ꓓꓳ‐ꓙꓰ 15ꓽ26
ꓖꓳ ꓕꓯ ꓪꓴ‐ꓢ ꓡꓰ꓾ ꓠꓴ ꓪ ꓠꓬ ꓕꓲꓽ ꓠꓲ, ꓟ ꓡꓱꓸꓼ ꓠꓴ ꓪ ꓪꓴ‐ꓢ ꓥꓪ ꓔꓯ ꓠ ꓡꓳ, ꓢꓲ꓾ ꓥꓪ ꓟꓲꓽ ꓙꓬ ꓗꓪ ꓔꓱ, ꓜꓳꓽˍ ꓟ ꓬꓰ ꓢꓲ ꓠꓬꓲ꓾ ꓥꓪ ꓕꓵꓼ ꓪˍ ꓐꓰ ꓥꓪ ꓙꓵꓽ ꓚꓱ, ꓔꓯ ꓒꓵꓽ ꓛꓳˍ ꓠꓬ꓾ ꓥꓪ ꓡꓰ ꓬꓲ‐ꓙꓲ ꓡ ꓞꓳ ꓔꓯ ꓗꓷ ꓡꓰ ꓝꓲ ꓟ ꓠꓻ ꓓꓴ ꓒꓬꓽ ꓓꓴ ꓠꓬ ꓠꓴ ꓪ ꓔꓯ ꓟꓽ ꓗꓷ ꓡꓰ ꓝꓲ꓿ ꓮ ꓡꓲꓳ ꓐꓯˍ ꓠꓬ ꓥꓪ ꓠꓽ ꓠꓴ ꓪ ꓔꓯ ꓓꓻ ꓡꓰ ꓝꓲ ꓢꓴ ꓪꓴ‐ꓢ ꓥ ꓡꓳ꓾ ꓐꓯˍ ꓡꓳ꓿
ꓬꓰ‐ꓡꓲ‐ꓟꓲ 3ꓽ22
ꓙꓵꓻ ꓠꓲ, ꓟꓽ ꓙꓳ ꓢꓴ ꓐꓴꓳ꓾ ꓡꓰꓼ ꓡꓯ꓿ ꓣꓳ ꓪꓴ‐ꓢ ꓡꓰ ꓠꓴ ꓪ ꓔꓯ ꓠꓲ, ꓟ ꓗꓴ ꓖꓶ ꓢꓲ ꓫꓬ, ꓓꓻ ꓡꓰ ꓝꓲˍ ꓥꓳ꓿
ꓝꓲ ꓓꓴ 10ꓽ38
ꓢꓲ‐ꓫꓬ‐ꓟ‐ꓦˍ ꓐꓰ ꓪ ꓠꓬꓲˍ ꓟ ꓡꓰ꓾ ꓪꓴ‐ꓢ ꓠꓬ ꓮ ꓡꓲ ꓐꓰ ꓠ‐ꓢ‐ꓡꓱ ꓢꓴ ꓬꓰ‐ꓢꓴ ꓔꓯ ꓟꓰ ꓞꓶ ꓟꓰ ꓖꓶ ꓗꓷ ꓟˍ ꓐꓰ꓾ ꓪꓴ‐ꓢ ꓠꓬ ꓬꓲˍ ꓐꓰ ꓔꓬ ꓠꓬꓲ ꓬꓲ ꓠꓬ ꓙꓲˍ ꓟ ꓬꓰ ꓠ, ꓟ ꓮ ꓡꓲ ꓐꓰ ꓚꓳ ꓙꓰ ꓢꓲ꓾ ꓢ‐ꓓꓯ ꓡꓰ ꓞꓳ, ꓔ ꓟ ꓡ ꓞꓳ ꓮ ꓙꓵꓽ ꓔꓯ ꓓꓻ ꓡꓰ ꓝꓲˍ ꓟ ꓠꓴ ꓪ ꓢꓷ.ˍ ꓡꓳ꓿
ꓬꓲ‐ꓢ‐ꓬ 53ꓽ5
ꓬꓲ ꓠꓽ ꓣꓳ ꓛꓬ ꓖꓴ ꓑꓶ. ꓓꓴ ꓠꓻ ꓓꓴꓻ ꓓꓴ ꓡꓰꓳ꓿ ꓣꓳ ꓥꓳꓽ ꓖꓴ ꓪꓴ. ꓠꓬꓲ ꓫꓵꓽ ꓛꓵꓽ ꓡꓴ. ꓡꓰꓳ꓿ ꓬꓲ ꓡꓰ ꓣꓳ ꓛꓬ ꓒꓵꓽ ꓟꓯꓻ ꓙ ꓗꓷ ꓠꓬꓲ ꓣꓳ ꓢꓲ ꓡꓲ ꓟ ꓟꓶ ꓡꓰꓳ꓿ ꓬꓲ ꓐꓴꓻ ꓙꓵꓽ ꓡꓰ ꓟ ꓗꓪ ꓐꓰ ꓣꓳ ꓓꓻ ꓡꓰ ꓟꓶꓳ꓿
ꓬꓰ‐ꓡꓲ‐ꓟꓲ 30ꓽ17
ꓖꓳ ꓡꓱ ꓥˍ ꓟꓲ ꓢꓴ ꓡꓰ ꓠꓴ ꓪ ꓔꓯ꓾ ꓡꓳꓺ ꓩꓴ ꓗꓷ ꓟˍ ꓐꓰ ꓮꓽ ꓟˍ ꓟꓲ ꓟꓽ ꓙꓽꓗꓳ ꓟ ꓜꓲ‐ꓬꓴ꓾ ꓐꓰ ꓘꓴˍ ꓠꓬꓲ꓾ ꓥꓪ ꓠꓬ ꓠꓴ ꓪ ꓔꓯ ꓫꓬ, ꓓ ꓡꓰ ꓝꓲˍ ꓥꓳ꓿ ꓠꓴ ꓪ ꓠꓻ ꓓꓴ ꓔꓯˍ ꓟꓲ ꓫꓬ, ꓖꓶˍ ꓥꓳ꓾ ꓐꓰ ꓐꓯˍ ꓡꓳ꓿
ꓟ‐ꓕꓲ 14ꓽ14
ꓬꓰ‐ꓢꓴ ꓠꓬ ꓡꓲ ꓗꓪ ꓐꓰ ꓓꓳ ꓡ ꓢꓲ ꓞꓳ ꓜꓴ ꓞꓳ ꓟꓯꓼ ꓔꓯ ꓟꓳꓻ ꓗꓷ ꓠꓬ ꓬꓲ ꓪ ꓔꓯ ꓫꓱ. ꓤ ꓠꓬꓲ꓾ ꓬꓲ ꓪ ꓗꓪ ꓟ ꓠꓻ ꓢꓴ ꓒꓬꓽ ꓢꓴ ꓔꓯ ꓫꓬ, ꓓꓻ ꓡꓰ ꓝꓲˍ ꓡꓳ꓿
ꓟ‐ꓘꓳ 1ꓽ34
ꓠꓻ ꓫꓵꓽ ꓠꓻ ꓙꓰꓽ ꓠꓻ ꓢꓴ ꓮ ꓟꓬ, ꓔꓯ ꓬꓰ‐ꓢꓴ ꓡꓰ ꓫꓬ, ꓓꓻ ꓡꓰˍ ꓡꓳ꓿ ꓠꓲꓽ ꓮ ꓟꓬ, ꓔꓯˍ ꓟꓲ ꓬꓲ ꓡꓰ ꓖꓼ ꓓꓳ ꓗꓷ ꓢꓲ꓾ ꓠꓲꓽ ꓜꓴ ꓠꓬ ꓬꓲ ꓮꓽ ꓟ ꓥ ꓟ ꓔꓯ ꓢꓷ.ˍ ꓠꓬꓲ ꓬꓲ ꓡꓰ ꓬꓲ ꓪ ꓔꓯ ꓟꓽ ꓫ. ꓕꓱ ꓝꓲ꓿
ꓬ‐ꓗꓴ 5ꓽ15
ꓙꓵꓻ ꓠꓲ, ꓡꓰ ꓪꓽ ꓘꓴˍ ꓠꓬ ꓞꓳ ꓠꓻ ꓓꓻ ꓡꓰ ꓢꓲ꓾ ꓢꓲ ꓒ ꓡꓰ ꓬꓲ ꓔꓯ ꓢꓯꓼ ꓙꓳ ꓡ ꓝꓲˍ ꓥꓳ꓿ ꓝꓮꓲ ꓬꓲ ꓝꓴꓲ. ꓬꓰ ꓗꓷ ꓐꓭˍ ꓟꓲ ꓬꓲ ꓔꓯ ꓖꓼ ꓖꓶˍ ꓥꓳ꓿
