ꓠꓲ, ꓠꓵˍ ꓟ ꓮꓽ ꓐ ꓮ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪ ꓠꓬ ꓪꓴ‐ꓢ ꓔꓬ ꓗꓪ ꓚꓳ. ꓢꓷ. ꓡꓰ ꓓꓴ ꓐꓰ ꓪꓽ ꓠꓬꓲˍ ꓟ ꓔꓯ ꓓꓰꓽ ꓠꓬꓲˍ ꓡ?꓿ ꓟꓽ ꓥ ꓠꓬ꓾ ꓠꓱ. ꓐꓯ ꓢꓴ ꓡꓰ ꓖꓳ ꓡꓱ ꓓꓰꓽˍ ꓟ ꓔꓯ ꓑ ꓙꓽ ꓠꓬꓲˍ ꓡ?꓿
ꓣꓳ ꓠꓬ ꓪꓴ‐ꓢ ꓔꓯ ꓪꓽ ꓘꓴˍ ꓕꓯ “ꓠꓴ ꓢꓲ ꓤ ꓥꓪ ꓔꓯ ꓖꓳ ꓟ ꓖꓶˍ ꓠꓬ꓾ ꓕꓱ ꓟ ꓖꓶˍ ꓠꓬ꓾ ꓥꓪ ꓥˍ ꓟꓲ ꓪꓽ ꓘꓴ ꓦꓲꓻ ꓗꓪ ꓔꓲꓺ ꓖꓶˍ ꓥꓳ꓿ ꓣꓱꓽ ꓞ, ꓔꓬ ꓢꓴ ꓐꓴ ꓔꓯ ꓥˍ ꓟꓲ ꓬꓰ ꓙ ꓔꓳ, ꓙˍ ꓥꓳ꓿ ꓖꓳ ꓟ ꓑꓶ. ꓓꓴ ꓪꓴ‐ꓢ ꓠꓴ ꓠꓬ ꓥꓪ ꓔꓯ ꓥꓪ ꓓꓰꓽˍ ꓟ ꓖꓶ ꓡꓯ” ꓐꓰ ꓐꓯ ꓢꓲ ꓪꓽ ꓘꓴ ꓠꓬꓲˍ ꓡ꓿ ꓕꓱ ꓟ ꓠꓽ ꓪꓽ ꓘꓴˍ ꓔꓬ ꓡꓳ ꓐꓯˍ ꓟ ꓢꓶ. ꓟꓽ ꓞꓲ ꓢꓷ. ꓡꓰ ꓓꓴ ꓟꓳ. ꓖꓶ ꓡ ꓠ, ꓟ ꓪꓴ‐ꓢ ꓔꓯ ꓓꓰꓽ ꓔꓬ ꓟ ꓥ ꓡꓳ꓿ ꓪꓽ ꓘꓴ ꓔꓬ ꓟ ꓟꓽ ꓥ ꓥ꓾ ꓪꓴ‐ꓢ ꓔꓯ ꓫꓵꓽ ꓠꓬꓲ ꓔꓬ ꓟ ꓡꓰ ꓐꓰ ꓗ, ꓡꓳ꓿
ꓪꓴ‐ꓢ ꓟꓽ ꓠꓲ, ꓒꓴ ꓟ ꓪꓽ ꓘꓴ ꓚꓱ, ꓙꓳˍ ꓡꓳ꓿ ꓖꓳ ꓟ ꓘꓴꓽ ꓗꓪ ꓪꓴ‐ꓢ ꓔꓯ ꓫꓵꓽ ꓠꓬꓲˍ ꓟˍ ꓟꓲ ꓕꓲ ꓟ ꓚꓬꓼˍ ꓟ ꓥ ꓡꓳ꓿ (ꓟ‐ꓘꓳ꓿8ꓽ12) ꓗꓪ “ꓕꓱ ꓕꓲ ꓤꓶ ꓢꓴ ꓠꓬ ꓮ ꓫꓵꓽ ꓪꓴ. ꓠꓬꓲ ꓢꓷ. ꓡꓰ ꓓꓴ ꓧꓪˍ ꓡ? ꓠꓴ ꓪ ꓔꓯ ꓥꓪ ꓔꓱ, ꓔꓱ,ˍ ꓐꓯ ꓖꓶˍ ꓠꓬꓲ꓾ ꓕꓱ ꓕꓲ ꓤꓶ ꓢꓴ ꓔꓯ ꓮ ꓫꓵꓽ ꓢꓷ. ꓡꓰ ꓓꓴˍ ꓟꓲ ꓟꓽ ꓖꓶ꓾” ꓐꓰ ꓢꓷ. ꓡꓰ ꓓꓴ ꓬꓰ ꓟꓳ. ꓖꓶ ꓠ, ꓟ ꓓꓰꓽˍ ꓟ ꓒ‐ꓡꓲ‐ꓢꓷ ꓐꓴ ꓔꓯ ꓢꓲ ꓒ ꓬꓰ‐ꓢꓴ ꓡꓰ ꓒꓳ, ꓖꓶˍ ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓣꓳ ꓪꓽ ꓘꓴˍ ꓕ ꓑꓳꓸꓼ ꓓꓰꓽˍ ꓕ ꓑꓳꓸꓼ ꓟꓽ ꓐꓲ ꓡ꓾ ꓟꓽ ꓟꓶ ꓡ ꓟ ꓠꓬ ꓪꓴ‐ꓢ ꓔꓯ ꓫꓵꓽ ꓠꓬꓲˍ ꓟ ꓡꓰ ꓪꓽ ꓘꓴˍ ꓟ ꓑꓶ. ꓓꓴ ꓥ ꓡꓳ꓿ ꓪꓴ‐ꓢ ꓬꓲ ꓣꓱꓽ ꓛꓰꓽ ꓐꓰ ꓬꓲ ꓶꓼ ꓤ ꓫꓱ, ꓤ ꓔꓯ ꓟꓶ ꓠ, ꓟ ꓠꓬ꓾ ꓓꓰꓽ ꓔꓬ, ꓕꓲ ꓖꓼ ꓟꓽ ꓓꓻ꓿ ꓚꓲ. ꓛꓬ ꓖꓳ ꓓꓱꓽ ꓥˍ ꓟꓲ ꓣꓱꓽ ꓬꓰ ꓠ ꓔ ꓡꓳ꓿ ꓙꓲꓻ ꓫꓬ ꓢꓴ ꓢꓔ. ꓝꓣꓠꓮꓚꓲꓢ ꓮꓢꓲꓢꓲ ꓡꓰ ꓐꓯˍ ꓟ ꓠꓬ “ꓢꓴ ꓔꓯ ꓖꓶꓽˍ ꓟ꓾ ꓣꓱꓽ ꓙˍ ꓟ ꓗꓪ ꓐꓰˍ ꓡꓰꓽ ꓣꓱꓽ ꓛꓰꓽ ꓟꓶˍ ꓡꓳ” ꓐꓰ ꓐꓯ ꓔ ꓡꓳ꓿
ꓥ ꓡꓳ ꓣꓳꓽ ꓠꓬ ꓢꓴ ꓔꓯ ꓬꓰ ꓙˍ ꓟ ꓗꓪ ꓐꓰ꓾ ꓠꓱ. ꓐꓯ ꓢꓴ ꓔꓯ ꓠꓵꓻ ꓠꓲ, ꓟꓳ. ꓖꓶˍ ꓟ ꓗꓪ ꓐꓰ ꓣꓳ ꓠꓲ, ꓟ ꓠꓬ ꓗ, ꓛꓲꓽ ꓡ ꓢꓲ ꓠꓬꓲ꓾ ꓣꓳꓽ ꓣꓱꓽ ꓞ, ꓔꓬ ꓟ ꓣꓱꓽ ꓛꓰꓽ ꓥˍ ꓟꓲ ꓣꓳꓽ ꓔꓯ ꓐꓲ ꓡˍ ꓡꓳ꓾ ꓐꓰ ꓢꓷ. ꓙ ꓟꓳ ꓙ ꓢꓴˍ ꓟꓲ ꓮ ꓟꓬ,ˍ ꓙꓳˍ ꓟ ꓥ ꓡꓳ꓿
ꓖꓳ ꓡꓰ ꓠꓬꓲ ꓢꓲ ꓒ ꓬꓰ‐ꓢꓴ ꓦꓵꓻ ꓡ ꓠ, ꓟ ꓔꓯ ꓥꓳ ꓡꓳ. ꓔꓬ ꓟ ꓮꓓꓦꓰꓠꓔꓴ ꓦꓬꓼ ꓠꓬꓲ ꓗꓪ ꓣꓳ ꓐꓴ ꓠꓬ꓾ ꓟꓬ ꓠꓯ.ˍ ꓟ꓾ ꓟꓽ ꓙꓲꓻ ꓟꓽ ꓔꓱ, ꓟ꓾ ꓚꓲ. ꓛꓬꓽ ꓐꓱ ꓶˍ ꓡꓰꓽ ꓓꓵꓽ ꓙˍ ꓟ꓾ ꓢꓴ ꓔꓯ ꓟꓳꓻ ꓟꓽ ꓟꓵ ꓟ꓾ ꓕꓱ ꓡꓱ ꓫꓵꓽ ꓠꓲ, ꓟ ꓔꓯ ꓲʼꓼ ꓘꓳ, ꓗꓷ ꓢꓲ ꓠꓬꓲ꓾ ꓞꓳ ꓫꓵꓼ ꓤ ꓬꓰ‐ꓢꓴ ꓔꓯ ꓒꓵꓽ ꓒꓵꓽ ꓡꓰꓽ ꓛꓵ, ꓣꓴ ꓘꓳ, ꓣꓴ ꓙꓰ ꓡꓯ꓿ ꓪꓴ‐ꓢ ꓡꓰ ꓖꓶˍ ꓡˍ ꓟ ꓣꓱꓽ ꓛꓰꓽ ꓐꓴ ꓔꓯ ꓓꓰꓽˍ ꓟ ꓗꓪ ꓠꓲ, ꓟ ꓫꓵ ꓢꓲ ꓠꓬꓲ ꓘꓳ, ꓣꓴ ꓓꓴ ꓬꓰ ꓡꓯ꓿
