ꓟ‐ꓘꓳ꓿6ꓽ7‐13
ꓢꓲ ꓒ ꓬꓰ‐ꓢꓴ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓾
ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓰ꓾ ꓪꓴ‐ꓢ ꓟꓽ ꓥ ꓠꓬ ꓠꓱ. ꓐꓯ ꓮ ꓫꓵꓽ ꓔꓯ ꓪꓴ‐ꓢ ꓕꓯꓽ ꓢꓲ ꓕꓽ ꓦ ꓡꓱꓻ ꓙꓰ ꓐꓯˍ ꓟ ꓟ. ꓟꓲꓽ ꓝꓲ. ꓗꓪ ꓐꓰ ꓣꓳ ꓦꓻ ꓢꓯꓼ ꓪ ꓣꓴ ꓓꓴ ꓥꓳ꓿ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓠꓬ (ꓟ‐ꓘꓳ 6ꓽ7‐13) ꓥ ꓡꓳ꓿ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓬꓲ ꓕꓲꓽ ꓟꓴꓽ ꓠꓬ ꓕꓱ ꓡꓱ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓞꓲ ꓠꓬꓲꓽ ꓣꓳ ꓔꓯ ꓘꓴ ꓔꓯ, ꓡ ꓢꓲ ꓠꓬꓲ꓾ ꓠꓬꓲꓽ ꓣꓳ ꓠꓬꓲꓽ ꓣꓳ ꓐꓰ ꓟ. ꓟꓲꓽ ꓚ ꓠ, ꓟ꓾ ꓓꓵꓽ ꓙ ꓒꓳ, ꓬꓲꓼ ꓡ ꓠ, ꓟ ꓐꓱ ꓶ ꓟ. ꓟꓲꓽ ꓚ ꓖꓶ ꓠ, ꓟ꓾ ꓠꓻ ꓫꓬ, ꓖꓶ ꓠ, ꓟ꓾ ꓠꓲꓽ ꓔꓯ ꓥ ꓟꓲ ꓖꓼ ꓓꓳ ꓠ, ꓟ ꓐꓱ ꓶ ꓝꓲ ꓩꓴ ꓗꓷˍ ꓡꓳ꓿ ꓕꓱ ꓡꓱ ꓝꓲ ꓩꓴ ꓗꓷˍ ꓟ ꓗꓪ ꓠꓬ ꓢꓲ ꓒ ꓬꓰ‐ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓕꓱ ꓡꓱ ꓕꓵꓼ ꓪ ꓖꓶˍ ꓡꓳ꓿ “ꓠꓴ ꓪ ꓓꓴ ꓓꓳ ꓙꓰˍ ꓟ ꓗꓪ ꓙꓽ ꓥꓳꓽ ꓟꓽ ꓥ ꓠꓬ ꓠꓱ. ꓐꓯ ꓮ ꓫꓵꓽˍ ꓟꓲ ꓕꓽ ꓔꓯ,꓿ ꓙꓽ ꓧꓷ, ꓗꓪ ꓒꓴˍ ꓟꓲ ꓕꓽ ꓔꓯ,꓿ ꓜꓽ ꓓꓴˍ ꓟꓲ ꓕꓽ ꓟꓯꓻ꓿ ꓡꓯꓼ ꓔꓲ. ꓥ ꓠꓬ ꓡꓯꓼ ꓫꓬ.ˍ ꓟꓲ ꓕꓽ ꓟꓯꓻ꓿ ꓛꓲ ꓠꓲ ꓠꓽ ꓠꓲ ꓛꓵˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓐꓵꓽ ꓞꓶ ꓠꓬꓲꓽ ꓘꓳ, ꓕꓽ ꓔꓯ,꓾” ꓐꓰ ꓐꓯ ꓢꓲ ꓠꓬꓲ ꓕꓱ ꓡꓱ ꓕꓵꓼ ꓪ ꓖꓶˍ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓡꓰ ꓕꓱ ꓡꓱ ꓕꓵꓼ ꓪ ꓖꓶ ꓔꓬ ꓟ ꓠꓬ ꓬꓲ. ꓬꓲ ꓢꓲ ꓠꓬ ꓕꓱ ꓡꓱ ꓥꓳ꓿ ꓙꓽ ꓥꓳꓽ ꓐꓰ ꓛꓲ ꓠꓲ ꓠꓲ ꓛꓵˍ ꓡꓳ꓿ ꓕꓱ ꓠꓬꓲꓽ ꓙꓰꓽ ꓗꓳ. ꓙꓰ ꓠꓬ ꓮ ꓫꓵꓽˍ ꓟꓲ ꓔꓽ ꓔꓯ,꓾ ꓐꓰ ꓢꓲ ꓒ ꓬꓰ‐ꓢꓴ ꓕꓵꓼ ꓪ ꓖꓶ ꓔꓬ ꓟ ꓠꓬ꓾ ꓙꓽ ꓥꓳꓽ ꓐꓯ ꓟ ꓠꓬ ꓮ ꓡꓲ ꓫꓵꓽ ꓬꓰ ꓓꓴ ꓥ ꓡ ꓐꓯ ꓠꓬ꓾ ꓣꓳ ꓢꓯꓼ ꓐꓽ ꓡˍ ꓕꓯ ꓔꓳ, ꓓꓴ꓾ ꓣꓳ ꓡꓱ. ꓐꓱꓽ ꓙꓰˍ ꓟ ꓗꓪ ꓔꓳ, ꓓꓴ꓾ ꓥ ꓠꓬ ꓠꓱ. ꓐꓯ ꓬꓲ ꓗꓳ. ꓬꓲ ꓟꓯꓼ ꓣꓳ ꓔꓯ ꓘꓳꓼ ꓜꓽ ꓡ ꓠ, ꓟ ꓐꓱ ꓶ ꓟꓽ ꓙꓲꓻ ꓟꓽ ꓜꓳꓽ ꓟ ꓣꓳ ꓔꓯ ꓬꓰ ꓡ ꓕꓯ ꓠꓽ ꓣꓳ ꓠꓽ ꓙꓽ ꓥꓳꓽ ꓖꓳ ꓟ ꓣꓱꓽ ꓢꓲ ꓠꓬꓲ꓾ ꓗꓽ ꓔ ꓕꓽ ꓔ ꓓꓴ ꓐꓱ ꓶ ꓐꓯ ꓢꓲ ꓠꓬꓲ ꓙꓽ ꓥꓳꓽ ꓔꓯ ꓣꓱꓽ ꓛꓵˍ ꓡꓳ꓾ ꓐꓰ ꓕꓱ ꓡꓱ ꓐꓯ ꓡꓳ꓿
ꓕꓱ ꓟ ꓬꓲ. ꓬꓲ ꓢꓲ ꓠꓬ ꓙꓽ ꓥꓳꓽ ꓠꓬ ꓠꓱ. ꓐꓯ ꓔꓯ ꓐꓯˍ ꓟ ꓟꓽ ꓥ꓿ ꓙꓽ ꓥꓳꓽ ꓐꓯ ꓟ ꓠꓬ ꓪꓴ‐ꓢ ꓔꓯ ꓦ ꓡꓱ ꓐꓳˍ ꓟ ꓔꓯ ꓐꓯˍ ꓟ ꓥ ꓡꓳ꓿ ꓪꓴ‐ꓢ ꓠꓬ ꓣꓳꓽ ꓙꓽ ꓥꓳꓽ ꓥ ꓡꓳ꓿ ꓙꓽ ꓥꓳꓽ ꓐꓰ ꓣꓳ꓾ ꓕꓲ ꓡꓰ, ꓓ, ꓕꓯ ꓠꓽ ꓣꓳ ꓔꓯ ꓮ ꓫꓵꓽˍ ꓟꓲ ꓛ ꓡꓰ ꓓꓴ ꓟꓽ ꓙꓳ꓿ ꓣꓳ ꓡꓱ. ꓐꓱꓽ ꓙꓰˍ ꓟꓲ ꓙꓽ ꓥꓳꓽ ꓖꓳ ꓟ ꓡꓰ ꓣꓳ ꓔꓯ ꓔꓳ, ꓖꓶˍ ꓟ ꓡꓰ ꓐꓰ꓾ ꓪꓴ‐ꓢ ꓠꓬ ꓣꓳ ꓔꓯ ꓔꓳ, ꓙ ꓡˍ ꓡꓳ꓿ ꓟꓽ ꓙꓲꓻ ꓟꓽ ꓜꓳꓽ ꓟ ꓣꓳ ꓔꓯ ꓘꓳꓼ ꓜꓽ ꓡˍ ꓟ꓾ ꓣꓳ ꓔꓯ ꓟꓽ ꓧꓺ ꓟ ꓬꓰ ꓖꓶ ꓡˍ ꓟ ꓮ ꓙꓵꓽ ꓥˍ ꓟꓲ ꓙꓽ ꓥꓳꓽ ꓖꓳ ꓟ ꓗꓪ ꓐꓰ ꓣꓳ ꓔꓯ ꓕꓽ ꓔ ꓗꓽ ꓔ ꓖꓶˍ ꓟ ꓡꓰ ꓐꓰ꓾ ꓪꓴ‐ꓢ ꓥˍ ꓟꓲ ꓣꓳ ꓔꓯ ꓗꓽ ꓔ ꓕꓽ ꓔ ꓖꓶˍ ꓥꓳ꓿ ꓠꓴ ꓓꓴ ꓓꓳ ꓙꓰˍ ꓟ ꓗꓪ ꓮ ꓫꓵꓽ ꓕꓽ ꓙꓳ꓾ ꓐꓰ ꓐꓯˍ ꓟ ꓬꓲ. ꓬꓲ ꓢꓲ ꓥ ꓡꓳ꓿
ꓝꓮꓲ ꓕꓲ ꓟ ꓟ ꓠꓬ “ꓛꓲ ꓠꓲ ꓠꓽ ꓠꓲ ꓛꓵˍ ꓡꓳ” ꓐꓯ ꓢꓰꓽ ꓡꓳ꓿ ꓛꓲ ꓠꓲ ꓐꓯ ꓟ ꓠꓬ꓾ ꓙ ꓣꓳˍ ꓟ ꓠꓲ, ꓟ ꓔꓯ ꓐꓯ ꓟ ꓥ ꓡꓳ꓿ ꓖꓳ ꓟ ꓪꓴ. ꓠꓬꓲ ꓪꓴ‐ꓢ ꓔꓯ ꓦ ꓡꓱ ꓐꓳ ꓢꓲ ꓠꓬꓲ ꓣꓳ ꓠꓬ ꓙ ꓣꓳˍ ꓟ ꓠꓲ, ꓟ ꓡꓰ ꓣꓳ ꓪꓴ‐ꓢ ꓟꓬꓱꓽ ꓬꓰˍ ꓕꓯ ꓠꓽ꓾ ꓮ ꓘꓶ. ꓐꓲ ꓜꓲꓼˍ ꓟ ꓟꓴꓽ ꓗꓪ ꓗꓴꓷꓼ ꓟ. ꓟꓲꓽ ꓚ ꓐ ꓡˍ ꓟ꓾ ꓟꓴꓽ ꓗꓪ ꓗꓴꓷꓼ ꓐꓱ ꓶ ꓣꓱꓽ ꓬꓰ ꓐ ꓡˍ ꓟ ꓬꓲ ꓝꓲ ꓓꓴ ꓒꓬꓱꓼ ꓡ ꓥꓳ ꓐꓰ꓾ ꓐꓯ ꓠꓲ, ꓫꓵˍ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓡꓰ ꓕꓱ ꓡꓱ ꓕꓵꓼ ꓪ ꓖꓶ ꓔꓬ ꓟ ꓥ ꓡꓳ꓿
ꓠꓬꓲ. ꓠꓬꓲ ꓣꓳ ꓥ ꓟꓲ꓾ ꓢꓲ ꓒ ꓬꓰ‐ꓢꓴ ꓬꓲ ꓝꓲ ꓓꓴ ꓚꓵ ꓣꓳ ꓥ ꓟꓽ ꓥ ꓟ ꓡꓳ. ꓠꓬꓲ ꓡꓯ꓿ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓬꓲ ꓝꓲ ꓓꓴ ꓐꓱ ꓶ ꓙꓽ ꓥꓳꓽ ꓠꓬ ꓪꓴ‐ꓢ ꓥ ꓡꓳ꓿ ꓣꓳ ꓐꓱ ꓶ ꓠꓬ ꓙꓽ ꓥꓳꓽ ꓠꓬ ꓮ ꓫꓵꓽ ꓥ ꓡ꓿ ꓠꓬꓲ. ꓠꓬꓲ ꓣꓳ ꓤꓶꓻ ꓦꓬꓼ ꓠꓬꓲ ꓗꓪ ꓠꓬ ꓣꓳ ꓠꓬ ꓙꓽ ꓥꓳꓽ ꓥ ꓟ ꓪꓴ‐ꓢ ꓕꓯꓽ ꓢꓲ ꓗꓪ ꓣꓳ ꓠꓬ ꓒꓴ ꓫꓵꓺ ꓔꓯ ꓪ ꓜꓲ ꓦ ꓡꓱ ꓔꓬ ꓡ꓿ ꓣꓳ ꓔꓯ ꓙꓳˍ ꓟ ꓬꓲ ꓙꓵ, ꓮ ꓙꓵꓽ ꓠꓬ ꓮ ꓫꓵꓽ ꓐꓱ ꓶ ꓣꓱꓽ ꓬꓰ ꓔꓬ ꓡ꓿ ꓣꓳ ꓬꓲ ꓙꓵ, ꓔꓯ ꓮꓽ ꓟ ꓔꓯ ꓖꓶ ꓔꓬ ꓡ꓿ ꓪꓴ‐ꓢ ꓕꓯꓽ ꓢꓲ ꓠꓱ. ꓐꓯ ꓮ ꓙꓵꓽ ꓔꓯ ꓣꓳ ꓬꓲ ꓙꓵ, ꓔꓯ ꓖꓶ ꓔꓬ ꓡ꓿ ꓣꓳ ꓢꓯꓼ ꓪ꓾ ꓣꓳ ꓪꓴ. ꓠꓶ.꓾ ꓣꓳ ꓣꓱꓽ ꓬꓰ ꓐ ꓡˍ ꓟ ꓮ ꓙꓵꓽ꓾ ꓙꓵꓽ ꓪ ꓢꓯꓼ ꓪ ꓮ ꓙꓵꓽ ꓠꓬ ꓪꓴ‐ꓢ ꓐꓱ ꓶ ꓟꓽ ꓥ ꓥ ꓐꓰ꓾ ꓪꓴ‐ꓢ ꓕꓯꓽ ꓢꓲ ꓠꓱ. ꓐꓯ ꓔꓯ ꓣꓳ ꓣꓱꓽ ꓬꓰ ꓐ ꓡˍ ꓟ ꓮ ꓙꓵꓽ ꓣꓳ ꓢꓯꓼ ꓪ ꓖꓶ ꓔꓬ ꓡ꓾ ꓐꓯ ꓟ ꓓꓵꓽ ꓙ ꓠꓬꓲ ꓡꓯ꓿ ꓕꓱ ꓡꓱ ꓖꓶ ꓔꓬ ꓥꓳ ꓐꓯ ꓠꓬ꓾ ꓠꓬꓲ. ꓠꓬꓲ ꓣꓳꓽ ꓠꓬ ꓪꓴ‐ꓢ ꓔꓯ ꓦ ꓡꓱ ꓟꓽ ꓐꓳ ꓐꓳ ꓐꓰ꓾ ꓣꓳ ꓚꓲ. ꓛꓬ ꓚꓳꓽ ꓚꓲ. ꓛꓬ ꓦ ꓡꓱˍ ꓟ꓾ ꓒꓴ ꓫꓵꓺ ꓔꓯ ꓦ ꓡꓱˍ ꓟ ꓥ ꓠꓬ꓾ ꓣꓳ ꓢꓷ. ꓠꓲ, ꓔꓯ ꓦ ꓡꓱˍ ꓟ꓾ ꓥ ꓠꓬ ꓠꓱ. ꓐꓯ ꓢꓴ ꓔꓯ ꓣꓳ ꓦ ꓡꓱ ꓔꓬ ꓟ ꓔꓯ ꓫꓱ.ˍ ꓡꓳ꓿
ꓖꓳ ꓡꓱ ꓠꓬꓲ ꓕꓱ ꓡꓱ ꓙꓰ ꓔꓬ ꓥꓳ ꓐꓯ ꓠꓬ ꓣꓳ ꓠꓽ ꓢꓲ ꓒ ꓬꓰ‐ꓢꓴ ꓬꓲ ꓝꓲ ꓓꓴ ꓚꓵ ꓟꓽ ꓥ꓿ ꓢꓲ ꓒ ꓬꓰ‐ꓢꓴ ꓬꓲ ꓐꓯ ꓘꓶꓽ ꓬꓲ ꓕꓵꓼ ꓪ ꓖꓶ ꓔ ꓟ ꓡꓰ ꓐꓰ ꓣꓳ ꓪꓴ‐ꓢ ꓟ. ꓟꓲꓽ ꓚ ꓖꓶ ꓟꓽ ꓐ ꓡ꓿ ꓪꓴ‐ꓢ ꓟꓬꓱꓽˍ ꓟꓲ ꓬꓰ ꓟꓽ ꓐ ꓡ꓿ ꓪꓴ‐ꓢ ꓤ ꓠꓱ ꓚꓵ ꓕꓲ ꓣꓳˍ ꓡꓰ ꓐꓰˍ ꓟꓲ ꓣꓳ ꓢꓯ. ꓔꓬ ꓟꓽ ꓐ ꓡ꓾ ꓐꓯ ꓟ ꓣꓳ ꓢꓷ. ꓔ ꓠꓯ, ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓙꓽ ꓥꓳꓽˍ ꓡꓰ ꓐꓰ ꓗ, ꓟ ꓪꓴ‐ꓢ ꓔꓯ ꓣꓳ ꓦ ꓡꓱ ꓐꓳˍ ꓟ ꓐꓰ꓾ ꓛꓲ ꓠꓲ ꓥ ꓟ ꓙ ꓣꓳˍ ꓟ ꓠꓲ, ꓟ ꓡꓰ ꓣꓳ ꓕꓱ ꓡꓱ ꓠꓬꓲꓽ ꓟ ꓣꓱꓽ ꓢꓲ ꓙꓰˍ ꓕꓯ ꓠꓽ꓾ ꓣꓳ ꓔꓯ ꓮ ꓫꓵꓽ ꓛ ꓡꓰ ꓓꓴ ꓟꓽ ꓙꓳ꓿ ꓐꓯ ꓠꓲ, ꓫꓵˍ ꓟ ꓠꓬ꓾ ꓪꓴ‐ꓢ ꓣꓳ ꓐꓰ ꓔꓬ ꓕꓯ ꓠꓬ꓾ ꓙ ꓣꓳˍ ꓟ ꓠꓲ, ꓟ ꓡꓰ ꓪꓴ‐ꓢ ꓔꓯ ꓣꓳ ꓘꓳ ꓣꓴ ꓔ ꓕꓯ ꓠꓽ ꓣꓳ ꓔꓯ ꓠꓱ. ꓐꓯ ꓮ ꓫꓵꓽ ꓟꓽ ꓙꓳ ꓥ ꓟꓲ ꓮ ꓫꓵꓽ ꓟꓽ ꓛ ꓡꓰ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓾ ꓣꓳ ꓔꓯ ꓮ ꓙꓵꓽ ꓖꓶ ꓐ ꓡˍ ꓟ ꓪꓴ‐ꓢ ꓠꓬ ꓣꓳ ꓐꓰ ꓔꓬ ꓟ ꓪꓴ. ꓠꓬꓲ ꓥ ꓡꓳ꓾ ꓐꓯ ꓟ ꓬꓲ. ꓬꓲ ꓢꓲ ꓬꓲ ꓟ. ꓟꓲꓽ ꓥ ꓡꓳ꓿
