ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪ ꓠꓬ ꓕꓲꓽ ꓠꓬꓲ ꓕꓲꓽ ꓠꓬꓲ ꓪꓽ ꓘꓴˍ ꓡ꓿ ꓪꓽ ꓘꓴˍ ꓕꓯ ꓮ ꓡꓲ ꓓꓵꓽ ꓙꓽ ꓢꓲ ꓘꓴˍ ꓡ꓿ ꓟꓶ ꓠꓲ, ꓫꓵˍ ꓟ ꓠꓲ, ꓟ ꓡꓰ ꓘꓴˍ ꓡ꓿ ꓟꓽ ꓥ ꓠꓬ꓾ ꓞꓼ ꓞꓼ ꓘꓴ ꓓꓳ ꓡꓰ ꓠꓲ, ꓫꓵˍ ꓟ ꓠꓲ, ꓟ ꓟꓯꓻ ꓢꓲ ꓘꓴˍ ꓡ꓿ ꓕꓱ ꓡꓱ ꓪꓽ ꓘꓴˍ ꓕꓯ ꓠꓽ ꓟꓽ ꓜꓳꓽ ꓟ ꓥ ꓡꓳ꓿ ꓮ ꓫꓵꓽ ꓐꓱ ꓶ ꓘꓴ ꓓꓰꓽˍ ꓥ ꓟꓲ꓾ ꓠꓲ, ꓟ ꓒꓴ ꓢꓲ ꓔꓱ, ꓜꓳꓽ ꓠ ꓔ ꓡꓳ꓿ ꓙꓵꓻ ꓠꓲ, ꓒ ꓐꓲꓻ ꓐꓰ ꓪꓽ ꓘꓴ ꓠꓯ,ˍ ꓟ ꓥ ꓡꓳ꓿
ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ (ꓡꓴ‐ꓘ꓿1ꓽ2‐25) ꓗꓪ ꓬꓲ‐ꓡꓲ‐ꓫ‐ꓑꓷ ꓬꓲ ꓤ ꓖꓴ ꓢ‐ꓚꓬ‐ꓡꓲ‐ꓬ ꓠꓬ ꓔꓱ, ꓜꓳꓽˍ ꓟ ꓔꓲ ꓒ ꓕꓲꓽ ꓣꓳ ꓥ ꓡꓳ꓿ ꓬꓲ ꓠꓬ ꓢꓲꓽ ꓫꓬ ꓦꓲꓻ ꓗꓪ ꓙꓰ ꓢꓲ ꓪꓽ ꓘꓴˍ ꓡꓳ꓿ ꓟꓴꓽ ꓗꓪ ꓝꓲ ꓓꓴ ꓕꓲ ꓣꓳ ꓥˍ ꓟꓲ꓾ ꓢ‐ꓚꓬ‐ꓡꓲ‐ꓬ ꓡꓰ ꓔꓱ, ꓜꓳꓽˍ ꓟ ꓠꓲ, ꓟ ꓡꓰ ꓪꓽ ꓘꓴˍ ꓟ ꓔꓯ ꓓꓽ ꓔꓳ, ꓠ, ꓟ ꓬꓲ ꓔꓯ ꓛꓲ ꓡˍ ꓡꓳ꓿
ꓟꓴꓽ ꓗꓪ ꓝꓲ ꓓꓴ ꓡꓰ ꓬꓲ ꓔꓯ “ꓠꓴ ꓠꓬ ꓤ ꓕꓲꓽ ꓣꓳ ꓟꓶ ꓡˍ ꓥꓳ” ꓐꓯˍ ꓕꓯ꓾ ꓢ‐ꓚꓬ‐ꓡꓲ‐ꓬ ꓡꓰ “ꓥꓪ ꓐꓰ ꓥꓪ ꓤ ꓟꓶ ꓠꓬ ꓬꓲ ꓞꓲꓼ ꓮ ꓘꓶ. ꓟꓳꓻ ꓡꓰꓳ꓿ ꓤ ꓶꓻ ꓠ, ꓟ ꓠꓬ ꓒꓬꓱꓼ ꓡ ꓟꓽ ꓓꓻꓳ” ꓐꓰ ꓒꓳ, ꓖꓶˍ ꓡꓳ꓿ ꓢ‐ꓚꓬ‐ꓡꓲ‐ꓬ ꓠꓽ ꓔꓱ, ꓜꓳꓽ ꓢꓴ ꓥ ꓟ ꓡꓰ ꓐꓰ ꓬꓲ ꓠꓬ ꓪꓴ‐ꓢ ꓔꓯ ꓮ ꓕꓯ ꓟꓲ ꓪꓽ ꓘꓴ ꓔꓲ ꓖꓶ ꓔꓬ ꓡꓳ ꓐꓯˍ ꓥ ꓟꓲ꓾ ꓟꓴ ꓗꓪ ꓝꓲ ꓓꓴ ꓐꓯ ꓖꓶ ꓡˍ ꓟ ꓔꓯ ꓬꓲ ꓟꓽ ꓙꓵꓻ꓿
ꓖꓳ ꓡꓱ ꓠꓬꓲ ꓢꓲ ꓒ ꓬꓲ ꓝꓲ ꓓꓴ ꓡꓰ ꓬꓲ ꓔꓯ “ꓠꓴ ꓤ ꓟꓶ ꓠꓬ ꓤ ꓠꓱ ꓟꓽ ꓦꓵꓻ ꓓꓳ ꓡ ꓕ ꓑꓳꓸꓼ ꓠꓴ ꓠꓬ ꓞꓳ ꓟꓶꓻˍ ꓡꓰ ꓐꓰ ꓫ. ꓕꓱ ꓟꓽ ꓐꓰꓼ ꓡ ꓗꓷ ꓡꓰˍ ꓥꓳ” ꓐꓰ ꓐꓯ ꓖꓶˍ ꓡꓳ꓿ ꓖꓳ ꓗ ꓠꓯ. ꓢ‐ꓚꓬ‐ꓡꓲ‐ꓬ ꓠꓬ ꓫ. ꓕꓱ ꓟꓽ ꓐꓰꓼ ꓡ ꓗꓷ ꓡꓰꓳ꓿ ꓕꓱ ꓟ ꓔꓯ ꓡꓳ. ꓠꓬꓲ ꓢꓲ꓾ ꓣꓳꓽ ꓠꓬ ꓪꓴ‐ꓢ ꓔꓯ ꓙꓵꓻˍ ꓟ ꓙꓵꓻ ꓠꓲ, ꓐꓰ ꓥꓳ ꓡꓳ.ˍ ꓟ ꓠꓬ ꓮ ꓘꓶ. ꓬꓳ. ꓚꓵˍ ꓡꓳ ꓐꓯˍ ꓟ ꓔꓯ ꓢꓷ. ꓠ ꓔ ꓡꓳ꓿ ꓖꓳ ꓟ ꓑꓶ. ꓓꓴ ꓪꓴ‐ꓢ ꓔꓯ ꓪꓽ ꓘꓴˍ ꓕꓯ ꓙꓵꓻ ꓠꓲ, ꓙꓳ ꓙꓳ ꓡꓰꓽ꓾ ꓔꓱ, ꓜꓳꓽˍ ꓟ ꓠꓲ, ꓟ ꓡꓰ ꓪꓽ ꓘꓴ꓿ ꓬꓲ ꓙꓵ, ꓛꓲ ꓡˍ ꓕꓯ ꓪꓴ‐ꓢ ꓠꓬ ꓣꓳꓽ ꓔꓯ ꓖꓶ ꓡˍ ꓥꓳ꓾ ꓐꓯ ꓟ ꓔꓯˍ ꓟꓲ ꓙꓵꓻ ꓢꓲ꓾ ꓟꓲ‐ꓢ‐ꓬ ꓢꓲ ꓒ ꓡˍ ꓟ ꓔꓯ ꓥꓳ ꓡꓳ. ꓔꓬ ꓓꓴ ꓬꓰ ꓡꓯ꓿
