Nꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓲ ꓠꓯ ꓕꓱ ꓟ ꓗꓪ ꓡ ꓞꓳ ꓕꓲ ꓣꓳ ꓔꓯ ꓕꓲꓺ ꓡꓰˍ ꓟ꓾ ꓬꓯꓼ ꓡꓰˍ ꓟ ꓟ. ꓟꓲꓽ ꓚ ꓑꓶ. ꓢꓴ ꓮ ꓟꓬ ꓣꓳ ꓙꓳˍ ꓡ꓿ ꓚ ꓟꓲꓽ ꓔꓯ ꓣꓳ ꓡꓳ. ꓠꓬꓲˍ ꓕꓯ ꓟꓲ ꓠꓯ ꓕꓱ ꓟ ꓗꓪ ꓠꓬ ꓟ. ꓟꓲꓽ ꓚˍ ꓟ ꓠꓬꓱ. ꓠꓬꓱ.ˍ ꓐꓰ ꓧ ꓓꓰ ꓡꓰˍ ꓟ꓾ ꓙꓲꓻ ꓓꓰ ꓡꓰˍ ꓟ꓾ ꓒꓵꓽ ꓓꓰ ꓡꓰˍ ꓟ ꓐꓯ ꓧꓪ. ꓘꓶꓽ ꓕꓲ ꓘꓶꓽ ꓐꓯ ꓔꓲ. ꓟ ꓡ ꓞꓳ ꓕꓲ ꓣꓳ ꓙꓳˍ ꓡꓳ꓿ ꓕꓱ ꓟ ꓠꓬ ꓬꓳ‐ꓦ꓿2ꓽ1‐11 ꓗꓪ ꓣꓳ ꓟꓳꓻ ꓪˍ ꓟ ꓢꓲ ꓒ ꓬꓰ‐ꓢꓴ ꓬꓲ ꓮ ꓟ ꓟ‐ꓡꓲ‐ꓬ ꓥ ꓡꓳ꓿
ꓡꓯꓽ ꓒꓯ, ꓝ. ꓜꓽ ꓑꓮꓲꓽ ꓗꓪ ꓬꓲ ꓪ ꓛꓱꓼ ꓡꓱꓼ ꓙꓵ ꓖꓴ ꓡꓰˍ ꓟ ꓔꓯ ꓢꓲꓽ‐ꓫꓬ‐ꓟ‐ꓡꓲ‐ꓬ ꓡꓳ. ꓟꓳꓻˍ ꓠꓬꓲ ꓢꓲ ꓒ ꓬꓰ‐ꓢꓴ ꓔꓯ ꓬꓲ ꓪꓽ ꓗꓳ, ꓖꓶˍ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓔꓯ꓾ ꓠꓴ ꓠꓬ ꓥꓪ ꓐꓰ ꓮ ꓫꓵꓽ ꓗꓴ. ꓙꓲꓽ ꓙꓳˍ ꓡ꓾ ꓐꓰ ꓐꓯ ꓔꓲ. ꓡꓳ꓿ ꓖꓳ ꓕꓯ ꓢꓲꓽ‐ꓫꓬ‐ꓟ‐ꓡꓲ‐ꓬ ꓬꓲ ꓐꓯ ꓧꓪ. ꓘꓶꓽ ꓠꓬ ꓠꓬꓲ. ꓠꓬꓲ ꓗꓪ ꓛꓲ ꓞꓳ ꓤ ꓮꓽ ꓟ ꓔꓯ ꓥ ꓟꓲ ꓬꓯꓼ ꓡꓰ ꓝꓲˍ ꓟ꓾ ꓮ ꓡꓲ ꓫꓵꓽ ꓡ ꓞꓳ ꓔꓯ ꓥˍ ꓟꓲ ꓠꓲ, ꓟ ꓗꓪ ꓕꓲꓺ ꓡꓰ ꓝꓲˍ ꓟ ꓐꓯ ꓧꓪ. ꓘꓶꓽ ꓕꓲ ꓘꓶꓽ ꓣꓳ ꓔꓯ ꓬꓰ ꓔꓲ. ꓖꓶ ꓗꓷꓳ꓿ ꓮ ꓫꓵꓽ ꓥ ꓡ꓿ “ꓬꓲ ꓐꓯ ꓟ ꓮ ꓙꓵꓽ ꓬꓰ” ꓐꓰ ꓢꓲꓽ‐ꓫꓬ‐ꓟ‐ꓡꓲ‐ꓬ ꓠꓬ ꓪꓽ ꓤ ꓐꓴ ꓔꓯ ꓐꓯ ꓖꓶꓽˍ ꓡꓳ꓿
ꓥ ꓡꓳ꓾ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓡꓯꓽ ꓒꓯ, ꓝ. ꓑꓮꓲꓽ ꓖꓳ ꓟ ꓔꓯ ꓣꓳꓽ ꓡꓳ. ꓠꓬꓲˍ ꓕꓯ ꓓꓵꓽ ꓙꓽ ꓟꓶ ꓓꓴ꓾ ꓓꓵꓽ ꓙ ꓮʼ ꓓꓴ ꓟꓬꓱꓽ ꓖꓳ ꓟ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓤꓶꓻ ꓗꓪ ꓬꓲ. ꓪꓴ. ꓪꓴ. ꓔꓴˍ ꓟ ꓥ ꓡꓳ꓿ ꓬꓲ ꓪꓴ. ꓕꓱ ꓟ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓮ ꓟ ꓢꓲꓽ‐ꓫꓬ‐ꓟ‐ꓡꓲ‐ꓬ ꓗꓪ ꓐꓰ ꓒꓬꓱꓼ ꓡˍ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓙꓵ, ꓟꓽ ꓛꓲ ꓡ ꓢꓰꓽ ꓐꓰ ꓐꓯ ꓥ ꓟꓲ ꓬꓲ ꓮ ꓟ ꓢꓲꓽ‐ꓫꓬ‐ꓟ‐ꓡꓲ‐ꓬ ꓐꓯ ꓘꓶꓼ ꓔꓯ ꓬꓲ ꓠ ꓠ, ꓢꓲ ꓠꓬꓲ ꓓꓵꓽ ꓙ ꓟꓶ ꓓꓴ ꓬꓲ ꓬꓰ ꓖꓶˍ ꓡꓳ꓿
ꓥ ꓡꓳ꓾ ꓢꓲꓽ‐ꓫꓬ‐ꓟ‐ꓡꓲ‐ꓬ ꓬꓲ ꓤꓶꓻ ꓔꓯ ꓣꓳ ꓡꓳ. ꓠꓬꓲˍ ꓥ ꓟꓲ ꓬꓲ ꓠꓬ ꓪꓰ ꓤ ꓕꓲ ꓣꓳ ꓥ ꓐꓯ ꓥ ꓟꓲ ꓠꓱ. ꓐꓯ ꓢꓴ ꓡꓰ ꓐꓰ ꓜꓽ ꓠꓬꓲ ꓓꓳꓻ ꓠꓬꓲ ꓖꓳ ꓡꓱ ꓟꓽ ꓔꓬ,꓿ ꓮ ꓡꓰ ꓕꓲ ꓣꓳ ꓠꓬ ꓮ ꓡꓲ ꓫꓵꓽ ꓣꓱꓽ ꓞ, ꓔꓬ ꓡ ꓐꓯ ꓟ ꓔꓯ ꓬꓲ ꓡꓰ ꓡꓳ. ꓠꓬꓲ ꓔꓬ ꓡꓳ꓿ ꓢꓲꓽ‐ꓫꓬ‐ꓟ‐ꓡꓲ‐ꓬ ꓬꓲ ꓤꓶꓻ ꓔꓯ ꓣꓳ ꓡꓳ. ꓠꓬꓲˍ ꓕꓯ ꓬꓲ ꓤꓶꓻ ꓕꓲ ꓟ ꓡꓱꓸꓼ ꓢꓲ ꓒ ꓬꓰ‐ꓢꓴ ꓔꓯ ꓖꓶ ꓗꓷˍ ꓡꓳ꓿ ꓪꓴ‐ꓢ ꓔꓯ ꓖꓶ ꓗꓷˍ ꓡꓳ꓿ ꓤ ꓟꓶ ꓡꓯ. ꓚꓵ ꓤꓶꓻ ꓗꓪ ꓐꓰ ꓫꓵꓻˍ ꓗꓪ ꓛꓲ ꓬꓲ ꓠꓬ꓾ ꓬꓲ ꓕꓲ ꓖꓳ ꓓꓱꓽ ꓡꓱꓸꓼ ꓕꓲ ꓠꓲ, ꓟ ꓡꓱꓸꓼ ꓪꓴ‐ꓢ ꓔꓯ ꓖꓶ ꓗꓷˍ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓗꓪ ꓠꓬ ꓢꓲꓽ‐ꓫꓬ‐ꓟ‐ꓡꓲ‐ꓬ ꓠꓬ ꓟꓲ ꓠꓯ ꓕꓱ ꓟ ꓗꓪ ꓒꓵꓽ ꓓꓰ ꓡꓰ ꓟ ꓟ, ꓟ ꓕꓲ ꓣꓳ ꓥ ꓡꓳ꓾ ꓐꓰ ꓣꓳ ꓒꓵꓽ ꓗ ꓬꓰˍ ꓡꓳ꓿ ꓬꓲ ꓔꓯ ꓠꓬ ꓝꓴꓲ. ꓟꓽ ꓙꓳ ꓙꓳ ꓖꓳ ꓓꓱꓽ ꓠꓬꓲꓽ ꓔꓱ, ꓐꓲ ꓡˍ ꓡꓳ꓾ ꓐꓰ ꓣꓳ ꓐꓴ ꓙꓵꓻˍ ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓳ. ꓖꓶ ꓡˍ ꓟ ꓠꓬ꓾ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓫ. ꓙꓵ ꓟꓶ ꓙꓵˍ ꓕꓯ꓾ ꓠꓴ ꓠꓲ, ꓟ ꓫ. ꓕꓯ꓾ ꓠꓴ ꓠꓲ, ꓟ ꓪꓴꓽ ꓧꓶˍ ꓕꓯ꓾ ꓠꓴ ꓦ ꓡꓱ ꓖꓴ ꓧꓪ ꓟꓽ ꓟꓶ ꓕꓯ꓾ ꓢꓲꓽ‐ꓫꓬ‐ꓟ‐ꓡꓲ‐ꓬ ꓠꓬ ꓠꓴ ꓒ ꓕꓲ ꓗꓪ ꓔꓬ ꓡꓳ꓾ ꓐꓰ ꓐꓯ ꓟ ꓣꓳ ꓔꓯ ꓐꓯ ꓟꓳ. ꓖꓶ ꓡ ꓔꓬ ꓡꓳ꓿ ꓢꓲꓽ‐ꓫꓬ‐ꓟ‐ꓡꓲ‐ꓬ ꓠꓬ ꓠꓬꓲ. ꓠꓬꓲ ꓠꓴ ꓮ ꓟˍ ꓟꓲ ꓥ ꓡꓳ꓾ ꓥꓪ ꓮ ꓟˍ ꓟꓲ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓢꓲ ꓒ ꓬꓰ‐ꓢꓴ ꓬꓲ ꓡꓯꓼ ꓐꓳ ꓔꓶ. ꓓꓴ ꓕꓯꓽ ꓢꓲ ꓗꓪ ꓕꓯꓼ ꓔꓶ. ꓟꓶ ꓔ ꓕꓯ ꓬꓲ ꓠꓬ ꓮ ꓟꓬ, ꓫ. ꓕꓱ ꓟꓽ ꓘꓴ꓿ ꓕꓲ ꓖꓳ ꓓꓱꓽ ꓡꓱꓸꓼ ꓔꓰ ꓝꓲꓼ ꓑꓻ ꓡꓰꓽ ꓓꓴ ꓓ, ꓟ ꓑꓶ. ꓓꓴ ꓬꓲ ꓠꓬ ꓢꓯꓼ ꓟꓬ ꓞꓷ, ꓗꓷˍ ꓟ ꓦꓬꓼ ꓠꓬꓲ ꓗꓪ ꓮ ꓟꓬ, ꓫ. ꓕꓱ ꓟꓽ ꓘꓴ꓿ ꓖꓳ ꓡꓱ ꓠꓬꓲ ꓬꓲ ꓢꓯꓼ ꓕꓵꓼ ꓢꓲ ꓠꓬꓲ ꓫ. ꓕꓱˍ ꓟ ꓗꓪ ꓬꓳ‐ꓦ ꓔꓯ ꓬꓲ ꓮ ꓟ ꓔꓯ ꓡꓯꓼ ꓙꓱ ꓔꓲ.ˍ ꓡꓳ꓿ ꓕꓱ ꓟˍ ꓡꓰ ꓐꓰ ꓬꓲ ꓮ ꓟ ꓔꓯ ꓥˍ ꓟꓲ ꓬꓳ‐ꓦ ꓔꓯ ꓡꓯꓼ ꓙꓱ ꓔꓲ.ˍ ꓡꓳ꓿ ꓖꓳ ꓗꓪ ꓚꓳ. ꓠꓬꓲ. ꓠꓬꓲ ꓞꓳ ꓤ ꓮ ꓙꓵꓽ ꓟ, ꓟ ꓠꓬ ꓢꓲꓽ‐ꓫꓬ‐ꓟ‐ꓡꓲ‐ꓬ ꓒꓬꓱꓼ ꓡꓺꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓢꓯꓼ ꓪ ꓖꓶ ꓡˍ ꓟ ꓠꓬ ꓬꓲ ꓮ ꓟ ꓢꓲꓽ‐ꓫꓬ‐ꓟ‐ꓡꓲ‐ꓬ ꓶꓼ ꓓꓰꓽ ꓪꓽ ꓘꓴ ꓙ ꓖꓶˍ ꓟ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓠꓬ ꓓꓵꓽ ꓙ ꓟꓶ ꓓꓴ ꓣꓳ ꓐꓱ ꓶ ꓬꓰ ꓖꓶ ꓡˍ ꓡꓳ ꓐꓯ ꓟ ꓣꓳ ꓔꓯ ꓕꓲ ꓫꓵꓽ ꓐꓯ ꓟ. ꓖꓶ ꓡˍ ꓡꓳ꓿ ꓝꓮꓲ ꓕꓲ ꓫꓵꓽ ꓟ ꓠꓬ ꓢꓲꓽ‐ꓫꓬ‐ꓟ‐ꓡꓲ‐ꓬ ꓬꓲ ꓠꓲ, ꓟ ꓔꓯ ꓣꓳ ꓔꓯ ꓢꓳ ꓠꓯ, ꓡꓳ꓿ ꓬꓲ ꓤꓶꓻ ꓔꓯ ꓣꓳ ꓡꓳ. ꓠꓬꓲˍ ꓕꓯ ꓬꓲ ꓠꓬ ꓮ ꓕꓯ ꓥ ꓟꓲ ꓠꓱ. ꓐꓯ ꓢꓴ ꓐꓱ ꓶˍ ꓡꓰꓽ ꓓꓵꓽ ꓙꓽ ꓢꓲ ꓠꓬꓲ ꓮ ꓕꓯ ꓥ ꓟꓲ ꓬꓲ ꓢꓯ. ꓔꓬ ꓡꓳ꓿ ꓢꓲꓽ‐ꓫꓬ‐ꓟ‐ꓦ ꓐꓰ ꓐꓲꓺ ꓞ, ꓢꓴ ꓠꓬ ꓮ ꓡꓲ ꓫꓵꓽ ꓟꓬꓱꓽ ꓬꓰˍ ꓡ ꓐꓯ ꓟ ꓔꓯ ꓢꓷ. ꓠꓲ, ꓫꓵˍ ꓠꓬ ꓢꓲꓽ‐ꓫꓬ‐ꓟ‐ꓡꓲ‐ꓬ ꓔꓯ ꓡꓳ. ꓠꓬꓲˍ ꓠꓬ ꓢꓷ. ꓓ, ꓡꓳ꓿ ꓬꓲ ꓠꓬ ꓮ ꓕꓯ ꓟꓲ ꓠꓱ. ꓐꓱ ꓢꓴ ꓮ ꓫꓵꓽ ꓣꓱꓽ ꓞ, ꓔꓬ ꓡ ꓐꓯ ꓟ ꓔꓯ ꓡꓳ. ꓠꓬꓲ ꓔꓬ ꓡꓳ꓿
