YO-V 1:19-28
ꓕꓲ ꓣꓳ ꓣꓳ ꓡꓰ ꓣꓳ ꓔꓯ “ꓠꓴ ꓮꓽ ꓟ ꓥ ꓡ” ꓐꓰ ꓠ ꓠꓬꓲ ꓡˍ ꓕꓯ ꓮ ꓡꓲ ꓒꓳ, ꓖꓶˍ ꓡ? ꓖꓳ ꓡꓱ ꓠ ꓠꓬꓲ ꓡˍ ꓕꓯ ꓠꓬ ꓣꓳ ꓟꓬꓱ꓾ ꓣꓳ ꓔꓬ, ꓖꓴ꓾ ꓣꓳ ꓟꓬꓱꓽ ꓔꓯ ꓟꓬꓽ ꓠꓬꓲ ꓒꓳ, ꓖꓶˍ ꓥꓳ꓿ ꓮꓽ ꓟ ꓤ ꓮ. ꓟꓲꓽ ꓥ ꓟ ꓔꓯˍ ꓟꓲ ꓐꓯ ꓟ. ꓖꓶˍ ꓥꓳ꓿ “ꓥꓪ ꓠꓬ ꓪꓴ‐ꓢ ꓤ ꓠꓱ ꓥꓳ” ꓐꓰ ꓐꓯ ꓢꓴ ꓠꓽ ꓮ ꓗꓶ. ꓠꓲ.ˍ ꓥꓳ꓿ ꓕꓱ ꓟ ꓠꓬ ꓔꓱ, ꓚꓵˍ ꓟ ꓥ ꓢꓲ ꓠꓬꓲ꓾ ꓣꓳ ꓘꓳ, ꓣꓴˍ ꓥ ꓟꓲ ꓟꓽ ꓘꓳ ꓣꓴ ꓥ ꓟꓲ ꓣꓳ ꓮ ꓙꓵꓽ ꓠꓬ ꓪꓴ‐ꓢ ꓬꓲ ꓤ ꓠꓱ ꓐꓴˍ ꓡꓰꓽ ꓥ ꓡꓳ꓿ ꓖꓳ ꓓꓱꓽ ꓔꓲ,ˍ ꓟ ꓗꓪ ꓐꓰ ꓡꓰꓽ ꓣꓳꓽ ꓠꓬ ꓪꓴ‐ꓢ ꓤ ꓠꓱ ꓚꓵ ꓒꓬꓱꓼ ꓡˍ ꓡꓳ꓿
ꓚꓵ ꓚꓵ ꓬꓰ‐ꓢꓴ ꓙꓲ‐ꓢꓴ ꓠꓬ ꓣꓳ ꓠꓯꓸꓼ ꓗꓪ ꓔꓬ ꓡꓳ꓾ ꓣꓳ ꓐꓰ ꓔꓬ ꓡꓳ꓿ ꓖꓳ ꓡꓱ ꓥˍ ꓟꓲ ꓮ ꓟꓬ, ꓟ ꓞꓳ ꓤ ꓐꓴ ꓠꓬ ꓕꓱ ꓟ ꓔꓯ ꓟꓽ ꓓꓵꓽ ꓙ ꓟꓶ꓿ ꓖꓳ ꓓꓱꓽ ꓔꓲ, ꓖꓶ ꓢꓴ ꓬꓳ‐ꓦ ꓠꓽ ꓕꓱ ꓟ ꓔꓯ ꓢꓷ.ˍ ꓡꓳ꓿ (ꓬꓳ‐ꓦ 1ꓽ26) ꓗꓪ “ꓠꓴ ꓪ ꓟꓽ ꓢꓷ. ꓟ ꓕꓲ ꓣꓳ ꓠꓽ ꓠꓴ ꓪ ꓗꓳ ꓡꓳ ꓗꓪ ꓦꓰꓼ ꓞ, ꓡꓳ” ꓐꓰ ꓐꓯ ꓔ ꓡꓳ꓿ ꓥ ꓡꓳ꓾ ꓐꓯ ꓘꓶꓽ ꓠꓬ ꓧꓪꓽ ꓖꓳ ꓓꓱꓽ ꓒꓬꓱꓼ ꓡ ꓢꓲ ꓣꓳ ꓐꓰ ꓕꓲ ꓪ ꓔꓬ ꓥˍ ꓟꓲ꓾ ꓣꓳ ꓠꓯꓸꓼ ꓗꓪ ꓔꓬ ꓥˍ ꓟꓲ꓾ ꓞꓳ ꓤ ꓮ ꓟꓬ, ꓠꓬ ꓕꓱ ꓟ ꓔꓯ ꓟꓽ ꓚꓬ, ꓪ ꓔꓬ꓿ ꓣꓳ ꓐꓴ ꓠꓬ ꓒ‐ꓡꓲ‐ꓢꓷ ꓐꓴ ꓡꓰ ꓐꓰ ꓢꓷ. ꓠꓲ, ꓙꓳ ꓢꓴ ꓕꓲ ꓐꓱ ꓥ ꓗꓴ.ˍ ꓥꓳ꓿ ꓖꓳ ꓡꓱ ꓥˍ ꓟꓲ ꓙꓵꓻ ꓠꓲ, ꓟꓬꓽ ꓢꓶꓽ ꓟꓽ ꓙꓳ ꓠꓬ꓾ ꓣꓳ ꓤꓶꓻ ꓠꓯꓸꓼ ꓗꓪ ꓢꓲ ꓒ ꓔꓬ ꓟ ꓔꓯ ꓣꓳ ꓚꓬ, ꓪ ꓟꓽ ꓓꓻ꓾ ꓢꓷ. ꓟꓽ ꓓꓻ꓿
ꓖꓳ ꓡꓱ ꓥ ꓟꓲ꓾ ꓣꓳ ꓮ ꓙꓵꓽ ꓠꓬ ꓢꓲ ꓒ ꓬꓲ ꓚꓱ, ꓐꓱ ꓶ ꓙꓽ ꓖꓶˍ ꓟ ꓟꓬꓱꓽ ꓔꓯ ꓝ. ꓢꓲ ꓣꓱꓽ ꓬꓰˍ ꓟ ꓤꓶꓻ ꓦꓬꓼ ꓠꓬꓲ ꓬꓲ ꓫꓵꓼ ꓗꓪ ꓟ ꓖꓳ ꓓꓱꓽ ꓔꓲ, ꓖꓶ ꓢꓴ ꓬꓳ‐ꓦ ꓒꓬꓱꓼ ꓡ ꓠ, ꓟ ꓢꓯꓼ ꓕꓵꓼ ꓡꓯ꓿ ꓢꓲ ꓒ ꓠꓬ ꓕꓲ ꓧꓪ, ꓬꓯꓼ ꓡ ꓗꓷꓳ꓾ ꓝꓮꓲ ꓕꓲ ꓧꓪ, ꓬꓯꓼ ꓡˍ ꓥꓳ꓿ ꓢꓲ ꓒ ꓬꓲ ꓠꓬꓲꓽ ꓧꓪ, ꓕꓲ ꓧꓪ, ꓡˍ ꓟ ꓗꓪ ꓢꓲ ꓒ ꓬꓲ ꓚꓱ, ꓔꓯ ꓙꓽ ꓖꓶˍ ꓟ ꓟꓬꓱꓽ ꓬꓰˍ ꓟ ꓗꓪ ꓗꓽ ꓕ. ꓓꓴ꓾ ꓤ ꓠꓬꓲ ꓓꓴ ꓙꓳ ꓡˍ ꓥꓳ꓾ ꓖꓳ ꓡꓱ ꓥ ꓟꓲ ꓣꓳ ꓔꓯ ꓮ ꓫꓵꓽ ꓥˍ ꓟꓲ ꓗꓽ ꓔ ꓟꓽ ꓐ ꓡ꓿ ꓣꓳ ꓠꓯꓸꓼ ꓗꓪ ꓙꓳ ꓔꓬ ꓟ ꓢꓲ ꓒ ꓠꓬ ꓢꓯ. ꓔꓬ ꓟ ꓥ ꓢꓲ ꓠꓬꓲ꓾ ꓬꓲ ꓠꓬ ꓣꓳ ꓢꓯꓼ ꓪꓽ꓾ ꓠꓬꓲ. ꓠꓬꓲ ꓐꓱ ꓶˍ ꓡꓰꓽ ꓟꓽ ꓞꓲꓺ ꓣꓳ ꓕꓲ ꓤꓶꓻ ꓡꓱꓸꓼ ꓐꓱ ꓶ ꓢꓯꓼ ꓪ ꓓꓽ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓢꓲ ꓒ ꓬꓲ ꓚꓬꓴ. ꓙˍ ꓟ ꓓꓳꓽ ꓔꓯ ꓡꓲ ꓛꓲ ꓗꓪ ꓢꓯꓼ ꓓꓽ ꓟ ꓡꓰ ꓘꓴ ꓔꓴ ꓓꓴ ꓡꓯ꓿
