ꓣꓳ‐ꓟ ꓗꓴꓷꓼ ꓠꓬ ꓮ ꓟꓬ, ꓗꓴꓷꓼ ꓐ,ˍ ꓟ ꓥ ꓡꓳ꓿ ꓕꓱ ꓗꓴꓷꓼ ꓮ ꓟꓬ, ꓠꓬ ꓢꓲ ꓡꓲ ꓐꓰ ꓙꓵꓽ ꓠ, ꓟ ꓙꓵꓽ ꓪ ꓟꓶˍ ꓟˍ ꓟꓲ ꓥ ꓡꓳ꓿ ꓕꓱ ꓗꓴꓷꓼ ꓮ ꓟꓬ, ꓗꓪ ꓐꓰ ꓗꓴꓷꓼ ꓝꓲ ꓓꓴ ꓐꓴ ꓡꓰ ꓗꓴꓷꓼ ꓔꓯ ꓙꓵꓽˍ ꓟ ꓟꓲ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓣꓳ‐ꓟ ꓗꓴꓷꓼ ꓠꓬ ꓮꓓ 300 ꓘꓳꓼ ꓕꓯ ꓗꓴꓷꓼ ꓙꓵꓽ ꓢꓴ ꓪ ꓔꓲ ꓐꓴ ꓮ ꓟꓬ, ꓑ ꓟ ꓟꓲ ꓥ ꓡꓳ꓿ ꓣꓳ‐ꓟ ꓗꓴꓷꓼ ꓔꓯ ꓙꓵꓽ ꓢꓴ ꓐꓴ ꓠꓬ ꓣꓳ‐ꓟ ꓟꓯꓼ ꓜꓴꓻ ꓗꓪ ꓐꓰ ꓓꓯ ꓡ ꓢꓴ ꓐꓴ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ‐ꓟ ꓗꓴꓷꓼ ꓙꓵꓽ ꓢꓴ ꓐꓴ ꓠꓬ ꓟꓯꓼ ꓜꓲꓽ ꓒꓽ ꓡꓰ ꓐꓯ ꓟ ꓔꓯ ꓡꓰꓽ ꓛꓳ ꓢꓴ ꓐꓴ ꓥ ꓡꓳ꓿
ꓣꓳ‐ꓟ ꓗꓴꓷꓼ ꓗꓪ ꓫꓵꓽ ꓪꓴ ꓮ ꓟꓬ, ꓙꓳ ꓡ ꓟ ꓥ ꓡꓳ꓿ ꓟꓯꓼ ꓜꓴꓻ ꓐꓴ ꓡꓰ ꓣꓱꓽˍ ꓟ ꓒꓴ ꓮ ꓟꓬ, ꓙꓳ ꓡ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓟꓯꓼ ꓜꓴꓻ ꓐꓴ ꓣꓱꓽˍ ꓟ ꓒꓴ ꓫꓵ ꓔꓯ ꓑ ꓫꓬ ꓐꓴ ꓗꓶ ꓠ, ꓟ ꓔ ꓟ ꓥ ꓡꓳ꓿ ꓒꓴ ꓒꓵꓽ ꓮ ꓟꓬ, ꓟꓽ ꓙꓳ ꓡ ꓟ ꓥ ꓡꓳ꓿ ꓖꓳ ꓡꓱ ꓡꓰꓽ ꓟꓽ ꓞꓲ ꓣꓳ‐ꓟ ꓗꓴꓷꓼ ꓔꓯ Barbarian ꓜꓴꓻ ꓡꓰ ꓢꓰꓼ ꓡ ꓟˍ ꓟꓲ ꓥ ꓡꓳ꓿
AD (284) ꓘꓳꓼ ꓕꓯ ꓪ ꓔꓲ Dalmatian ꓬꓲ ꓤ Diocletian ꓣꓳ‐ꓟ ꓪ ꓔꓲ ꓒꓬꓱꓼ ꓡ ꓟ ꓥ ꓡꓳ꓿ ꓬꓲ ꓠꓬ ꓮ ꓟꓬ, ꓢꓯꓼ ꓪ ꓙꓳ ꓢꓴ ꓥ ꓢꓲ ꓠꓬꓲ꓾ ꓣꓳ‐ꓟ ꓗꓴꓷꓼ ꓔꓯ ꓮ ꓟꓬ, ꓛꓲ ꓪꓴꓽ ꓟꓴ ꓡ ꓠ, ꓟ ꓐꓰ ꓢꓯꓼ ꓙꓳ ꓠ, ꓟ ꓙꓵꓽ ꓠ, ꓟ ꓓꓵꓽ ꓙ ꓔ ꓟ ꓥ ꓡꓳ꓿ ꓖꓳ ꓡꓱ ꓐꓰ ꓣꓳ‐ꓟ ꓗꓴꓷꓼ ꓔꓯ ꓝꓮꓲ ꓕꓲ ꓧꓪ, ꓪꓴꓽ ꓟꓴ ꓡ ꓠ, ꓟ ꓐꓰ ꓢꓯꓼ ꓙꓳ ꓪꓽ ꓠꓬꓲ ꓡ ꓠ, ꓟ ꓬꓰ ꓙ ꓢꓴ ꓠꓬ Maximian ꓟꓬꓱꓺ ꓔ ꓢꓴ ꓥ ꓡꓳ꓿ ꓪ ꓔꓲ ꓠꓬ ꓣꓳ‐ꓟ ꓗꓴꓷꓼ ꓗꓪ ꓔꓬ ꓢꓲ ꓠꓬꓲ ꓣꓳ‐ꓟ ꓗꓴꓷꓼ ꓔꓯ ꓙꓵꓽ ꓢꓲ ꓠꓬꓲ Maximian ꓠꓬ Milan ꓡꓳ ꓒꓱ ꓗꓪ ꓔꓬ ꓢꓲ ꓠꓬꓲ ꓗꓴꓷꓼ ꓔꓯ ꓙꓵꓽˍ ꓟ ꓥ ꓡꓳ꓿
ꓖꓳ ꓡꓱ ꓐꓰ ꓗꓴꓷꓼ ꓔꓯ ꓙꓵꓽˍ ꓟ ꓙꓵ, ꓕꓯ ꓣꓳ‐ꓟ ꓗꓴꓷꓼ ꓠꓬ ꓮ ꓟꓬ, ꓛꓲ ꓪꓴꓽ ꓟꓴ ꓡ ꓓꓴ ꓙꓳˍ ꓟ ꓥ ꓡꓳ꓿ ꓙꓲ‐ꓢꓴ ꓢꓲꓺ ꓤ ꓐꓴ ꓥ ꓟꓲ ꓗ, ꓛꓲꓽ ꓛꓲꓽ ꓡꓰ ꓢꓯ. ꓔꓬ ꓟꓶˍ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓟꓽ ꓟꓶ ꓫꓵˍ ꓟ ꓙꓵ, ꓕꓯ ꓣꓳ‐ꓟ ꓗꓴꓷꓼ ꓗꓪ ꓔꓬ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓝꓴꓲ. ꓖꓶ ꓠ, ꓟ ꓕꓳ ꓶ ꓐꓳ ꓩꓴ ꓡ ꓟ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓐꓯ ꓠꓬ ꓣꓳ‐ꓟ ꓡꓳ ꓒꓱ ꓓꓽ ꓗꓪ ꓮ. ꓔꓳ ꓐꓬ ꓡꓰ ꓟ ꓪꓴ. ꓠꓬꓲ ꓕꓱ ꓟ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓡꓰ ꓬꓰˍ ꓥ ꓐꓯ ꓢꓲ ꓝꓴꓲ ꓓꓰ.ˍ ꓟ ꓥ ꓡꓳ꓿ Armenia ꓟꓵꓽ ꓐꓰ Syria ꓗꓴꓷꓼ ꓗꓪ ꓒꓳ, ꓔꓴˍ ꓟ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓡꓰ ꓬꓰˍ ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓕꓱ ꓗꓴꓷꓼ ꓗꓪ ꓔꓬ ꓟ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓢꓴ ꓐꓴ ꓔꓯ ꓐꓱ ꓓꓴꓽ ꓗꓪ ꓐꓱˍ ꓟ ꓟꓲ ꓥ ꓡꓳ꓿ ꓬꓲ. ꓟꓶ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓦꓻ ꓡꓱ ꓔꓬ ꓟ ꓪꓴ‐ꓢ ꓔꓯ ꓡꓳꓻ ꓗꓷ ꓢꓲ ꓠꓬꓲ ꓠꓲꓽ ꓔꓯ ꓪꓴ. ꓓꓵ ꓕꓱꓼ ꓠ, ꓟ ꓐꓯ ꓑꓶ ꓗꓷꓳ꓿ ꓕꓱ ꓡꓰ ꓐꓰ ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓙꓵꓻ ꓠꓲ, ꓚꓱ, ꓑꓶ. ꓓꓴ ꓢꓰꓼ ꓟꓶ ꓡꓰ ꓟ ꓕꓱ ꓕꓳ ꓶ ꓠꓬ ꓒꓬꓱꓼ ꓡ ꓝꓲˍ ꓟ ꓥ ꓡꓳ꓿ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓮ ꓟꓬ, ꓫ. ꓟ ꓟꓬꓱꓽ ꓔꓯ ꓬꓰ ꓝꓲˍ ꓟ ꓥ ꓡꓳ꓿ ꓫ. ꓟꓴ ꓫ. ꓚꓬ ꓟꓲ ꓬꓰ ꓢꓲ ꓠꓬꓲ ꓜꓻ ꓮ ꓟꓬ, ꓟꓽ ꓖꓶ ꓜ ꓟ ꓥ ꓡꓳ꓿
ꓙꓲ‐ꓢꓴ ꓢꓲꓺ ꓤ ꓐꓴ ꓔꓬ ꓟ ꓡꓳ ꓒꓱ ꓞꓳ ꓘ, ꓮ ꓟꓬ, ꓔꓯ ꓮ. ꓔꓳ. ꓛꓴ ꓗꓷ ꓟ ꓥ ꓡꓳ꓿ ꓣꓳ‐ꓟ ꓗꓴꓷꓼ ꓙꓵꓽ ꓢꓴ ꓪ ꓔꓲ ꓐꓴ ꓡꓰ ꓙꓲ‐ꓢꓴ ꓢꓲꓺ ꓤ ꓮ ꓟꓬ, ꓔꓯ ꓢꓰꓼ ꓗꓷ ꓟ ꓗꓪ ꓙꓲꓻ ꓫꓬ ꓢꓴ St. Sebastian ꓥ ꓟꓲ ꓐ,ˍ ꓟ ꓥ ꓡꓳ꓿ ꓬꓲ ꓠꓬ ꓣꓳ‐ꓟ ꓟꓯꓼ ꓒꓽ ꓥˍ ꓟꓲ ꓙꓲ‐ꓢꓴ ꓢꓲꓺ ꓤ ꓥ ꓟ ꓪꓴ. ꓠꓬꓲ ꓬꓲ ꓔꓯ ꓣꓳ‐ꓟ ꓟꓯꓼ ꓐꓴ ꓡꓰ ꓛꓳ, ꓔ ꓢꓲ ꓠꓬꓲ ꓛꓬ, ꓗꓪ ꓐꓰ ꓐꓶ ꓢꓰꓼ ꓗꓷ ꓟ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓟꓽ ꓫꓵꓻ ꓟ ꓪꓴ. ꓠꓬꓲ ꓙꓲꓻ ꓫꓬ ꓢꓴ St. Sebastian ꓔꓯ ꓮ. ꓕꓽ ꓗꓪ ꓐꓰ ꓗ. ꓢꓰꓼ ꓗꓷꓳ꓿ ꓙꓲꓻ ꓫꓬ ꓢꓴ Acolyte ꓠꓬ ꓢꓲꓺ ꓒ ꓬꓰ‐ꓢꓴ ꓧꓪꓽ ꓖꓳ ꓓꓱ ꓔꓯ ꓗꓽ ꓕ. ꓢꓲ ꓠꓬꓲ ꓣꓳ‐ꓟ ꓟꓯꓼ ꓐꓴ ꓡꓰ ꓢꓰꓼ ꓗꓷˍ ꓟ ꓟꓶ ꓡꓰ ꓢꓴ ꓕꓲ ꓣꓳ ꓥ ꓡꓳ꓿
ꓬꓲ ꓠꓬ ꓪꓴ‐ꓢ ꓟꓽ ꓦꓻ ꓡꓱ ꓢꓴ ꓐꓴ ꓗꓳ ꓡꓳ ꓗꓪ ꓢꓲꓺ ꓒ ꓬꓰ‐ꓢꓴ ꓧꓪꓽ ꓖꓳ ꓓꓱ ꓚꓵ ꓔꓯ ꓗꓽ ꓕ. ꓢꓲ ꓠꓬꓲ ꓙꓵꓻ ꓠꓲ, ꓚꓱ, ꓑꓶ. ꓓꓴ ꓢꓰꓼ ꓗꓷ ꓟ ꓟꓶ ꓢꓴ ꓥ ꓡꓳ꓿ ꓙꓲꓻ ꓫꓬ ꓢꓴ Lucy ꓔꓯ ꓠꓬ ꓣꓳ‐ꓟ ꓟꓯꓼ ꓐꓴ ꓡꓰ ꓟꓬꓽ ꓢꓶ ꓔꓯ ꓑꓳꓻ ꓩꓴ ꓢꓲ ꓠꓬꓲ ꓢꓰꓼ ꓗꓷ ꓟ ꓥ ꓡꓳ꓿ ꓙꓲꓻ ꓫꓬ ꓢꓴ Cosmon ꓐꓰ ꓙꓲꓻ ꓫꓬ ꓢꓴ Damian ꓐꓴ ꓠꓬꓲꓽ ꓣꓳ ꓠꓬ ꓠꓯꓻ ꓞꓲꓼ ꓟ. ꓒꓽ ꓓꓽ ꓥˍ ꓟꓲ ꓙꓵꓻ ꓠꓲ, ꓚꓱ, ꓑꓶ. ꓓꓴ ꓣꓳ‐ꓟ ꓟꓯꓼ ꓐꓴ ꓡꓰ ꓢꓰꓼ ꓗꓷ ꓢꓴ ꓐꓴ ꓙꓲꓻ ꓫꓬ ꓢꓴ ꓐꓴ ꓥ ꓡꓳ꓿
ꓙꓲꓻ ꓫꓬ ꓢꓴ Agnes ꓐ, ꓐ ꓐꓰ ꓟ, ꓟ ꓠꓬ ꓒꓴ ꓫꓵ ꓮ ꓟꓬ, ꓙꓳˍ ꓟ ꓕꓲ ꓦꓲꓻ ꓗꓪ ꓐꓰ ꓥ ꓡꓳ꓿ ꓬꓲ ꓞꓲꓼ (12) ꓘꓳꓼ ꓙꓳˍ ꓕꓯ ꓬꓲ ꓠꓬ ꓙꓵꓻ ꓠꓲ, ꓚꓱ, ꓑꓶ. ꓓꓴ ꓑꓶ. ꓑꓶ. ꓙꓵꓻ ꓠꓲ, ꓚꓱ, ꓗꓪ ꓫꓵꓻ ꓢꓴ ꓙꓲꓻ ꓫꓬ ꓢꓴ ꓥ ꓡꓳ꓿ ꓟꓽ ꓙꓲꓻ ꓢꓴ ꓐꓴ ꓡꓰ ꓬꓲ ꓔꓯ ꓮ ꓟꓬ, ꓛꓲ ꓫ. ꓓꓴ ꓟꓷꓼ ꓓꓴ ꓖꓶˍ ꓥ ꓟꓲ ꓬꓲ ꓠꓬ ꓪꓴ‐ꓢ ꓔꓯ ꓟꓽ ꓡꓳ ꓗꓷ ꓟ ꓥ ꓡꓳ꓿ ꓬꓲ ꓔꓯ ꓟꓽ ꓙꓲꓻ ꓢꓴ ꓐꓴ ꓡꓰ ꓪꓴ. ꓓꓵ ꓔꓯ ꓓꓶꓺ ꓗꓷ ꓟ ꓥ ꓡꓳ꓿ ꓬꓲ ꓔꓯ ꓬꓲ ꓪ ꓦꓲꓻ ꓟꓵꓽ ꓗꓪ ꓬꓵ. ꓔ ꓟ ꓥ ꓡꓳ꓿ ꓙꓲꓻ ꓫꓬ ꓢꓴ Agnes ꓠꓬ ꓞꓲꓼ ꓣꓳˍ ꓥ ꓟꓲ ꓙꓵꓻ ꓠꓲ, ꓚꓱ, ꓑꓶ. ꓓꓴ ꓫꓵꓻ ꓙ ꓢꓴ ꓙꓲꓻ ꓫꓬ ꓢꓴ ꓕꓲ ꓣꓳ ꓥ ꓡꓳ꓿
