ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓠꓬ ꓟ‐ꓘꓳ 1:21-28 ꓥ ꓢꓲ ꓠꓬꓲ꓾ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓟꓽ ꓫꓬ ꓠꓲꓽ ꓔꓯ ꓬꓲ ꓐꓯ ꓘꓶꓽ ꓕꓲ ꓘꓶꓽ ꓗꓪ ꓐꓰ ꓡꓰꓽ ꓓꓳ ꓙꓰ ꓝꓲˍ ꓟ ꓟ. ꓟꓲꓽ ꓥ ꓡꓳ꓿ ꓬꓰ‐ꓢꓴ ꓐꓯ ꓘꓶꓽ ꓗꓪ ꓐꓰ ꓠꓲꓽ ꓠꓬ ꓓꓳ ꓙꓰ ꓟ ꓑꓶ. ꓓꓴ ꓑ ꓫꓬ ꓐꓴ ꓠꓬ ꓓꓵꓽ ꓙꓽ ꓮ’ ꓡꓰ ꓢꓲ ꓕꓱ ꓟ ꓠꓬ ꓙꓵꓽ ꓪ ꓙꓳˍ ꓟ ꓟ. ꓟꓲꓽ ꓫꓵꓼ ꓕꓲ ꓟ ꓥ ꓐꓷ꓾ ꓐꓰ ꓐꓯ ꓡꓯ ꓘꓳˍ ꓡꓳ꓿
ꓢꓲ ꓒ ꓬꓰ‐ꓢꓴ ꓦꓬꓼ ꓠꓬꓲ ꓗꓪ ꓥꓶˍ ꓟ ꓦ ꓐꓴ ꓟꓽ ꓫꓬ ꓠꓲꓽ ꓐꓴ ꓠꓬ ꓮ ꓘꓶ. ꓟꓬꓽˍ ꓟ ꓥ ꓢꓲ ꓠꓬꓲ ꓬꓲ ꓪ ꓠꓬ ꓢꓯꓼ ꓙꓳ ꓪꓽ ꓠꓬꓲ ꓢꓲ ꓕꓲ ꓖ ꓕꓲ ꓖ ꓗꓪ ꓮʼ ꓚꓳ ꓔꓬ ꓢꓲ ꓠꓬꓲ꓾ ꓞꓳ ꓤ ꓐꓴ ꓔꓯ ꓫ. ꓙꓵ ꓝꓲ ꓠ, ꓟ ꓢꓯꓼ ꓕꓵꓼ ꓔꓬ ꓡꓳ꓾ ꓐꓰ ꓬꓴ‐ꓔ ꓡ ꓞꓳ ꓐꓴ ꓡꓰ ꓙꓵꓻ ꓔ ꓡꓳ꓿ ꓡ ꓞꓳ ꓕꓲ ꓣꓳ ꓔꓯ ꓠꓲꓽ ꓜꓶꓽ ꓞ, ꓔꓬ ꓡꓳ ꓐꓰ ꓚꓬ, ꓪˍ ꓕꓯ꓾ ꓔꓲ ꓒ ꓪꓴ. ꓓꓵ ꓣꓱꓽ ꓢꓴ ꓐꓴ꓾ ꓥ ꓠꓬ꓾ꓠꓲꓽ ꓖꓼ ꓓꓳ ꓢꓴ ꓐꓴ ꓠꓬ ꓬꓲ ꓪ ꓢꓷ. ꓔ ꓟ ꓠꓲꓽ ꓖꓼ ꓓꓳ ꓚꓱ, ꓔꓯ ꓣꓱꓽ ꓢꓲ ꓠꓲꓽ ꓓꓳ ꓙꓰ ꓠ, ꓟ ꓢꓯꓼ ꓕꓵꓼˍ ꓡꓳ꓿ ꓙꓵꓽ ꓪ ꓠꓬ ꓬꓲ ꓪ ꓠꓲꓽ ꓖꓼ ꓓꓳ ꓚꓱ, ꓗꓪ ꓙꓳˍ ꓡꓳ ꓐꓰ ꓙꓵꓻ ꓔ ꓟ ꓑꓶ. ꓓꓴ꓾ ꓠꓲꓽ ꓖꓼ ꓓꓳ ꓠ, ꓟ ꓐꓯ ꓘꓶꓽ ꓐꓰ ꓠꓲꓽ ꓖꓼ ꓓꓳˍ ꓕꓯ ꓣꓱꓽˍ ꓟ ꓬꓲꓻ ꓙꓬ ꓗꓪ ꓧꓳꓽ ꓫꓵꓽ ꓧꓳꓽ ꓙꓰꓽ ꓔꓯ ꓢꓷ. ꓢꓴ ꓐꓴ ꓠꓬ꓾ ꓟꓳꓻ ꓟꓽ ꓓꓻ ꓟ ꓠꓲꓽ ꓔꓯ ꓖꓼ ꓓꓳˍ ꓟ ꓗꓪ ꓮ ꓘꓶ. ꓟꓬꓱ ꓓꓳꓽ ꓪꓴꓽ ꓡ ꓔꓬ ꓡꓳ꓿
ꓖꓳ ꓡꓱ ꓥ ꓟꓲ ꓬꓰ‐ꓢꓴ ꓠꓬ ꓬꓲ ꓪ ꓔꓯ ꓟꓽ ꓫꓱ.꓿ ꓠꓲꓽ ꓜꓶꓽ ꓞ, ꓢꓴ ꓠꓬ ꓜꓲꓼ ꓦꓲ ꓗꓪ ꓡ ꓢꓲ ꓢꓲ ꓒ ꓬꓰ‐ꓢꓴ ꓔꓯ ꓘꓶꓻ ꓡꓶ ꓡˍ ꓕꓯ ꓬꓲ ꓔꓯ ꓓꓳ ꓙꓰ ꓠ, ꓟ ꓕꓵꓼ ꓪ ꓖꓶ ꓗꓷ ꓠꓬ꓾ ꓥꓶˍ ꓟ ꓦ ꓠꓬ ꓡ ꓞꓳ ꓖꓳ ꓕꓲ ꓣꓳ ꓗꓪ ꓐꓰ ꓓꓳ ꓙꓰꓳ꓿ ꓠꓲꓽ ꓖꓼ ꓓꓳ ꓠ, ꓟ ꓬꓲ ꓠꓬ ꓮ ꓡꓲ ꓫꓵꓽ ꓚꓱ, ꓔꓯ ꓥˍ ꓟꓲ ꓬꓲ ꓟꓽ ꓣꓱꓽ꓾ ꓐꓯ ꓘꓶꓽ ꓕꓲ ꓘꓶꓽˍ ꓡꓰꓽ ꓣꓱꓽˍ ꓡꓳ꓿ ꓜꓲꓼ ꓦꓲ ꓗꓪ ꓔꓬ ꓢꓴ ꓐꓴ ꓠꓬ ꓕꓱ ꓡꓱ ꓙꓵꓽ ꓪ ꓙꓳ ꓢꓴ ꓔꓯ ꓟꓽ ꓟꓳꓻ ꓠꓬꓲ꓿ ꓥꓶˍ ꓟ ꓦꓻ ꓐꓴ ꓥˍ ꓟꓲ ꓬꓲ ꓐꓯ ꓘꓶꓽ ꓔꓯ ꓠ ꓠ, ꓗꓪ ꓛꓲ ꓙꓵꓽ ꓪ ꓙꓳ ꓢꓴ ꓠꓬ ꓠꓱ. ꓐꓯ ꓮꓽ ꓟ ꓙꓳˍ ꓡ?
ꓪꓴ‐ꓢ ꓬꓲ ꓤ ꓔꓲ. ꓬꓰ‐ꓢꓴ ꓙꓲ‐ꓢꓴ ꓠꓬ ꓟꓴꓽ ꓗꓪ ꓐꓰ ꓟꓲ ꓠꓯ ꓗꓪ ꓟ ꓙꓵꓽ ꓪ ꓮ ꓙꓵꓽ ꓬꓲ ꓔꓯ ꓙꓳˍ ꓡꓳ꓿ ꓪꓴ‐ꓢ ꓠꓬ ꓬꓲ ꓗꓪ ꓐꓰ ꓮ ꓙꓵꓽ ꓔꓯ ꓚꓰꓼ ꓔ ꓟ ꓥ ꓢꓲ꓾ ꓙꓳˍ ꓟ ꓮ ꓙꓵꓽ ꓔꓯ ꓬꓲ ꓙꓵꓽˍ ꓟ ꓠꓯꓸꓼ ꓗꓪ ꓗꓷ ꓔ ꓡꓳ꓿ ꓖꓳ ꓡꓱ ꓠꓬꓲ ꓥꓶˍ ꓟ ꓦ ꓕꓯꓽ ꓢꓲ ꓗꓪ ꓥˍ ꓟꓲ ꓬꓰ‐ꓢꓴ ꓠꓬ ꓙꓵꓽ ꓪ ꓙꓳˍ ꓟ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓙꓵꓽ ꓪ ꓔꓯ ꓞꓳ ꓤ ꓐꓴ ꓣꓱꓽˍ ꓟ ꓡꓰ ꓬꓲ ꓟꓽ ꓣꓱꓽ꓿ ꓣꓳ ꓟꓲ ꓠꓯ ꓞꓳ ꓤ ꓐꓴ ꓠꓬ ꓚꓲ. ꓛꓬ ꓔꓯ ꓙꓵꓽ ꓪ ꓙꓳˍ ꓕꓯ ꓠꓽ ꓬꓰ ꓠꓲ, ꓫꓵˍ ꓟ ꓮ ꓙꓵꓽ ꓬꓰˍ ꓡꓳ꓿ ꓙꓵꓽ ꓪ ꓮ ꓡꓲ ꓟꓬ ꓙꓳˍ ꓠꓬ ꓖꓳ ꓟꓬ ꓣꓱꓽ ꓒꓬ,ˍ ꓡꓳ꓿ ꓢꓴ ꓔꓯ ꓕꓯꓽ ꓢꓲ ꓗꓪ ꓡꓰꓽ ꓝꓲ ꓜꓽˍ ꓡꓳ꓿ ꓬꓰ‐ꓢꓴ ꓠꓽ ꓖꓳ ꓡꓱ ꓟꓽ ꓥ꓿ ꓞꓳ ꓤ ꓮ ꓟꓬ, ꓐꓱ ꓶ ꓙꓵꓽ ꓪ ꓠꓬ ꓚꓲ. ꓛꓬ ꓐꓳ ꓡ ꓠ, ꓟ꓾ ꓚꓲ. ꓛꓬ ꓐꓱ ꓶ ꓙꓲꓻ ꓠ, ꓟ꓾ ꓔꓱ, ꓚꓵˍ ꓟ ꓔꓯ ꓠꓬꓲ. ꓞꓰꓻ ꓠ, ꓟ꓾ ꓐꓰ ꓙꓵꓽ ꓪ ꓔꓯ ꓡꓯꓼ ꓫꓵ ꓟꓶ ꓠ, ꓟ ꓐꓱ ꓶ ꓟꓶ ꓔ ꓟ ꓙꓵꓽ ꓪ ꓔꓯ ꓣꓱꓽˍ ꓡꓳ꓿ ꓗꓴꓷꓼ ꓙꓵꓽ ꓢꓴ ꓠꓯꓸꓼ ꓗꓪˍ ꓟꓲ ꓙꓵꓽ ꓪ ꓔꓯ ꓚꓲ. ꓛꓬ ꓐꓱ ꓶˍ ꓡꓰꓽ ꓣꓱꓽ ꓢꓴ ꓮ ꓟꓬ, ꓙꓳˍ ꓟ ꓡꓰꓽ ꓟꓽ ꓞꓲ꓾ ꓟ. ꓒ ꓟ. ꓟ ꓐꓴ ꓠꓯꓸꓼ ꓗꓪ꓾ ꓘꓴ ꓜꓲꓼ ꓞꓳ ꓠꓯꓸꓼ ꓗꓪ꓾ ꓝꓮꓲ ꓟꓬꓱꓽ ꓬꓰ ꓖꓴ ꓗꓪ꓾ ꓝꓮꓲ ꓕꓲ ꓦꓲꓻ ꓘꓴꓽ ꓗꓪ ꓥˍ ꓟꓲ ꓙꓵꓽ ꓪ ꓔꓯ ꓟꓬꓽ ꓠꓬꓲ ꓣꓱꓽ ꓢꓴ ꓐꓴ ꓔꓯ ꓣꓳ ꓟꓳꓻ ꓪ ꓓ, ꓡꓳ꓿
ꓬꓰ‐ꓢꓴ ꓠꓽ ꓖꓳ ꓡꓱ ꓟꓽ ꓥ꓿ ꓬꓲ ꓔꓯ ꓙꓵꓽ ꓪ ꓮ ꓙꓵꓽ ꓙꓳˍ ꓥ ꓟꓲ ꓟꓲ ꓠꓯ ꓞꓳ ꓡꓰ ꓐꓰ ꓙꓵꓽ ꓪ ꓔꓯ ꓬꓲ ꓟꓽ ꓣꓱꓽ꓿ ꓬꓲ ꓠꓬ ꓣꓱꓽ ꓞ, ꓢꓴ ꓔꓯ ꓠꓲ, ꓞ ꓬꓰ ꓙ ꓢꓴ ꓥ ꓡꓳ꓿
ꓬꓰ‐ꓢꓴ ꓠꓬ ꓝꓲ ꓓꓴ ꓐꓱ ꓶ ꓟꓽ ꓥ ꓥ꓾ ꓣꓱꓽ ꓙ ꓠ, ꓟ ꓐꓱ ꓶ ꓬꓲ ꓙꓵꓽ ꓪ ꓔꓯ ꓣꓱꓽˍ ꓡꓳ꓿ ꓕꓱ ꓟ ꓠꓬ ꓣꓳ ꓔꓯ ꓙꓳˍ ꓟ ꓙꓵꓽ ꓪ ꓔꓯ ꓣꓳ ꓮ ꓡꓲ ꓣꓱꓽ ꓠ, ꓟ ꓣꓳꓽ ꓔꓯ ꓟ. ꓖꓶ ꓔꓬ ꓟ ꓥ ꓡꓳ꓿ ꓣꓳ ꓔꓯ ꓙꓳˍ ꓟ ꓙꓵꓽ ꓪ ꓔꓯ ꓦꓲꓻ ꓗꓪ ꓥˍ ꓟꓲ꓾ ꓟꓬꓱꓽ ꓬꓰ ꓖꓴ ꓗꓪ ꓥˍ ꓟꓲ ꓠꓱ. ꓐꓯ ꓗꓪ ꓥˍ ꓟꓲ ꓣꓳ ꓠꓬ ꓠꓱ. ꓐꓯ ꓢꓴ ꓔꓯ ꓬꓰ ꓙ ꓠ, ꓟ꓾ ꓚꓲ. ꓛꓬ ꓔꓯ ꓚꓲ. ꓛꓬ ꓪꓴꓽˍ ꓟ ꓟꓽ ꓚꓬ, ꓔ ꓠ, ꓟ ꓣꓳ ꓙꓵꓽ ꓪ ꓔꓯ ꓢꓲ ꓒ ꓠꓬ ꓣꓱꓽ ꓝꓲ ꓠꓲ, ꓫꓵˍ ꓟ ꓥ ꓡꓳ꓿
ꓬꓰ‐ꓢꓴ ꓠꓬ ꓣꓳꓽ ꓔꓯ ꓡꓯꓼ ꓠꓬꓲ ꓖꓴ ꓢꓲ ꓠꓬꓲ ꓟꓽ ꓙꓵꓽ꓾ ꓟꓽ ꓝꓲ꓿ ꓬꓲ ꓠꓬ ꓣꓳ ꓔꓯ ꓠꓲ, ꓟ ꓫꓵ ꓢꓲ ꓙꓽ ꓗꓳ ꓫꓱ. ꓤ ꓠꓲ, ꓡꓰ ꓣꓱꓽ ꓙ ꓢꓲ ꓠꓬꓲ꓾ ꓣꓳ ꓠꓬ ꓬꓲ ꓔꓯ ꓮ ꓡꓲ ꓟꓬ ꓛꓲ ꓣꓱꓽ ꓞ, ꓔꓬ ꓟ ꓣꓳꓽ ꓢꓷ. ꓠ, ꓟ ꓬꓰ ꓙ ꓔꓬ ꓡꓳ꓿ ꓝꓴꓲ. ꓠꓬ ꓥꓶˍ ꓟ꓾ ꓦꓶˍ ꓟ꓾ ꓞꓳ, ꓔ ꓠꓲ, ꓫꓵˍ ꓟ꓾ ꓖꓼ ꓖꓶꓽ ꓟꓽ ꓐ ꓡ ꓟ ꓬꓲ ꓢꓲ ꓒ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓬꓰ‐ꓢꓴ ꓠꓬ ꓫꓱ. ꓤˍ ꓟ꓾ ꓠꓲ, ꓒꓴˍ ꓟ꓾ ꓠꓲ, ꓟ ꓫꓵˍ ꓟ꓾ ꓠꓵꓻ ꓠꓲ, ꓐꓰ ꓙꓽ ꓗꓳ ꓠꓲ, ꓙꓳˍ ꓡꓳ꓿ ꓝꓴꓲ. ꓬꓲ ꓙꓵꓽ ꓪ ꓠꓬ ꓞꓳ ꓤ ꓔꓯ ꓠꓲ, ꓟ ꓒꓳ, ꓡꓰ ꓝꓲˍ ꓥ ꓟꓲ꓾ ꓬꓰ‐ꓢꓴ ꓬꓲ ꓙꓵꓽ ꓪ ꓠꓬ ꓣꓳ ꓔꓯ ꓩꓴ ꓖꓶ ꓡˍ ꓡꓳ꓿ ꓞꓳ, ꓔ ꓟ ꓗꓪ ꓐꓰ ꓡꓲ, ꓗꓷ ꓝꓲˍ ꓡꓳ꓿
ꓣꓳ ꓤꓶꓻ ꓠꓯꓸꓼ ꓗꓪ ꓬꓰ‐ꓢꓴ ꓬꓲ ꓙꓵꓽ ꓪ ꓠꓬ ꓮ ꓡꓲ ꓣꓱꓽ ꓔꓬ ꓡ ꓐꓰ ꓠꓴ ꓓꓵꓽ ꓙˍ ꓡ? ꓬꓲ ꓙꓵꓽ ꓪ ꓖꓳ ꓟ ꓠꓬ ꓣꓳ ꓔꓯ ꓬꓰ ꓙ ꓓꓴ ꓥ ꓡ꓾ ꓣꓳ ꓔꓯ ꓙꓵꓽ ꓪ ꓙꓳˍ ꓟ ꓗꓴꓷꓼ ꓙꓵꓽ ꓢꓴˍ ꓡꓰ ꓐꓰ ꓙꓵꓽ ꓠ, ꓟ ꓥ ꓡ? ꓣꓳ ꓮ ꓟꓬ, ꓠꓬ ꓢꓲ ꓒ ꓠꓬ ꓣꓳ ꓔꓯ ꓙꓵꓽ ꓠ, ꓟ ꓐꓱ ꓶ꓾ ꓝꓲ ꓠ, ꓟ ꓐꓱ ꓶ ꓬꓲ ꓙꓵꓽ ꓪ ꓔꓯ ꓣꓱꓽ ꓔꓬ ꓡꓳ ꓐꓰ ꓓꓵꓽ ꓙ ꓔꓬ ꓡꓳ꓿ ꓣꓳ ꓔꓯ ꓠꓲ, ꓠꓵˍ ꓟ ꓬꓲ ꓠꓵꓻ ꓠꓲ, ꓠꓬ ꓣꓳ ꓮ ꓡꓲ ꓟꓬ ꓛꓲ ꓙꓲꓻˍ ꓟ ꓬꓰˍ ꓡ꓾ ꓬꓲ ꓔꓯ ꓮ ꓡꓲ ꓟꓬ ꓠ ꓠ, ꓡ ꓐꓯ ꓟ ꓔꓯ ꓡꓳ. ꓢꓲ ꓬꓲ ꓣꓳ ꓔꓯ ꓠꓲ, ꓠꓵˍ ꓡꓳ꓾ ꓐꓰ ꓣꓳ ꓓꓵꓽ ꓙ ꓔꓬ ꓖꓴˍ ꓡꓳ꓿ ꓣꓳ ꓠꓬ ꓢꓲ ꓒ ꓔꓯ ꓟꓽ ꓠ ꓡꓳ. ꓕꓯ ꓢꓲ ꓒ ꓠꓬ ꓣꓳ ꓔꓯ ꓟꓽ ꓠꓲ, ꓠꓵꓻ ꓡꓺꓳ ꓐꓰ ꓓꓵꓽ ꓙ ꓢꓲ ꓠꓲ, ꓟ ꓙꓬ ꓔꓬ ꓡꓳ꓾ ꓙꓳꓺ ꓔꓬ ꓡꓳ꓿
ꓖꓳ ꓡꓱ ꓥ ꓟꓲ ꓬꓰ‐ꓢꓴ ꓠꓬ ꓣꓳ ꓔꓯ ꓟꓽ ꓐꓬ ꓡꓰ ꓝꓲ ꓝꓲ꓾ ꓣꓳ ꓔꓯ ꓣꓱꓽ ꓙ ꓠ, ꓟ ꓬꓰ ꓙ ꓠ, ꓟ ꓬꓲ ꓙꓵꓽ ꓪ ꓔꓯ ꓣꓱꓽ ꓔꓬ ꓟ ꓥ ꓡꓳ꓿ ꓬꓲ ꓠꓬ ꓥꓶˍ ꓟ ꓦ ꓔꓯ ꓖꓼ ꓓꓳ ꓗꓷˍ ꓡꓳ꓾ ꓣꓳ ꓔꓯ ꓖꓼ ꓓꓳˍ ꓟ ꓟꓽ ꓥ꓿ ꓝꓮꓲ ꓬꓰ‐ꓢꓴ ꓡꓰ ꓙꓵꓽ ꓪ ꓣꓱꓽ ꓢꓲ ꓖꓼ ꓓꓳ ꓖꓶ ꓗꓷ ꓟ ꓥꓶˍ ꓟ ꓦ ꓠꓬ ꓣꓳ ꓐꓱ ꓶ ꓕꓲ ꓙꓰꓽˍ ꓟ ꓢ‐ꓓꓯ ꓟꓽ ꓥ꓿ ꓐꓯ ꓠꓲ, ꓫꓵˍ ꓟ ꓠꓬ ꓣꓳ ꓐꓱ ꓶ ꓢ‐ꓓꓯ ꓐꓯ ꓟ ꓠꓬ ꓢꓲ ꓒ ꓬꓰ‐ꓢꓴ ꓡꓰ ꓖꓼ ꓓꓳ ꓗꓷ ꓟ ꓥꓶˍ ꓟ ꓦꓻ ꓕꓲ ꓟˍ ꓡꓰꓽ ꓙꓳˍ ꓟ ꓟꓽ ꓥ꓿ ꓝꓴꓲ. ꓥˍ ꓟꓲ ꓣꓳ ꓐꓴ ꓔꓯ ꓐꓬ ꓡꓰ ꓝꓲ ꓢꓲ꓾ ꓣꓳ ꓔꓯ ꓟꓽ ꓙꓲꓻ ꓟ ꓚꓱ, ꓗꓪ ꓐꓰ ꓙꓵꓽ ꓔꓬ ꓟ ꓢ‐ꓓꓯ ꓥ ꓡꓳ꓾ ꓥꓶˍ ꓟ ꓥ ꓡꓳ꓿ ꓣꓳ ꓙꓳꓺ ꓠꓲ, ꓐꓰ ꓟꓽ ꓙꓵꓻ ꓟˍ ꓟꓲ ꓖꓳ ꓟ ꓐꓰ ꓕꓲ ꓡꓰ, ꓥꓳ꓿
ꓣꓳ ꓝꓴꓲ. ꓐꓰ ꓙꓳꓺ ꓠꓲ, ꓠꓬ ꓣꓳ ꓔꓯ ꓘꓶꓻ ꓡꓶ ꓡꓰ ꓝꓲˍ ꓕꓯ꓾ ꓫꓵꓽ ꓪꓴ ꓖꓳ ꓟ ꓔꓯ ꓫꓬ, ꓔꓱ, ꓖꓶ ꓐ ꓡ ꓢꓴ ꓔꓬ, ꓗꓪ ꓙꓰ ꓠ, ꓟ ꓬꓲ ꓙꓵ, ꓥ ꓡꓳ꓿ ꓣꓳ ꓠꓬ ꓬꓰ‐ꓢꓴ ꓔꓬ ꓗꓪ ꓪꓽ ꓘꓴ ꓢꓲ ꓫꓵꓽ ꓪꓴ ꓕꓱ ꓟ ꓔꓯ ꓮ ꓡꓲ ꓫꓬ, ꓔꓱ, ꓠ, ꓟ ꓔꓯ ꓢꓷ. ꓡꓰ ꓠ, ꓟ ꓓꓰꓽ ꓠ ꓔ ꓡꓳ꓿ ꓬꓰ‐ꓢꓴ ꓔꓯ ꓙꓵꓻ ꓠ ꓔ ꓡꓳ꓿
ꓣꓳ ꓛꓴꓽ ꓙꓳ ꓢꓴ ꓠꓬ ꓮ ꓟꓽ ꓥ ꓡ? ꓮ ꓡꓲ ꓫꓵꓽ ꓬꓲ ꓫꓱ, ꓥ ꓡ? ꓮ ꓡꓲ ꓙꓳꓺ ꓠꓲ, ꓠꓬ ꓣꓳꓽ ꓔꓯ ꓫ. ꓙꓵ ꓡꓰ ꓝꓲˍ ꓡ? ꓣꓳꓽ ꓠꓲ. ꓪꓴꓽ ꓠꓲ, ꓐꓰ ꓢꓯꓼ ꓪ ꓔꓯ ꓮ ꓡꓲ ꓟ ꓙꓳꓺ ꓠꓲ, ꓡꓰ ꓣꓳ ꓔꓯ ꓫ. ꓙꓵ ꓡꓰ ꓝꓲˍ ꓡ? ꓮ ꓡꓲ ꓟ ꓡꓰ ꓣꓳ ꓔꓯ ꓓꓶꓽ ꓡ ꓢꓲ ꓚꓳ ꓑ. ꓬꓰ ꓝꓲˍ ꓡ? ꓕꓱ ꓟ ꓠꓬ ꓮ ꓡꓲ ꓫꓵꓽ ꓥ ꓟꓲ꓾ ꓬꓰ‐ꓢꓴ ꓬꓲ ꓙꓵꓽ ꓪ ꓔꓯ ꓧꓪ. ꓡꓰ ꓟꓽ ꓐ ꓡ꓿ ꓫ. ꓙꓵ ꓓꓴ ꓕꓱ ꓟ ꓮ ꓙꓵꓽ ꓔꓯ ꓬꓲ ꓔꓯ ꓣꓳ ꓖꓶ ꓗꓷ ꓕꓯ꓾ ꓫ. ꓓꓴ ꓖꓳ ꓟ ꓠꓬ ꓗ, ꓛꓲꓽ ꓓꓴ ꓗꓪ ꓒꓳ, ꓙꓰˍ ꓡꓳ꓿ ꓣꓳ ꓔꓯ ꓛꓴꓽ ꓙꓳ ꓔꓬ ꓟ ꓠꓬ ꓶꓽ ꓤ ꓗꓪ ꓛꓰ, ꓙꓰˍ ꓡꓳ꓿
ꓣꓳ ꓠꓬ ꓢꓲ ꓒ ꓐꓰ ꓒ ꓕꓲ ꓗꓪ ꓦꓰꓼ ꓞ, ꓔꓬ ꓕꓯ꓾ ꓫꓵꓽ ꓪꓴ ꓮ ꓙꓵꓽ ꓠꓬ ꓕꓲ ꓘꓶꓽˍ ꓟꓲ ꓫ. ꓕꓱ ꓟꓽ ꓐꓰꓼ ꓡꓺꓳ꓾ ꓣꓳ ꓔꓯˍ ꓟꓲ ꓡꓱ. ꓙꓰ ꓝꓲ ꓟꓽ ꓐ ꓡꓺꓳ꓿ ꓣꓳ ꓠꓬ ꓢꓲ ꓒ ꓔꓯ ꓡꓰꓽ ꓠꓲ, ꓟ ꓗꓪ ꓗꓷ ꓔ ꓕꓯ꓾ ꓫ. ꓙꓵ ꓓꓴ ꓮ ꓙꓵꓽ ꓠꓬ ꓢꓯꓼ ꓐꓽ ꓡꓰ ꓖꓴˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓰ‐ꓢꓴ ꓠꓬ ꓫ. ꓙꓵ ꓓꓴ ꓮ ꓙꓵꓽ ꓔꓯ ꓢꓯꓼ ꓟꓽ ꓙꓳ ꓟ ꓤ ꓠꓱ ꓤ ꓡꓰ ꓐꓰ ꓡꓳ. ꓟꓳˍ ꓟ ꓪꓴ. ꓠꓬꓲ ꓥ ꓡꓳ꓿ ꓬꓰ‐ꓢꓴ ꓟꓲꓽ ꓙꓬ ꓗꓪ ꓫ. ꓙꓵ ꓟꓷꓼ ꓙꓵ ꓓꓴ ꓮ ꓙꓵꓽ ꓠꓬ ꓮ ꓘꓶ. ꓢꓯꓼ ꓐꓽˍ ꓟ ꓕꓲ ꓟ ꓥ ꓡꓳ꓿ ꓬꓰ‐ꓢꓴ ꓗꓪ ꓐꓰ ꓣꓳ ꓠꓬ ꓢꓯꓼ ꓙꓳ ꓪꓽ ꓠꓬꓲ ꓡ ꓢꓲ ꓠꓬꓲ꓾ ꓣꓳ ꓔꓯ ꓫ. ꓙꓵ ꓡꓰ ꓝꓲˍ ꓟ ꓙꓳꓺ ꓠꓲ, ꓐꓰ ꓣꓳ ꓔꓯ ꓝꓴꓲ. ꓠꓯꓸꓼ ꓗꓪ ꓞꓰ ꓓꓵꓽ ꓡꓰ ꓝꓲˍ ꓟ ꓥꓶˍ ꓟ ꓠꓬ ꓢꓯꓼ ꓐꓽ ꓡꓰˍ ꓡꓳ꓿ ꓖꓳ ꓡꓱ ꓥ ꓠꓬ꓾ ꓣꓳ ꓣꓱꓽ ꓞ, ꓟ ꓔꓯ ꓬꓰ‐ꓢꓴ ꓔꓯ ꓮ ꓫꓵꓽ ꓪꓴ. ꓠꓬꓲ ꓟꓽ ꓐꓯ ꓖꓶ ꓡ? ꓣꓳ ꓔꓳ, ꓜꓳꓽ ꓔꓬ ꓪˍ ꓟ ꓫꓵꓽ ꓪꓴ ꓫ. ꓙꓵ ꓓꓴ ꓔꓯ ꓬꓲ ꓔꓯ ꓡꓯꓼ ꓙꓱ ꓖꓶ ꓗꓷ ꓢꓲ꓾ ꓖꓳ ꓟ ꓔꓯ ꓣꓳ ꓧꓪ. ꓡꓰˍ ꓥꓳ ꓐꓯ ꓟ ꓔꓯ ꓣꓳ ꓙꓵꓻ ꓡꓯ꓿ ꓬꓲ ꓠꓬ ꓕꓱ ꓡꓱ ꓬꓰ ꓖꓶ ꓠ, ꓟ ꓐꓱ ꓶ꓾ ꓮ ꓟꓶ ꓟꓲ ꓔꓬ ꓡꓳ꓾ ꓮ ꓕꓯ ꓟꓲ ꓙꓳ ꓔꓬ ꓥꓳ꓿
