ꓡꓴ‐ꓘ꓿2ꓽ41‐52
ꓢ. ꓠꓯ ꓢꓲ‐ꓒ‐ꓦꓬꓼ‐ꓠꓬꓲ ꓠꓬ Homily Family ꓐꓰ ꓐꓯˍ ꓟ ꓢꓲꓽ ꓫꓬ, ꓟ ꓦꓲꓻ ꓘꓴꓽ ꓑꓮꓲꓽ ꓥ ꓡꓳ꓿ ꓦꓲꓻ ꓘꓴꓽ ꓐꓯˍ ꓟ ꓠꓬ ꓮ ꓙꓵꓽ ꓟ ꓬꓲ ꓝꓳ, ꓟꓶ ꓥ ꓡꓳ꓿ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓠꓲꓽ ꓢ‐ꓓꓯ ꓠꓬ ꓞꓳ ꓤ ꓔꓯ ꓜꓶꓽ ꓠꓬꓲ꓾ ꓞꓳ ꓤ ꓠꓯꓸꓼ ꓗꓪ ꓓꓵꓽ ꓠꓬꓲ ꓖꓳ ꓡꓱ ꓫꓵꓽ ꓮ ꓘꓶ. ꓟꓽ ꓙꓳ꓿ ꓠꓲꓽ ꓢ‐ꓓꓯ ꓬꓲ ꓟꓬꓱꓽ ꓬꓰˍ ꓟ ꓠꓬ ꓦꓲꓻ ꓘꓴꓽ ꓕꓲ ꓟ ꓗꓪꓺ ꓡꓰ ꓠ, ꓟ ꓐꓰꓽ ꓡꓰ ꓠ, ꓟ ꓬꓲ ꓠꓬ ꓬꓲ ꓫꓵ. ꓫꓵ. ꓖꓶˍ ꓡꓳ꓿ ꓦꓲ ꓢꓲ ꓒ ꓦꓲ ꓢꓲ ꓟ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲ, ꓧꓳ, ꓫꓵꓽ ꓧꓳ,ˍ ꓟ ꓔꓯ ꓐꓬ ꓡꓰ ꓝꓲ ꓠ, ꓟ꓾ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲ, ꓠꓵ ꓡꓯ ꓘꓳ,ˍ ꓟ ꓠꓵꓻ ꓠꓲ, ꓕꓱ ꓟ ꓗꓪꓺ ꓡꓰ ꓠ, ꓟ ꓬꓲ ꓠꓬ ꓮ ꓕꓯ ꓥˍ ꓟꓲ ꓢꓯꓼ ꓕꓵꓼ ꓔꓬ ꓡꓳ꓿ ꓟꓽ ꓬꓲꓼ ꓔ ꓔ ꓢꓯꓼ ꓕꓵꓼ ꓔꓬ ꓡꓳ꓿
ꓮꓽ ꓐ ꓐꓰ ꓮ ꓟ ꓗꓪꓺ ꓡꓰ ꓠ, ꓟ꓾ ꓤ ꓠꓱ ꓛꓳꓽ ꓤ ꓠꓱ ꓗꓪꓺ ꓡꓰ ꓠ, ꓟ꓾ ꓮ ꓬꓲꓼ ꓠꓬꓲ ꓤ ꓮ ꓝꓲ ꓠꓬꓲ ꓟ ꓕꓲ ꓣꓳ ꓐꓰ ꓕꓲ ꓣꓳ ꓐꓰꓽ ꓡꓰ ꓠ, ꓟ ꓬꓲ ꓡꓰ ꓢꓯꓼ ꓕꓵꓼ ꓔꓬ ꓡꓳ꓿ ꓬꓲ ꓢꓯꓼ ꓕꓵꓼ ꓔꓬ ꓟˍ ꓡꓰ ꓐꓰ ꓮ ꓟꓶ ꓞꓲꓼ ꓦꓬꓼ ꓠꓬꓲ ꓗꓪ ꓦꓲꓻ ꓘꓴꓽ ꓕꓲ ꓟ ꓐꓬ ꓡꓰˍ ꓟ ꓠꓬ ꓢꓻ ꓢꓻ ꓡꓰꓽ ꓐꓬ ꓡꓰ ꓔꓬ ꓡꓳ꓿ ꓪꓴ‐ꓢ ꓟꓲꓽ ꓙꓬ꓾ ꓞꓳ ꓤ ꓟꓲꓽ ꓙꓬ ꓗꓪ ꓡꓯꓽ ꓒꓯ, ꓝ. ꓔ ꓥˍ ꓟꓲ꓾ ꓘꓶꓽ ꓫꓵꓽ ꓬꓰ ꓔ ꓥˍ ꓟꓲ꓾ ꓘꓶꓽ ꓫꓵꓽ ꓖꓳ ꓟ ꓔꓯ ꓒꓵꓽ ꓗ ꓟꓽ ꓬꓰ꓿ ꓫꓵꓻˍ ꓗꓪ ꓛꓲ ꓟꓽ ꓫ ꓫ ꓐꓰ ꓕꓲ ꓫꓵꓽ ꓫꓵꓽ ꓔꓯ ꓟꓽ ꓠꓲ, ꓒꓴ ꓕꓯ ꓮ ꓤ ꓤ ꓐꓰ ꓐꓬ ꓡꓰˍ ꓟ ꓦꓲꓻ ꓘꓴꓽ꓾ ꓕꓲ ꓣꓳ ꓔꓯ ꓡꓳ ꓔꓲ. ꓬꓰ ꓢꓲ ꓠꓬꓲ ꓝꓮꓲ ꓕꓲ ꓣꓳ ꓗ ꓠꓯ. ꓢꓲ ꓖꓼ ꓛꓳ ꓙꓰˍ ꓟ ꓬꓲ ꓡꓲꓽ ꓕꓲ ꓟ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓮ ꓘꓶ. ꓟꓳꓻ ꓪˍ ꓡꓳ꓿
ꓣꓳ ꓗꓳ ꓡꓳ ꓗꓪˍ ꓟꓲ ꓦꓲꓻ ꓘꓴꓽ ꓗꓪꓺ ꓡꓰ ꓟ ꓮ ꓘꓶ. ꓙꓳˍ ꓡꓳ꓿ ꓮ ꓫꓵꓽ ꓪꓴ. ꓠꓬꓲ ꓥ ꓡ꓿ ꓠꓲꓽ ꓢ‐ꓓꓯ ꓠꓬ ꓦꓲꓻ ꓘꓴꓽ ꓕꓱ ꓟ ꓐꓬ ꓡꓰ ꓠ, ꓟ ꓐꓱ ꓶ ꓬꓲ ꓠꓬ ꓢꓯꓼ ꓕꓵꓼ ꓔꓬ ꓡꓳ꓿ ꓕꓱ ꓡꓱ ꓢꓯꓼ ꓕꓵꓼ ꓔꓬ ꓟ ꓘꓴꓽ ꓗꓪ ꓘꓴ ꓜꓲꓼ ꓞꓳ ꓠꓬ ꓢ. ꓠꓯ Homily Family ꓐꓰ ꓐꓯˍ ꓟ ꓬꓳ‐ꓢꓷ ꓟ‐ꓡꓲ‐ꓬ ꓬꓰ‐ꓢꓴ꓾ ꓬꓲ ꓪ ꓕꓲꓽ ꓦꓲꓻ ꓢꓴ ꓔꓯ ꓔꓯꓺ ꓢꓳꓻ ꓢꓲ ꓠꓬꓲ꓾ ꓢꓲ ꓒ ꓬꓰ‐ꓢꓴ ꓗ ꓠꓯ. ꓖꓼ ꓢꓴ ꓘ‐ꓣꓲ‐ꓢ‐ꓔꓴ ꓢꓲ ꓤ ꓮ ꓙꓵꓽ ꓠꓬ ꓢꓲꓽ ꓫꓬ, ꓟ ꓦꓲꓻ ꓘꓴꓽ ꓒꓬꓱꓼ ꓡ ꓠ, ꓟ ꓐꓱ ꓶ ꓣꓳꓽ ꓘꓴ ꓜꓲꓼ ꓞꓳ ꓗꓪ ꓐꓰ ꓣꓳꓽ ꓔꓯ ꓬꓲꓼ ꓠꓬꓲ. ꓖꓶ ꓡ ꓔꓬ ꓡꓳ꓿
ꓙꓲꓻ ꓫꓬ, ꓟ ꓦꓲꓻ ꓘꓴꓽ ꓥ ꓟ ꓬꓳ‐ꓢꓷ ꓟ‐ꓡꓲ‐ꓬ ꓬꓰ‐ꓢꓴ꓾ ꓬꓲ ꓪ ꓢ ꓑ. ꓡꓽ ꓕꓲ ꓦꓲꓻ ꓟ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓬꓲ ꓦꓲꓻ ꓠꓯꓸꓼ ꓗꓪ ꓗꓷ ꓔ ꓟ꓾ ꓬꓲ ꓦꓲꓻ ꓠꓯꓸꓼ ꓗꓪ ꓔꓬ ꓝꓲˍ ꓟ ꓑꓶ. ꓓꓴ꓾ ꓮ ꓡꓲ ꓫꓵꓽ ꓠꓲ, ꓫ. ꓟꓬ ꓫ. ꓓꓴ ꓔꓳ, ꓜꓳꓽ ꓡ ꓥ ꓟꓲ ꓬꓲ ꓪ ꓠꓬ ꓙ ꓙꓰ ꓐ ꓡˍ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓪ ꓐꓰ ꓕꓲ ꓪꓽ ꓔꓬ ꓡꓳ꓿ ꓖꓳ ꓡꓱ ꓠꓬꓲ ꓢ. ꓠꓯ ꓢꓲꓽ ꓫꓬ ꓕꓳꓽ ꓶ ꓗꓪ ꓣꓳ ꓑ ꓙꓽ ꓪˍ ꓟ ꓥˍ ꓟꓲ꓾ 12 ꓘꓳꓼ ꓙꓳˍ ꓟ ꓬꓰ‐ꓢꓴ ꓠꓬ ꓙꓱ‐ꓣꓴ‐ꓢ‐ꓡꓱ ꓪꓽ ꓘꓴ ꓦꓲꓻ ꓗꓪ ꓒꓲꓼ ꓬꓰˍ ꓟ ꓟ. ꓟꓲꓽ ꓣꓳ ꓑ ꓙꓽˍ ꓡꓳ꓿ ꓮꓽ ꓐ ꓮ ꓟ ꓣꓱꓽ ꓢꓴ ꓠꓬ ꓟꓽ ꓟꓳꓻ ꓟꓳꓻ ꓠ ꓛꓲ ꓧꓪ ꓢꓲ ꓠꓬꓲ ꓬꓲ ꓔꓯ ꓧꓳꓽ ꓬꓰˍ ꓟ ꓟ. ꓟꓲꓽ ꓣꓳꓽ ꓑ ꓙꓽˍ ꓡꓳ꓿
ꓕꓱ ꓡꓱ ꓐꓰ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳˍ ꓟ ꓦꓬꓼ ꓠꓬꓲ ꓗꓪ ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓘꓳ ꓣꓴ ꓔ ꓥˍ ꓟꓲ꓾ ꓕꓲ ꓖ ꓕꓲ ꓧꓪ, ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓒꓲꓼ ꓬꓰˍ ꓟ ꓦꓬꓼ ꓠꓬꓲ꓾ ꓣꓳ ꓦꓲꓻ ꓠꓯꓸꓼ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓒꓲꓼ ꓬꓰˍ ꓟ ꓦꓬꓼ ꓠꓬꓲ ꓣꓳ ꓔꓳ, ꓜꓳꓽ ꓗꓴ.ˍ ꓡꓳ꓿ ꓖꓳ ꓡꓱ ꓔꓳ, ꓜꓳꓽˍ ꓕꓯ ꓠꓲ, ꓞꓽ ꓢꓲ ꓒ ꓬꓰ‐ꓢꓴ ꓔꓯ ꓧꓪ ꓢꓲ ꓠꓬꓲ ꓚꓲ. ꓛꓬꓽ ꓦꓲꓻ ꓗꓪ ꓧꓳꓽ ꓔꓯ, ꓡ ꓠ, ꓟ ꓬꓳ. ꓚꓰꓽˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓔꓬ ꓟ ꓦꓲꓻ ꓘꓴꓽ ꓠꓬ ꓢꓲꓽ ꓫꓬ, ꓡꓳ꓿ ꓢꓲ ꓒ ꓬꓰ‐ꓢꓴ ꓔꓬ ꓟ ꓦꓲꓻ ꓘꓴꓽ ꓠꓬ ꓢꓲ ꓡꓲ ꓟ ꓙꓳˍ ꓡꓳ꓿ ꓢꓲ ꓒ ꓬꓰ‐ꓢꓴ ꓔꓬ ꓟ ꓦꓲꓻ ꓘꓴꓽ ꓠꓬ ꓗ, ꓛꓲꓽˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓢꓲ ꓡꓲ ꓟ ꓖꓶꓽ ꓐ ꓡˍ ꓟ꓾ ꓣꓱꓽ ꓛꓰꓽ ꓖꓶ ꓐ ꓡˍ ꓟ ꓠꓬ ꓢꓲ ꓒ ꓬꓰ‐ꓢꓴ ꓥ ꓡꓳ꓿ ꓠꓬꓲ. ꓠꓬꓲ ꓮ ꓟꓶ ꓞꓲꓼ ꓦꓬꓼ ꓠꓬꓲ ꓗꓪ ꓢ‐ꓓꓯ ꓡꓰ ꓦꓲꓻ ꓘꓴꓽ ꓔꓯ ꓟ. ꓒꓬˍ ꓟ ꓦꓬꓼ ꓠꓬꓲ ꓓꓳ ꓡ ꓠꓬꓲ ꓣꓳ ꓠꓬ ꓟꓬꓽ ꓠꓬꓲ ꓐꓷ, ꓠꓬꓲ ꓢꓲꓽ ꓫꓬ ꓟ‐ꓡꓲ‐ꓬ ꓐꓰ ꓬꓳ‐ꓢꓷ ꓔꓯ ꓔꓯꓺ ꓢꓳ ꓠ, ꓟ ꓬꓳ. ꓚꓰꓽˍ ꓡꓳ꓿ ꓬꓲ ꓪ ꓤꓶꓻ ꓔꓯ ꓣꓳꓽ ꓡꓳ. ꓠꓬꓲˍ ꓕꓯ ꓮ ꓡꓲ ꓗꓪ ꓥˍ ꓟꓲ ꓮ ꓫꓵꓽ ꓬꓰˍ ꓥ ꓟꓲ ꓐ, ꓐ ꓠꓲ, ꓡꓶꓽ ꓡꓰꓽ ꓗꓷ ꓔ ꓢꓲ ꓠꓬꓲ ꓛꓳ ꓫꓱꓽˍ ꓡꓳ꓿ ꓠꓲ, ꓫ. ꓟꓬ ꓫ. ꓓꓴ ꓔꓳ, ꓜꓳꓽ ꓡˍ ꓥ ꓟꓲ ꓢꓲ ꓒ ꓬꓰ‐ꓢꓴ ꓔꓯ ꓡꓰꓽ ꓡꓳ. ꓢꓲ ꓠꓬꓲ ꓛꓳ ꓫꓱꓽˍ ꓡꓳ꓿ ꓬꓲ ꓪ ꓟꓽ ꓢꓷ. ꓔ ꓟꓽ ꓟꓳꓻ ꓔ ꓟ ꓠꓲ, ꓫ. ꓓꓴ ꓔꓳ, ꓜꓳꓽ ꓡ ꓥ ꓟꓲ ꓢꓲ ꓒ ꓬꓰ‐ꓢꓴ ꓒꓬꓱꓽ ꓟꓬ ꓔꓯ ꓡꓳ. ꓢꓲ ꓠꓬꓲ ꓢꓯꓼ ꓕꓵꓼ ꓔꓬ ꓡꓳ꓿
ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓕꓲ ꓣꓳ ꓛꓳꓽ ꓕꓲ ꓣꓳ ꓜꓲꓽ ꓡꓯ ꓘꓳ,ˍ ꓟ꓾ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲ, ꓟ ꓫꓵ ꓡꓯ ꓘꓳˍ ꓟ ꓮ ꓘꓶ. ꓟꓽ ꓙꓳꓻꓳ꓿ ꓕꓲ ꓘꓶꓽ ꓐꓯ ꓗꓷ ꓠꓬ ꓠꓬꓲꓽ ꓘꓶꓽ꓾ ꓠꓬꓲꓽ ꓘꓶꓽ ꓐꓯ ꓗꓷ ꓠꓬ ꓢ ꓘꓶꓽ ꓦꓯꓽ ꓡꓰ ꓟꓰ, ꓢꓲ ꓠꓬꓲ꓾ ꓕꓲ ꓣꓳ ꓐꓰ ꓕꓲ ꓣꓳ ꓓꓶꓽ ꓡꓯ ꓘꓳ,ˍ ꓟ ꓔꓲ. ꓡꓯ ꓘꓳ,ˍ ꓟ ꓪ ꓜꓲ ꓟꓬꓽ ꓡ ꓔꓬ ꓡꓳ꓿
ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓣꓳ ꓬꓲ ꓪꓴ. ꓕꓲ ꓫꓵꓽ ꓢꓷ. ꓠ, ꓟ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓦꓲꓻ ꓠꓯꓸꓼ ꓗꓪ ꓣꓳ ꓠꓲ, ꓟ ꓠꓯꓸꓼ ꓗꓪ ꓗꓶ ꓔ ꓢꓲ ꓠꓬꓲ꓾ ꓬꓲ ꓒꓬꓱꓽ ꓟꓬ ꓡꓳ. ꓢꓲ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲ, ꓟ ꓫꓵ ꓡꓯ ꓘꓳ ꓠ, ꓟ ꓬꓲ ꓪꓴ. ꓕꓲ ꓫꓵꓽ ꓬꓳ. ꓚꓰꓽˍ ꓟ ꓥ ꓡꓳ꓿ ꓢꓲꓽ ꓫꓬ ꓠ, ꓟ ꓐꓱ ꓶ ꓠꓵꓻ ꓠꓲ, ꓙꓳ ꓪˍ ꓡꓳ꓿ ꓙꓲꓻ ꓫꓬ ꓠ, ꓟ ꓐꓱ ꓶ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓠꓯꓸꓼ ꓗꓪ ꓔꓬ ꓪˍ ꓡꓳ꓿ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲꓽ ꓫꓬ ꓟ ꓦꓲꓻ ꓘꓴꓽ ꓑꓮꓲꓽ ꓗꓪ ꓟꓲ ꓠꓯ ꓕꓱ ꓟ ꓗꓪ ꓦꓲꓻ ꓘꓴꓽ ꓥ ꓕ ꓑꓳꓸꓼ ꓟ ꓬꓲ ꓔꓯ ꓢꓳ ꓓꓴ ꓥ ꓟ꓾ ꓬꓳ‐ꓢꓷ ꓟ‐ꓡꓲ‐ꓬ ꓬꓰ‐ꓢꓴ ꓬꓲ ꓪ ꓦꓲꓻ ꓘꓴꓽ ꓔꓯ ꓣꓳ ꓔꓯꓺ ꓢꓳ ꓡꓯ꓿ ꓢꓲ ꓡꓲ ꓡꓲˍ ꓐꓰ ꓕꓲ ꓠꓬꓲ ꓐꓱ ꓶ ꓕꓲ ꓠꓬꓲ ꓬꓰ ꓠ ꓔ ꓟ ꓪꓴ‐ꓢ ꓟꓲꓽ ꓙꓬ ꓞꓳ ꓤ ꓟꓲꓽ ꓙꓬ ꓗꓪ ꓔꓱ, ꓔꓱ, ꓚꓵ ꓚꓵˍ ꓡꓰꓽ ꓗꓳ. ꓙꓰ ꓟ ꓬꓰ‐ꓢꓴ ꓟ‐ꓡꓲ‐ꓬ ꓬꓳ‐ꓢꓷ ꓦꓲꓻ ꓘꓴꓽ ꓔꓯ ꓣꓳ ꓔꓯꓺ ꓢꓳ ꓡꓯ꓿ ꓣꓳ ꓥˍ ꓟꓲ ꓕꓲ ꓠꓬꓲ ꓐꓱ ꓶ ꓕꓲ ꓠꓬꓲ ꓬꓰ ꓠ ꓔ ꓟ ꓟꓬꓱꓽ ꓔꓯ ꓠꓲ, ꓟ ꓫꓵ ꓫꓵ ꓡꓰꓽ ꓠꓵꓻ ꓠꓲ, ꓙꓳ ꓙꓳ ꓡꓰꓽ ꓬꓰ ꓗꓳ. ꓙꓰ ꓢꓲ ꓠꓬꓲ꓾ ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓠꓲ, ꓟ ꓠꓯꓸꓼ ꓗꓪ ꓗꓶ ꓔ ꓠꓬꓲ꓾ ꓦꓲꓻ ꓘꓴꓽ ꓐꓬ ꓡꓰˍ ꓟ ꓗꓪ ꓡꓰˍ ꓟ ꓟꓽ ꓙꓳ ꓙꓳ ꓐꓰ꓾ ꓠꓲ, ꓫ. ꓟꓬ ꓫ. ꓓꓴ ꓤ, ꓠꓬꓲ ꓫꓵꓽ ꓠꓬꓲ ꓓꓴ ꓔꓳ, ꓜꓳꓽ ꓡˍ ꓥ ꓟꓲ ꓢꓲ ꓒ ꓬꓰ‐ꓢꓴ ꓔꓯ ꓣꓳꓽ ꓡꓳ. ꓢꓲ ꓠꓬꓲ꓾ ꓢꓲ ꓒ ꓬꓰ‐ꓢꓴ ꓗꓪ ꓐꓰ ꓢꓯꓼ ꓪ ꓣꓴ ꓢꓲ ꓠꓬꓲ ꓣꓳꓽ ꓞꓳ ꓙꓳ ꓐ ꓡˍ ꓥꓳ꓾ ꓗꓳ. ꓐ ꓡˍ ꓥꓳ꓾ ꓐꓰ ꓢꓲꓽ ꓫꓬ ꓟ ꓦꓲꓻ ꓘꓴꓽ ꓑꓮꓲꓽ ꓗꓪ ꓐꓰ ꓣꓳ ꓔꓯ ꓐꓯ ꓟꓳ. ꓖꓶ ꓡ ꓔꓬ ꓡꓳ꓿
