ꓮ ꓠꓱ ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓬꓰˍ ꓟ ꓖꓪ ꓙꓱ ꓜꓲꓼ ꓓꓴ ꓠꓬ ꓘꓴ ꓜꓲꓼ ꓞꓳ ꓡꓰ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓟ. ꓖꓶ ꓔ ꓟ ꓚꓱ, ꓔꓯ ꓗꓽ ꓕ. ꓠ, ꓟ ꓥ ꓡꓳ꓿ ꓖꓳ ꓟ ꓟꓽ ꓞꓲ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓔꓬ ꓟ ꓚꓱ, ꓗꓪ ꓪꓴꓽ ꓟꓴ ꓡ ꓠ, ꓟ ꓚꓱ, ꓟꓲ ꓥ ꓡꓳ꓿ ꓕꓱ ꓖꓪ ꓙꓱ ꓜꓲꓼ ꓓꓴ ꓬꓰ ꓗꓷ ꓟ ꓗꓪ ꓐꓰ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓔꓬ ꓟ ꓔꓲꓺ ꓒ ꓓꓽ ꓐꓴ ꓮ ꓙꓵꓽ ꓐ, ꓟ ꓟꓵꓽ ꓗꓳ, ꓓꓵ ꓓꓵ ꓔꓲꓺ ꓒ ꓓꓽ ꓐꓴ ꓖꓪ ꓙꓱ ꓜꓲꓼ ꓓꓴ ꓐꓰ ꓚꓲ. ꓛꓬ ꓗꓴꓷꓼ ꓘꓴꓽ ꓗꓪ ꓔꓬ ꓟ ꓔꓲꓺ ꓒ ꓓꓽ ꓐꓴ ꓖꓪ ꓙꓱ ꓜꓲꓼ ꓓꓴ ꓥ ꓟꓲ ꓬꓰ ꓗꓷ ꓟ ꓥ ꓡꓳ꓿

Nicaea ꓡꓳ ꓒꓱ ꓗꓪ ꓬꓰ ꓗꓷ ꓟ ꓖꓪ ꓙꓱ ꓜꓲꓼ ꓓꓴ ꓥ ꓟ ꓪꓴ. ꓠꓬꓲ Nicene Creed ꓝꓲ ꓓꓴ ꓐꓴ ꓙꓵꓻ ꓠꓲ, ꓪꓽ ꓘꓴ ꓘꓶꓽ ꓔꓯ ꓪꓽ ꓘꓴ ꓓꓴ ꓔꓯ ꓕꓱ ꓖꓪ ꓙꓱ ꓜꓲꓼ ꓓꓴ ꓗꓪ ꓔꓲꓺ ꓒ ꓓꓽ ꓐꓴ ꓖꓪ ꓙꓱ ꓗꓷ ꓟ ꓚꓱ, ꓮ ꓙꓵꓽ ꓐ, ꓟ ꓥ ꓡꓳ꓿ Nicaea ꓡꓳ ꓒꓱ ꓗꓪ ꓬꓰ ꓗꓷ ꓟ ꓖꓪ ꓙꓱ ꓜꓲꓼ ꓓꓴ ꓠꓬ General Council ꓟꓲ ꓥ ꓡꓳ꓿ ꓕꓱ ꓖꓪ ꓙꓱ ꓜꓲꓼ ꓓꓴ ꓗꓪ ꓢꓲꓺ ꓒ ꓬꓰ‐ꓢꓴ ꓐꓰ ꓐ, ꓐꓽ ꓪꓴ‐ꓢ ꓠꓬ ꓪꓽ ꓡꓯꓽ ꓘꓳ, ꓟ ꓙꓵꓽ ꓪ ꓙꓳˍ ꓟ ꓚꓱ, ꓔꓯ ꓖꓪ ꓙꓱ ꓗꓷ ꓟ ꓥ ꓡꓳ꓿

ꓖꓳ ꓡꓱ ꓥ ꓟ ꓪꓴ. ꓠꓬꓲ ꓟꓲ‐ꓢ ꓪꓽ ꓘꓴ ꓙꓵ, ꓗꓪ ꓖꓪˍ ꓟ ꓝꓲ ꓓꓴ ꓐꓴ ꓙꓵꓻ ꓠꓲ, ꓪꓽ ꓘꓴꓽ ꓘꓶꓽ ꓔꓯ ꓟꓴ ꓖꓪ ꓗꓪ ꓐꓰ ꓖꓪ ꓔꓬ ꓟ ꓥ ꓡꓳ꓿ ꓕꓱ ꓖꓪ ꓙꓱ ꓜꓲꓼ ꓓꓴ ꓗꓪ ꓤ ꓔꓲ. ꓬꓰ‐ꓢꓴ ꓙꓲ‐ꓢꓴ ꓠꓬ ꓪꓴ‐ꓢ ꓚꓵ ꓚꓵ ꓥ ꓟ ꓚꓱ, ꓔꓯ ꓐꓯ ꓑꓶ ꓗꓷ ꓟ ꓥ ꓡꓳ꓿

ꓪꓴ‐ꓢ ꓐꓰ ꓪꓴ‐ꓢ꓾ ꓠꓬꓲ ꓟꓳ ꓓꓴ ꓐꓰ ꓠꓬꓲ ꓟꓳ ꓓꓴ꓾ ꓪꓴ‐ꓢ ꓚꓵ ꓚꓵ ꓐꓰ ꓪꓴ‐ꓢ ꓚꓵ ꓚꓵ꓾ ꓚꓰꓼ ꓔ ꓢꓴ ꓟꓲ ꓟꓽ ꓙꓳ꓿ ꓙꓳˍ ꓟ ꓮ ꓙꓵꓽ ꓚꓰꓼ ꓔ ꓟ ꓕꓲ ꓣꓳ ꓖꓳ ꓓꓱ ꓗꓪ ꓬꓲ ꓔꓬ ꓡꓳ꓿ ꓐ, ꓐ ꓤ ꓔꓲ ꓢꓲꓽ‐ꓫꓬ‐ꓟ‐ꓦ ꓢꓽ ꓣꓳ ꓕꓲ ꓖꓳꓽ ꓓꓱ ꓪꓴ‐ꓢ ꓠꓬ ꓕꓲ ꓟ ꓥ ꓟ ꓚꓱ, ꓔꓯ ꓟ. ꓖꓶ ꓔ ꓡꓳ꓿

ꓕꓱ ꓖꓪ ꓙꓱ ꓜꓲꓼ ꓓꓴ ꓗꓪ ꓐꓰ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓪꓴ‐ꓢ ꓟꓽ ꓥ ꓐꓰ ꓙꓵꓻ ꓢꓲ ꓠꓬꓲ ꓟ. ꓟꓲ ꓚꓺ ꓟ Arius ꓔꓯ ꓘꓴ ꓜꓲꓼ ꓞꓳ ꓗꓪ ꓐꓰ ꓖꓼ ꓓꓳ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ Arius ꓔꓯ ꓘꓴ ꓜꓲꓼ ꓞꓳ ꓠꓬ ꓗ. ꓠꓯ. ꓕꓯ ꓘꓴ ꓜꓲꓼ ꓞꓳ ꓗꓪ ꓬꓯꓼ ꓡ ꓠ, ꓟ ꓙꓵꓽ ꓪ ꓖꓶ ꓔ ꓟ ꓥ ꓡꓳ꓿  ꓖꓳ ꓡꓱ ꓥ ꓟꓲ ꓬꓲ ꓡꓰ ꓥꓳꓽ ꓡꓰ ꓟ ꓟ. ꓟꓲꓽ ꓚꓺ ꓗꓷ ꓟ ꓪꓴ. ꓠꓬꓲ ꓬꓲ ꓢꓯ. ꓔꓬ ꓢꓰꓽ ꓟ ꓙꓵ, ꓗꓪ ꓐꓰ ꓬꓲ. ꓫꓵꓻ ꓡꓰ ꓗ. ꓠꓯ. ꓗꓪ ꓛꓲ ꓘꓴ ꓜꓲꓼ ꓞꓳ ꓔꓯ ꓮ ꓟꓬ, ꓫꓵꓽ ꓪꓴꓽ ꓖꓶˍ ꓟ ꓥ ꓡꓳ꓿

ꓗꓴꓷꓼ ꓙꓵꓽ ꓚꓱ, ꓗꓪ ꓙꓵꓽ ꓪ ꓙꓳ ꓢꓴ ꓕꓲ ꓐꓱ ꓠꓬ ꓪꓴ‐ꓢ ꓟꓽ ꓦꓻ ꓡꓱ ꓢꓴ Arians ꓗ. ꓠꓯ. ꓛꓳ ꓢꓴ ꓐꓴ ꓔꓯ ꓙꓵꓽ ꓪ ꓖꓶˍ ꓟ ꓟꓲ ꓙꓳˍ ꓟ ꓥ ꓡꓳ꓿ ꓕꓲ ꓐꓱ ꓠꓬ ꓘꓴ ꓜꓲꓼ ꓞꓳ ꓔꓯ ꓮ ꓕꓯ ꓥ ꓟꓲ ꓗꓽ ꓕ. ꓢꓴ ꓥ ꓢꓲ ꓠꓬꓲ ꓮ ꓡꓲ ꓫꓵꓽ ꓫꓵꓽ ꓪꓴꓽ ꓖꓶ ꓡ ꓥ ꓟꓲ ꓢꓽ ꓣꓳ ꓕꓲ ꓖꓳꓽ ꓓꓱ ꓪꓴ‐ꓢ ꓔꓯ ꓦꓻ ꓡꓱˍ ꓟ ꓠꓬ ꓟꓽ ꓠꓽ ꓡꓰ ꓟ ꓥ ꓡꓳ꓿

ꓪꓴ‐ꓢ ꓔꓯ ꓟꓽ ꓦꓻ ꓡꓱ ꓢꓴ ꓐꓴ ꓔꓯ ꓠꓬ ꓘꓴ ꓜꓲꓼ ꓞꓳ ꓗꓪ ꓐꓰ ꓖꓼ ꓓꓳ ꓗꓷ ꓥ ꓟꓲ꓾ ꓬꓲ ꓪ ꓘꓳ, ꓣꓴˍ ꓟ ꓚꓱ, ꓔꓯ ꓟ. ꓟꓲ ꓚꓺ ꓟ ꓪꓴ. ꓠꓬꓲ Babarians ꓐꓰ ꓟꓬꓱꓺ ꓔ ꓟ ꓞꓳ ꓫꓵꓽ ꓗꓪ Arian ꓙꓵꓻ ꓠꓲ, ꓥ ꓟꓲ ꓐ, ꓐ ꓪꓴ‐ꓢ ꓠꓬ ꓪꓴ‐ꓢ ꓟꓽ ꓥ꓾ ꓡ ꓞꓳ ꓕꓲ ꓣꓳˍ ꓡꓰꓽ ꓥ ꓡꓳ ꓐꓯ ꓟ ꓥꓳꓽ ꓡꓰ ꓟ ꓟ. ꓟꓲ ꓚ ꓡ ꓟ ꓥ ꓡꓳ꓿ Nicaea creed ꓐꓯ ꓟ ꓝꓲ ꓓꓴ ꓙꓵꓻ ꓠꓲ, ꓪꓽ ꓘꓴ ꓘꓶꓽ ꓔꓯ ꓮꓓ 325 ꓘꓳꓼ ꓕꓯ ꓖꓪ ꓗꓷ ꓟ ꓥ ꓡꓳ꓿