ꓛꓳꓽ ꓒꓯ, ꓞꓲ ꓠꓬꓲꓽ ꓣꓳ ꓔꓯ ꓢꓲˍ ꓟ (ꓟ‐ꓘꓳ 3ꓽ13‐19)
ꓗ ꓠꓯ. ꓬꓰ‐ꓢꓴ ꓠꓬ꓾ ꓪ ꓚꓲ ꓗꓪ ꓓꓯ ꓙꓰ ꓢꓲ꓾ ꓬꓲ ꓘꓴ ꓠꓲ, ꓫꓵˍ ꓟ ꓕꓲ ꓧꓳꓽ ꓔꓯ ꓘꓴ ꓗꓷ ꓠꓬ ꓬꓲ ꓪ ꓠꓽ ꓬꓲ ꓔꓯ ꓡˍ ꓡꓳ꓿ ꓬꓲˍ ꓐꓰ ꓕꓲ ꓪˍ ꓔꓬ ꓠ, ꓟˍ ꓐꓰ꓾ ꓟ. ꓟꓲꓽ ꓚ ꓙꓰ ꓝꓲ ꓠ, ꓟ ꓡ ꓞꓳ ꓞꓲ ꓠꓬꓲꓽ ꓣꓳ ꓔꓯ ꓢꓲ ꓚꓰ. ꓗꓷ ꓠꓬ ꓬꓲ ꓪ ꓔꓯ꓾ ꓝꓲ ꓓꓴ꓾ ꓐꓰ ꓟꓬꓱ ꓖꓶˍ ꓡꓳ꓿ ꓖꓳ ꓡꓱ ꓢꓲ ꓬꓲ ꓪ ꓔꓯ ꓠꓲꓽ ꓖꓼ ꓓꓳ ꓠ, ꓟ ꓙꓵꓽ ꓪ ꓖꓶˍ ꓡꓳ꓿
ꓬꓲ ꓪ ꓞꓲ ꓠꓬꓲꓽ ꓣꓳ ꓟ ꓟꓬꓱ ꓠꓬ꓾ ꓬꓰ‐ꓢꓴ ꓡꓰ ꓒꓲ‐ꓕꓱ ꓟꓬꓱ ꓔ ꓟ ꓢꓲ‐ꓟꓴ꓾ ꓐꓳ‐ꓪ‐ꓠꓱ‐ꓙꓲ ꓟꓬꓱ ꓔ ꓟ ꓜꓲ‐ꓐꓱ‐ꓓꓲ ꓬꓲ ꓮ ꓐꓲ ꓬ‐ꓗꓴˍ ꓐꓰ ꓬꓲ ꓠꓬꓲ ꓤ ꓬꓳ‐ꓦ꓾ (ꓐꓳ‐ꓪ‐ꓐꓱ‐ꓙꓲ ꓐꓯˍ ꓟꓲ ꓠꓬ꓾ ꓟꓴꓽ ꓖꓴꓽ ꓮ ꓐꓲ ꓐꓴ꓾ ꓐꓯˍ ꓟ ꓥꓳ꓿) ꓯ‐ꓓꓱ‐ꓣꓴ꓾ ꓒꓲ‐ꓡꓲ꓾ ꓐ‐ꓕꓳ‐ꓡꓳ‐ꓟꓲ꓾ ꓟ‐ꓕꓲ꓾ ꓕꓳ‐ꓟ꓾ ꓮ‐ꓡꓱ‐ꓒꓲ, ꓬꓲ ꓮ ꓐꓲ ꓬ‐ꓗꓴ꓾ ꓕ‐ꓓꓲ‐ꓪꓴ꓾ ꓘ‐ꓠ ꓢꓴ ꓢꓲ‐ꓟꓴˍ ꓐꓰ꓾ ꓬꓰ‐ꓢꓴ ꓔꓯ ꓪꓴꓽ ꓜ ꓢꓴ ꓘ‐ꓡꓲꓳ ꓢꓴ ꓬꓴ‐ꓓꓽ ꓥ ꓡꓳ꓿
Nꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓝꓲ ꓓꓴ ꓞꓲ ꓠꓬꓲ ꓣꓳ ꓔꓯ ꓘꓴˍ ꓟ ꓠꓬ ꓬꓲ ꓤꓶꓻ ꓠꓯꓸꓼ ꓗꓪ ꓕꓲ ꓪˍ ꓔꓬ ꓠ, ꓟ ꓐꓱ ꓶ ꓥ ꓡꓳ꓿ ꓬꓲ ꓐꓰ ꓕꓲ ꓪˍ ꓔꓬ ꓠ, ꓟ꓾ ꓬꓲ ꓐ ꓘꓶꓽ ꓔꓯ ꓠ ꓠ, ꓢꓲ ꓠꓬꓲ꓾ ꓬꓲ ꓞꓳ ꓙꓳ ꓚꓱ, ꓔꓯ ꓢꓳ ꓣꓴ ꓠ, ꓟ ꓐꓱ ꓶ ꓝꓲ ꓓꓴ ꓐꓴ ꓠꓬ ꓘꓴꓻ ꓔ ꓟꓶˍ ꓟ ꓥ ꓡꓳ꓿ ꓕꓱ ꓟ ꓡꓰꓽ ꓟꓽ ꓞꓲ ꓟꓲ ꓠꓯ ꓐꓱ ꓶ ꓬꓲ ꓡꓰ ꓬꓰ ꓝꓲ ꓠꓲ, ꓫꓵˍ ꓟ ꓮ ꓙꓵꓽ ꓔꓯ ꓐꓯ ꓟ. ꓖꓶ ꓠ, ꓟ ꓐꓱ ꓶ ꓝꓲ ꓩꓴˍ ꓟ ꓟꓶ ꓗꓷꓳ꓿ ꓬꓲ ꓪ ꓠꓯꓸꓼ ꓗꓪ ꓟꓬꓽ ꓠꓬꓲ ꓠꓬ ꓬꓲ ꓪ ꓫꓵꓻˍ ꓗꓪ ꓛꓲ ꓪꓴ‐ꓢ ꓟ. ꓟꓲꓽ ꓟ. ꓖꓶ ꓗꓷꓳ꓿
ꓝꓲ ꓓꓴ ꓐꓴˍ ꓡꓰ ꓐꓰ ꓣꓳ ꓐꓴ ꓥ ꓟꓲ꓾ ꓬꓰ‐ꓢꓴ ꓐꓰ ꓙ ꓡꓯ ꓘꓳ ꓠ, ꓟ ꓘꓴꓻ ꓔ ꓟꓶˍ ꓡꓳ꓿ ꓪꓽ ꓘꓴˍ ꓟ ꓗꓪ ꓐꓰ ꓢꓲꓽ ꓫꓬ ꓕꓳꓽ ꓶ ꓵˍ ꓟ ꓗꓪ ꓐꓰ ꓪꓴ‐ꓢ ꓔꓯ ꓬꓲ ꓙꓵ, ꓖꓶ ꓠ, ꓟ꓾ ꓟꓲ ꓠꓯ ꓕꓱ ꓟ ꓗꓪ ꓪꓴ‐ꓢ ꓟꓬꓱꓽ ꓬꓰˍ ꓟ ꓗꓪ ꓚꓲ. ꓛꓬ ꓐ ꓡˍ ꓟ ꓚꓱ, ꓗꓪ ꓐꓰ ꓣꓱꓽ ꓬꓰ ꓠ, ꓟ ꓢꓲ ꓒ ꓡꓰ ꓣꓳ ꓔꓯ ꓠꓬꓲ. ꓠꓬꓲ ꓗꓪ ꓘꓴ ꓔ ꓡꓳ꓿
ꓣꓳ ꓮ ꓙꓵꓽ ꓠꓬ ꓪꓴ‐ꓢ ꓗꓪ ꓐꓰ ꓣꓳ ꓟꓶ ꓔ ꓟ ꓣꓱꓽ ꓛꓰꓽ ꓡꓯꓼ ꓫꓴ꓾ ꓣꓳ ꓓꓻˍ ꓟ ꓣꓳ ꓬꓰ ꓗꓴ.ˍ ꓟ ꓔꓯ ꓣꓱꓽ ꓢꓲ ꓠꓬꓲ꓾ ꓣꓳ ꓞꓳ ꓙꓳ ꓔꓬ ꓟ ꓟꓲ ꓠꓯ ꓮ ꓡꓲ ꓕꓲ ꓒꓳ, ꓔꓯ ꓥˍ ꓟꓲ ꓪ ꓜꓲ ꓙꓲˍ ꓟ ꓒꓬꓱꓼ ꓡ ꓠ ꓬꓰ ꓠ, ꓟ ꓐꓱ ꓶ ꓘꓴ ꓔ ꓟ ꓟꓶˍ ꓡꓳ꓿ ꓣꓳ ꓮ ꓡꓲ ꓕꓲ ꓣꓳ ꓔꓯ ꓥˍ ꓟꓲ ꓪꓴ‐ꓢ ꓡꓰ ꓟꓽ ꓫꓱ. ꓡꓯ ꓘꓳ ꓟ ꓣꓱꓽ ꓛꓰꓽ ꓖꓶ ꓔ ꓡꓳ꓿ ꓖꓳ ꓡꓱ ꓠꓬꓲ ꓣꓱꓽ ꓛꓰꓽ ꓡꓯꓼ ꓫꓴ ꓖꓳ ꓟ ꓔꓯ ꓣꓱꓽ ꓢꓲ ꓠꓬꓲ꓾ ꓚꓲ. ꓛꓬ ꓞꓳ ꓙꓳ ꓛꓳ ꓫꓱꓽ ꓔꓬ ꓟ ꓕꓲ ꓔꓶ. ꓗꓪ ꓪ ꓜꓲ ꓙꓲꓻˍ ꓡ ꓠ, ꓟ ꓐꓱ ꓶ ꓢꓯꓼ ꓕꓵꓼ ꓠ, ꓟ ꓢꓲ ꓒ ꓡꓰ ꓣꓳ ꓔꓯ ꓘꓴ ꓔ ꓟ ꓥ ꓡꓳ꓿ ꓪꓽ ꓘꓴˍ ꓟ ꓗꓪ ꓐꓰˍ ꓟꓲ ꓢꓲ ꓒ ꓠꓬ ꓣꓳ ꓔꓯ ꓬꓲ ꓐꓰ ꓕꓲ ꓪ ꓔꓬ ꓝꓲ ꓠꓲ, ꓫꓵˍ ꓟ ꓬꓲ ꓠꓲ, ꓡꓶꓽ ꓔꓯ ꓐꓲ ꓡꓰ ꓝꓲˍ ꓟ ꓥ ꓡꓳ꓿
