ꓟꓲ ꓠꓯ ꓕꓱ ꓟ ꓗꓪ ꓣꓳ ꓛꓲ ꓡˍ ꓟ ꓠꓬ ꓜꓽ ꓓꓴ ꓓꓳꓻ ꓓꓴ ꓖꓪꓽ ꓓꓴ ꓧꓪ ꓢꓲ ꓡꓰꓽ ꓬꓰ ꓙꓰ ꓠ, ꓟ ꓟꓽ ꓥ꓿ ꓪꓴ‐ꓢ ꓡꓰ ꓣꓳꓽ ꓔꓯ ꓚꓰꓼ ꓔ ꓖꓶˍ ꓟ ꓠꓬ꓾ ꓣꓳ ꓕꓲ ꓠꓬꓲ ꓕꓲ ꓠꓬꓲ ꓜꓽ ꓓꓴ꓾ ꓓꓳꓻ ꓓꓴ꓾ ꓖꓪꓽ ꓓꓴ ꓡꓰꓽ ꓢꓯꓼ ꓕꓵꓼ ꓠ, ꓟ ꓐꓱ ꓶ ꓣꓳ ꓔꓯ ꓚꓰꓼ ꓔ ꓟ ꓟꓽ ꓥ꓿ ꓣꓳ ꓤꓶꓻ ꓗꓪ ꓠꓬ ꓬꓲ. ꓬꓲ ꓢꓲ ꓙꓳˍ ꓫꓵꓽ꓾ ꓣꓳ ꓤꓶꓻ ꓗꓪ ꓠꓬ ꓣꓳ ꓕꓱ ꓡꓱ ꓐꓰ ꓢꓯ. ꓔꓬ ꓟ ꓬꓲ ꓔꓶ ꓙꓱꓼ ꓮ ꓫꓵꓽ ꓥ ꓡ ꓐꓯ ꓟ ꓧꓪ ꓠ ꓔ ꓡꓳ꓿
ꓢ. ꓠꓯ ꓠꓽ ꓦꓬꓼ ꓠꓬꓲ ꓗꓪ ꓣꓳ ꓑ ꓙꓽ ꓪˍ ꓟ ꓢꓲꓽ ꓫꓬ ꓕꓳꓽ ꓶ ꓠꓬ ꓡꓴ‐ꓘ 4ꓽ14‐18 ꓗꓪ ꓣꓳ ꓑ ꓙꓽˍ ꓟ ꓠꓬ꓾ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓮ ꓐ ꓮ ꓟ ꓡꓯꓼ ꓚꓳ. ꓡꓯꓼ ꓖꓳꓼ ꓠꓯꓸꓼ ꓘꓴꓽ ꓗꓪ 30 ꓘꓳꓼ ꓔꓬ ꓗꓷ ꓗ ꓠꓯ.꓾ ꓬꓲ ꓟꓬꓱꓽ ꓬꓰ ꓪꓴ. ꓔꓴˍ ꓡꓳ꓿ ꓬꓲ ꓠꓬ ꓪꓴ‐ꓢ ꓟ. ꓟꓲꓽ ꓚ ꓪꓴ. ꓔꓴˍ ꓟ ꓔꓯ ꓣꓳ ꓑ ꓙꓽˍ ꓡꓳ꓿ ꓢꓲꓽ ꓫꓬ ꓦꓲꓻ ꓗꓪ ꓙꓰ ꓢꓲ ꓠꓬꓲ ꓟ. ꓟꓲꓽ ꓚ ꓢꓲ ꓠꓬꓲ “ꓟꓴꓽ ꓗꓪ ꓗꓴꓷꓼ ꓠꓶꓽ ꓡꓺꓳ” ꓐꓰ ꓬꓲ ꓡꓰ ꓐꓯ ꓖꓶˍ ꓡꓳ꓿
ꓬꓲ ꓠꓬ ꓟꓲ ꓠꓯ ꓕꓱ ꓟ ꓗꓪ ꓞꓳ ꓤ ꓔꓯ ꓚꓬꓴ. ꓠ, ꓟ ꓡˍ ꓡꓳ꓿ ꓟꓲ ꓠꓯ ꓕꓱ ꓟ ꓗꓪ ꓞꓳ ꓤ ꓮ ꓙꓵꓽ ꓔꓯ ꓬꓲ ꓚꓬꓴ. ꓠ, ꓟ ꓡˍ ꓟ ꓬꓲ ꓢꓷ.ˍ ꓟ ꓑꓶ. ꓓꓴ ꓬꓲ ꓠꓬ 30 ꓘꓳꓼ ꓟꓬꓱꓽ ꓬꓰ ꓡꓳ, ꓬꓰ ꓗꓷ ꓗ ꓠꓯ.꓾ ꓪꓴ‐ꓢ ꓟꓬꓱꓽ ꓬꓰ ꓠ, ꓟ ꓬꓲ ꓢꓯꓼ ꓕꓵꓼˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓕꓱ ꓟ ꓐꓱ ꓶ ꓬꓲ ꓡˍ ꓡꓳ꓿ ꓕꓱ ꓟ ꓐꓱ ꓶ ꓬꓲ ꓠꓬ ꓟꓲ ꓠꓯ ꓗꓪ ꓞꓳ ꓤ ꓕꓲ ꓣꓳˍ ꓡꓰ ꓐꓰ ꓒꓬꓱꓽ ꓟꓳꓻ ꓡˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓐꓰ ꓥꓪ ꓥ ꓟꓲ꓾ ꓟꓲ ꓠꓯ ꓕꓱ ꓟ ꓗꓪ ꓧꓪ ꓜꓽ ꓧꓪ ꓓꓳꓻ ꓠ, ꓟ ꓡꓰꓽ ꓛꓲ ꓡˍ ꓟ ꓟꓽ ꓥ꓿ ꓣꓳ ꓐꓱ ꓶ ꓬꓲ ꓬꓲ ꓢꓲ ꓙꓳˍ ꓟ꓾ ꓬꓲ ꓔꓶ ꓙꓱꓼ ꓕꓲ ꓟ ꓣꓳꓽ ꓧꓪ ꓠ ꓗ, ꓡꓳ꓿ ꓠꓴ ꓤꓶꓻ ꓗꓪ ꓠꓴ ꓔꓯ ꓞꓳ ꓤ ꓕꓲ ꓣꓳ ꓒꓬꓱꓼ ꓡ ꓝꓲ ꓐ ꓡˍ ꓟ꓾ ꓚꓵ ꓚꓵ ꓠꓴ ꓗ, ꓛꓲꓽˍ ꓟ꓾ ꓠꓴ ꓬꓰˍ ꓟ ꓠꓴ ꓢꓯꓼ ꓕꓵꓼˍ ꓟ ꓬꓲ ꓢꓶꓽ ꓠꓬ ꓠꓴ ꓐꓱ ꓶˍ ꓡꓰꓽ ꓟꓽ ꓥ ꓥ ꓐꓰ꓾ ꓚꓳ ꓡꓳ ꓚꓳ ꓫꓵ ꓗꓪ ꓟ ꓞꓳ ꓤ ꓐꓱ ꓶ꓾ ꓠꓴ ꓦꓲꓻ ꓘꓴꓽ ꓢꓴ ꓐꓱ ꓶ꓾ ꓝꓮꓲ ꓠꓴ ꓘꓴ ꓜꓲꓼ ꓞꓳ ꓐꓱ ꓶ ꓕꓱ ꓡꓱ ꓶꓼ ꓛꓳˍ ꓟ ꓠꓴ ꓢꓯꓼ ꓕꓵꓼ ꓠ ꓔˍ ꓡꓳ꓿ ꓪꓴ‐ꓢ ꓐꓱ ꓶ ꓞꓳ ꓤ ꓐꓱ ꓶ ꓢꓯꓼ ꓕꓵꓼ ꓠ ꓔˍ ꓡꓳ꓿
ꓮ ꓡꓲꓳ ꓐꓯ ꓠꓬ꓾ ꓞꓳ ꓤ ꓮ ꓡꓲ ꓕꓲ ꓣꓳ ꓔꓯ ꓥˍ ꓟꓲ ꓚꓲ. ꓛꓬ ꓶꓻ ꓙꓳˍ ꓡꓳ꓿ ꓮꓽ ꓟ ꓥˍ ꓟꓲ ꓮꓽ ꓟ ꓙꓵ, ꓙꓳˍ ꓡꓳ꓿ ꓮꓽ ꓟ ꓥ ꓟꓲ ꓮꓽ ꓟ ꓢꓲꓺ ꓔ ꓟ ꓤꓶꓻ ꓙꓳˍ ꓡꓳ꓿ ꓕꓱ ꓡꓱ ꓚꓲ. ꓛꓬ ꓤꓶꓻ꓾ ꓚꓲ. ꓛꓬ ꓢꓲꓺ ꓔ ꓟ ꓘꓴꓽ ꓗꓪ ꓚꓲ. ꓛꓬ ꓐꓱ ꓶˍ ꓡꓰꓽ ꓟꓽ ꓥ ꓥ ꓐꓰ꓾ ꓠꓱ. ꓐꓯ ꓢꓴ ꓐꓱ ꓶ ꓮ ꓡꓲ ꓐꓰ ꓥꓪ ꓛꓳꓻ ꓫꓱꓽ ꓐ ꓡˍ ꓡ꓾ ꓐꓯ ꓟ ꓠꓺ ꓠꓬꓲ ꓘꓶꓽ ꓔꓯ ꓣꓳ ꓜꓳꓽ ꓜꓳꓽ ꓠꓺ ꓠꓬꓲ ꓠ ꓔ ꓡꓳ꓿ ꓮ ꓡꓲꓳ ꓐꓯ ꓠꓬ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓟ. ꓖꓶ ꓡ ꓔꓬ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓬꓰ ꓙꓲꓽ ꓙꓳˍ ꓟ꓾ ꓬꓲ ꓮꓽ ꓟ ꓥ ꓟ ꓬꓲ ꓢꓷ.ˍ ꓡꓳ꓿ ꓬꓲ ꓬꓰ ꓙꓲꓽ ꓙꓳˍ ꓟ ꓬꓲ ꓢꓯꓼ ꓕꓵꓼˍ ꓟ ꓡꓰ ꓐꓰ ꓣꓳ ꓥˍ ꓟꓲ ꓣꓳ ꓬꓰ ꓙꓲꓽ ꓙꓳˍ ꓟ ꓮ ꓫꓵꓽ ꓥ ꓡ ꓐꓯ ꓟ ꓣꓳꓽ ꓓꓵꓽ ꓙ ꓠꓬꓲ ꓡꓯ꓿
ꓣꓳ ꓠꓬ ꓟꓲ ꓠꓯ ꓕꓱ ꓟ ꓗꓪ ꓜꓽ ꓓꓴ ꓓꓳꓻ ꓓꓴ ꓖꓪꓽ ꓓꓴ ꓜꓽ ꓠ, ꓟ ꓖꓪꓽ ꓠ, ꓟ ꓡꓰꓽ ꓟꓲ ꓠꓯ ꓕꓱ ꓟ ꓗꓪ ꓬꓯꓼ ꓡˍ ꓟ ꓟꓽ ꓥ꓿ ꓣꓳ ꓔꓯ ꓪꓴ‐ꓢ ꓡꓰ ꓦꓻ ꓖꓶ ꓔ ꓡꓳ꓿ ꓙꓵꓻ ꓠꓲ, ꓖꓶ ꓔ ꓡꓳ꓿ ꓓꓵꓽ ꓙꓽ ꓗꓴ. ꓠ, ꓟ ꓐꓱ ꓶ ꓣꓳꓽ ꓔꓯ ꓪꓴ. ꓠꓶ. ꓖꓶ ꓔ ꓡꓳ꓿ ꓕꓱ ꓡꓱ ꓖꓶ ꓔ ꓟ ꓠꓬ ꓣꓳ ꓐꓱ ꓶˍ ꓡꓰꓽ ꓟꓽ ꓥ꓿ ꓚꓵ ꓚꓵ ꓚꓳ ꓡꓳ ꓚꓳ ꓫꓵ ꓗꓪ ꓔꓬ ꓟ ꓣꓳ ꓮ ꓚꓲ ꓠꓬꓲ ꓟ ꓐꓴ ꓐꓱ ꓶ꓾ ꓣꓳ ꓬꓲꓼ ꓤ ꓠꓬꓲ ꓤ ꓐꓴ ꓐꓱ ꓶ ꓥˍ ꓟꓲ ꓣꓳ ꓕꓯꓽ ꓢꓲ ꓗꓪ ꓶꓻ ꓙꓳˍ ꓡꓳ꓿
ꓝꓮꓲ ꓪꓴ‐ꓢ ꓟꓬꓱꓽ ꓬꓰ ꓠ, ꓟ ꓥˍ ꓟꓲ ꓶꓻ ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓣꓳ ꓧꓪꓽ ꓖꓳ ꓓꓱꓽ ꓕꓲ ꓒꓳ, ꓟꓲ ꓠꓯ ꓕꓱ ꓟ ꓗꓪ ꓕꓲ ꓑ, ꓤ ꓟꓶ ꓔꓬ, ꓡꓳ꓿ ꓣꓳ ꓢꓯꓼ ꓕꓵꓼˍ ꓟ ꓬꓲ. ꓬꓲ ꓢꓲ ꓠꓬ ꓬꓲ. ꓤꓶꓻ ꓔꓯ ꓠꓱ. ꓐꓯ ꓢꓴ ꓐꓱ ꓶ ꓮ ꓡꓲ ꓣꓱꓽˍ ꓡ꓾ ꓬꓲ. ꓤꓶꓻ ꓔꓯ ꓠꓱ. ꓐꓯ ꓢꓴ ꓐꓱ ꓶ ꓮ ꓡꓲ ꓐꓰ ꓢꓯꓼ ꓟꓬ ꓖꓶ ꓐ ꓡˍ ꓡ꓾ ꓐꓯ ꓟ ꓔꓯ ꓡꓳ. ꓠꓬꓲ ꓢꓲ ꓠꓬꓲ ꓞꓳ ꓤ ꓕꓲ ꓣꓳ ꓒꓵꓽ ꓟꓽ ꓒꓵꓽ ꓐꓯ ꓟ ꓝꓶꓽ ꓡꓰˍ ꓡꓳ꓾ ꓗꓪ ꓡꓰˍ ꓡꓳ꓿
ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓢꓯꓼ ꓕꓵꓼˍ ꓟ ꓡꓰ ꓐꓰ ꓬꓲ ꓠꓬ ꓬꓲ ꓮ ꓡꓲ ꓗꓪ ꓚꓳ. ꓡˍ ꓟ꓾ ꓮ ꓡꓲ ꓗꓪ ꓙꓰˍ ꓟ ꓬꓲ ꓢꓷ.ˍ ꓟ ꓡꓰ ꓐꓰ ꓣꓳꓽ ꓥˍ ꓟꓲ ꓮ ꓡꓲ ꓗꓪ ꓚꓳ. ꓡˍ ꓥ꓾ ꓮ ꓡꓲ ꓗꓪ ꓙꓰˍ ꓥ ꓣꓳ ꓢꓷ. ꓡꓰ ꓗ ꓠꓯ.꓾ ꓚꓵ ꓚꓵ ꓢꓯꓼ ꓕꓵꓼ ꓙꓰ ꓡꓯ꓿ ꓣꓳ ꓐꓱ ꓶˍ ꓡꓰꓽ ꓢꓯ. ꓔꓬ ꓟ ꓟꓽ ꓥ ꓥ ꓐꓰ ꓚꓵ ꓚꓵ ꓞꓳ ꓤ ꓐꓱ ꓶ ꓮ ꓟꓬ, ꓐꓱ ꓶ ꓪꓴ‐ꓢ ꓐꓱ ꓶ ꓣꓳ ꓢꓯꓼ ꓕꓵꓼ ꓙꓰ ꓡꓯ ꓐꓰ ꓮ ꓙꓵꓽ ꓢꓴ ꓔꓯ ꓢꓯꓼ ꓖꓶ ꓠꓲ, ꓫꓵˍ ꓡꓳ꓿ ꓖꓳ ꓕꓯ ꓡꓰꓽ ꓣꓳ ꓤꓶꓻ ꓠꓬ ꓟꓲ ꓠꓯ ꓕꓱ ꓟ ꓗꓪ ꓗ, ꓛꓲꓽˍ ꓟ ꓬꓲ. ꓬꓲ ꓢꓲ ꓙꓳˍ ꓟ ꓞꓳ ꓤ ꓤꓶꓻ ꓕꓲ ꓟ ꓒꓬꓱꓼ ꓡˍ ꓥꓳ꓿ ꓮ ꓙꓵꓽ ꓢꓴ ꓢꓯꓼ ꓕꓵꓼ ꓙꓰ ꓡꓯ꓿
