ꓡꓴ‐ꓘ꓿10ꓽ24 ꓗꓪ ꓬꓰ‐ꓢꓴ ꓡꓰ ꓬꓲ ꓛꓳꓽ ꓒꓯ, ꓐꓴ ꓔꓯ꓾ “ꓟꓷꓽ ꓠꓷ, ꓝ. ꓢꓴ ꓐꓰ ꓪ ꓔꓲ. ꓮ ꓟꓬ, ꓠꓬ꓾ ꓠꓴ ꓪ ꓡꓳ. ꓟꓳˍ ꓟ ꓔꓯ ꓟꓳ ꓠꓲ, ꓫꓵˍ ꓟꓲ ꓟꓽ ꓟꓳ ꓠꓬꓲ꓿ ꓠꓴ ꓪ ꓑ ꓙꓽˍ ꓟ ꓔꓯ ꓑ ꓙꓽ ꓠꓲ, ꓫꓵˍ ꓟꓲ ꓟꓽ ꓑ ꓙꓽ ꓠꓬꓲ” ꓐꓰ ꓐꓯ ꓖꓶˍ ꓡꓳ꓿
ꓟꓲ ꓠꓯ ꓕꓱ ꓟ ꓗꓪ ꓟ. ꓒ ꓐꓰ ꓢꓳ ꓤ꓾ ꓢꓷ. ꓠꓲ, ꓙꓳ ꓢꓴ ꓐꓰ ꓟꓽ ꓙꓳ ꓢꓴ꓾ ꓠꓲ, ꓘ, ꓢꓴ ꓐꓰ ꓙ ꓣꓳꓽ ꓢꓴ꓾ ꓕꓱ ꓡꓱ ꓙꓳˍ ꓟ ꓥ ꓡꓳ꓿ ꓟꓬꓽ ꓠꓬꓲ ꓞꓳ ꓤ ꓐꓴ ꓠꓬ ꓢꓷ. ꓠꓲ, ꓙꓳ ꓢꓴ꓾ ꓒꓴ ꓙꓳ ꓢꓴ ꓐꓴ ꓔꓯ ꓡꓰꓽ ꓔ, ꓠꓲ, ꓫꓵˍ ꓡꓳ꓾ ꓕꓽ ꓠꓲ, ꓫꓵˍ ꓡꓳ꓿ ꓕꓱ ꓟ ꓠꓬ ꓞꓳ ꓤ ꓬꓲ ꓡꓲꓽ ꓥ ꓡꓳ꓿ ꓬꓲ ꓝꓳꓽ ꓥ ꓡꓳ꓿
ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲ ꓒ ꓬꓰ‐ꓢꓴ ꓡꓰ ꓐꓯˍ ꓟ ꓐꓯ ꓘꓶꓽ ꓗꓪ ꓠꓬ꓾ ꓢꓷ. ꓠꓲ, ꓙꓳ ꓢꓴ꓾ ꓙꓵꓽ ꓪ ꓙꓳ ꓢꓴ ꓐꓰ ꓙꓽ ꓣꓳ ꓠꓲ, ꓙꓳ ꓢꓴ꓾ ꓐꓯ ꓟ ꓔꓯ ꓖꓴ ꓟ. ꓖꓶ ꓔ ꓡꓳ꓿ ꓢꓲ ꓒ ꓬꓰ‐ꓢꓴ ꓐꓯ ꓘꓶꓽ ꓔꓯ ꓠꓬꓲ ꓟꓽ ꓟꓵ ꓬꓰ ꓢꓲ ꓟꓽ ꓠ ꓠ, ꓟ ꓪ ꓔꓲ. ꓐꓴ꓾ ꓢꓷ. ꓠꓲ, ꓙꓳ ꓢꓴ ꓐꓴ ꓠꓬ ꓬꓰ‐ꓢꓴ ꓐꓰ ꓶꓽ ꓤ ꓔꓬ ꓡꓳ꓿ ꓬꓰ‐ꓢꓴ ꓟ. ꓖꓶˍ ꓟ ꓔꓯˍ ꓟꓲ ꓟꓽ ꓠ ꓠ,꓿ ꓖꓳ ꓟ ꓪꓴ. ꓠꓬꓲ ꓬꓲ ꓪ ꓠꓬ ꓬꓰ‐ꓢꓴ ꓡꓰ ꓟ. ꓖꓶˍ ꓟ ꓟꓴꓽ ꓗꓪ ꓗꓴꓷꓼ ꓟ. ꓟꓲꓽ꓾ ꓔꓱ, ꓚꓵˍ ꓟ ꓚꓱ,꓾ ꓙ ꓗꓳ ꓫꓱ. ꓤˍ ꓟ ꓟ. ꓟꓲꓽ ꓐꓰ꓾ ꓛꓳ ꓫꓱꓽ ꓠꓯ, ꓟ ꓙꓵꓽ ꓗ ꓚꓱ, ꓐꓴ ꓔꓯ ꓬꓲ ꓪ ꓟꓽ ꓑ ꓙꓽꓳ꓿
ꓖꓳ ꓡꓱ ꓥˍ ꓟꓲ ꓢꓷ. ꓠꓲ, ꓟꓽ ꓢꓷ. ꓢꓴ꓾ ꓞꓳ ꓫ. ꓐꓴ꓾ ꓢꓲ ꓒ ꓐꓯ ꓘꓶꓽ ꓔꓯ ꓠꓲ, ꓒꓵꓽ ꓠꓲ, ꓡꓱ ꓠ ꓠ, ꓠꓲ, ꓫꓵ ꓢꓴ ꓐꓴˍ ꓡꓰꓽ ꓢꓲ ꓒ ꓬꓰ‐ꓢꓴ ꓡꓰ ꓬꓰ ꓟ. ꓖꓶˍ ꓟ ꓓꓵꓽ ꓙ ꓮʼ ꓓꓴ ꓢꓷ. ꓡꓰ ꓓꓴ ꓐꓰ꓾ ꓬꓲ ꓟ. ꓖꓶˍ ꓟ ꓶꓼ ꓘꓶꓽ ꓫꓱ, ꓘꓶꓽ ꓐꓴ ꓔꓯ ꓑꓽ ꓙ ꓪ꓾ ꓟꓳꓻ ꓪˍ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓪ ꓐꓴ ꓔꓯ “ꓶꓼ ꓛꓳ ꓢꓴ ꓥ ꓡꓳ”꓾ ꓐꓰ ꓐꓯ ꓖꓶˍ ꓡꓳ꓿ ꓬꓰ‐ꓢꓴ ꓐꓰ ꓒ ꓕꓲ ꓟꓽ ꓔꓬ ꓢꓴ ꓐꓴ ꓠꓬ ꓪꓴ‐ꓢ ꓬꓲ ꓪꓽ ꓠꓬꓲˍ ꓟ ꓔꓯ ꓟꓽ ꓟꓶ꓿ ꓣꓳ ꓤꓶꓻ ꓗꓪ ꓥˍ ꓟꓲ ꓪꓴ‐ꓢ ꓬꓲ ꓪꓽ ꓠꓬꓲˍ ꓟ ꓓꓵꓽ ꓙ ꓮʼ ꓡꓰ ꓢꓴ ꓢꓷ. ꓡꓰ ꓓꓴ ꓟꓬꓱꓽ ꓐꓴ ꓔꓯ ꓑꓽ ꓙ ꓠꓬꓲ ꓟꓳꓻ ꓠꓬꓲ ꓠꓲ, ꓫꓵˍ ꓠꓬ꓾ ꓪꓴ‐ꓢ ꓐꓯ ꓘꓶꓽ ꓔꓯ ꓠ ꓠ, ꓠꓲ, ꓫꓵˍ ꓟ ꓠꓲ, ꓟ ꓙꓳ ꓠ ꓔ ꓟ ꓥ ꓢꓲ ꓠꓬꓲ꓾ ꓖꓳ ꓟ ꓔꓯ ꓛꓳ ꓫꓱꓽ ꓠꓲ, ꓫꓵˍ ꓟ ꓠꓲ, ꓡꓶˍ ꓟꓲ ꓙꓳ ꓠ ꓗ, ꓡꓳ꓿ ꓦꓻ ꓢꓯꓼ ꓪ ꓟꓶ ꓠꓲ, ꓫꓵˍ ꓟ ꓑꓶ. ꓓꓴ ꓬꓲ ꓙꓵ, ꓖꓶ ꓢꓲ ꓪꓴ‐ꓢ ꓐꓯ ꓘꓶꓽ ꓠ ꓠ, ꓔꓬ ꓢꓴ ꓐꓴ꓾ ꓪꓽ ꓘꓴ ꓦꓲꓻ ꓗꓪ ꓙꓰ ꓢꓲ ꓪꓴ‐ꓢ ꓐꓯ ꓘꓶꓽ ꓠ ꓠ, ꓢꓴ ꓐꓴ ꓠꓬ꓾ ꓟꓽ ꓢꓷ. ꓟ ꓔꓯ ꓢꓷ. ꓪ ꓡꓰ ꓟ ꓑꓶ. ꓓꓴ꓾ ꓶꓼ ꓛꓳ ꓫꓱ, ꓛꓳˍ ꓡꓳ꓿ ꓑ ꓙꓽ ꓪ ꓡꓰ ꓟ ꓪꓴ‐ꓢ ꓐꓯ ꓘꓶꓽ꓾ ꓶꓼ ꓓꓳꓽ ꓫꓱ, ꓓꓳꓽ ꓐꓴ ꓔꓯ ꓥˍ ꓟꓲ ꓡꓯꓼ ꓕꓲꓺ ꓛꓳ ꓫꓱꓽ ꓐ ꓡ ꓠ, ꓟ ꓢꓯꓼ ꓕꓵꓼ ꓙꓰ ꓡꓯ꓿
