AD (337) ꓘꓳꓼ ꓕꓯ ꓪ ꓔꓲ Constantine ꓫꓵꓻ ꓡꓰ ꓟ ꓥ ꓡꓳ꓿ ꓪ ꓔꓲ ꓠꓬ ꓫꓵꓻ ꓘꓶꓽ ꓗꓪ ꓛꓲ ꓝꓴꓲ. ꓟꓽ ꓔꓲ ꓔ ꓢꓴ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ. ꓟꓶ ꓗꓪ ꓠꓬ ꓝꓴꓲ. ꓔꓲ ꓟꓶ ꓡꓰ ꓢꓴ ꓥ ꓡꓳ꓿ ꓪ ꓔꓲ Constantine ꓠꓬ ꓬꓲ. ꓟꓽ ꓫꓵꓻ ꓢꓰꓽ ꓕꓯ ꓬꓲ ꓤ ꓢꓽ ꓣꓳ ꓔꓯ ꓟꓵꓽ ꓕꓲ ꓣꓳ ꓕꓲ ꓐꓱ ꓐꓱꓻ ꓖꓶ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓪ ꓔꓲ ꓫꓵꓻˍ ꓟ ꓙꓵ, ꓕꓯ ꓪ ꓔꓲ ꓬꓲ. ꓤ ꓢꓽ ꓣꓳ ꓠꓬ ꓕꓲ ꓣꓳ ꓐꓰ ꓕꓲ ꓣꓳ ꓢꓰꓼ ꓡꓯ ꓘꓳ ꓓꓶꓽ ꓡꓯ ꓘꓳˍ ꓟ ꓥ ꓡꓳ꓿
ꓬꓲ. ꓟꓶ ꓗꓪ ꓠꓬ ꓪ ꓔꓲ ꓬꓲ. ꓤ Constantius ꓠꓬ ꓧꓪ. ꓡꓰ ꓢꓲ ꓠꓬꓲ ꓣꓳ‐ꓟ ꓗꓴꓷꓼ ꓔꓯ ꓙꓵꓽˍ ꓟ. ꓟꓲꓽ ꓥ ꓡꓳ꓿ ꓬꓲ. ꓠꓬ ꓪꓴ‐ꓢ ꓟꓽ ꓦꓻ ꓡꓱ ꓢꓴ Pagan ꓐꓴ ꓔꓯ ꓙꓲˍ ꓟ ꓕꓲ ꓒꓳ, ꓗꓪ ꓐꓰ ꓫꓵꓽ ꓘꓶꓽ ꓖꓶˍ ꓟ ꓥ ꓡꓳ꓿ ꓝꓮꓲ ꓣꓳ‐ꓟ ꓗꓴꓷꓼ ꓘꓴꓽ ꓗꓪ ꓠꓲꓽ ꓔꓯ ꓟꓽ ꓦꓻ ꓡꓱ ꓠ, ꓟ ꓪꓴ. ꓓꓵ ꓟꓽ ꓔꓵ. ꓠ, ꓟ ꓐꓯ ꓑꓶ ꓗꓷ ꓢꓲ ꓠꓬꓲ ꓠꓲꓽ ꓔꓯ ꓦꓻ ꓡꓱ ꓢꓴ ꓔꓯ ꓢꓰꓼˍ ꓟ ꓟꓲ ꓥ ꓡꓳ꓿
ꓪ ꓔꓲ. ꓠꓬ ꓠꓲꓽ ꓔꓯ ꓦꓻ ꓡꓱ ꓢꓴ ꓐꓴ ꓢꓳꓻ ꓦꓲꓻ ꓔꓯ ꓛꓴꓻ ꓩꓴ ꓗꓷ ꓟ ꓟꓲ ꓥ ꓡꓳ꓿ ꓝꓮꓲ ꓠꓲꓽ ꓔꓯ ꓦꓻ ꓡꓱ ꓢꓴ ꓐꓴ ꓢꓳꓻ ꓦꓲꓻ ꓔꓯ ꓙꓲˍ ꓟ ꓕꓲ ꓒꓳ, ꓗꓪ ꓣꓱꓽˍ ꓟ ꓥ ꓡꓳ꓿ ꓪ ꓔꓲ. ꓐꓴ ꓡꓰ ꓥꓳꓽ ꓡꓰ ꓟ ꓠꓬ ꓪꓴ‐ꓢ ꓟꓽ ꓦꓻ ꓡꓱ ꓢꓴ ꓐꓴ ꓟ. ꓒ ꓓꓽ ꓐꓴ ꓔꓯ ꓠꓱ. ꓐꓯ ꓙꓲ‐ꓢꓴ ꓢꓲꓺ ꓤ ꓢꓳꓻ ꓦꓲꓻ ꓗꓪ ꓕꓳꓽ ꓶ ꓟ. ꓙꓵꓽ ꓪ ꓖꓶ ꓗꓷ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓔꓳ, ꓔ ꓟ ꓟꓽ ꓙꓲꓻ ꓐꓯ ꓟ ꓫ. ꓕꓱ ꓘꓶꓽ ꓐꓰ ꓓꓵꓽ ꓙ ꓚꓱ, ꓮ ꓟꓬ, ꓔꓯ ꓢꓳꓻ ꓦꓲꓻ ꓟ. ꓒꓽ ꓐꓴ ꓡꓰ ꓟ. ꓖꓶˍ ꓟ ꓥ ꓡꓳ꓿ ꓪꓴ‐ꓢ ꓔꓯ ꓟꓽ ꓦꓻ ꓡꓱ ꓟ ꓠꓲꓽ ꓙꓵꓻ ꓠꓲ, ꓔꓯ ꓢꓳꓻ ꓤ ꓐꓴ ꓔꓯ ꓟ. ꓖꓶ ꓠ, ꓟ ꓙꓳꓽ ꓦꓲꓻ ꓗꓪ ꓟ. ꓒ ꓓꓽ ꓐꓴ ꓡꓰ ꓬꓰˍ ꓟ ꓥ ꓡꓳ꓿
