ꓪꓴ‐ꓢ ꓡꓰ ꓣꓳ ꓔꓯ ꓘꓴ ꓡˍ ꓕꓯ ꓠꓬꓲꓽ ꓚꓱ, ꓗꓪ ꓐꓰ ꓬꓲ ꓠꓬ ꓘꓴ ꓗꓴ.ˍ ꓡꓳ꓿ ꓬꓲ ꓪꓴ. ꓕꓲ ꓚꓱ, ꓟ ꓠꓬ ꓬꓲ ꓠꓬ ꓣꓳ ꓔꓯ ꓶꓼ ꓤ ꓫꓱ, ꓤ꓾ ꓥ ꓠꓬ ꓕꓲ ꓫꓵꓽ ꓫꓵꓽ ꓓꓵꓽ ꓙ ꓮʼ ꓓꓴ ꓟꓬꓱꓽ ꓬꓲ ꓡꓰ ꓣꓳ ꓔꓯ ꓬꓰ ꓟꓳ. ꓖꓶ ꓡˍ ꓡꓳ꓿ ꓖꓳ ꓗꓪ ꓐꓰ ꓣꓳ ꓠꓬ꓾ “ꓳ꓾ ꓕꓱ ꓟ ꓠꓬ ꓪꓴ‐ꓢ ꓥ ꓐꓭ꓿ ꓪꓴ‐ꓢ ꓡꓯꓼ ꓓꓴ ꓥ ꓐꓭ꓾ ꓪꓴ‐ꓢ ꓥꓪ ꓔꓯ ꓘꓴ ꓔꓬ ꓐꓭ꓾” ꓐꓰ ꓐꓯ ꓢꓲ ꓠꓬꓲ ꓓꓵꓽ ꓙ ꓮʼ ꓠꓬꓲ ꓐꓰ ꓢꓲ ꓒ ꓬꓰ‐ꓢꓴ ꓗ ꓠꓯ. ꓖꓼ ꓛꓳ ꓙꓰˍ ꓟ ꓬꓲ ꓚꓱ, ꓕꓲ ꓚꓱ, ꓕꓲ ꓚꓱ, ꓥ ꓡꓳ꓿ ꓠꓬꓲꓽ ꓚꓱ, ꓕꓱ ꓟ ꓗꓪ ꓠꓬ ꓪꓴ‐ꓢ ꓠꓬ ꓬꓲ ꓚꓲ. ꓛꓬ ꓬꓲ ꓢꓯꓼ ꓪ꓾ ꓬꓲ ꓪꓽ ꓠꓬꓲˍ ꓟ ꓢꓯꓼ ꓪ ꓡꓰ ꓬꓲ ꓘꓴ ꓠꓲ, ꓫꓵˍ ꓟ ꓖꓳ ꓕꓲ ꓣꓳ ꓔꓯ ꓓꓵꓽ ꓙ ꓟꓶ ꓓꓴ ꓬꓰ ꓟ. ꓖꓶˍ ꓡꓳ꓿
ꓔꓯ ꓥꓳꓽ ꓐꓯˍ ꓠꓬ꓾ ꓢ. ꓠꓯ ꓢꓲꓽ ꓫꓬ ꓕꓳꓽ ꓶ ꓥ ꓟ (ꓡꓴ‐ꓘ 5ꓽ1‐11) ꓗꓪ꓾ ꓢꓲ ꓒ ꓬꓰ‐ꓢꓴ ꓠꓬ ꓬꓲꓻ ꓡꓴꓽ ꓐꓱ ꓘꓶꓽ ꓗꓪ ꓙ ꓫꓱꓽ ꓙꓰ ꓔꓬ ꓕꓯ ꓖꓳ ꓗꓪ ꓥꓪ. ꓓꓳꓽ ꓢꓴ ꓒꓲ‐ꓕꓱ ꓔꓯ ꓟꓳꓻˍ ꓡꓳ꓿ ꓒꓲ‐ꓕꓱ ꓠꓬ ꓕꓲ ꓦꓬꓽ ꓡꓱꓸꓼ ꓥꓪ. ꓓꓳꓽ ꓔꓬ ꓥˍ ꓟꓲ ꓮ ꓫꓵꓽˍ ꓟꓲ ꓬꓲ ꓓꓳꓽ ꓟꓽ ꓟꓶ꓿ ꓖꓳ ꓕꓯ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓔꓯ꓾ ꓬꓲ ꓓꓱꓽ ꓑꓶ. ꓔꓯ ꓬꓲꓻ ꓙꓬ ꓠꓯ. ꓟ ꓗꓪ ꓗꓶ ꓠ, ꓟ ꓐꓱ ꓶ ꓬꓲ ꓠꓬ ꓕꓵꓼ ꓪ ꓖꓶˍ ꓡꓳ꓿ ꓖꓳ ꓡꓱ ꓖꓶ ꓗꓷ ꓗ ꓠꓯ. ꓒꓲ‐ꓕꓱ ꓠꓬ ꓥꓪ. ꓮꓽ ꓟꓬ, ꓓꓳꓽ ꓟꓶˍ ꓟ ꓣꓳ ꓑ ꓙꓽ ꓪˍ ꓡꓳ꓿
ꓒꓲ‐ꓕꓱ ꓠꓬ ꓕꓲꓽ ꓦꓬꓽ ꓡꓱꓸꓼ ꓥꓪ. ꓓꓳꓽˍ ꓥ ꓟꓲ ꓮ ꓫꓵꓽˍ ꓟꓲ ꓓꓳꓽ ꓟꓽ ꓟꓶ꓿ ꓖꓳ ꓡꓱ ꓐꓯˍ ꓥ ꓟꓲ ꓢꓲ ꓒ ꓬꓰ‐ꓢꓴ ꓬꓲ ꓐꓯ ꓘꓶꓽ ꓕꓲ ꓘꓶꓽˍ ꓗꓷ ꓡꓰ ꓕꓯ ꓬꓲ ꓠꓬ ꓓꓵꓽ ꓙ ꓮʼ ꓡꓰ ꓢꓲ ꓠꓬꓲ꓾ ꓢꓲ ꓒ ꓬꓰ‐ꓢꓴ ꓠꓬ ꓚꓵ ꓚꓵ ꓪꓴ‐ꓢ ꓥꓳ ꓐꓯ ꓢꓲ꓾ ꓣꓷꓠ. ꓢꓲ ꓠꓬꓲ ꓬꓲ ꓠꓬ ꓢꓲ ꓒ ꓬꓰ‐ꓢꓴ ꓗ ꓠꓯ. ꓛꓳꓻ ꓙꓰˍ ꓡꓳ꓿ ꓮ ꓡꓲꓳ ꓐꓯˍ ꓠꓬ ꓞꓳ ꓤ ꓕꓲ ꓣꓳ ꓬꓰ ꓟꓽ ꓐ ꓡ ꓟ ꓟꓬꓱꓽ ꓕꓱ ꓟ ꓔꓯ ꓪꓴ‐ꓢ ꓬꓰ ꓟꓳ. ꓖꓶˍ ꓟ ꓑꓶ. ꓓꓴ ꓚꓵ ꓚꓵ ꓕꓱ ꓟ ꓠꓬ ꓪꓴ‐ꓢ ꓥ ꓡꓳ꓾ ꓚꓵ ꓚꓵ ꓕꓱ ꓟ ꓠꓬ ꓪꓴ‐ꓢ ꓡ ꓞꓳ ꓥ ꓡꓳ ꓐꓯ ꓢꓲ ꓠꓬꓲ꓾ ꓬꓲ ꓠꓬ ꓙꓵꓻ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓗ ꓠꓯ. ꓛꓳꓻ ꓙꓰˍ ꓟ ꓥ ꓡꓳ꓿
ꓕꓱ ꓟˍ ꓡꓰ ꓐꓰ ꓙꓲꓻ ꓫꓬ ꓢꓴ ꓒꓳ‐ꓡꓳ ꓔꓯ ꓣꓳ ꓡꓳ. ꓠꓬꓲˍ ꓥ ꓟꓲ ꓬꓲ ꓠꓬ ꓮ ꓟꓴꓽ ꓜꓶꓽ ꓢꓲ ꓙꓰˍ ꓕꓯ ꓮ ꓟꓴꓽ ꓕꓯꓽ ꓢꓲ ꓗꓪ ꓐꓰ ꓞꓰꓻ ꓡꓰ ꓟ ꓣꓳ ꓢꓷ.ˍ ꓡꓳ꓿ ꓬꓲ ꓮ ꓟꓴꓽ ꓗꓪ ꓐꓰ ꓞꓰꓻ ꓡꓰ ꓕꓯ ꓟꓴꓽ ꓗꓪ ꓗꓪ ꓐꓰ ꓠꓬꓲ ꓟꓳꓻ ꓓꓴ ꓡꓬ. ꓡ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓔꓯ ꓘꓴˍ ꓡꓳ꓿ “ꓠꓴ ꓠꓬ ꓮ ꓫꓵꓽ ꓑꓶ. ꓓꓴ ꓥꓪ ꓔꓯ ꓘꓶꓻ ꓙꓵˍ ꓡ꓾” ꓐꓯ ꓢꓲ ꓪꓴ‐ꓢ ꓠꓬ ꓠꓺ ꓠꓬꓲ ꓘꓶꓽ ꓗꓪ ꓐꓰ ꓓꓵꓽ ꓙ ꓟꓶ ꓓꓴ ꓬꓰ ꓟꓳ. ꓖꓶˍ ꓡꓳ꓿ ꓕꓱ ꓟ ꓠꓬ ꓢꓲ ꓒ ꓠꓬ ꓬꓲ ꓗ ꓠꓯ. ꓢꓲ ꓛꓳꓻ ꓠ, ꓟ ꓐꓱ ꓶ꓾ ꓬꓲ ꓤ ꓬꓲ ꓮ ꓟꓲꓽ ꓒꓬꓱꓼ ꓡ ꓠ, ꓟ ꓐꓱ ꓶ ꓓꓵꓽ ꓙ ꓟꓶ ꓓꓴ ꓚꓱ, ꓗꓪ ꓐꓰ ꓘꓴˍ ꓟ ꓬꓲ ꓚꓱ, ꓕꓲ ꓚꓱ, ꓥ ꓡꓳ꓿
ꓝꓮꓲ ꓬꓲ ꓠꓬ ꓓꓵꓽ ꓙ ꓟꓶ ꓓꓴ ꓗꓪ ꓐꓰ ꓟꓽ ꓥ ꓥ ꓐꓰ ꓮ ꓤ ꓤ ꓫ. ꓕꓱ ꓢꓲ ꓠꓬꓲ ꓘꓴˍ ꓟˍ ꓟꓲ ꓙꓳˍ ꓡꓳ꓿ ꓬꓲ ꓠꓬ ꓟꓲꓽ ꓦꓲ ꓒꓲ ꓡꓲˍ ꓡꓰ ꓐꓰ ꓮ ꓤ ꓤˍ ꓒꓲ, ꓢꓲ ꓠꓬꓲ ꓞꓳ ꓤ ꓔꓯ ꓬꓲ ꓗ ꓠꓯ. ꓛꓳꓻ ꓠ, ꓟ ꓐꓱ ꓶ ꓘꓴˍ ꓡꓳ꓿ ꓔꓯ ꓥꓳꓽ ꓐꓯˍ ꓠꓬ꓾ ꓬꓲ ꓘꓳ. ꓖꓳ ꓒ ꓟ‐ꓕꓲ ꓔꓯ ꓢꓲ ꓒ ꓬꓰ‐ꓢꓴ ꓠꓬ “ꓠꓴ ꓥꓪ ꓔꓯ ꓖꓼ ꓡꓯ” ꓐꓯ ꓢꓲ ꓠꓬꓲ ꓘꓴˍ ꓡꓳ꓿ ꓕꓱ ꓟˍ ꓡꓰ ꓐꓰ ꓬꓲ ꓗ ꓠꓯ. ꓛꓳꓻ ꓢꓴ ꓮ ꓟꓬ, ꓔꓯ ꓠꓬ ꓮ ꓫꓵꓽ ꓓꓵꓽ ꓙ ꓟꓶ ꓓꓴ ꓟꓽ ꓬꓰ ꓟꓳ. ꓖꓶ꓿ ꓖꓳ ꓡꓱ ꓐꓯˍ ꓥ ꓟꓲ ꓫ. ꓕꓱ ꓘꓶꓽ ꓗꓪ ꓐꓰ ꓮ ꓤ ꓮ ꓤ ꓐꓰ ꓘꓴ ꓢꓲ ꓠꓬꓲ ꓬꓲ ꓪ ꓔꓯ ꓟ. ꓖꓶˍ ꓡꓳ꓿ ꓬꓲ ꓗ ꓠꓯ. ꓖꓼ ꓠ, ꓟ ꓐꓱ ꓶ ꓬꓲ ꓠꓬ ꓮ ꓕꓯ ꓥ ꓟꓲ ꓘꓴ ꓔꓬ ꓡꓳ꓿
ꓔꓯ ꓥꓳꓽ ꓝꓮꓲ ꓕꓲ ꓟ ꓠꓬ꓾ ꓢꓲ ꓒ ꓬꓰ‐ꓢꓴ ꓠꓬ ꓬꓲꓻ ꓙꓬ ꓢꓲꓼˍ ꓕꓯ ꓢ‐ꓟ‐ꓡꓲ ꓤ ꓟꓶ ꓤ ꓕꓲ ꓣꓳ ꓔꓯ ꓬꓲꓻ ꓙꓬ ꓓꓰꓽ ꓓꓳꓻˍ ꓟ ꓗꓪ ꓐꓰ ꓥˍ ꓟꓲ ꓣꓳ ꓡꓳ. ꓟꓳˍ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓤ ꓟꓶ ꓤ ꓖꓳ ꓕꓲ ꓣꓳ ꓔꓯ ꓮ ꓫꓵꓽ ꓓꓵꓽ ꓙ ꓟꓶ ꓓꓴ ꓟꓽ ꓬꓰ ꓟꓳ. ꓖꓶ꓿ ꓖꓳ ꓡꓱ ꓐꓯˍ ꓥ ꓟꓲ ꓬꓲ ꓠꓬ ꓟ. ꓟꓲꓽ ꓔꓯ ꓒꓶ ꓟ. ꓖꓶ ꓢꓲ ꓠꓬꓲ ꓮꓽ ꓤ ꓮꓽ ꓤ ꓬꓲ ꓔꓯ ꓚꓵ, ꓣꓴˍ ꓡꓳ꓿
ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓕꓱ ꓡꓱ ꓞꓳ ꓤ ꓔꓯ ꓬꓲ ꓗ. ꓠꓯ. ꓖꓼ ꓠ, ꓟ ꓐꓱ ꓶ ꓚꓵ, ꓣꓴ ꓓꓴ ꓠꓬꓲꓽ ꓚꓱ, ꓙꓳˍ ꓟ ꓗꓪ꓾ ꓣꓳꓽ ꓮꓽ ꓟ ꓔꓯ ꓥˍ ꓟꓲ ꓕꓱ ꓡꓱ ꓠꓬꓲ. ꓠꓬꓲ ꓗꓪ ꓛꓲ ꓬꓲ ꓡꓰ ꓬꓰ ꓔꓬ ꓢꓰꓽ ꓡꓳ꓿ ꓣꓳ ꓑ ꓙꓽ ꓠꓬꓲˍ ꓡꓳ꓾ ꓕꓲ ꓐꓱ ꓔꓯ ꓠꓬ ꓓꓵꓽ ꓙ ꓟꓶ ꓓꓴ ꓪꓴ‐ꓢ ꓡꓰ ꓬꓰ ꓟꓳ. ꓖꓶˍ ꓟ ꓗꓪ ꓐꓰ ꓬꓲ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻ ꓡˍ ꓟ꓾ ꓬꓲ ꓤꓶꓻ ꓗꓪ ꓫ. ꓙꓵ ꓟꓷꓼ ꓙꓵ ꓓꓰ ꓡꓰˍ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓬꓰ ꓙˍ ꓟ ꓑꓶ. ꓓꓴ ꓬꓲ ꓠꓬ ꓕꓱ ꓟ ꓠꓬ ꓪꓴ‐ꓢ ꓣꓱꓽ ꓛꓰꓽ ꓥ ꓐꓭ ꓐꓯ ꓢꓲ ꓠꓬꓲ ꓪꓴ‐ꓢ ꓔꓯ ꓙꓵꓻ ꓡˍ ꓟ ꓟꓲ ꓙꓳˍ ꓡꓳ꓿ ꓕꓲ ꓐꓱ ꓠꓬ ꓕꓳꓽ ꓶ ꓕꓲ ꓚꓬ. ꓵˍ ꓟ ꓗꓪ ꓐꓰ꓾ ꓥ ꓠꓬ ꓠꓱ. ꓐꓯ ꓢꓴ ꓡꓰ ꓐꓯ ꓟꓳ. ꓖꓶˍ ꓟ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻ ꓡˍ ꓟˍ ꓟꓲ ꓙꓳˍ ꓡꓳ꓿ ꓠꓴ ꓠꓬ ꓮ ꓡꓲ ꓐꓰ ꓙꓵꓻ ꓡˍ ꓥ ꓟꓲ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻ ꓠ, ꓟ ꓬꓳ. ꓚꓰꓽˍ ꓡꓳ꓿ ꓓꓵꓽ ꓙ ꓟꓶ ꓓꓴ ꓟꓳꓻ ꓡꓰ ꓢꓲ ꓙꓵꓻ ꓡ ꓥˍ ꓟꓲ ꓢꓲ ꓒ ꓬꓰ‐ꓢꓴ ꓬꓲ ꓘꓴ ꓔ ꓟ ꓥ ꓡꓳ꓿ ꓮ ꓤ ꓤ ꓫ. ꓕꓱ ꓘꓶꓽ ꓗꓪ ꓐꓰ ꓘꓴ ꓔ ꓟꓶ ꓢꓴ ꓥˍ ꓟꓲ ꓢꓲ ꓒ ꓬꓰ‐ꓢꓴ ꓘꓴ ꓔ ꓟˍ ꓡꓰꓽ ꓥ ꓡꓳ꓿ ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓔꓯ ꓘꓴ ꓔ ꓟ ꓟꓶˍ ꓟ꓾ ꓘ‐ꓣꓲ‐ꓢ‐ꓔꓴ ꓢꓲ ꓤ ꓒꓬꓱꓼ ꓡˍ ꓟ ꓙꓵꓻ ꓠꓲ, ꓔꓯ ꓟꓶˍ ꓟ ꓠꓬ꓾ ꓠꓲ, ꓪꓴꓽ ꓪꓴꓽ ꓡꓰꓽ ꓠꓲ, ꓟ ꓠꓯꓸꓼ ꓗꓪ ꓗꓶ ꓔ ꓢꓲ ꓠꓬꓲ ꓪꓴ‐ꓢ ꓠꓯꓸꓼ ꓗꓪ ꓠꓲ, ꓟ ꓟꓽ ꓙꓬ ꓙꓬ ꓐꓰ ꓠꓲ, ꓟ ꓟꓽ ꓫ. ꓫ.꓾ ꓟꓽ ꓙꓵꓻ ꓙꓵꓻ ꓟꓽ ꓗꓷ ꓡꓰ ꓡꓰ ꓐꓰ ꓢꓲ ꓒ ꓬꓰ‐ꓢꓴ ꓔꓯ ꓕꓶ ꓕꓶ ꓡꓰꓽ ꓪꓳꓻ ꓞ, ꓢꓲ ꓠꓬꓲ꓾ ꓣꓳ ꓘꓴ ꓟꓶ ꓔ ꓟ ꓘꓴ ꓘꓶꓽ ꓕꓱ ꓟ ꓔꓯ ꓓꓽ ꓔꓳ, ꓢꓲ ꓠꓬꓲ ꓟꓲꓽ ꓙꓬ ꓢꓲ ꓗꓪ ꓙꓰˍ ꓡꓯ꓿ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓐꓰ ꓕꓲ ꓪꓽ ꓔꓬ ꓡꓳ꓿
