ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓠꓬ (ꓟ‐ꓘꓳ 7ꓽ24‐30) ꓥ ꓡꓳ꓿ ꓢꓲꓽ ꓫꓬ ꓕꓳꓽ ꓶ ꓗꓪ ꓦꓲ‐ꓡꓲ ꓤ ꓟꓶ ꓤ ꓕꓲ ꓣꓳ ꓬꓲ ꓮ ꓟꓲꓽ ꓠꓲꓽ ꓜꓶꓽ ꓞ, ꓟ ꓔꓯ ꓢꓲ ꓒ ꓬꓰ‐ꓢꓴ ꓡꓰ ꓠꓲꓽ ꓖꓼ ꓓꓳ ꓖꓶˍ ꓟ ꓟ. ꓟꓲꓽ ꓥ ꓡꓳ꓿
ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓕꓲ‐ꓬ ꓐꓰ ꓢꓲ‐ꓓꓳ ꓟꓵꓽ ꓗꓪ ꓙꓰ ꓢꓲ ꓠꓬꓲ ꓠꓻ ꓫꓵꓽ ꓠꓻ ꓙꓰꓽ ꓫꓬ, ꓖꓶ ꓔꓬ ꓡꓳ꓿ ꓖꓳ ꓕꓲ ꓝꓲ. ꓗꓪ ꓦꓲ‐ꓡꓲ ꓤ ꓟꓶ ꓤ ꓕꓲ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓔꓬ ꓗꓪ ꓡ ꓢꓲ꓾ ꓢꓲ ꓒꓽꓳ꓾ ꓥꓪ ꓮ. ꓟꓲꓽ ꓔꓯ ꓠꓲꓽ ꓖꓼ ꓓꓳ ꓖꓶ ꓡꓯ꓾ ꓐꓰ ꓓꓰꓽˍ ꓡꓳ꓿ ꓖꓳ ꓕꓯ ꓢꓲ ꓒ ꓬꓰ‐ꓢꓴ ꓠꓬ ꓕꓱ ꓡꓱ ꓒꓳ, ꓖꓶˍ ꓡꓳ꓾ ꓤ ꓠꓱ ꓤ ꓐꓴ ꓜꓽ ꓓꓴ ꓣꓴ ꓢꓲ ꓮ ꓠꓽ ꓔꓯ ꓡꓳ ꓖꓶ ꓜꓽ ꓙꓲꓽ ꓟꓽ ꓙꓳ꓾ ꓐꓰ ꓐꓯ ꓖꓶˍ ꓡꓳ꓿ ꓖꓳ ꓕꓯ ꓤ ꓟꓶ ꓤ ꓖꓳ ꓟ ꓠꓬ꓾ ꓢꓲ ꓒꓽꓳ ꓥ ꓡꓳ꓿ ꓢꓽ ꓡ ꓠꓯꓸꓼ ꓗꓪ ꓮ ꓠꓽ ꓥˍ ꓟꓲ ꓤ ꓠꓱ ꓤ ꓜ ꓟꓰꓽ ꓔꓯ ꓜꓽ ꓙꓲꓽ ꓙꓳˍ ꓡꓳ꓾ ꓐꓰ ꓒꓳ, ꓖꓶˍ ꓡꓳ꓿ ꓖꓳ ꓕꓯ ꓠꓬ ꓢꓲ ꓒ ꓬꓰ‐ꓢꓴ ꓡꓰ ꓦꓲ ꓡꓲ ꓤ ꓟꓶ ꓤ ꓬꓲ ꓙꓵꓻ ꓠꓲ, ꓐꓰ ꓬꓲ ꓙ ꓣꓳꓽˍ ꓟ ꓓꓰꓽ ꓘꓶꓽ ꓔꓯ ꓢꓲ ꓒ ꓬꓰ‐ꓢꓴ ꓫꓱ. ꓤ ꓢꓲ ꓠꓬꓲ꓾ ꓬꓲ ꓮ ꓟꓲꓽ ꓔꓯ ꓠꓲꓽ ꓖꓼ ꓓꓳ ꓖꓶˍ ꓟ ꓥꓳ꓿
ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓐꓯ ꓖꓶ ꓡ ꓠꓲ, ꓫꓵˍ ꓟ ꓠꓬ꓾ ꓤ ꓠꓱ ꓤ ꓜꓽ ꓓꓴ ꓔꓯ ꓮ. ꓠꓽ ꓔꓯ ꓖꓶ ꓜꓽ ꓙꓲꓽ ꓟꓽ ꓙꓳ ꓐꓯ ꓟ ꓠꓬ꓾ ꓤ ꓠꓱ ꓤ ꓐꓯ ꓟ ꓠꓬ ꓪꓴ‐ꓢ ꓡꓰ ꓢꓲ ꓚꓰ. ꓔ ꓟ ꓬꓲ‐ꓢꓷ‐ꓡꓰ ꓡ ꓞꓳ ꓥ ꓡꓳ꓿ ꓐꓯ ꓠꓲ, ꓫꓵˍ ꓟ ꓠꓬ ꓬꓲ‐ꓢꓷ‐ꓡꓰ ꓡ ꓞꓳ꓾ ꓥ ꓠꓬ ꓬꓴ‐ꓔ ꓡ ꓞꓳ ꓐꓴ ꓠꓬ ꓪꓴ‐ꓢ ꓡꓰ ꓢꓲ ꓚꓰ. ꓔ ꓟ ꓥ ꓠꓬꓲ ꓪꓴ‐ꓢ ꓣꓱꓽ ꓛꓰꓽ ꓒ ꓐꓲꓸꓼ ꓘꓳ ꓣꓴ ꓟꓶˍ ꓟ ꓥꓳ꓿ ꓢꓲ ꓒ ꓬꓰ‐ꓢꓴ ꓡˍ ꓟˍ ꓟꓲ ꓬꓲ ꓪ ꓐꓱ ꓶ ꓟꓬꓽ ꓠꓬꓲ ꓥꓳ꓿ ꓕꓱ ꓟ ꓑꓶ. ꓓꓴ ꓬꓴ‐ꓔ ꓡ ꓞꓳ ꓐꓴ ꓠꓬ ꓣꓱꓽ ꓛꓰꓽ ꓒ ꓐꓲꓸꓼ ꓮ ꓕꓯ ꓟꓲ ꓘꓳ ꓣꓴ ꓟꓶˍ ꓟ ꓞꓳ ꓫꓵꓽ ꓕꓲ ꓫꓵꓽ ꓥꓳ꓿ ꓖꓳ ꓡꓱ ꓐꓯ ꓥ ꓟꓲ ꓬꓴ‐ꓔ ꓡ ꓞꓳ ꓟꓽ ꓥ ꓟ ꓞꓳ ꓫꓵꓽ ꓦꓲ‐ꓡꓲ ꓞꓳ ꓮ ꓟꓬ, ꓙꓳˍ ꓡꓳ꓿ ꓦꓲ‐ꓡꓲ ꓤ ꓟꓶ ꓤ ꓥ ꓟꓲ ꓕꓲ ꓡꓰ, ꓥꓳ꓿
ꓬꓲ ꓔꓯ ꓠꓬ ꓮ ꓠꓽ ꓡꓰ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓔꓯꓺˍ ꓡꓳ꓿ ꓬꓲ ꓔꓯ ꓮ ꓠꓽ ꓡꓰ ꓐꓰ ꓐꓯ ꓔꓬ ꓥ ꓟꓲ ꓬꓲ ꓠꓬ ꓙ ꓣꓳꓽ ꓠꓲ, ꓟ ꓡꓰ ꓙꓵꓻ ꓠꓲ, ꓡꓰ꓾ ꓮ ꓠꓽ ꓥ ꓟꓲ ꓤ ꓠꓱ ꓤ ꓜ ꓟꓰꓽ ꓔꓯ ꓜꓽ ꓙꓲꓽ ꓙꓳˍ ꓡꓳ꓾ ꓐꓰ ꓒꓳ, ꓖꓶˍ ꓡꓳ꓿ ꓐꓯ ꓠꓲ, ꓫꓵˍ ꓟ ꓠꓬ꓾ ꓬꓲ‐ꓢꓷ‐ꓡꓰ ꓡ ꓞꓳ ꓐꓴ ꓬꓴ‐ꓔ ꓡ ꓞꓳ ꓐꓴ ꓘꓳ ꓣꓴ ꓟꓶˍ ꓟ ꓣꓱꓽ ꓛꓰꓽ ꓠꓬ ꓐꓲ ꓜꓲꓼ ꓐꓲ ꓡꓶꓽ ꓡꓰ ꓢꓲ ꓠꓬꓲ꓾ ꓖꓳ ꓟ ꓐꓰ ꓓꓳ ꓡˍ ꓟ ꓬꓲ ꓟꓰꓽ ꓬꓲ ꓐꓯ ꓥ ꓟꓲ ꓥꓪ ꓠꓴꓽ ꓘꓳ ꓣꓴ ꓙꓲꓽ ꓙꓳˍ ꓡꓳ꓾ ꓥꓪ ꓠꓴꓽ ꓔꓯ ꓖꓶ ꓡꓯ꓾ ꓐꓰ ꓓꓰꓽˍ ꓟ ꓬꓲ ꓟ. ꓟꓲꓽ ꓥ ꓡꓳ꓿
ꓖꓳ ꓡꓱ ꓠꓬꓲ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓣꓳ ꓢꓷ. ꓠ ꓔ ꓟ ꓠꓬ ꓪꓴ‐ꓢ ꓡ ꓞꓳ꓾ ꓪꓴ‐ꓢ ꓡꓰ ꓢꓲ ꓚꓰ. ꓔ ꓟ ꓬꓲ‐ꓢꓷ‐ꓡꓰ ꓡ ꓞꓳ ꓐꓴ ꓬꓴ‐ꓔ ꓡ ꓞꓳ ꓐꓴ ꓘꓳ ꓣꓴ ꓟꓶˍ ꓟ ꓣꓱꓽ ꓛꓰꓽ ꓬꓲ ꓟꓰꓽ ꓬꓲ ꓐꓯ ꓮ ꓔꓲ. ꓤ ꓟ ꓡꓰ. ꓠꓬꓲ ꓦꓲ‐ꓡꓲ ꓤ ꓟꓶ ꓤ ꓐꓱ ꓶ ꓠꓬ ꓮ ꓘꓶ. ꓪꓴꓽˍ ꓟ꓾ ꓮ ꓘꓶ. ꓒꓵꓽˍ ꓟ ꓣꓱꓽ ꓛꓰꓽ ꓒꓬꓱꓼ ꓡˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓬꓲ‐ꓢꓷ‐ꓡꓰ ꓡ ꓞꓳ ꓐꓴ ꓐꓰ ꓕꓲ ꓡꓰ, ꓥ ꓟ ꓣꓳ ꓤꓶꓻ ꓠꓯꓸꓼ ꓗꓪ ꓥ ꓟꓲ꓾ ꓪꓴ‐ꓢ ꓦ ꓡꓱ ꓢꓴ ꓟꓬꓽ ꓠꓬꓲ ꓠꓬ ꓪꓴ‐ꓢ ꓖꓶ ꓔ ꓟ ꓣꓱꓽ ꓛꓰꓽ ꓮ ꓟꓬ, ꓙꓳˍ ꓡꓳ꓿ ꓝꓮꓲ ꓖꓶ ꓡ ꓠ, ꓟˍ ꓟꓲ ꓮ ꓟꓬ, ꓙꓳˍ ꓡꓳ꓿ ꓖꓳ ꓡꓱ ꓥ ꓟꓲ ꓠꓬꓲ. ꓠꓬꓲ ꓟ ꓣꓳꓽ ꓪꓴ‐ꓢ ꓦ ꓡꓱ ꓢꓴ ꓐꓴ ꓠꓬ ꓪꓴ‐ꓢ ꓣꓱꓽ ꓛꓰꓽ ꓔꓯ ꓣꓳ ꓘꓳ ꓣꓴ ꓟꓽ ꓗꓴ.꓿ ꓘꓳ ꓣꓴ ꓟꓶˍ ꓥꓳ ꓐꓯ ꓥ ꓟꓲ ꓒꓵꓽ ꓗ ꓚꓰꓺ ꓟꓽ ꓗꓴ.꓿ ꓮ ꓡꓲ ꓘꓶ ꓛꓲ ꓒꓵꓽˍ ꓡ ꓐꓯ ꓟ ꓣꓳꓽ ꓟꓽ ꓢꓷ.꓿
ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓦꓲ‐ꓡꓲ ꓤ ꓟꓶ ꓤ ꓡꓰ ꓣꓳ ꓔꓯ ꓟ. ꓖꓶ ꓡ ꓔꓬ ꓡꓳ꓿ ꓬꓲ ꓠꓬ ꓪꓴ‐ꓢ ꓤ ꓠꓱ ꓐꓴ ꓘꓳ ꓣꓴ ꓟꓶˍ ꓟ ꓣꓱꓽ ꓛꓰꓽ ꓠꓬ ꓮ ꓡꓲ ꓘꓶ ꓛꓲ ꓒꓵꓽˍ ꓡ ꓐꓯ ꓟ ꓬꓲ ꓟꓰꓽ ꓬꓲ ꓐꓯ ꓬꓲ ꓘꓳ ꓣꓴ ꓟꓶˍ ꓟ ꓗꓪ ꓐꓰ ꓬꓲ ꓢꓷ. ꓓˍ ꓡꓳ꓿ ꓖꓳ ꓟ ꓑꓶ. ꓓꓴ ꓠꓬꓲ. ꓠꓬꓲ ꓦꓲ‐ꓡꓲ ꓤ ꓟꓶ ꓤ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓠꓬ꓾ ꓥꓪ ꓬꓲ ꓟꓰꓽ ꓬꓲ ꓐꓯ ꓘꓳ ꓣꓴ ꓟꓶˍ ꓟ ꓡꓰ. ꓠꓬꓲ ꓥꓪ ꓮ ꓘꓶ. ꓒꓵꓽ ꓗ ꓚꓰꓺˍ ꓡꓳ꓿ ꓠꓴ ꓪ ꓪꓴ‐ꓢ ꓦ ꓡꓱ ꓢꓴ ꓐꓴ ꓪꓴ‐ꓢ ꓣꓱꓽ ꓛꓰꓽ ꓮ ꓟꓬ, ꓘꓳ ꓣꓴ ꓟꓶˍ ꓕꓯ ꓠꓽ ꓒꓵꓽ ꓗ ꓚꓰꓺ ꓢꓲ ꓠꓬꓲ ꓪꓴ‐ꓢ ꓔꓯ ꓫ. ꓟꓳ ꓠ ꓗ, ꓡꓳ꓾ ꓐꓰ ꓐꓯ ꓖꓶ ꓡ ꓔꓬ ꓡꓳ꓿
