ꓬꓲ‐ꓢ‐ꓬ 41ꓽ13 “ꓠꓴ ꓪ ꓪꓴ‐ꓢ ꓥꓪ ꓡꓯ ꓙ ꓡꓰ ꓠꓴ ꓔꓯ ꓔ ꓙˍ ꓥꓳ꓾ ꓕꓽ ꓙꓳ꓾ ꓐꓯˍ ꓡꓳ꓿”
ꓞꓳ ꓤ ꓕꓲ ꓣꓳ ꓒꓬꓱꓼ ꓡˍ ꓠꓬ ꓦꓯ. ꓠꓲ, ꓙꓵꓽˍ ꓟ꓾ ꓠꓲ, ꓟ ꓦꓶˍ ꓟ꓾ ꓚꓲ. ꓛꓬ ꓐꓱ ꓶˍ ꓡꓰꓽ ꓓꓵꓽ ꓙˍ ꓟ꓾ ꓕꓱ ꓟꓬ ꓫꓵꓽ ꓠꓲ, ꓟ ꓠꓬ ꓣꓳ ꓮꓽ ꓟ ꓔꓯ ꓥˍ ꓔꓯ ꓙꓳˍ ꓟ ꓥ ꓡꓳ꓿ ꓝꓮꓲ ꓮ ꓡꓲ ꓟꓬ ꓛꓲ ꓐꓳˍ ꓥˍ ꓟꓲ꓾ ꓮ ꓡꓲ ꓟꓬ ꓛꓲ ꓢꓷ. ꓠꓲ, ꓙꓳˍ ꓥ ꓟꓲ꓾ ꓢꓯꓼ ꓟꓬ ꓐꓱ ꓶ ꓙꓳꓺ ꓠꓲ, ꓙꓳˍ ꓟ ꓥ ꓡꓳ꓿ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓠꓬ ꓟꓬꓽ ꓠꓬꓲ ꓥꓳ꓿ ꓮ ꓡꓲ ꓗꓪ ꓙꓰˍ ꓥ ꓟꓲ ꓫ. ꓑꓬ ꓖꓴ ꓟꓽ ꓙꓳ꓿ ꓢꓲ ꓡꓲ ꓟ ꓟꓽ ꓙꓳ꓿ ꓩꓼ ꓔ ꓢꓲ ꓤ ꓟꓳ ꓢꓲ ꓠꓬꓲ ꓙꓰ ꓔꓬ ꓪ꓾ ꓢꓯ. ꓔꓬ ꓪ꓾ ꓜꓽ ꓔꓬ, ꓪˍ ꓟ ꓦꓬꓼ ꓠꓬꓲ ꓗꓪ ꓣꓳꓽ ꓞꓳ ꓙꓳ ꓔꓬ ꓪˍ ꓟ ꓥ ꓡꓳ꓿
ꓞꓳ ꓤ ꓕꓲ ꓐꓱ ꓠꓬ ꓦꓴꓻ ꓜꓽˍ ꓟ꓾ ꓢꓰꓼˍ ꓟ꓾ ꓘꓴꓽˍ ꓟ ꓕꓱ ꓟꓬ ꓫꓵꓽ ꓔꓯ ꓬꓰ ꓠ, ꓟ ꓙꓵꓽ ꓪ ꓟꓶ ꓔ ꓟ ꓡꓰ꓾ ꓟꓽ ꓙꓲꓻ ꓟ ꓬꓰ ꓠ, ꓟ ꓡꓯꓼ ꓟ ꓟꓶ ꓔ ꓟ ꓡꓰ꓾ ꓞꓳ ꓤ ꓮ ꓟꓬ, ꓟꓲꓽ ꓙꓬ ꓗꓪˍ ꓟꓲ ꓫꓬꓽ ꓫꓬꓽ ꓡꓰꓽ ꓬꓰ ꓔꓬ ꓖꓴˍ ꓡꓳ꓿ ꓧꓶ. ꓕꓯ ꓡ ꓞꓳ ꓕꓲ ꓣꓳ ꓔꓬ ꓗꓪ ꓚꓳ. ꓦꓴꓻˍ ꓟ ꓔꓯ ꓘꓳ ꓫꓱ ꓫꓱ ꓬꓰ ꓔꓬ ꓥˍ ꓟꓲ ꓮ ꓟꓶ ꓕꓯ ꓠꓽ ꓞꓳ ꓤ ꓮ ꓟꓬ, ꓟꓲꓽ ꓙꓬ ꓗꓪ ꓚꓬ ꓢꓲ. ꓶꓻ ꓤ ꓦꓴꓻˍ ꓡꓳ꓿ ꓡ ꓞꓳ ꓢꓰꓼˍ ꓟˍ ꓟꓲ ꓖꓳ ꓡꓱ ꓥꓳ꓿
ꓒꓴ ꓤ ꓫꓵ ꓤ ꓙꓳ ꓢꓴ ꓐꓴ ꓥˍ ꓟꓲ꓾ ꓬꓲ ꓪ ꓒꓴ ꓔꓯ ꓮ ꓡꓲ ꓗꓪ ꓫ ꓔ ꓠꓯ, ꓡ꓾ ꓐꓰ ꓢꓪ. ꓪꓴꓽ ꓧꓶ ꓔꓬˍ ꓟ ꓡꓰˍ ꓐꓰ꓾ ꓫ. ꓢꓴ ꓐꓴ ꓥˍ ꓟꓲ ꓕꓲ ꓠꓬꓲ ꓕꓲ ꓠꓬꓲ ꓮ ꓡꓲ ꓐꓰ ꓧꓪ ꓜꓽ ꓧꓪ ꓓꓳ ꓠꓯ, ꓡ꓾ ꓐꓯ ꓢꓲ ꓢꓪ. ꓛꓲ. ꓔꓬ ꓡꓳ꓿ ꓖꓳ ꓡꓱ ꓥˍ ꓟꓲ ꓠꓲ, ꓟ ꓡꓰꓽ ꓫ. ꓔꓬ ꓠꓬ꓾ ꓓꓵꓽ ꓙꓽ ꓪꓴꓽ ꓧꓶ ꓔꓬ ꓠꓬ ꓮ ꓫꓵꓽˍ ꓟꓲ ꓟꓽ ꓒꓬꓱꓼ ꓡ꓿ ꓚꓲ. ꓛꓬ ꓤꓶꓻ ꓐꓱ ꓶ ꓢꓯꓼ ꓕꓵꓼ ꓔꓬ ꓪˍ ꓡꓳ꓿ ꓖꓳ ꓡꓱ ꓢꓯꓼ ꓕꓵꓼˍ ꓕꓯ ꓪꓴ‐ꓢ ꓐꓰ ꓕꓲ ꓪꓽ ꓢꓯꓼ ꓕꓵꓼ꓿ ꓪꓴ‐ꓢ ꓡꓰ ꓣꓳꓽ ꓔꓯ ꓬꓰ ꓙ ꓡˍ ꓥꓳ꓿ ꓠꓲ, ꓫ. ꓟꓬ ꓫ.ˍ ꓟ ꓔꓯ ꓥˍ ꓟꓲ ꓪꓴ‐ꓢ ꓡꓰ ꓢꓻ ꓡꓰ ꓠ ꓬꓰ ꓙ ꓖꓶ ꓡˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓪꓴ‐ꓢ ꓡꓰ ꓣꓳꓽ ꓔꓯ “ꓕꓽ ꓙꓳꓺ” ꓐꓰ ꓐꓯˍ ꓡꓳ꓿ ꓪꓴ‐ꓢ ꓡꓰ ꓐꓯˍ ꓟ “ꓕꓽ ꓙꓳꓺ” ꓐꓯˍ ꓟ ꓐꓯ ꓘꓶꓽ ꓕꓲ ꓘꓶꓽ ꓤ ꓗꓪ ꓐꓰ ꓡꓰꓽ ꓣꓳ ꓠꓬ ꓢꓯꓼ ꓪ ꓟꓶ ꓔꓬ ꓡꓳ꓿ ꓣꓳ ꓔꓬ, ꓟꓽ ꓢꓻ ꓠꓻ ꓤ ꓒꓬꓽ ꓤ ꓙꓳˍ ꓟ꓾ ꓟꓬꓱꓽ ꓬꓰˍ ꓟ ꓗꓪ ꓠꓲ, ꓫ. ꓓꓴ ꓙꓳˍ ꓟ꓾ ꓟꓽ ꓢꓲ ꓡꓲ ꓟ꓾ ꓕꓱ ꓟꓬ ꓫꓵꓽ ꓐꓴ ꓔꓯ ꓪꓴ‐ꓢ ꓟꓲꓽ ꓙꓬ ꓗꓪ ꓐꓯ ꓟ. ꓖꓶ꓿ ꓙꓵꓻ ꓠꓲ, ꓡꓰ ꓪꓴ‐ꓢ ꓔꓯ ꓮ ꓙꓵꓽ ꓐꓯ ꓟ. ꓖꓶ꓿ ꓥꓳ ꓡꓳ. ꓠꓲ, ꓒ ꓐꓲ ꓟꓯꓻ ꓔ ꓢꓲ ꓪꓴ‐ꓢ ꓟꓲꓽ ꓙꓬ ꓗꓪ ꓓꓵꓽ ꓙꓰ꓿ ꓣꓳꓽ ꓔꓯ “ꓕꓽ ꓙꓳꓺ” ꓐꓰ ꓐꓯ ꓖꓶ ꓡ ꓔꓬ ꓟ ꓪꓴ‐ꓢ ꓠꓬ꓾ ꓣꓳ ꓠꓲ, ꓟ ꓔꓯ ꓢꓲ ꓡꓲ ꓟ ꓖꓶ ꓡˍ ꓥꓳ꓿ ꓠꓲ, ꓪꓴꓽ ꓪꓴꓽ ꓡꓰ ꓗꓷ ꓡꓰ ꓝꓲˍ ꓥꓳ꓿ ꓠꓴ ꓔꓯ ꓥˍ ꓟꓲ ꓗ, ꓛꓲꓽ ꓓꓴ ꓖꓶ ꓡˍ ꓥꓳ꓿
