ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓸ ꓠꓯ ꓠꓬ 4 ꓠꓽ ꓕꓲ ꓠꓽ ꓟ ꓮꓓꓦꓰꓠꓔꓴ ꓦꓬꓼ ꓠꓬꓲ ꓢꓲ-ꓒ-ꓦꓬꓼ-ꓠꓬꓲ ꓥ ꓡꓳ= 2024 ꓘꓳꓼ ꓮꓓꓦꓰꓠꓔꓴ ꓦꓬꓼ ꓠꓬꓲ ꓡꓳꓹ ꓬꓰˍ ꓕꓲ ꓠꓽ ꓟ ꓥ ꓡꓳ= ꓢꓸ ꓠꓯ ꓗ ꓠꓯꓸ ꓟꓽ ꓟꓶ ꓫꓵ ꓕꓯ ꓠꓬ ꓘ-ꓣꓲ-ꓢ-ꓟꓮꓢ ꓑꓮꓲꓽ ꓔꓯ ꓣꓳ ꓬꓰˍ ꓥꓳ= ꓢꓲ ꓒ ꓬꓰ-ꓢꓴ ꓦꓵꓻ ꓡ ꓟ ꓔꓯ ꓙꓽ ꓖꓶˍ ꓟ ꓕꓱ ꓕꓲ ꓠꓽ ꓗꓪ ꓠꓬ 4 ꓠꓽ ꓘꓴꓽ ꓗꓪ ꓛꓲꓺ ꓡꓺꓳ= ꓢꓲꓽ ꓫꓬ ꓕꓳꓽ ꓶ ꓗꓪ ꓣꓳ ꓑ ꓙꓽ ꓪˍ ꓟ ꓠꓬ ꓡꓴ-ꓘ=1ꓽ39-45 ꓥ ꓡꓳ= ꓢꓲꓽ ꓫꓬ ꓟ-ꓡꓲ-ꓬ ꓠꓬ ꓬꓲ-ꓡꓲ-ꓫ-ꓑꓷ ꓦꓲ ꓗꓪ ꓛꓪꓸ ꓙꓰˍ ꓟ ꓔꓯ ꓣꓳ ꓠ ꓠꓹ ꓪˍ ꓡꓳ= ꓢꓲꓽ ꓫꓬ ꓟ-ꓡꓲ-ꓬ ꓐꓰ ꓬꓲ-ꓡꓲ-ꓫ-ꓑꓷ ꓐꓴ ꓟꓳꓻ ꓡꓯ ꓘꓳꓹ ꓕꓯ ꓬꓲ ꓪ ꓫꓸ ꓕꓱˍ ꓟ ꓠꓬ ꓢꓲꓽ-ꓫꓬ-ꓟ-ꓦ ꓡꓰ ꓐꓲ ꓞꓹ ꓢꓲ ꓫꓸ ꓕꓱ ꓡꓯ ꓘꓳꓹˍ ꓡꓳ= ꓬꓲ-ꓡꓲ-ꓫ-ꓑꓷ ꓥˍ ꓟꓲ ꓗꓹ ꓛꓲꓽ ꓢꓲ ꓠꓬꓲ ꓢꓲꓽ ꓫꓬ ꓟ-ꓡꓲ-ꓬ ꓔꓯ “ꓤ ꓟꓶ ꓤ ꓮ ꓙꓵꓽ ꓟ ꓗꓪ ꓶꓼ ꓤ ꓫꓱꓹ ꓤ ꓐꓲ ꓢꓴ ꓠꓴ ꓥ ꓡꓳ” ꓐꓰ ꓢꓲꓽ-ꓫꓬ-ꓟ-ꓦ ꓐꓲ ꓢꓲ ꓫꓸ ꓕꓱˍ ꓟ ꓟꓸ ꓟꓲꓽ ꓥ ꓡꓳ=
ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓢꓯꓼ ꓪ ꓖꓶ ꓔꓬ ꓟ ꓬꓲ ꓪꓴꓸ ꓕꓲ ꓫꓵꓽ ꓟ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓣꓳ ꓘꓳ ꓣꓴ ꓟꓶˍ ꓕꓯ꓾ ꓣꓳ ꓠꓬ ꓮ ꓡꓲ ꓥˍ ꓟꓲ ꓢꓴ ꓔꓯ ꓖꓶ ꓠꓲꓹ ꓫꓵˍ ꓡꓳ꓾ ꓐꓯˍ ꓟ ꓥ ꓡꓳ= ꓜꓽ ꓫꓵꓽ ꓜꓽ ꓙꓰꓽ꓾ ꓜꓽ ꓟꓲ ꓓꓳꓻ ꓟꓲ ꓕꓱ ꓡꓱ ꓫꓵꓽ ꓣꓳ ꓜꓽ ꓓꓳꓻˍ ꓕꓯ ꓣꓳ ꓠꓲꓹ ꓠꓵˍ ꓟ ꓔꓯ ꓓꓵꓽ ꓙꓽ ꓟꓶˍ ꓡꓳ꓾ ꓐꓰ ꓐꓯ ꓧꓪꓸ ꓘꓶꓽ ꓙꓳˍ ꓡꓳ= ꓕꓱ ꓟˍ ꓡꓰ ꓐꓰ ꓢꓲ ꓒ ꓬꓰ-ꓢꓴ ꓔꓯ ꓘꓳ ꓣꓴ ꓟꓶ ꓢꓴ꓾ ꓢꓲ ꓒ ꓬꓰ-ꓢꓴ ꓠꓬ ꓮ ꓫꓵꓽ ꓟꓲ ꓬꓰ ꓐ ꓡ ꓢꓴ꓾ ꓢꓲ ꓒ ꓬꓰ-ꓢꓴ ꓠꓬ ꓚꓲꓸ ꓛꓬ ꓒ ꓕꓲꓺ ꓗꓪ ꓔꓬ ꓡꓳ ꓐꓯ ꓟ ꓙꓵꓻ ꓠꓲꓹ ꓕꓱ ꓟ ꓔꓯ ꓟꓶ ꓡꓰ ꓢꓴ ꓠꓬ ꓮ ꓡꓲ ꓥˍ ꓟꓲ ꓢꓴ ꓔꓯ ꓖꓶ ꓠꓲꓹ ꓫꓵˍ ꓡꓳ=
ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲꓽ ꓫꓬ ꓟ-ꓡꓲ-ꓬ ꓠꓬ ꓬꓲ ꓠꓯꓸꓼ ꓗꓪ ꓓꓵˍ ꓟ ꓢꓲ ꓒ ꓬꓰ-ꓢꓴ ꓗꓹ ꓛꓲꓽ ꓓꓴ꓾ ꓢꓲ ꓡꓲ ꓟ ꓢꓲ ꓒ ꓬꓰ-ꓢꓴ ꓔꓯ꓾ ꓞꓼ ꓞꓼ ꓙꓰ ꓢꓲ ꓠꓬꓲ ꓬꓲ-ꓡꓲ-ꓫ-ꓑꓷ ꓔꓯ ꓙꓰ ꓢꓲ ꓓꓳꓽ ꓕꓱ ꓟ ꓖꓶ ꓬꓰˍ ꓡꓳ= ꓖꓳ ꓕꓯ ꓬꓲ-ꓡꓲ-ꓫ-ꓑꓷ ꓥˍ ꓟꓲ ꓗꓹ ꓛꓲꓽ ꓢꓲ ꓠꓬꓲ ꓪꓴ-ꓢ ꓔꓯ ꓫꓱꓸ ꓖꓶˍ ꓡꓳ= ꓢꓲ ꓒ ꓬꓰ-ꓢꓴ ꓔꓯ ꓘꓳ ꓣꓴ ꓟꓶ ꓢꓴ ꓠꓬ ꓮ ꓕꓯ ꓟꓲ ꓗꓹ ꓛꓲꓽˍ ꓡꓳ꓾ ꓐꓰ ꓐꓯ ꓟ ꓣꓳ ꓡꓳꓸ ꓟꓳꓻˍ ꓡꓳ=
ꓬꓲ ꓤꓶꓻ ꓗꓪ ꓫꓸ ꓙꓵ ꓟꓷꓼ ꓙꓵ ꓓꓴ ꓔꓳꓹ ꓜꓳꓽ ꓡˍ ꓟˍ ꓟꓲ ꓙꓳˍ ꓥꓳ= ꓬꓲ ꓤꓶꓻ ꓗꓪ ꓠꓲꓹ ꓫꓸ ꓟꓬ ꓫꓸ ꓓꓴ꓾ ꓟꓬ ꓐꓲ ꓞꓰꓻ ꓓꓴ ꓔꓳꓹ ꓜꓳꓽ ꓡˍ ꓟˍ ꓟꓲ ꓙꓳˍ ꓥꓳ= ꓖꓳ ꓡꓱ ꓐꓯ ꓥ ꓟꓲ ꓬꓲ ꓠꓲꓹ ꓟ ꓮ ꓠꓯꓸ ꓠꓯꓸ ꓗꓪ ꓢꓲ ꓒ ꓬꓰ-ꓢꓴ ꓔꓯ ꓘꓳꓹ ꓣꓴ ꓔ ꓟ ꓑꓶꓸ ꓓꓴ ꓬꓲ ꓤꓶꓻ ꓠꓬ ꓗꓹ ꓛꓲꓽˍ ꓡꓳ= ꓕꓱ ꓟ ꓡꓰꓽ ꓟꓽ ꓞꓲ ꓬꓲ ꓠꓬ꓾ ꓢꓲ ꓒ ꓬꓰ-ꓢꓴ ꓔꓯ ꓮꓽ ꓟ ꓔꓯˍ ꓟꓲ ꓬꓲ ꓠꓬ ꓖꓶ ꓬꓰˍ ꓥꓳ= ꓒ ꓕꓲ ꓗꓪ ꓔꓬ ꓢꓴ ꓔꓯ ꓥˍ ꓟꓲ꓾ ꓬꓲ ꓐꓰ ꓗꓴꓸ ꓙꓲꓽ ꓙꓳ ꓢꓴ ꓬꓲ ꓐꓰ ꓕꓲ ꓡꓰꓹ ꓔꓬ ꓢꓴ ꓔꓯ ꓥˍ ꓟꓲ꓾ ꓬꓰ-ꓢꓴ ꓐꓯ ꓟ ꓠꓬ ꓮ ꓡꓲ ꓘꓶ ꓛꓲ ꓙꓲꓻˍ ꓟ꓾ ꓬꓰ-ꓢꓴ ꓐꓯˍ ꓟ ꓠꓬ ꓚꓵ ꓚꓵ ꓔꓬ ꓟ ꓬꓲ ꓠꓬ ꓮ ꓡꓲ ꓥˍ ꓟꓲ ꓐꓯ ꓟꓳꓸ ꓖꓶˍ ꓡꓳ= ꓕꓱ ꓟ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓔꓬ ꓡˍ ꓕꓯ꓾ ꓠꓲꓹ ꓟ ꓠꓯꓸꓼ ꓗꓪ ꓬꓲ ꓔꓬꓹ ꓖꓴ ꓖꓶˍ ꓕꓯ꓾ ꓣꓳ ꓠꓬ ꓕꓱ ꓡꓱ ꓬꓲ ꓚꓱꓹ ꓔꓯ ꓠꓱꓸ ꓐꓯ ꓢꓴ ꓔꓯ ꓐꓯ ꓟꓳꓸ ꓖꓶˍ ꓥꓳ=
ꓢꓲ ꓒ ꓬꓰ-ꓢꓴ ꓣꓳ ꓠꓯꓸꓼ ꓗꓪ ꓟꓽ ꓔꓬ ꓠꓬ ꓮ ꓡꓲ ꓥˍ ꓟꓲ ꓠꓱꓸ ꓐꓯ ꓢꓴ ꓔꓯ ꓐꓯ ꓟꓳꓸ ꓖꓶ ꓟꓽ ꓠ= ꓣꓳ ꓔꓯ ꓟꓽ ꓙꓳ ꓟ ꓕꓲ ꓫꓵꓽ ꓠꓱꓸ ꓐꓯ ꓢꓴ ꓔꓯ ꓖꓶ ꓟꓽ ꓠ= ꓠꓬꓲꓸ ꓠꓬꓲ ꓢꓲꓽ ꓫꓬ ꓟ-ꓡꓲ-ꓬ ꓠꓬ ꓬꓲ-ꓡꓲ-ꓫ-ꓑꓷ ꓔꓯ ꓬꓰ-ꓢꓴ ꓖꓳ ꓟ ꓔꓯ ꓖꓶ ꓙꓰˍ ꓟ꓾ ꓬꓲ ꓓꓳꓽ ꓖꓳ ꓟ ꓔꓯ ꓖꓶ ꓙꓰˍ ꓟ ꓣꓳ ꓔꓯ ꓬꓲ ꓔꓷꓼ ꓢꓷꓸ ꓡꓰ ꓝꓲ ꓠꓲꓹ ꓫꓵˍ ꓡꓳ= ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓐꓰ ꓥꓪ ꓢꓲ ꓒ ꓬꓰ-ꓢꓴ ꓔꓯ ꓘꓳ ꓣꓴ ꓟꓶ ꓡꓰ ꓢꓴ ꓠꓬ ꓠꓱꓸ ꓐꓯ ꓢꓴ ꓔꓯ ꓥˍ ꓟꓲ ꓢꓲ ꓒ ꓬꓰ-ꓢꓴ ꓖꓳ ꓟ ꓔꓯ ꓖꓶ ꓐ ꓡ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ=
ꓝꓮꓲ ꓠꓬꓲꓽ ꓙꓰꓽ ꓕꓲ ꓙꓰꓽ ꓟ ꓠꓬ ꓢꓲꓽ ꓫꓬ ꓟ-ꓡꓲ-ꓬ ꓬꓲ ꓙ ꓣꓳꓽ ꓠꓲꓹ ꓔꓯ ꓣꓳ ꓡꓳꓸ ꓟꓳꓻˍ ꓡꓳ= ꓬꓲ ꓠꓬ ꓙ ꓣꓳꓽˍ ꓟ ꓡꓰ ꓪꓴ-ꓢ ꓔꓯ ꓙꓵꓻˍ ꓡꓳ= ꓪꓴ-ꓢ ꓐꓯ ꓘꓶꓽ ꓠꓬ ꓚꓵ ꓚꓵ ꓒꓬꓱꓼ ꓡˍ ꓥꓳ ꓐꓯ ꓟ ꓔꓯ ꓙꓵꓻˍ ꓟ ꓑꓶꓸ ꓓꓴ ꓬꓲ-ꓡꓲ-ꓫ-ꓑꓷ ꓡꓰ ꓬꓲ ꓔꓯ ꓕꓱ ꓡꓱ ꓫꓱꓸ ꓖꓶˍ ꓡꓳ= “ꓪꓴ-ꓢ ꓐꓯ ꓘꓶꓽ ꓚꓵ ꓚꓵ ꓒꓬꓱꓼ ꓡˍ ꓥꓳ ꓐꓰ ꓙꓵꓻ ꓢꓴ ꓠꓬ ꓶꓼ ꓙꓳ ꓫꓱꓹ ꓙꓳˍ ꓡꓳ” ꓐꓰ ꓐꓯ ꓔ ꓡꓳ=
ꓬꓲ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓠꓴ ꓥꓪ ꓢꓲꓽ ꓫꓬ ꓐꓯ ꓘꓶꓽ ꓗꓪ ꓐꓯ ꓔ ꓟ ꓪꓴ-ꓢ ꓐꓯ ꓘꓶꓽ ꓔꓯ ꓚꓵ ꓚꓵ ꓙꓵꓻ ꓐ ꓡˍ ꓡ ꓐꓯ ꓟ ꓔꓯ ꓓꓵꓽ ꓙꓽ ꓠꓬꓲ ꓡꓯ= ꓟꓽ ꓟꓶ ꓫꓵ ꓟ ꓦꓬꓼ ꓠꓬꓲ ꓗꓪ ꓘ-ꓣꓲ-ꓢ-ꓟꓮꓢ ꓑꓮꓲꓽ ꓛꓲ ꓡꓺꓳ= ꓖꓳ ꓟ ꓗꓪ ꓣꓳ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓘꓳ ꓣꓴ ꓟꓶ ꓢꓲ ꓠꓬꓲ꓾ ꓠꓬꓲꓸ ꓠꓬꓲ ꓢꓲꓽ ꓫꓬ ꓟ-ꓡꓲ-ꓬ ꓡꓰ ꓐꓰ ꓠꓱꓸ ꓐꓯ ꓢꓴ ꓔꓯ ꓥˍ ꓟꓲ ꓖꓶ ꓐ ꓡˍ ꓟ꓾ ꓠꓱꓸ ꓐꓯ ꓢꓴ ꓔꓯ ꓥˍ ꓟꓲ ꓑꓶ ꓖꓶ ꓐ ꓡ ꓢꓴ ꓒꓬꓱꓼ ꓡˍ ꓟ ꓡꓰꓽ ꓟꓽ ꓞꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓓꓵˍ ꓟ ꓮ ꓙꓵꓽ ꓚꓵ ꓚꓵ ꓒꓬꓱꓼ ꓡˍ ꓥꓳ꓾ ꓪꓴ-ꓢ ꓐꓯ ꓘꓶꓽ ꓠꓬ ꓮ ꓙꓵꓽ ꓒꓬꓱꓼ ꓡˍ ꓥꓳ ꓐꓯˍ ꓟ ꓔꓯ ꓙꓵꓻ ꓢꓲ ꓠꓬꓲ꓾ ꓣꓳ ꓤꓶꓻ ꓗꓪ ꓛꓳ ꓫꓱꓽ ꓠꓹ ꓟ ꓐꓱ ꓶ ꓕꓱ ꓕꓲ ꓠꓽ ꓗꓪ ꓣꓳꓽ ꓔꓯ ꓢꓯꓼ ꓪ ꓖꓶ ꓔꓬ ꓟ ꓥ ꓡꓳ=
