ꓟ‐ꓘꓳ꓿6ꓽ34‐44
ꓙꓵꓻˍ ꓟ ꓦ ꓡꓱ ꓐꓳˍ ꓟ “ꓔꓣꓴꓢꓔ” ꓐꓯˍ ꓟ ꓐꓯ ꓘꓶꓽ ꓠꓬ꓾ ꓕꓲ ꓣꓳ ꓣꓳ ꓥ ꓠꓬ ꓕꓲ ꓙꓰꓽ ꓙꓰꓽ ꓬꓲ ꓪꓽ ꓠꓬꓲˍ ꓟ꓾ ꓦ ꓡꓱ ꓐꓳ ꓓꓻˍ ꓟ ꓔꓯ ꓚꓵ ꓚꓵ ꓙꓵꓻˍ ꓡꓳ꓾ ꓐꓯ ꓟ ꓬꓲ. ꓬꓲ ꓢꓲ ꓬꓲ ꓟ. ꓟꓲꓽ ꓥ ꓡꓳ꓿ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓠꓬ ꓣꓳ ꓐꓴ ꓔꓯ ꓙꓵꓻ ꓠꓲ, ꓬꓲ ꓚꓱ, ꓔꓯ ꓐꓯ ꓟ. ꓖꓶ ꓡ ꓔꓬ ꓡꓳ꓿ ꓙꓵꓻ ꓠꓲ, ꓖꓳ ꓟ ꓠꓬ ꓫ. ꓙꓵ ꓓꓴ ꓔꓳ, ꓜꓳꓽˍ ꓟ ꓠꓯꓸꓼ ꓗꓪ ꓪꓴ‐ꓢ ꓠꓬ ꓣꓳ ꓔꓯ ꓮ ꓕꓯ ꓟꓲ ꓟꓽ ꓡꓳꓻ ꓔ ꓐꓯ ꓟ ꓔꓯ ꓙꓵꓻˍ ꓟ ꓙꓵꓻ ꓠꓲ, ꓥ ꓡꓳ꓿
ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓫꓵꓽ ꓠꓬꓲˍ ꓡꓳ꓿ ꓬꓲ ꓪꓴ. ꓕꓯ ꓬꓲ ꓪ ꓠꓬ ꓞꓳ ꓤ ꓮ ꓟꓬ, ꓔꓯ ꓖꓶ ꓜꓽ ꓟꓽ ꓐ ꓡ ꓟ ꓑꓶ. ꓓꓴ ꓬꓲ ꓪ ꓔꓯ ꓬꓲꓼ ꓙꓰ ꓝꓲ ꓠ, ꓟ ꓬꓰ‐ꓢꓴ ꓔꓯ ꓐꓯ ꓖꓶˍ ꓡꓳ꓿ ꓖꓳ ꓡꓱ ꓥˍ ꓟꓲ ꓗ ꓠꓯ. ꓕꓯ ꓠꓬ ꓢꓲ ꓒ ꓬꓲ ꓪꓽ ꓠꓬꓲˍ ꓟ ꓔꓯ ꓟꓳꓻ ꓡꓰ ꓢꓲ ꓓꓵꓽ ꓙꓽ ꓮʼ ꓡꓰˍ ꓡꓳ꓿ ꓬꓰ‐ꓢꓴ ꓠꓬ ꓥꓪ. ꓠꓬꓲꓽ ꓟꓻ ꓐꓰ ꓑ ꓑ ꓥꓪꓽ ꓑꓬ ꓔꓯ ꓶꓼ ꓥꓳꓽ ꓙꓱꓽ ꓖꓶ ꓗꓷ ꓢꓲ ꓡ ꓞꓳ 5000 ꓟꓽ ꓞꓲꓺ ꓔꓯ ꓖꓶ ꓜꓽ ꓗꓷꓳ꓿
ꓢꓲꓽ ꓫꓬ ꓕꓳꓽ ꓶ ꓕꓱ ꓟ ꓗꓪ ꓐꓰ ꓣꓳ ꓓꓵꓽ ꓙ ꓠꓬꓲ ꓓꓴ ꓠꓬ꓾ ꓒꓬꓱꓼ ꓡ ꓟꓽ ꓓꓻ ꓐꓰ ꓓꓵꓽ ꓙ ꓔ ꓟ ꓕꓲ ꓙꓵ, ꓗꓪ ꓥˍ ꓟꓲ ꓬꓲ ꓔꓯ ꓙꓵꓻ ꓠ, ꓟ ꓣꓳ ꓐꓴ ꓔꓯ ꓘꓴꓻ ꓔ ꓡꓳ꓾ ꓐꓯˍ ꓟ ꓥ ꓡꓳ꓿ ꓚꓵ ꓚꓵ ꓣꓳ ꓥ ꓕꓯ ꓠꓽ ꓟꓶꓽ ꓘꓶ ꓟꓰˍ ꓟꓲ ꓟꓰ ꓡꓺꓳ꓾ ꓚꓳ ꓡꓳ ꓗꓪ ꓜꓽ ꓓꓴˍ ꓟꓲ ꓟꓽ ꓙꓳ ꓕꓯ ꓟꓶꓽ ꓘꓶ ꓜꓻ ꓧꓪ ꓜꓻ ꓠ, ꓟ ꓬꓲꓼ ꓙꓰˍ ꓥꓳ꓿ ꓖꓳ ꓡꓱ ꓥˍ ꓟꓲ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓠꓯꓸꓼ ꓗꓪ ꓟ ꓡ ꓞꓳ ꓐꓴ ꓠꓽ ꓟꓽ ꓬꓲꓼ ꓙꓰ꓿ ꓬꓲ ꓪ ꓠꓬ ꓬꓰ‐ꓢꓴ ꓔꓯ ꓙꓵꓻˍ ꓟ ꓑꓶ. ꓓꓴ ꓦ ꓡꓱ ꓐꓳ ꓔ ꓟ ꓑꓶ. ꓓꓴ꓾ ꓬꓰ‐ꓢꓴ ꓟꓷꓽ ꓠꓷ, ꓘꓶꓽ ꓗꓪ ꓐꓰ ꓐꓯ ꓓꓳ ꓡˍ ꓟ ꓮ ꓙꓵꓽ ꓒꓬꓱꓼ ꓡˍ ꓟ ꓔꓯ ꓙꓵꓻˍ ꓟ ꓑꓶ. ꓓꓴ ꓬꓲ ꓪ ꓠꓽ ꓬꓰ‐ꓢꓴ ꓐꓰ ꓕꓲ ꓪꓽ ꓔꓬ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓪ ꓙꓵꓻ ꓔ ꓟ ꓡꓰ ꓒꓬꓱꓼ ꓡ ꓗꓷꓳ꓿ ꓣꓳ ꓐꓴ ꓥˍ ꓟꓲ ꓢꓲ ꓒ ꓬꓲ ꓐꓯ ꓘꓶꓽ ꓐꓴ ꓔꓯ ꓪ ꓜꓲ ꓠ ꓠ, ꓠ, ꓟ ꓘꓴꓻ ꓔ ꓟꓶ ꓢꓴ ꓐꓴ ꓥ ꓡꓳ꓿ ꓢꓲ ꓒ ꓔꓯ ꓙꓵꓻ ꓢꓲ ꓦ ꓡꓱ ꓐꓳˍ ꓟ ꓠꓬ ꓣꓳ ꓣꓱꓽ ꓞ, ꓟ ꓮ ꓙꓵꓽ ꓔꓯ ꓢꓲ ꓒ ꓠꓬ ꓡꓴꓽ ꓖꓶ ꓡˍ ꓟ ꓔꓯ ꓙꓵꓻˍ ꓟ ꓔꓯ ꓐꓯ ꓟ ꓟꓽ ꓥ꓿ ꓣꓳ ꓠꓲ, ꓫꓵˍ ꓕ ꓑꓳꓸꓼ ꓖꓶ ꓡˍ ꓟ ꓔꓯ ꓙꓵꓻˍ ꓟ ꓟꓽ ꓥ꓿ ꓢꓲ ꓒ ꓔꓯ ꓙꓵꓻˍ ꓟ ꓦ ꓡꓱ ꓐꓳˍ ꓟ ꓠꓬ꓾ ꓣꓳ ꓠꓬ ꓫ. ꓓꓴ ꓔꓳ, ꓜꓳꓽ ꓡˍ ꓥ ꓟꓲ ꓢꓲ ꓒ ꓐꓰ ꓕꓲ ꓪ ꓔꓬ ꓟ ꓔꓯ ꓐꓯˍ ꓟ ꓥ ꓡꓳ꓿
