ꓟ‐ꓕꓲ꓿7ꓽ21,24‐27
ꓬꓰ‐ꓢꓴ ꓡꓰ ꓐꓯˍ ꓡꓳ꓾ “ꓥꓪ ꓔꓯ ꓢꓲ ꓒꓽꓳ꓾ ꓢꓲ ꓒꓽꓳ꓾ ꓘꓴ ꓢꓴ ꓮ ꓙꓵꓽ ꓟꓴ ꓗꓪ ꓗꓴꓷꓼ ꓗꓪ ꓟꓽ ꓓꓵꓽ ꓡꓰ꓿ ꓟꓴ ꓗꓪ ꓗꓪ ꓔꓬ ꓟ ꓥꓪ ꓐ, ꓐꓽ ꓠꓲ, ꓡꓶꓽ ꓛꓳ ꓢꓴˍ ꓡꓰꓽ ꓓꓵꓽ ꓡꓰˍ ꓟ ꓥꓳ” ꓟ‐ꓕꓲ꓿7ꓽ21
ꓮꓽ ꓐ ꓮꓽ ꓟ ꓐꓯ ꓘꓶꓽ ꓠ ꓠ, ꓢꓲ ꓛꓳ ꓫꓱꓽˍ ꓟ ꓤ ꓠꓱ ꓐꓴ ꓠꓬ ꓬꓲ ꓪ ꓤꓶꓻ ꓗꓪ ꓞꓳ ꓙꓳ ꓢꓻˍ ꓡꓳ꓿ ꓟ. ꓒ ꓟ. ꓟ ꓐꓯ ꓘꓶꓽ ꓠ ꓠ, ꓢꓲ ꓢꓯꓼ ꓕꓵꓼˍ ꓟ ꓢꓳ ꓤ ꓐꓴ ꓥˍ ꓟꓲ ꓢꓷ. ꓠꓲ, ꓢꓷ. ꓢꓴ ꓒꓬꓱꓼ ꓡ ꓐ ꓡˍ ꓡꓳ꓿ ꓖꓳ ꓡꓱ ꓥˍ ꓟꓲ ꓮꓽ ꓐ ꓮ ꓟ꓾ ꓟ. ꓒ ꓟ. ꓒ ꓐꓴ ꓐꓯ ꓘꓶꓽ ꓮ ꓙꓵꓽ ꓕꓲ ꓘꓶꓽ ꓘꓴˍ ꓡꓰ ꓔꓯ ꓠꓽ ꓠ ꓠ, ꓟꓽ ꓐ ꓡ꓿ ꓮ ꓘꓶ. ꓐꓯ ꓓꓻ ꓡꓳ꓾ ꓮ ꓘꓶ. ꓠ ꓠ, ꓡꓳ ꓐꓯˍ ꓟ ꓤ ꓠꓱ ꓐꓴ ꓥˍ ꓟꓲ ꓮꓽ ꓐ ꓮ ꓟ ꓟ. ꓒ ꓟ. ꓟ ꓐꓯ ꓘꓶꓽ ꓮ ꓙꓵꓽ ꓔꓯ ꓛꓳ ꓫꓱꓽ ꓟꓽ ꓐ ꓡ꓿ ꓚꓲ. ꓛꓬ ꓠꓲ, ꓡꓶꓽ ꓙꓳˍ ꓟ ꓡꓰ ꓕꓲ ꓖ ꓕꓲ ꓧꓪ, ꓬꓰˍ ꓡꓳ꓾ ꓟꓽ ꓥ ꓡ꓿
ꓣꓳꓽ ꓠꓬ ꓮ ꓫꓵꓽ ꓬꓰˍ ꓥ ꓟꓲ ꓚꓲ. ꓛꓬ ꓐꓱ ꓶ꓾ ꓮ ꓟꓬ, ꓐꓱ ꓶ ꓙꓲꓻ ꓠ, ꓟ꓾ ꓧ ꓠ, ꓟ ꓬꓳ. ꓚꓰꓽˍ ꓡꓳ꓿ ꓕꓱ ꓡꓱ ꓙꓲꓻˍ ꓟ ꓧˍ ꓟ ꓟꓬꓱꓽ ꓔꓯ ꓬꓰ ꓐ ꓡ ꓠ, ꓟ ꓠꓬ꓾ ꓪꓴ‐ꓢ ꓐꓯ ꓘꓶꓽ ꓔꓯ ꓠ ꓠ, ꓢꓲ ꓛꓳ ꓫꓱꓽ ꓠ, ꓟ꓾ ꓔꓲ ꓒ ꓔꓲ ꓟ ꓐꓴ꓾ ꓘꓴ ꓜꓲꓼ ꓞꓳ ꓟ. ꓒ ꓟ. ꓟ ꓐꓴ ꓬꓲ ꓪ ꓟ. ꓖꓶ ꓡˍ ꓟ ꓔꓯ ꓠ ꓡꓳ. ꓘꓳ ꓣꓴ ꓢꓲ꓾ ꓚꓲ. ꓛꓲ ꓤꓶꓻ ꓗꓪ ꓡꓯꓼ ꓕꓲꓺ ꓛꓳ ꓫꓱꓽ ꓠ ꓗ, ꓡꓳ꓿
ꓪꓴ‐ꓢ ꓐꓯ ꓘꓶꓽ ꓑ ꓙꓽ ꓢꓲ ꓛꓳ ꓫꓱꓽ ꓠ, ꓟ ꓐꓱ ꓶ ꓠꓬ꓾ ꓪꓴ‐ꓢ ꓔꓯ ꓚꓵ ꓚꓵ ꓠꓲ, ꓠꓵ ꓪˍ ꓡꓳ꓾ ꓚꓵ ꓚꓵ ꓙꓵꓻ ꓠ ꓗ, ꓡꓳ꓿ ꓕꓱ ꓡꓱ ꓪꓴ‐ꓢ ꓔꓯ ꓠꓲ, ꓠꓵ ꓢꓲ ꓙꓵꓻˍ ꓕꓯ ꓠꓬ ꓪꓴ‐ꓢ ꓐꓯ ꓘꓶꓽ ꓔꓯ ꓛꓳ ꓫꓱꓽ ꓐ ꓡˍ ꓡꓳ꓿ ꓠ ꓠ, ꓢꓲ ꓚꓵ ꓚꓵ ꓛꓳ ꓫꓱꓽˍ ꓕꓯ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓗꓽ ꓔ ꓓꓴ ꓟꓽ ꓙꓳ ꓙꓳ ꓓꓵꓽ ꓙꓰ ꓐ ꓡˍ ꓡꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓐꓯˍ ꓡꓳ꓿
ꓮ ꓟꓶ ꓕꓯ ꓢꓲ ꓒ ꓬꓰ‐ꓢꓴ ꓐꓯ ꓖꓶ ꓟ. ꓖꓶ ꓡˍ ꓟ ꓔꓯ ꓚꓲ. ꓛꓬ ꓠꓲ, ꓟ ꓗꓪ ꓗꓷ ꓔ ꓢꓲ ꓞꓳ ꓙꓳ ꓙꓰˍ ꓟ ꓡꓰꓽ ꓟꓽ ꓞꓲ꓾ ꓠꓱ. ꓐꓯ ꓢꓴ ꓔꓯ ꓥˍ ꓟꓲ ꓐꓯ ꓟ. ꓖꓶˍ ꓕꓯ ꓠꓽ꓾ ꓚꓲ. ꓛꓬ ꓦꓲꓻ ꓔꓯ ꓡꓳ ꓓꓰ ꓕꓯꓽ ꓢꓲ ꓗꓪ ꓫꓬ, ꓔ ꓟ ꓢꓷ. ꓠꓲ, ꓙꓳ ꓢꓴ ꓡꓰ ꓐꓰ ꓗ, ꓡꓳ꓾ ꓐꓰ (ꓟ‐ꓕꓲ 7ꓽ21) ꓗꓪ ꓢꓲ ꓒ ꓬꓰ‐ꓢꓴ ꓡꓰ ꓫꓬꓽ ꓫꓬꓽ ꓡꓰꓽ ꓐꓯ ꓟ. ꓖꓶ ꓔ ꓡꓳ꓿
ꓖꓳ ꓡꓱ ꓠꓬꓲ꓾ ꓟꓬꓽ ꓠꓬꓲ ꓐꓯ ꓠꓲ, ꓫꓵˍ ꓟ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓠ, ꓟ ꓠꓬ ꓙꓲ‐ꓢꓴ ꓢꓲ ꓤ ꓒꓬꓱꓼˍ ꓕꓲ ꓖ ꓟꓽ ꓓꓻ꓿ ꓢꓲꓽ ꓫꓬ ꓕꓳꓽ ꓶ ꓵꓻ ꓔꓬ ꓕꓲꓽ ꓖ ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓟꓽ ꓓꓻ꓿ ꓔꓲ ꓒ ꓔꓲ ꓟ ꓐꓴ꓾ ꓟ. ꓟꓲꓽ ꓚ ꓟ. ꓒ ꓟ. ꓟ ꓐꓴ ꓡꓰ ꓟ. ꓖꓶ ꓡˍ ꓟ ꓔꓯ ꓠ ꓠ, ꓔꓬ, ꓕꓲꓽ ꓖ ꓟꓽ ꓓꓻ꓿ ꓪꓴ‐ꓢ ꓠꓲ, ꓡꓶꓽ ꓙꓳˍ ꓟ ꓡꓰ ꓛꓳ ꓫꓱꓽ ꓢꓲ꓾ ꓡꓯꓼ ꓕꓲꓺ ꓞꓳ ꓙꓳˍ ꓕꓯ ꓡꓰꓽ ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓐ ꓡˍ ꓡꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓐꓯˍ ꓡꓳ꓿
