓔ ꓡꓳ꓿
ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓱꓽ ꓛꓰꓽ ꓤ ꓮ ꓟꓲꓽ ꓥ ꓟ꓾ ꓣꓱꓽ ꓛꓰꓽ ꓤ ꓠꓱ ꓥ ꓟ ꓠꓴ ꓐꓰ ꓥꓪ ꓠꓬ ꓣꓳ ꓠꓲ, ꓟ ꓠꓯꓸꓼ ꓗꓪ ꓓꓵˍ ꓟ ꓣꓱꓽ ꓛꓰꓽ ꓖꓶ ꓢꓴ ꓐ,ꓐ ꓢꓲ ꓒ ꓬꓰ‐ꓢꓴ ꓬꓲ ꓫꓱ, ꓣꓳ ꓠꓯꓸꓼ ꓗꓪ ꓓꓯ, ꓡ ꓠ, ꓟ ꓐꓱ ꓶ ꓢꓯꓼ ꓕꓵꓼ ꓙꓰ ꓡꓯ꓿ ꓣꓳ ꓔꓯ ꓗ. ꓡˍ ꓥ ꓟꓲ꓾ ꓣꓳ ꓔꓯ ꓐꓯ ꓧꓪ. ꓡˍ ꓥ ꓟꓲ ꓢꓲ ꓒ ꓬꓰ‐ꓢꓴ ꓒꓬꓱꓽ ꓟꓬ ꓔꓯ ꓡꓳ. ꓢꓲ ꓠꓬꓲ꓾ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓟꓳ. ꓖꓶ ꓔꓲ. ꓟ ꓡꓰ ꓐꓰ ꓬꓲ ꓚꓲ. ꓛꓬ ꓡꓰ ꓣꓳ ꓔꓯ ꓟꓳ. ꓖꓶ ꓔꓲ. ꓬꓰꓳ꓿ ꓬꓲ ꓔꓯ ꓓꓶꓽ ꓢꓴ꓾ ꓬꓲ ꓔꓯ ꓔꓲ. ꓢꓴ꓾ ꓬꓲ ꓔꓯ ꓟꓶꓽ ꓷ, ꓔꓲ. ꓧꓳꓽ ꓢꓴ꓾ ꓬꓲ ꓔꓯ ꓡꓯꓼ ꓐꓳ ꓔꓶ. ꓢꓴ ꓕꓯꓽ ꓢꓲ ꓗꓪ ꓕꓯꓼ ꓔꓶ. ꓗꓷ ꓢꓴ ꓔꓯ ꓥ ꓟꓲ ꓬꓲ ꓠꓬ ꓮ ꓫꓵꓽ ꓟꓽ ꓒꓳ, ꓒꓳ, ꓐꓰ ꓙꓽ ꓜꓲꓼ ꓠꓲ, ꓡꓰ ꓾ ꓙ ꓣꓳꓽ ꓠꓲ, ꓡꓰ ꓢꓯꓼ ꓪ ꓖꓶ ꓗꓷꓳ꓿
ꓠꓲ, ꓠꓵˍ ꓟ ꓣꓱꓽ ꓛꓰꓽ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓲ ꓠꓯ ꓕꓱ ꓟ ꓡꓰ ꓔꓶ ꓔ ꓟ ꓗ. ꓚꓵ ꓥ ꓟ ꓟꓬ ꓢꓶꓽ ꓕꓲ ꓢꓶꓽ ꓐꓱ ꓶ ꓟꓬ ꓢꓶꓽ ꓕꓲ ꓢꓶꓽ ꓐꓯˍ ꓟ ꓕꓯꓽ ꓢꓲ ꓗꓪ ꓙ ꓙꓰˍ ꓟ ꓗ. ꓚꓵ꓾ ꓠꓵꓻ ꓠꓲ, ꓗ. ꓚꓵ ꓕꓱ ꓟ ꓔꓯ ꓣꓳ ꓠꓬ ꓒ ꓕꓲ ꓐꓰ ꓖꓼ ꓒꓳ, ꓙꓰ ꓢꓲ ꓠꓬꓲ꓾ ꓣꓳ ꓠꓯꓸꓼ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓬꓲ ꓟꓬꓱꓻ ꓓꓳꓽ ꓪꓴꓽ ꓡ ꓠ, ꓟ ꓐꓱ ꓶ ꓢꓯꓼ ꓕꓵꓼ ꓙꓰ ꓡꓯ꓿
