ꓟ‐ꓘꓳ꓿8ꓽ14‐21
ꓢꓲ ꓒ ꓬꓰ‐ꓢꓴ ꓗ ꓠꓯ. ꓛꓳ ꓔꓬ ꓟ ꓝꓲ ꓓꓴ ꓐꓴ ꓐꓰ ꓬꓲ ꓟ. ꓟꓲꓽ ꓚ ꓟ. ꓖꓶ ꓡˍ ꓟ ꓔꓯ ꓠ ꓠ, ꓔꓬ ꓟ ꓬꓴ‐ꓔ ꓡ ꓞꓳ ꓐꓴ ꓠꓬ ꓬꓰ‐ꓢꓴ ꓔꓯ ꓓꓵꓽ ꓙꓽ ꓥꓳꓽ ꓓꓵꓽ ꓙꓽ ꓛꓬ ꓗꓷˍ ꓡꓳ꓿ ꓬꓲ ꓪ ꓠꓬ ꓬꓰ‐ꓢꓴ ꓔꓯ ꓙꓵꓽ ꓪ ꓙꓳˍ ꓟ ꓗꓴꓷꓼ ꓙꓵꓽ ꓢꓴ ꓥ ꓡꓳ꓾ ꓐꓰ ꓓꓵꓽ ꓙ ꓟꓶ ꓔꓬ ꓖꓴˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓰ‐ꓢꓴ ꓠ: ꓖꓳ ꓡꓱ ꓟꓽ ꓥ꓿ ꓬꓲ ꓪ ꓠꓬ ꓬꓰ‐ꓢꓴ ꓔꓯ ꓬꓲ ꓪ ꓐꓱ ꓶ ꓜꓽ ꓓꓴ ꓖꓶ ꓜꓽ ꓢꓴ ꓥ ꓡꓳ꓾ ꓐꓰ ꓓꓵꓽ ꓙ ꓟꓶ ꓔꓬ ꓡꓳ꓿ ꓚꓵ ꓚꓵ ꓬꓰ‐ꓢꓴ ꓠꓽ ꓬꓲ ꓪ ꓔꓯ ꓟꓲ ꓠꓯ ꓜꓽ ꓓꓴ ꓢꓶ. ꓟꓽ ꓞꓲ꓾ ꓦ ꓕꓲ ꓒꓳ, ꓐꓱ ꓶ ꓜꓽ ꓓꓴ ꓖꓶ ꓢꓴ ꓥ ꓡꓳ꓿ ꓝꓮꓲ ꓬꓲ ꓪ ꓠꓬ ꓬꓰ‐ꓢꓴ ꓔꓯ ꓪ ꓔꓲ. ꓣꓱꓽ ꓝꓲ ꓠꓲ, ꓫꓵˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓰ‐ꓢꓴ ꓠꓬ ꓬꓲ ꓪ ꓔꓯ ꓟ. ꓟꓲꓽ ꓚ ꓟ. ꓖꓶˍ ꓟ ꓗꓪ꓾ ꓬꓲ ꓠꓬ ꓟꓲ ꓠꓯ ꓕꓱ ꓟ ꓗꓪ ꓣꓱꓽ ꓙ ꓠ, ꓟ ꓬꓯꓼ ꓡˍ ꓟ ꓐꓰ꓾ ꓡꓳ, ꓬꓰˍ ꓕꓯ ꓬꓲ ꓠꓬ ꓡꓯꓼ ꓐꓳ ꓔꓶ. ꓓꓴ ꓕꓯꓽ ꓢꓲ ꓗꓪ ꓢꓯꓼ ꓟꓬ ꓞꓷ, ꓗꓷˍ ꓥꓳ꓾ ꓐꓯˍ ꓟ ꓔꓯ ꓮ ꓕꓯ ꓟꓲ ꓚ ꓟ. ꓖꓶˍ ꓡꓳ꓿ ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓬꓲ ꓝꓲ ꓓꓴ ꓐꓴ ꓐꓰ ꓬꓴ‐ꓔ ꓡ ꓞꓳ ꓐꓴ ꓠꓬ ꓬꓰ‐ꓢꓴ ꓔꓯ ꓓꓵꓽ ꓙꓽ ꓥꓳꓽ꓾ ꓓꓵꓽ ꓙꓽ ꓛꓬ ꓡꓰ ꓗꓷꓳ꓿
ꓣꓳ ꓐꓴ ꓥˍ ꓟꓲ ꓬꓲ ꓪ ꓕꓯꓽ ꓢꓲ ꓙꓲꓻˍ ꓟ ꓟꓽ ꓥ꓿ ꓣꓳ ꓟꓲ ꓣꓳ ꓞꓳ ꓙꓳ ꓔꓬ ꓟ ꓗꓪ ꓮ ꓟꓬ, ꓚꓱ, ꓗꓪ ꓐꓰ ꓦꓰꓼ ꓟꓷꓼ ꓔꓬ ꓢꓰꓽ ꓡꓳ꓾ ꓠꓱ. ꓐꓯ ꓢꓴ ꓝꓴꓲ. ꓔꓯ ꓖꓽ ꓖꓶ ꓠ, ꓟ ꓮ ꓘꓶ. ꓫ. ꓔꓬ ꓢꓰꓽ ꓡꓳ꓾ ꓝꓮꓲ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓳ ꓙꓳ ꓔꓬ ꓟ ꓠꓯꓸꓼ ꓗꓪ ꓬꓲ ꓖ ꓙꓳ ꓠ, ꓟ ꓐꓱ ꓶ ꓮ ꓟꓬ, ꓢꓯꓼ ꓕꓵꓼ ꓔꓬ ꓪˍ ꓟ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓬꓲ ꓝꓲ ꓐꓴ ꓐꓴ ꓐꓰ ꓬꓴ‐ꓔ ꓡ ꓞꓳ ꓐꓴˍ ꓡꓰꓽ ꓟꓽ ꓛꓲ꓾ ꓣꓳ ꓐꓴ ꓥ ꓟꓲ ꓓꓵꓽ ꓙꓽ ꓥꓳꓽ ꓓꓵꓽ ꓙꓽ ꓛꓬ ꓡꓰ ꓔꓬ ꓡꓳ꓿
ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓬꓲ ꓪꓴ. ꓠꓽ ꓑ ꓕꓲꓽ꓾ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓬꓲ ꓮꓽ ꓟ ꓥ ꓟ ꓔꓯ ꓐꓯ ꓟ. ꓖꓶ ꓔ ꓡꓳ꓿ ꓬꓲ ꓠꓬ ꓪꓴ‐ꓢ ꓥ ꓢꓲ ꓠꓬꓲ꓾ ꓓꓵꓽ ꓙ ꓮʼ ꓡꓰ ꓓꓴ ꓟꓬꓱꓽ ꓮ ꓟꓬ, ꓔꓯ ꓬꓰ ꓐ ꓡˍ ꓟ ꓔꓯ ꓐꓯ ꓟ. ꓖꓶˍ ꓡꓳ꓿ ꓝꓮꓲ ꓠꓬꓲꓽ ꓙꓰꓽ ꓕꓲ ꓙꓰꓽ ꓠꓬ꓾ ꓬꓲ ꓪ ꓠꓬ ꓢꓲ ꓒ ꓬꓲ ꓝꓲ ꓓꓴ ꓐꓴ ꓥ ꓟ ꓑꓶ. ꓓꓴ ꓜꓽ ꓓꓴ ꓐꓱ ꓶ ꓞꓲ. ꓟꓽ ꓛꓵ ꓟ ꓔꓯ ꓐꓯ ꓟ. ꓖꓶ ꓔꓬ ꓡꓳ꓿ ꓢꓺ ꓙꓰꓽ ꓕꓲ ꓙꓰꓽ ꓗꓪ ꓠꓬ꓾ ꓬꓰ‐ꓢꓴ ꓠꓬ ꓙ ꓖꓴ ꓥꓳꓽ ꓡꓰ ꓝꓲ ꓛꓬ ꓡꓰ ꓝꓲˍ ꓟ ꓚꓱ, ꓟ. ꓖꓶˍ ꓟ ꓔꓯ ꓤ ꓟꓳ ꓠ, ꓟ ꓐꓯ ꓟ. ꓖꓶˍ ꓡꓳ꓿ ꓬꓰ‐ꓢꓴ ꓠꓬ ꓮꓽ ꓟ ꓥ ꓡ꓾ ꓬꓰ‐ꓢꓴ ꓠꓬ ꓮ ꓫꓵꓽ ꓬꓰ ꓗꓷ ꓡ ꓐꓯ ꓟ ꓔꓯ ꓙꓽ ꓜꓲꓼ ꓟꓽ ꓐ ꓡ ꓗꓪ ꓛꓲ ꓟꓬ ꓢꓶꓽ ꓛꓱꓼ ꓔꓬ ꓟ ꓒ‐ꓡꓲ‐ꓢꓷ ꓐꓴ ꓬꓲ ꓪ ꓟ. ꓖꓶˍ ꓚꓱ, ꓔꓯ ꓤ ꓟꓳ ꓠ, ꓟ꓾ ꓢꓲ ꓒ ꓬꓰ‐ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓕꓵꓼ ꓪ ꓖꓶ ꓔ ꓡꓳ꓿
ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓢꓯꓼ ꓖꓶ꓾ ꓕꓵꓼ ꓪ ꓖꓶ ꓔꓬ ꓟ ꓡꓰ ꓐꓰ ꓣꓳ ꓔꓯ ꓥ ꓟꓲ ꓬꓲ ꓡꓰ ꓢꓯꓼ ꓖꓶ ꓡ ꓔꓬ ꓡꓳ꓿ ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓮ ꓕꓯ ꓥˍ ꓟꓲ ꓟꓽ ꓡꓳ ꓔ ꓟ ꓪꓴ. ꓠꓬꓲ ꓬꓰ‐ꓢꓴ ꓔꓯ ꓣꓳ ꓪ ꓜꓲ ꓙꓵꓻ ꓠ ꓔ ꓡꓳ꓿ ꓣꓳ ꓟꓽ ꓙꓳꓺ ꓟꓽ ꓛꓱꓽ ꓠ, ꓟ ꓬꓰ‐ꓢꓴ ꓔꓯ ꓣꓳ ꓟꓬꓽ ꓠꓬꓲ ꓦ ꓡꓱ ꓐꓳ ꓠ ꓔ ꓟ ꓥ ꓡꓳ꓿ ꓣꓳ ꓠꓬ ꓬꓰ‐ꓢꓴ ꓐꓰ ꓪ ꓜꓲ ꓒ ꓕꓲ ꓗꓪ ꓔꓬ ꓢꓲ ꓬꓲ ꓗ ꓠꓯ. ꓛꓳ ꓫꓱꓽ ꓠ ꓗ, ꓡꓳ꓿ ꓣꓳ ꓐꓴ ꓠꓬ ꓣꓳ ꓠꓲ, ꓟ ꓐꓰ ꓣꓳ ꓤꓶꓻ ꓠꓯꓸꓼ ꓗꓪ ꓢꓲ ꓒ ꓔꓬ ꓡꓳ ꓐꓯˍ ꓟ ꓔꓱ, ꓚꓵˍ ꓟ ꓔꓯ ꓟꓬꓽ ꓠꓬꓲ ꓙꓵꓻ ꓢꓲ ꓞꓳ ꓙꓳ ꓠ ꓗ, ꓟ ꓥ ꓡꓳ꓿ ꓮ ꓙꓵꓽ ꓟ ꓕꓯꓽ ꓢꓲ ꓗꓪ ꓙꓵꓽ ꓪ ꓙꓳˍ ꓟ ꓪꓽ ꓠꓬꓲˍ ꓟ ꓪꓴ‐ꓢ ꓕꓲ ꓣꓳˍ ꓡꓰ ꓐꓰ ꓬꓰ‐ꓢꓴ ꓔꓯ ꓣꓳ ꓦ ꓡꓱ ꓐꓳ ꓓꓴ ꓬꓰ ꓡꓯ꓿
