ꓬꓰ‐ꓢꓴ ꓡꓰ ꓐꓯˍ ꓡꓳ꓾ ꓠꓴ ꓪ ꓠꓬ ꓙꓳꓻ ꓓꓴ ꓮ ꓡꓲ ꓫꓵꓽ ꓡꓰ ꓢꓴ ꓔꓯ ꓙꓳꓻ ꓖꓶˍ ꓠꓬ ꓢꓴˍ ꓟꓲ ꓠꓴ ꓪ ꓔꓯ ꓖꓳ ꓟ ꓡꓰ ꓐꓰ ꓙꓳꓻ ꓖꓶ ꓡˍ ꓥꓳ꓾ ꓐꓰ ꓐꓯˍ ꓡꓳ꓿ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓠꓬ (ꓟ‐ꓘꓳ꓿4ꓽ21‐25) ꓥ ꓡꓳ꓿ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲ ꓒ ꓬꓰ‐ꓢꓴ ꓡꓰ ꓟꓬ ꓡꓴꓻ ꓔꓯ ꓠꓬ ꓠꓳ. ꓘꓴꓽ ꓗꓪ꓾ ꓥ ꓠꓬ ꓘ, ꓛꓽ ꓠꓯꓸ ꓘꓪ ꓗꓶ ꓔ ꓓꓴ ꓥ ꓡ꓾ ꓟꓬ ꓡꓴꓻ ꓕꓲꓺ ꓗꓪ ꓗꓶ ꓔ ꓓꓴ ꓟꓽ ꓥ ꓡ꓾ ꓐꓰ ꓬꓲ ꓪꓴ. ꓕꓲ ꓘꓶꓽ ꓟ. ꓔ ꓬꓰˍ ꓟ ꓥ ꓡꓳ꓿ ꓟꓬ ꓡꓴꓻ ꓐꓯˍ ꓟ ꓠꓬ ꓠꓬꓲ ꓟꓳꓻ ꓓꓴ ꓖꓶ ꓠ, ꓟ ꓥ ꓡꓳ꓿ ꓠꓬꓲ ꓟꓳꓻ ꓓꓴ ꓡꓬ. ꓖꓶ ꓠ, ꓟ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓠꓬꓲ ꓟꓳꓻ ꓓꓴ ꓡꓬ. ꓖꓶ ꓓꓴ ꓟꓬ ꓡꓴꓻ ꓔꓯ ꓠꓬ ꓠꓱ. ꓐꓯ ꓢꓴ ꓡꓰ ꓟꓳꓻ ꓓˍ ꓟ ꓗꓪ ꓗꓶ ꓔ ꓓꓴ ꓥ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓟꓬ ꓡꓴꓻ ꓡꓰ ꓐꓰ ꓣꓱꓽ ꓬꓰ ꓠ, ꓟ ꓟ. ꓖꓶ ꓔꓬ ꓟ ꓥ ꓡꓳ꓿ ꓟꓬ ꓡꓴꓻ ꓐꓯ ꓟ ꓠꓬ ꓪꓴ‐ꓢ ꓡꓰ ꓣꓳ ꓔꓯ ꓖꓶ ꓔ ꓟ ꓣꓱꓽ ꓛꓰꓽ ꓡꓯꓼ ꓫꓴ ꓮ ꓙꓵꓽ ꓥ ꓡꓳ꓿ ꓪꓴ‐ꓢ ꓡꓰ ꓣꓳ ꓔꓯ ꓖꓶ ꓡˍ ꓟ ꓣꓱꓽ ꓛꓰꓽ ꓡꓯꓼ ꓫꓴ ꓠꓬ꓾ ꓣꓳ ꓔꓯ ꓙꓳˍ ꓟ ꓢꓷ. ꓠꓲ,꓾ ꓓꓻˍ ꓟ꓾ ꓥ ꓠꓬ ꓕꓲ ꓐꓱ ꓠꓬ ꓮ ꓘꓶ. ꓫ. ꓕꓱ ꓗꓴ.ˍ ꓡꓳ꓾ ꓕꓲ ꓐꓱ ꓠꓬ ꓠꓲ, ꓠꓵˍ ꓗꓴ.ˍ ꓡꓳ꓾ ꓕꓲ ꓐꓱ ꓙꓳˍ ꓟ ꓠꓬ ꓮ ꓘꓶ. ꓠꓲ, ꓟ ꓫꓵˍ ꓡꓳ꓾ ꓕꓲ ꓐꓱ ꓠꓬ ꓫꓱ. ꓤ ꓗꓴ.ˍ ꓡꓳ꓾ ꓕꓲ ꓐꓱ ꓠꓬ ꓒꓴ ꓫꓵꓺ ꓮ ꓟꓬ, ꓙꓳˍ ꓡꓳ꓾ ꓕꓲ ꓐꓱ ꓠꓬ ꓮ ꓘꓶ. ꓐꓲꓻˍ ꓡꓳ꓿ ꓕꓱ ꓟ ꓮ ꓙꓵꓽ ꓠꓬ ꓪꓴ‐ꓢ ꓡꓰ ꓖꓶ ꓔ ꓟ ꓣꓱꓽ ꓛꓰꓽ ꓡꓯꓼ ꓫꓴ ꓥ ꓡꓳ꓿ ꓕꓱ ꓟ ꓮ ꓙꓵꓽ ꓠꓬ ꓠꓱ. ꓐꓯ ꓢꓴ ꓔꓯ ꓡꓬ. ꓖꓶ ꓠ, ꓟ ꓠꓬꓲ ꓟꓳꓻ ꓓꓴ ꓥ ꓡꓳ꓿
ꓖꓳ ꓟ ꓪꓴ. ꓠꓬꓲ ꓣꓳ ꓔꓯ ꓙꓳˍ ꓟ ꓮ ꓙꓵꓽ ꓠꓬ ꓚꓵ ꓔ ꓓꓴ ꓫꓺ ꓔ ꓓꓴ ꓟꓽ ꓥ ꓥ꓾ ꓢꓴ ꓐꓱ ꓶ ꓠꓬꓲ ꓟꓳꓻ ꓡ ꓓꓴ꓾ ꓢꓴ ꓔꓯ ꓣꓱꓽ ꓙ ꓠ, ꓟ꓾ ꓢꓴ ꓔꓯ ꓠꓲ, ꓠꓵ ꓠ, ꓟ꓾ ꓢꓴ ꓔꓯ ꓖꓼ ꓖꓶ ꓠ, ꓟ꓾ ꓐꓯ ꓢꓲ ꓠꓬꓲ ꓣꓳ ꓔꓯ ꓙꓳˍ ꓟ ꓣꓱꓽ ꓛꓰꓽ ꓡꓯꓼ ꓫꓴ ꓮ ꓙꓵꓽ ꓠꓬ ꓚꓵ ꓔ ꓓꓴ ꓟꓽ ꓥ ꓥ ꓢꓴ ꓔꓯ ꓖꓶ ꓓꓴ ꓥ ꓡꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓔꓯꓺ ꓥꓳꓽ ꓣꓱꓽ ꓢꓲ ꓐꓯ ꓖꓶ ꓡ ꓔꓬ ꓟ ꓥ ꓡꓳ꓿
ꓢꓲ ꓒ ꓬꓰ‐ꓢꓴ ꓡꓰ ꓝꓮꓲ ꓕꓱ ꓡꓱ ꓐꓯˍ ꓡꓳ꓿ ꓠꓴ ꓪ ꓠꓬ ꓙꓳꓻ ꓓꓴ ꓮ ꓡꓲ ꓫꓵꓽ ꓡꓰ ꓢꓴ ꓔꓯ ꓙꓳꓻ ꓖꓶˍ ꓠꓬ꓾ ꓢꓴˍ ꓟꓲ ꓠꓴ ꓪ ꓔꓯ ꓖꓳ ꓟ ꓡꓰ ꓙꓳꓻ ꓖꓶ ꓡˍ ꓥꓳ꓾ ꓐꓯˍ ꓡꓳ꓿ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓐꓯ ꓖꓶ ꓠꓲ, ꓫꓵˍ ꓟ ꓠꓬ꓾ ꓣꓳ ꓢꓴ ꓔꓯ ꓠꓲ, ꓠꓵˍ ꓥꓳ ꓐꓯ ꓠꓬ ꓣꓳ ꓠꓬ ꓠꓵꓻ ꓠꓲ, ꓪ ꓜꓲ ꓟꓶˍ ꓟ ꓥ ꓡꓳ꓿ ꓣꓳ ꓠꓬ ꓢꓴ ꓔꓯ ꓠꓵꓻ ꓠꓲ, ꓖꓶˍ ꓕꓯ꓾ ꓖꓼ ꓖꓶˍ ꓕꓯ꓾ ꓣꓳ ꓔꓯ ꓙꓳˍ ꓟ ꓮ ꓙꓵꓽ ꓢꓴ ꓔꓯ ꓬꓰ ꓙˍ ꓕꓯ ꓣꓳ ꓔꓯ ꓟꓽ ꓫꓱ ꓡꓰ ꓡꓰ ꓪꓴ‐ꓢ ꓡꓰ ꓣꓳ ꓔꓯ ꓝꓮꓲ ꓡꓴꓽ ꓖꓶ ꓧꓳꓽ ꓖꓶ ꓡˍ ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓣꓳ ꓤꓶꓻ ꓠꓯꓸꓼ ꓗꓪ ꓪꓴ‐ꓢ ꓡꓰ ꓖꓶ ꓡˍ ꓟ ꓣꓱꓽ ꓛꓰꓽ ꓡꓯꓼ ꓫꓴ ꓮ ꓟꓬ, ꓙꓳˍ ꓡꓳ꓿ ꓕꓱ ꓟ ꓔꓯ ꓠꓴ ꓚꓲ. ꓛꓬ ꓐꓱ ꓶˍ ꓡꓰꓽ ꓫ ꓔ ꓢꓲ ꓠꓬꓲ ꓚꓵ ꓔ ꓢꓲ ꓠꓬꓲ ꓣꓱꓽ ꓔꓬ ꓡ꓿ ꓟꓽ ꓥ ꓠꓬ ꓠꓴ ꓔꓯ ꓖꓶ ꓔ ꓟ ꓣꓱꓽ ꓛꓰꓽ ꓡꓯꓼ ꓫꓴ ꓮ ꓙꓵꓽ ꓔꓯ ꓠꓴ ꓡꓰ ꓢꓴ ꓐꓱ ꓶ ꓠꓬꓲ ꓟꓳꓻ ꓓꓴ ꓟꓶ ꓡꓰ ꓠ, ꓟ꓾ ꓢꓴ ꓔꓯ ꓣꓱꓽ ꓙ ꓠ, ꓟ ꓠꓴ ꓖꓶ ꓔꓬ ꓡ꓾ ꓐꓯˍ ꓟ ꓔꓯ ꓠꓬꓲ. ꓠꓬꓲ ꓗꓪ ꓓꓵꓽ ꓙ ꓠꓬꓲ ꓓꓴ ꓥꓳ꓿
ꓠꓴ ꓪ ꓟꓬꓽ ꓠꓬꓲ ꓖꓶˍ ꓠꓬ ꓠꓴ ꓪ ꓟꓬꓽ ꓠꓬꓲ ꓟꓶˍ ꓥꓳ꓿ ꓠꓴ ꓪ ꓮ ꓔꓲ. ꓤ ꓖꓶˍ ꓠꓬ ꓮ ꓔꓲ. ꓤ ꓡꓰꓽ ꓟꓶˍ ꓥꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓣꓳꓽ ꓔꓯ ꓢꓲꓽ ꓢꓲꓽ ꓡꓰꓽ ꓐꓯ ꓖꓶ ꓡ ꓔꓬ ꓡꓳ꓿ ꓖꓳ ꓟ ꓑꓶ. ꓓꓴ ꓠꓬꓲ. ꓠꓬꓲ ꓣꓳ ꓟꓬꓽ ꓠꓬꓲ ꓖꓶˍ ꓠꓬ ꓟꓬꓽ ꓠꓬꓲ ꓟꓶˍ ꓥꓳ꓾ ꓐꓯˍ ꓟ ꓢꓲ ꓒ ꓬꓰ‐ꓢꓴ ꓐꓯ ꓘꓶꓽ ꓔꓯ ꓠ ꓠ, ꓢꓲ ꓠꓬꓲ ꓣꓳ ꓔꓯ ꓙꓳˍ ꓟ ꓮ ꓙꓵꓽ ꓠꓬ ꓟꓬ ꓡꓴꓻˍ ꓡꓰ ꓐꓰ ꓢꓴ ꓐꓱ ꓶ ꓠꓬꓲ ꓟꓳꓻ ꓓꓴ ꓒꓬꓱꓼ ꓡ ꓝꓲ ꓡꓯ꓿
