ꓮ ꓙꓵꓽ ꓔꓯ ꓧꓪ. ꓧꓪꓸꓼ꓾ ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓰ ꓡ ꓞꓳ ꓮ ꓟꓬ, ꓔꓯ ꓠꓻ ꓫꓵꓽ ꓠꓻ ꓙꓰꓽ ꓫꓬ, ꓖꓶˍ ꓟ ꓐꓰ꓾ ꓠꓲꓽ ꓜꓶꓽ ꓞ, ꓢꓴ ꓔꓯ ꓠꓲꓽ ꓖꓼ ꓓꓳ ꓖꓶˍ ꓟ ꓟ. ꓟꓲꓽ ꓥ ꓡꓳ꓿ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓠꓬ ꓟ‐ꓘꓳ 3ꓽ7‐12 ꓥ ꓡꓳ꓿ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓠꓬ ꓢꓲ ꓒ ꓬꓰ‐ꓢꓴ ꓔꓬ ꓗꓪ ꓖ‐ꓡꓲ‐ꓡꓲ ꓟꓵꓽ ꓾ ꓬꓴ‐ꓔ ꓟꓵꓽ꓾ ꓙꓱ‐ꓣꓴ‐ꓢ‐ꓡꓱ ꓐꓰ ꓬꓲ‐ꓓꓳ‐ꓟꓷ꓾ ꓬꓳ‐ꓔ ꓬꓲꓽ ꓟ ꓖꓳ ꓐ ꓢꓲ꓾ ꓕꓲ‐ꓬˍ ꓐꓰ ꓢꓲ‐ꓓꓳ ꓟꓵꓽ ꓮ ꓟꓬ, ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓔꓬ ꓗꓪ ꓛꓲ ꓡˍ ꓡꓳ꓿ ꓖꓳ ꓡꓱ ꓡ ꓞꓳ ꓮ ꓟꓬ, ꓛꓲ ꓡ ꓟ ꓠꓬ ꓬꓲ ꓪ ꓠꓻ ꓫꓵꓽ ꓠꓻ ꓙꓰꓽ ꓫꓬ, ꓟꓶ ꓠ, ꓟ ꓐꓰ꓾ ꓠꓲꓽ ꓜꓶꓽ ꓞ, ꓢꓴ ꓥˍ ꓟꓲ ꓠꓲꓽ ꓖꓼ ꓓꓳ ꓗꓷ ꓟꓶ ꓠ, ꓟ ꓡˍ ꓟ ꓥ ꓡꓳ꓿ ꓡ ꓞꓳ ꓖꓳ ꓟꓬꓽ ꓔꓯ ꓢꓲ ꓒ ꓬꓰ‐ꓢꓴ ꓠꓬ ꓠꓻ ꓫꓬ, ꓖꓶ ꓠꓬꓲ꓾ ꓠꓲꓽ ꓖꓼ ꓓꓳ ꓖꓶ ꓠꓬꓲ ꓬꓰ ꓗꓷ ꓠꓬꓲ ꓬꓲ ꓪ ꓮ ꓙꓵꓽ ꓓꓻ ꓡꓰꓳ꓿
ꓖꓳ ꓡꓱ ꓥ ꓟꓲ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓐꓯ ꓖꓶ ꓔꓬ ꓟ ꓠꓬ꓾ ꓬꓲ ꓔꓯ ꓡ ꓞꓳ ꓬꓲ ꓜꓴ ꓬꓲ ꓟꓯꓼ ꓠꓻ ꓫꓬ, ꓢꓴ ꓐꓰ ꓠꓲꓽ ꓜꓶꓽ ꓞ, ꓢꓴ ꓬꓲ ꓔꓬ ꓗꓪ ꓡˍ ꓡꓳ꓿ ꓬꓲ ꓪ ꓡˍ ꓟ ꓠꓬ ꓠꓻ ꓫꓬ, ꓒ ꓢꓲ ꓒ ꓬꓰ‐ꓢꓴ ꓔꓯ ꓟꓶ ꓠ, ꓟ ꓟꓽ ꓥ꓿ ꓠꓻ ꓓꓻ ꓡꓰ ꓕꓯ ꓠꓽ ꓬꓲ ꓪ ꓬꓲꓼ ꓙꓰˍ ꓟ ꓥ ꓡꓳ꓿ ꓬꓲ ꓪ ꓠꓬ ꓠꓻ ꓫꓬ, ꓒ ꓬꓰ‐ꓢꓴ ꓔꓯ ꓟꓽ ꓙꓵꓻ꓿ ꓠꓲꓽ ꓜꓶꓽ ꓞ, ꓢꓴ ꓥˍ ꓟꓲ ꓖꓳ ꓡꓱ ꓥꓳ꓿ ꓬꓲ ꓪ ꓠꓲꓽ ꓖꓼ ꓓꓳ ꓟꓶ ꓡꓰ ꓕꓯ ꓠꓽ ꓢꓲ ꓒ ꓬꓰ‐ꓢꓴ ꓠꓬ ꓚꓵ ꓚꓵ ꓢꓯꓼ ꓪ ꓙꓳˍ ꓟ ꓥ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓬꓲ ꓪ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓟꓽ ꓙꓵꓻ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓟ ꓤꓶꓻ ꓦꓬꓼ ꓠꓬꓲ ꓠꓯꓸꓼ ꓗꓪ ꓠꓬ ꓪꓴ‐ꓢ ꓦ ꓡꓱ ꓢꓴ ꓮ ꓟꓬ, ꓙꓳˍ ꓟ ꓥ ꓡꓳ꓿ ꓖꓳ ꓡꓱ ꓐꓯ ꓥˍ ꓟꓲ ꓪꓴ‐ꓢ ꓦ ꓡꓱ ꓢꓴ ꓮ ꓟꓬ, ꓠꓽ ꓪꓴ‐ꓢ ꓔꓬ ꓗꓪ ꓡ ꓢꓲ ꓪꓽ ꓘꓴ ꓖꓴ ꓗꓪ ꓡ ꓢꓲ ꓠꓬꓲ ꓓꓰꓽ ꓠ, ꓟ ꓡꓰꓽ ꓥ ꓡꓳ꓿ ꓪꓴ‐ꓢꓺꓳ꓾ ꓥꓪ ꓠꓬ ꓕꓱ ꓡꓱ ꓐꓰ ꓞ, ꓟ ꓥ ꓡꓳ꓿ ꓥꓪ ꓔꓯ ꓕꓱ ꓡꓱ ꓬꓰ ꓖꓶ꓿ ꓕꓱ ꓡꓱ ꓐꓰ ꓫꓬ, ꓖꓶ꓾ ꓥꓪ ꓔꓯ ꓕꓱ ꓡꓱ ꓬꓰ ꓙ ꓖꓶ꓾ ꓐꓰ ꓓꓰꓽ ꓢꓲ ꓠꓬꓲ꓾ ꓓꓰꓽ ꓓꓳ ꓡꓰ ꓕꓯ ꓠꓽ ꓬꓲꓼ ꓙꓰˍ ꓡꓳ꓿ ꓖꓳ ꓟ ꓪꓴ. ꓠꓬꓲ ꓬꓲ ꓪ ꓠꓬ ꓢꓲ ꓒ ꓬꓰ‐ꓢꓴ ꓫꓬ, ꓖꓶˍ ꓟ ꓡꓰꓽ ꓟꓶˍ ꓡꓳ꓿ ꓠꓻ ꓫꓬ, ꓖꓶ ꓢꓴ꓾ ꓠꓲꓽ ꓖꓼ ꓓꓳ ꓖꓶ ꓢꓴ ꓢꓲ ꓒ ꓬꓰ‐ꓢꓴ ꓔꓯ ꓟꓽ ꓟꓶ꓿
ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓟ ꓣꓳꓽ ꓤꓶꓻ ꓦꓬꓼ ꓠꓬꓲ ꓠꓯꓸꓼ ꓗꓪ ꓟꓲ ꓕꓱ ꓡꓱ ꓥꓳ꓿ ꓣꓳ ꓠꓬ ꓪꓴ‐ꓢ ꓔꓯ ꓚꓵ ꓚꓵ ꓙꓵꓻ ꓔꓬ ꓡ꓿ ꓢꓲ ꓒ ꓬꓰ‐ꓢꓴ ꓔꓯ ꓚꓵ ꓚꓵ ꓟꓶ ꓔꓬ ꓡ꓿ ꓟꓽ ꓥ ꓠꓬ꓾ ꓢꓲ ꓒ ꓬꓰ‐ꓢꓴ ꓡꓰ ꓖꓶˍ ꓟ ꓡꓯꓼ ꓫꓴ ꓔꓯ ꓡꓰꓽ ꓟꓶ ꓢꓲ ꓠꓬꓲ꓾ ꓡꓯꓼ ꓫꓴ ꓖꓶꓽ ꓢꓴ ꓢꓲ ꓒ ꓬꓰ‐ꓢꓴ ꓔꓯ ꓣꓳꓽ ꓟꓽ ꓘꓳ ꓣꓴ ꓟꓶ ꓟꓶ ꓔꓬ ꓡ꓾ ꓐꓯ ꓟ ꓔꓯ ꓣꓳ ꓓꓵꓽ ꓙ ꓠꓬꓲ ꓡꓯ꓿ ꓕꓱ ꓡꓱ ꓟꓽ ꓥ ꓥꓳ ꓐꓯ ꓕꓯ ꓠꓽ ꓠꓬꓲ. ꓠꓬꓲ ꓣꓳ ꓥˍ ꓟꓲ꓾ ꓡ ꓞꓳ ꓮ ꓟꓬ, ꓟ ꓢꓲ ꓒ ꓔꓬ ꓗꓪ ꓛꓲ ꓡ ꓢꓲ ꓠꓬꓲ꓾ ꓢꓲ ꓒ ꓬꓰ‐ꓢꓴ ꓔꓬ ꓗꓪ ꓐꓰ ꓠꓻ ꓫꓬ, ꓟꓶˍ ꓟ ꓡꓯꓼ ꓫꓴ꓾ ꓠꓲꓽ ꓖꓼ ꓓꓳ ꓗꓷ ꓟꓶˍ ꓟ ꓡꓯꓼ ꓫꓴ ꓟꓶ ꓢꓲ ꓠꓬꓲ ꓬꓲꓼ ꓙꓰˍ ꓟ ꓞꓳ ꓤˍ ꓡꓰ ꓐꓰ ꓗꓷ ꓡꓰˍ ꓥꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓣꓳꓽ ꓔꓯ꓾ ꓬꓲ ꓖꓶˍ ꓟ ꓡꓯꓼ ꓫꓴ ꓢꓶ. ꓟꓽ ꓞꓲ ꓡꓯꓼ ꓫꓴ ꓖꓶ ꓢꓴ ꓢꓲ ꓒ ꓔꓯ ꓟꓶ ꓠ, ꓟ꓾ ꓬꓲ ꓠꓬ ꓣꓳꓽ ꓔꓯ ꓬꓲ ꓡ ꓠ, ꓫꓵˍ ꓡꓳ꓿ ꓬꓲ ꓔꓯ ꓘꓳ ꓣꓴ ꓖꓶ ꓠ, ꓟ ꓬꓲ ꓣꓳ ꓔꓯ ꓠꓲ, ꓫꓵˍ ꓡꓳ ꓐꓯ ꓟ ꓔꓯ꓾ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟ. ꓖꓶ ꓡ ꓔꓬ ꓡꓳ꓿
