(ꓬꓳ‐ꓦ꓿1ꓽ29‐34)
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓝꓴꓲ. ꓐꓰ ꓥꓶˍ ꓟ ꓠꓬ ꓣꓳ ꓐꓴ ꓔꓯ ꓗ, ꓛꓲꓽ ꓡꓰ ꓠ ꓬꓰ ꓟꓽ ꓐ ꓡ ꓟ ꓪꓴ. ꓠꓬꓲ꓾ ꓣꓳ ꓝꓴꓲ. ꓔꓯ ꓣꓴ ꓦ ꓗꓷ ꓠ, ꓟ ꓬꓰ‐ꓢꓴ ꓠꓬ ꓟꓲ ꓠꓯ ꓗꓪ ꓬꓯꓼ ꓡ ꓗꓷꓳ꓿ ꓝꓴꓲ. ꓠꓬ ꓚꓬꓴ. ꓟꓶ ꓠ, ꓟ ꓐꓱ ꓶ ꓗꓽ ꓕ. ꓓꓴ ꓕꓲ ꓟ ꓥ ꓡꓳ꓿ ꓝꓴꓲ. ꓠꓬ ꓣꓳ ꓔꓯ ꓫ. ꓙꓵ ꓡꓰ ꓝꓲˍ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓔꓯ ꓞꓲꓽ ꓫꓬ ꓡꓰ ꓝꓲ ꓠ, ꓟ ꓢꓲ ꓒ ꓠꓬ ꓟꓲ ꓠꓯ ꓗꓪ ꓬꓯꓼ ꓡ ꓗꓷꓳ꓿
ꓠꓬꓲ. ꓠꓬꓲ ꓣꓳ ꓑ ꓙꓽ ꓗꓷ ꓟ ꓬꓳ‐ꓦ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓬꓳ. ꓚꓰꓽˍ ꓟ ꓬꓲꓼ ꓠꓬꓲ. ꓘꓶꓽ (3) ꓙꓰꓽ ꓙꓳˍ ꓡꓳ꓿ ꓬꓲ ꓪꓴ. ꓠ ꓑ (1) ꓠꓬ꓾ ꓣꓳ ꓠꓬ ꓠꓲ, ꓟ ꓠꓬꓲꓽ ꓔꓱ, ꓣꓱꓽ ꓢꓲ ꓟꓽ ꓞꓳ ꓙꓳ ꓔꓬ ꓠ, ꓟ ꓬꓲꓼ ꓠꓬꓲ. ꓖꓶ ꓔ ꓡꓳ꓿ ꓠꓲ, ꓟ ꓠꓬꓲꓽ ꓔꓱ, ꓣꓱꓽˍ ꓐꓯ ꓟ ꓠꓬ꓾ ꓣꓳ ꓠꓬ ꓕꓲ ꓙꓰꓽ ꓙꓰꓽ ꓐꓯ ꓗꓷ ꓥˍ ꓟꓲ꓾ ꓝꓮꓲ ꓕꓲ ꓙꓰꓽ ꓔꓯ ꓬꓰˍ ꓟ ꓔꓯ ꓐꓯ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓐꓯˍ ꓟ ꓡꓰꓽ ꓣꓳ ꓛꓳ ꓫꓱꓽ ꓙꓰ ꓡꓯ꓿ ꓚꓲ. ꓛꓬ ꓤ ꓠꓱ ꓤ ꓔꓯ ꓙꓲꓻˍ ꓟ ꓚꓱ, ꓗꓪ ꓟ. ꓖꓶˍ ꓟ ꓡꓰ ꓮꓽ ꓐ ꓮ ꓟ ꓣꓱꓽ ꓢꓴ ꓥˍ ꓟꓲ ꓖꓳ ꓡꓱ ꓛꓳ ꓫꓱꓽ꓿ ꓟ. ꓒ ꓟ. ꓟ ꓐꓴ ꓥˍ ꓟꓲ ꓢꓴ ꓔꓯ ꓟ. ꓖꓶˍ ꓟ ꓡꓰ ꓚꓲ. ꓛꓬ ꓥˍ ꓟꓲ ꓛꓳ ꓫꓱꓽ ꓐ ꓡ ꓠ, ꓟ ꓢꓯꓼ ꓕꓵꓼ꓿ ꓞꓳ ꓡꓱ ꓐꓴ ꓔꓯ ꓟ. ꓖꓶˍ ꓟ ꓡꓰ ꓪꓴꓽ ꓢꓴ ꓟꓴ ꓢꓴ ꓐꓴ ꓥˍ ꓟꓲ ꓖꓳ ꓡꓱ ꓢꓯꓼ ꓕꓵꓼ ꓠ ꓔ ꓡꓳ꓿ ꓚꓲ. ꓛꓬ ꓤꓶꓻ ꓔꓯ ꓪ ꓜꓲ ꓙꓲꓻ ꓡꓰ ꓠ ꓞꓳ ꓙꓳ ꓠ ꓗ, ꓡꓳ꓿ ꓕꓲ ꓠꓬꓲ ꓕꓲ ꓠꓬꓲ ꓪ ꓜꓲ ꓙꓲꓻˍ ꓟ ꓞꓳ ꓤ ꓒꓬꓱꓼ ꓡ ꓠ, ꓟ ꓢꓯꓼ ꓕꓵꓼ ꓠ, ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓕꓵꓼ ꓪ ꓖꓶ ꓡ ꓔꓬ ꓟ ꓬꓲ ꓪꓴ. ꓕꓲ ꓚꓱ, ꓥ ꓡꓳ꓿
ꓝꓮꓲ 2 ꓚꓱ, ꓕꓲ ꓚꓱ, ꓟ ꓠꓬ꓾ ꓖꓳ ꓓꓱꓽ ꓔꓲ, ꓖꓶ ꓢꓴ ꓬꓳ‐ꓦ ꓡꓰ ꓐꓰ꓾ ꓡ ꓞꓳ ꓐꓴ ꓔꓯ ꓪꓴ‐ꓢ ꓔꓯ ꓖꓴ ꓟ. ꓖꓶ ꓠ, ꓟ ꓠꓬ ꓣꓳꓽ ꓶꓻ ꓥ ꓡꓳ꓿ ꓬꓰ‐ꓢꓴ ꓠꓬ ꓪꓴ‐ꓢ ꓬꓲ ꓮ ꓣꓳ ꓤ ꓥ ꓡꓳ꓾ ꓐꓯ ꓟ ꓔꓯ ꓢꓷ. ꓙ ꓟꓳ ꓠ, ꓟ ꓣꓳ ꓔꓯ ꓶꓻ ꓙꓳˍ ꓡꓳ꓿ ꓟꓲ ꓠꓯ ꓞꓳ ꓤ ꓐꓴ ꓔꓯ ꓪꓴ‐ꓢ ꓚꓱ, ꓟ. ꓖꓶ ꓠ ꓔ ꓡꓳ꓿ ꓙꓳˍ ꓟ ꓮ ꓙꓵꓽ ꓕꓯꓽ ꓢꓲ ꓪꓴ‐ꓢ ꓠꓬ ꓪꓴꓽ ꓓꓰ ꓡꓰ ꓢꓴ ꓥ ꓡꓳ꓾ ꓐꓯ ꓟ ꓔꓯ ꓣꓳ ꓢꓷ. ꓙ ꓟꓳ ꓙ ꓠ ꓔ ꓡꓳ꓿ ꓚꓲ. ꓛꓬ ꓘꓴ ꓜꓲꓼ ꓞꓳ ꓗꓪ ꓥˍ ꓟꓲ꓾ ꓚꓲ. ꓛꓬ ꓦꓲ ꓘꓴꓽ ꓗꓪ ꓥˍ ꓟꓲ꓾ ꓚꓲ ꓛꓬ ꓜꓴ꓾ ꓥ ꓠꓬ꓾ ꓚꓲ. ꓛꓬ ꓛꓲ ꓬꓰˍ ꓟ ꓟꓵꓽ ꓗꓪ ꓙꓲꓻˍ ꓟ ꓬꓰ ꓢꓲ ꓠꓬꓲ ꓪꓴ‐ꓢ ꓔꓯ ꓢꓷ. ꓙ ꓟꓳ ꓙ ꓠ ꓔ ꓡꓳ꓾ ꓐꓯ ꓟ ꓥ ꓡꓳ꓿
ꓡꓳ, ꓬꓰˍ ꓕꓲ ꓚꓱ, ꓠꓬ꓾ ꓢꓲꓽ ꓫꓬ ꓢꓴ ꓐꓯ ꓟ ꓠꓬ ꓪꓴ‐ꓢ ꓠꓲ, ꓡꓶꓽ ꓙꓳˍ ꓟ ꓔꓯ ꓮ ꓕꓯ ꓟꓲ ꓣꓱꓽ ꓬꓰ ꓢꓴ ꓥ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓥˍ ꓟꓲ ꓝꓴꓲ. ꓠꓯꓸꓼ ꓗꓪ ꓐꓰ ꓡꓲ, ꓓꓳ ꓙꓰ ꓟꓶ ꓢꓲ ꓠꓬꓲ ꓢꓲꓽ ꓫꓬ ꓢꓴ ꓒꓬꓱꓼ ꓡ ꓠ, ꓟ ꓐꓱ ꓶ꓾ ꓚꓲ. ꓛꓬ ꓝꓴꓲ. ꓐꓱ ꓶ ꓠꓲ, ꓥꓴꓻ ꓢꓲ ꓠꓲ, ꓟ ꓡꓶ. ꓢꓲ ꓠꓬꓲ ꓢꓲ ꓒ ꓠꓲ, ꓡꓶꓽ ꓙꓳˍ ꓟ ꓡꓰ ꓛꓳ ꓫꓱꓽ ꓐ ꓡ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿
