ꓣꓳ ꓠꓯꓸꓼ ꓗꓪ ꓕꓲ ꓐꓱ ꓠꓬ “ꓥꓪ ꓠꓽ ꓮꓽ ꓐ ꓮꓽ ꓟ ꓠꓵꓻ ꓠꓲ, ꓔꓯ ꓒ ꓐꓲꓻ ꓟꓽ ꓟꓶ ꓡꓰ꓾ ꓛꓳꓽ ꓒꓯ, ꓐꓴ ꓥˍ ꓟꓲ ꓥꓪ ꓔꓯ ꓟꓽ ꓓꓵꓽ ꓙ ꓟꓶ꓿ ꓥꓪ ꓠꓽ ꓞꓳ ꓙꓳ ꓟꓽ ꓒꓵꓽ ꓐꓷ” ꓐꓯ ꓢꓲ ꓓꓵꓽ ꓙ ꓔꓬ ꓢꓴ ꓙꓳ ꓗꓴ.ˍ ꓥꓳ꓿ ꓓꓵꓽ ꓙ ꓟꓶˍ ꓟ ꓡꓰ ꓚꓬ, ꓪˍ ꓟ ꓡꓰ ꓚꓵ ꓚꓵ ꓒꓬꓱꓼ ꓔꓬ, ꓟˍ ꓟꓲ ꓥ ꓗꓴ.ˍ ꓥꓳ꓿
ꓤ ꓠꓱ ꓕꓲ ꓐꓱ ꓠꓬ ꓮꓽ ꓐ ꓮꓽ ꓟ ꓣꓱꓽ ꓢꓴ ꓐꓴ ꓡꓰ ꓡꓳ ꓔ ꓬꓰ ꓟ ꓟꓶˍ ꓡꓳ꓿ ꓘꓳ ꓫꓱˍ ꓫꓱˍ ꓐꓰ ꓡꓳ ꓔ ꓬꓰˍ ꓟ ꓟꓽ ꓥ ꓥ꓾ ꓠꓰꓪꓢꓑꓮꓑꓰꓣ ꓐꓯˍ ꓟ ꓓꓳꓽ ꓫꓵꓽ ꓐꓳ ꓔ ꓟ ꓕꓳꓽ ꓶ ꓒꓬꓽ ꓗꓪ ꓵꓻ ꓢꓴ ꓮ ꓙꓵꓽ ꓢꓷ. ꓡꓰ ꓠ, ꓟ “ꓠꓬꓲ. ꓠꓬꓲ ꓗꓪ ꓚꓳ. ꓕꓱ ꓕꓲ ꓣꓳ ꓠꓬ ꓥꓪ ꓤꓽ ꓟꓽ ꓥꓺꓳ꓾ ꓥꓪ ꓮꓽ ꓟꓲꓽ ꓟꓽ ꓥꓺꓳ꓾” ꓐꓰ ꓐꓯ ꓑꓶ ꓢꓴˍ ꓟꓲ ꓙꓳˍ ꓡꓳ꓿ ꓖꓳ ꓡꓱ ꓒꓬꓱꓼ ꓡˍ ꓕꓯ ꓤ ꓠꓱ ꓣꓱꓽ ꓢꓴ ꓠꓬ ꓮ ꓡꓲ ꓟꓬ ꓗꓪ ꓛꓲ ꓠꓲ, ꓫ. ꓟꓬ ꓫ. ꓡ ꓐꓯ ꓟ ꓠꓬ ꓐꓯ ꓟꓽ ꓛꓵꓺꓳ꓿
ꓖꓳ ꓡꓱ ꓥˍ ꓟꓲ ꓠꓲ, ꓟ ꓕꓽ ꓙꓬ꓾ ꓢꓲ ꓒ ꓪꓴ‐ꓢ ꓔꓬ, ꓗꓪ ꓚꓱ, ꓬꓲꓼ ꓙꓰ꓾ ꓞꓳ ꓤ ꓡꓰ ꓡꓳ ꓒꓰ, ꓔ ꓥˍ ꓟꓲ ꓪꓴ‐ꓢ ꓠꓬ ꓣꓳ ꓔꓯ ꓮ ꓕꓯ ꓟꓲ ꓟꓽ ꓡꓳ ꓔ꓾ ꓐꓯ ꓟ ꓔꓯ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓯ ꓔ ꓡꓳ꓿ ꓙ ꓖꓴ ꓥꓳꓽ ꓡꓰ ꓢꓴ ꓐꓴ ꓔꓯ ꓔꓱ,ˍ ꓟ ꓚꓱ, ꓗꓪ ꓛꓲ ꓬꓰ ꓠ, ꓟ꓾ ꓝꓴꓲ. ꓠꓯꓸꓼ ꓗꓪ ꓞꓰ ꓓꓵꓽ ꓡꓰ ꓢꓲ ꓙ ꓖꓴ ꓒꓲꓼ ꓔꓬ, ꓢꓴ ꓐꓴ ꓔꓯ ꓝꓴꓲ. ꓗꓪ ꓐꓰ ꓡꓲ, ꓓꓳ ꓡ ꓐ ꓡ ꓠ, ꓟ ꓫꓬ, ꓔꓱ, ꓖꓶ ꓢꓲ ꓘꓴ ꓓꓳ ꓡ ꓢꓴ ꓠꓬ ꓪꓴ‐ꓢ ꓥ ꓡꓳ꓿
ꓡ ꓞꓳ ꓕꓲ ꓦꓬ ꓣꓳ ꓘꓴꓽ ꓗꓪ ꓐꓰ ꓕꓲ ꓣꓳ ꓒꓲꓼ ꓬꓰ ꓠꓬ꓾ 99 ꓣꓳ ꓔꓯ ꓗꓶ ꓔ ꓬꓰ ꓢꓲ꓾ ꓒꓲꓼ ꓡꓰ ꓟ ꓕꓲ ꓣꓳ ꓔꓯ ꓟꓽ ꓟꓳꓻ ꓟꓳ ꓠ ꓛꓲ ꓧꓪ ꓢꓲ ꓠꓬꓲ꓾ ꓧꓪ ꓟꓶ ꓡꓰˍ ꓕꓯ ꓗ, ꓛꓲꓽˍ ꓡꓳ ꓐꓯˍ ꓟ ꓬꓲ. ꓬꓲ ꓢꓲ ꓠꓬ꓾ ꓣꓳꓽ ꓕꓲ ꓣꓳ ꓡꓰ ꓕꓲ ꓣꓳ ꓠꓬ ꓪꓴ‐ꓢ ꓟꓲꓽ ꓙꓬ ꓗꓪ ꓮ ꓘꓶ. ꓒꓵꓽˍ ꓟ ꓬꓲ ꓑ ꓫꓬꓼ ꓐꓴ ꓥ ꓡꓳ꓾ ꓐꓰ ꓐꓯˍ ꓟ ꓥ ꓡꓳ꓿ ꓪꓴ‐ꓢ ꓠꓬ ꓣꓳ ꓮ ꓡꓲ ꓕꓲꓽ ꓣꓳ ꓔꓯ ꓥˍ ꓟꓲ ꓛꓬꓼ ꓟꓵꓽ ꓮ ꓔꓳ. ꓗꓪ ꓓꓵꓽ ꓙꓰ ꓝꓲ ꓠꓲ, ꓟꓽ ꓫꓵ꓿ ꓟꓽ ꓓ ꓟꓽ ꓞꓽ ꓣꓳ ꓔꓯ ꓚꓬꓴ. ꓙ ꓖꓶˍ ꓟ ꓪꓴ‐ꓢ ꓥ ꓡꓳ꓿ ꓣꓳ ꓥˍ ꓟꓲ ꓜꓲꓽ ꓜꓲꓽ ꓑꓰ, ꓑꓰ, ꓬꓰ ꓢꓲ꓾ ꓪꓴ‐ꓢ ꓐꓰ ꓶꓽ ꓤ ꓗꓪ ꓟꓽ ꓔꓬ, ꓔꓬ,꓾ ꓒ ꓕꓲꓺ ꓗꓪ ꓔꓬ, ꓠ ꓗ, ꓡꓳ꓿ ꓢꓲ ꓒ ꓡꓰ ꓟ. ꓖꓶ ꓡˍ ꓟ ꓚꓱ, ꓗꓪ ꓐꓰ ꓟꓽ ꓧꓶ. ꓙꓰ ꓠ, ꓟ ꓬꓳ. ꓚꓰꓽˍ ꓡꓳ꓿ ꓖꓳ ꓡꓱ ꓠꓬꓲ ꓝꓴꓲ. ꓐꓱ ꓶ ꓠꓲ, ꓥꓴˍ ꓟ ꓠꓲ, ꓟ ꓡꓰ ꓢꓲ ꓒ ꓔꓬ, ꓗꓪ ꓓꓵꓽ ꓙꓰ ꓠ, ꓟ ꓢꓯꓼ ꓕꓵꓼ ꓙꓰ ꓡꓯ꓿
