ꓣꓳ‐ꓟ ꓡꓳ ꓒꓱ ꓗꓪ ꓮ ꓠꓱ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓔꓵ . ꓔ ꓟ ꓔꓶ. ꓡꓱꓼ ꓜꓴꓻ ꓜꓳꓻ (The Catacombs) ꓗꓪ ꓡꓳ. ꓟꓳ ꓪˍ ꓟ ꓙꓵꓻ ꓠꓲ, ꓚꓱ, (The Catacombs Bear Witness to the Faith)
ꓣꓳ‐ꓟ ꓡꓳ ꓒꓱ ꓗꓪ ꓮ ꓠꓱ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓔꓵ. ꓔ ꓟ ꓔꓶ. ꓡꓱꓼ ꓜꓴꓻ ꓜꓳꓻ (The Catacombs) ꓗꓪ ꓐꓳ ꓔ ꓟ ꓕꓳꓽ ꓶ ꓗꓪ ꓠꓬ ꓮ ꓠꓱ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓙꓵꓻ ꓠꓲ, ꓔꓯ ꓡꓳ. ꓟꓳ ꓪˍ ꓟ ꓥ ꓡꓳ꓿ ꓮ ꓠꓱ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓠꓬꓲ. ꓠꓬꓲ ꓗ‐ꓔꓳ‐ꓡꓲ ꓙꓲ‐ꓢꓴ ꓢꓲꓺ ꓤ ꓐꓴ ꓙꓵꓻ ꓔꓬ ꓟ ꓮ ꓙꓵꓽ ꓔꓯ ꓙꓵꓻ ꓢꓴ ꓐꓴ ꓥ ꓡꓳ꓿ ꓐ, ꓐ ꓪꓴ‐ꓢ ꓔꓯ ꓙꓵꓻˍ ꓟ ꓐꓰ꓾ ꓢꓲꓺ ꓒ ꓬꓰ‐ꓢꓴ ꓟ, ꓟ ꓟ‐ꓡꓲ ꓚꓱ, ꓐꓰ꓾ ꓙꓲꓻ ꓫꓬ ꓢꓴ ꓐꓴ ꓔꓯ ꓐ, ꓐ ꓪꓴ‐ꓢ ꓠꓯꓸꓼ ꓗꓪ ꓪꓽ ꓘꓴ ꓙ ꓠ, ꓟ ꓓꓰꓽˍ ꓟ ꓔꓯ ꓘꓳ, ꓣꓴˍ ꓟ ꓐꓰ ꓛꓬꓼ ꓟꓵꓽ ꓙꓳˍ ꓟ ꓚꓱ, ꓐꓰ꓾ ꓫꓵꓻ ꓢꓴ ꓐꓴ ꓐꓱ ꓶ ꓪꓽ ꓘꓴ ꓙˍ ꓟ ꓔꓯ ꓥ ꓟꓲ ꓮ ꓠꓱ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓬꓰ ꓗꓷ ꓟ ꓚꓱ, ꓔꓯ ꓡꓳ. ꓟꓳ ꓪ ꓡꓳ꓿
ꓮ ꓠꓱ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓥꓳ ꓡꓳ. ꓗꓷ ꓟ ꓠꓬ ꓠꓬꓲ. ꓠꓬꓲ ꓣꓳ ꓥꓳ ꓡꓳ. ꓔꓬ ꓟ ꓥ ꓡꓳ꓿ ꓮ ꓠꓱ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓡꓰ ꓡꓯꓼ ꓐꓳ ꓔꓶ. ꓓꓴ ꓗꓪ ꓫꓵꓻ ꓙ ꓗꓷ ꓢꓲ ꓠꓬꓲ ꓝꓴꓲ. ꓙꓳ ꓢꓴ ꓟꓲ ꓠꓯ ꓡ ꓞꓳ ꓔꓯ ꓚꓬꓴ. ꓙ ꓗꓷ ꓟ ꓐꓰ꓾ ꓪꓴ‐ꓢ ꓠꓵꓻ ꓠꓲ, ꓗꓪ ꓐꓰ ꓫꓬ ꓡꓰ ꓟ ꓝꓴꓲ. ꓔꓯ ꓖꓽ ꓖꓶˍ ꓟ ꓚꓱ, ꓐꓰ꓾ ꓧꓪꓽ ꓖꓳ ꓓꓱ ꓫꓵꓻ ꓥ ꓟꓲ ꓦꓻ ꓠꓬ ꓝꓮꓲ ꓢꓯ. ꓬꓲꓼ ꓡ ꓟ ꓐꓰ ꓕꓲ ꓞꓲꓼ ꓕꓲ ꓑ ꓐ, ꓐ ꓪꓴ‐ꓢ ꓐꓰ ꓔꓬ ꓪ ꓠ, ꓟ ꓙꓵꓻ ꓠꓲ, ꓚꓱ, ꓮ ꓙꓵꓽ ꓔꓯ ꓙꓵꓻ ꓢꓴ ꓐꓴ ꓥ ꓡꓳ꓿
ꓮ ꓠꓱ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓐꓬꓱꓽ ꓐꓳ ꓔ ꓟ ꓗꓪ ꓢꓲꓺ ꓒ ꓬꓰ‐ꓢꓴ ꓠꓬ ꓙꓲˍ ꓟ ꓮꓽ ꓣꓳ ꓡꓳ. ꓒ ꓐꓬꓱꓽ ꓥ ꓢꓲ ꓠꓬꓲ꓾ ꓢꓲꓺ ꓒ ꓬꓰ‐ꓢꓴ ꓡꓰ ꓧꓪ ꓟꓶ ꓡꓰ ꓟ ꓮꓽ ꓣꓳ ꓔꓯ ꓑꓱ. ꓔ ꓟ ꓐꓬꓱꓽ ꓔꓯ ꓥ ꓟꓲ ꓡꓳ. ꓟꓳ ꓪˍ ꓟ ꓥ ꓡꓳ꓿ ꓝꓮꓲ ꓐꓬꓱꓽ ꓕꓲ ꓟ ꓗꓪ ꓠꓬ ꓢꓲꓺ ꓒ ꓬꓰ‐ꓢꓴ ꓬꓲ. ꓟꓶ ꓘꓶꓼ ꓜ ꓜꓽ ꓑꓮꓲ ꓬꓰ ꓗꓷ ꓟ ꓐꓬꓱꓽ ꓔꓯ ꓥ ꓟꓲ ꓡꓳ. ꓟꓳ ꓪˍ ꓟ ꓥ ꓡꓳ꓿ ꓮ ꓠꓱ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓫꓵꓻˍ ꓟ ꓗꓪ ꓐꓰ ꓝꓮꓲ ꓢꓯ. ꓬꓯꓼ ꓡ ꓟ ꓚꓱ, ꓔꓯ ꓠꓳ‐ꓪ ꓐꓰ ꓡꓲ ꓐꓬꓱꓽ ꓔꓯ ꓐꓳ ꓔ ꓟ ꓥ ꓡꓳ꓿ ꓝꓮꓲ ꓬꓳ‐ꓠ ꓐꓰ ꓥꓪ. ꓐꓬꓱꓽ꓾ ꓡꓽ ꓟ ꓟꓷꓽ ꓠꓷ, ꓒ ꓕꓲ ꓗꓪ ꓓ‐ꓠꓲ‐ꓡꓲ ꓐꓬꓱꓽ ꓐꓰ꓾ ꓡ‐ꓢ‐ꓣꓴ ꓝꓮꓲ ꓢꓯ. ꓬꓯꓼ ꓡ ꓟ ꓐꓬꓱꓽ ꓔꓯ ꓥ ꓟꓲ ꓐꓬꓱꓽ ꓢꓱ. ꓔ ꓐꓳ ꓔ ꓟ ꓔꓯ ꓡꓳ. ꓟꓳ ꓪˍ ꓟ ꓥ ꓡꓳ꓿ Catacombs ꓘꓴꓽ ꓗꓪ ꓠꓬ ꓟꓲ‐ꓢ ꓔꓲ ꓪꓽ ꓘꓴ ꓔꓬ ꓟ ꓙꓵ, ꓕꓯ ꓙꓵꓻ ꓠꓲ, ꓚꓱ, ꓑꓶ. ꓓꓴ ꓢꓰꓼ ꓟꓶ ꓢꓴ ꓐꓴ ꓐꓬꓱꓽ ꓕꓯꓽ ꓢꓲ ꓗꓪ ꓟꓲ‐ꓢ ꓔꓲ ꓪꓽ ꓘꓴ ꓙꓵ, ꓬꓰˍ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓠꓬꓲ. ꓠꓬꓲ ꓟ ꓙꓵ, ꓕꓯ ꓙꓲꓻ ꓫꓬ ꓢꓴ ꓐꓴ ꓡꓰ ꓪꓽ ꓘꓴ ꓔ ꓟ ꓐꓰ꓾ ꓣꓱꓽ ꓫꓵꓽ ꓣꓱꓽ ꓙꓰꓽ ꓔꓯ ꓪꓽ ꓘꓴ ꓦꓲꓻ ꓟꓲ‐ꓢ ꓔꓲ ꓔꓶ. ꓗꓪ ꓗꓷ ꓢꓲ ꓠꓬꓲ ꓫꓬ, ꓔ ꓟ ꓥ ꓡꓳ꓿ ꓪꓽ ꓘꓴ ꓦꓲ ꓔꓱ, ꓫꓵ ꓗꓪ ꓠꓬ ꓟꓲ‐ꓢ ꓔꓲ ꓪꓽ ꓘꓴ ꓔꓶ. ꓥ ꓡꓳ꓿
