ꓢꓲ ꓒ ꓬꓰ‐ꓢꓴ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓾ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓠꓬ ꓢꓲ ꓒ ꓬꓰ‐ꓢꓴ ꓡꓰ ꓔ ꓟꓼ ꓩꓴ. ꓓꓲꓻ ꓢꓴ ꓕꓲ ꓣꓳ ꓔꓯ ꓫꓬ, ꓓꓻ ꓡꓰ ꓟ ꓟ. ꓟꓲꓽ (ꓟ‐ꓘꓳ 1ꓽ40‐45) ꓥ ꓡꓳ꓿ ꓢꓲꓽ ꓫꓬ ꓕꓳꓽ ꓶ ꓗꓪ ꓔ ꓟꓼ ꓩꓴ. ꓓꓲꓻ ꓢꓴ ꓕꓲ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓔꓬ ꓗꓪ ꓡ ꓢꓲ ꓠꓬꓲ “ꓢꓲꓺ ꓒꓽꓳ ꓠꓴ ꓠꓲ, ꓫꓵˍ ꓠꓬ ꓥꓪ ꓔꓯ ꓠꓻ ꓫꓬ, ꓖꓶ꓾” ꓐꓰ ꓓꓰꓽˍ ꓕꓯ ꓢꓲ ꓒ ꓬꓰ‐ꓢꓴ ꓬꓲ ꓔꓯ ꓟꓳꓻ ꓗꓷ ꓠꓬꓲ ꓫꓱ. ꓤ ꓢꓲ꓾ “ꓥꓪ ꓠꓲ, ꓫꓵˍ ꓡꓳ꓿ ꓠꓴ ꓠꓻ ꓓꓴ ꓓꓻ ꓡꓰ ꓨ” ꓐꓰ ꓐꓯ ꓖꓶˍ ꓕꓯ ꓬꓲ ꓠꓻ ꓓꓴ ꓠꓽ ꓓꓻ ꓡꓰˍ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓡꓰ ꓔ ꓟꓼ ꓩꓴ. ꓓꓲꓻ ꓢꓴ ꓔꓯ ꓫꓬ, ꓖꓶˍ ꓟ ꓠꓬ꓾ ꓔ ꓟꓼ ꓩꓴ. ꓓꓲꓻ ꓢꓴ ꓐꓯ ꓟ꓾ ꓢꓲ ꓒ ꓬꓰ‐ꓢꓴ ꓤꓶꓻ ꓗꓪ ꓠꓬ ꓟꓽ ꓢꓲꓽ ꓟꓽ ꓫꓬ ꓢꓴ ꓕꓲ ꓣꓳ꓾ ꓧꓪꓽ ꓖꓳ ꓓꓱꓽ ꓗꓪ ꓠꓻ ꓓꓴ ꓬꓲ ꓑ ꓮ ꓟꓬ, ꓙꓳˍ ꓟ ꓥ ꓡꓳ꓿ ꓖꓳ ꓟ ꓪꓴ. ꓠꓬꓲ ꓔ ꓟꓼ ꓩꓴ. ꓓꓲꓻ ꓢꓴ ꓮ ꓙꓵꓽ ꓠꓬ ꓞꓳ ꓘ, ꓘꓴꓽ ꓠꓯꓸꓼ ꓗꓪ ꓬꓲ ꓪ ꓟꓽ ꓪ ꓔꓬ꓿ ꓬꓲ ꓪ ꓠꓬ ꓞꓳ ꓘ, ꓠꓱ ꓫꓳ. ꓟ. ꓗꓪ ꓔꓬ ꓪˍ ꓡꓳ꓿ ꓬꓲ ꓪ ꓠꓬ ꓞꓳ ꓘ, ꓠꓯꓸꓼ ꓗꓪ꓾ ꓥ ꓠꓬ꓾ ꓙꓵ ꓗꓪ ꓓꓵꓽ ꓡ ꓕꓯ ꓗꓳ. ꓡꓱ. ꓣꓱꓽ ꓢꓲ ꓬꓲ ꓢꓯꓼ ꓖꓶ ꓠ ꓔ ꓡꓳ꓿ ꓗꓳ. ꓡꓱ. ꓷ, ꓢꓲ꓾ ꓗꓳ. ꓡꓱ. ꓓꓶꓽ ꓢꓲ ꓠꓬꓲ ꓥ ꓠꓬ꓾ ꓢꓯꓼ ꓢꓽ ꓟ ꓘꓴꓻ ꓢꓲ ꓠꓬꓲ “ꓥꓪ ꓟꓽ ꓢꓲꓽ ꓫꓬ ꓢꓴ ꓡꓺꓳ꓾ ꓮ ꓟꓲ. ꓤ. ꓔ ꓖꓶ꓾ ꓥꓪ ꓟꓽ ꓢꓲꓽ ꓫꓬ ꓢꓴ ꓡꓺꓳ꓾” ꓐꓰ ꓘꓴ ꓢꓲ ꓠꓬꓲ ꓓꓵꓽ ꓙꓰ ꓠꓯ, ꓟ ꓥ ꓡꓳ꓿
ꓖꓳ ꓟ ꓪꓴ. ꓠꓬꓲ ꓦꓬꓼ ꓠꓬꓲ ꓖꓳ ꓟ ꓗꓪ ꓔ ꓟꓼ ꓩꓴ. ꓓꓲꓻ ꓢꓴ ꓠꓬ ꓢꓯ. ꓔꓬ ꓕꓲ ꓖꓼ ꓥ ꓡꓳ꓿ ꓡ ꓞꓳ ꓮꓽ ꓟˍ ꓟꓲ ꓬꓲ ꓔꓯˍ ꓟꓲ ꓔ, ꓠꓲ, ꓟꓽ ꓫꓵ꓿ ꓫ. ꓕꓱ ꓠꓲ, ꓟꓽ ꓫꓵ꓿ ꓬꓲ ꓔꓯ ꓡꓳ. ꓠꓲ, ꓟꓽ ꓫꓵ꓾ ꓣꓱꓽ ꓙ ꓠꓲ, ꓟꓽ ꓫꓵ꓾ ꓬꓲ ꓐꓰ ꓕꓲ ꓡꓰ, ꓟꓲ ꓔꓬ ꓠꓲ, ꓟꓽ ꓫꓵ꓿ ꓖꓳ ꓟ ꓑꓶ. ꓓꓴ ꓔ ꓟꓼ ꓩꓴ. ꓓꓲꓻ ꓢꓴ ꓤꓶꓻ ꓠꓬ ꓢꓯ. ꓔꓬ ꓕꓲ ꓖꓼ꓾ ꓢꓯꓼ ꓦ ꓔꓬ ꓕꓲ ꓖꓼ ꓥ ꓡꓳ꓿ ꓬꓲ ꓪ ꓤꓶꓻ ꓠꓯꓸꓼ ꓗꓪ ꓞꓳ ꓙꓳ ꓔꓬ ꓟ ꓮ ꓙꓵꓽ ꓠꓬ ꓞꓳ ꓫꓵꓻˍ ꓡꓰ ꓐꓰ ꓥꓳ꓿
ꓖꓳ ꓡꓱ ꓐꓯ ꓥ ꓟꓲ ꓢꓲ ꓒ ꓬꓰ‐ꓢꓴ ꓡꓰ ꓬꓲ ꓔꓯ ꓫꓬ, ꓖꓶˍ ꓕꓯ ꓠꓽ꓾ ꓬꓲ ꓤꓶꓻ ꓠꓬ ꓫꓵꓻ ꓢꓴ ꓡꓰˍ ꓐꓰ ꓗ, ꓟ ꓗꓪ ꓐꓰ ꓞꓳ ꓢꓯ. ꓡꓰ ꓐꓰ ꓘꓳ ꓣꓴ ꓟꓶ ꓡꓰꓳ꓿ ꓬꓲ ꓤꓶꓻ ꓠꓬ ꓫꓵꓻ ꓗꓪ ꓐꓰ ꓢꓯ. ꓬꓲꓼ ꓡˍ ꓟ ꓡꓰ ꓘꓳ ꓣꓴ ꓟꓶ ꓡꓰ ꓠꓬꓲ꓾ ꓔ ꓟꓼ ꓩꓴ. ꓓꓲꓻ ꓢꓴ ꓕꓱ ꓕꓲ ꓣꓳ ꓠꓬ ꓮ ꓘꓶ. ꓗ, ꓛꓲꓽ ꓠꓬꓲ ꓗꓷ ꓡꓰꓳ꓿
ꓣꓳ ꓤꓶꓻ ꓠꓯꓸꓼ ꓗꓪ ꓥ ꓟꓲ ꓕꓱ ꓡꓱ ꓥꓳ꓿ ꓣꓳ ꓤꓶꓻ ꓠꓯꓸꓼ ꓗꓪ ꓥ ꓟꓲ ꓡ ꓞꓳ ꓡꓰ ꓣꓳ ꓔꓯ ꓫꓬ, ꓖꓶ ꓟꓽ ꓐ ꓡ ꓟ꓾ ꓡ ꓞꓳ ꓡꓰ ꓣꓳ ꓔꓯ ꓖꓶꓽ ꓟꓽ ꓐ ꓡ ꓟ꓾ ꓡ ꓞꓳ ꓡꓰ ꓣꓳ ꓔꓯ ꓣꓱꓽ ꓙ ꓟꓽ ꓐ ꓡ ꓟ꓾ ꓞꓳ ꓤ ꓡꓰ ꓣꓳ ꓔꓯ ꓡꓳ. ꓠꓬꓲ ꓠꓲ, ꓟꓽ ꓫꓵ ꓟ ꓮ ꓙꓵꓽ ꓠꓬ꓾ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓔꓬ ꓗꓪ ꓡꓰꓽ ꓙꓳˍ ꓥꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓡꓯꓼ ꓙꓱ ꓗꓷˍ ꓕꓯ ꓠꓽ ꓬꓲ ꓣꓳꓽ ꓔꓯ ꓠꓻ ꓫꓬ, ꓖꓶˍ ꓟ ꓥꓳ꓿
ꓔ ꓟꓼ ꓩꓴ. ꓓꓲꓻ ꓢꓴ ꓔꓯ ꓬꓲ ꓤꓶꓻ ꓫꓵꓻ ꓡꓰˍ ꓟ ꓗꓪ ꓐꓰ ꓢꓯ. ꓡ ꓝꓲˍ ꓟ ꓐꓰ ꓕꓲ ꓡꓰ, ꓣꓳ ꓔꓯ ꓥ ꓟꓲ꓾ ꓣꓳ ꓫ. ꓙꓵ ꓟꓶ ꓙꓵ ꓓꓴ ꓮ ꓙꓵꓽ ꓗꓪ ꓐꓰ ꓬꓲ ꓡꓰ ꓚꓬꓴ. ꓙ ꓡˍ ꓥꓳ꓿
