ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓙꓵꓽ ꓢꓴ ꓧꓪ. ꓧꓪꓸꓼ꓾ ꓣꓳ ꓮ ꓙꓵꓽ ꓠꓬ ꓢꓲ ꓒ ꓬꓰ‐ꓢꓴ ꓝꓮꓲ ꓕꓲ ꓧꓪ, ꓬꓯꓼ ꓡˍ ꓟ ꓔꓯ ꓡꓳ. ꓠꓬ, ꓔꓬ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ꓾ ꓬꓲ ꓟꓴꓽ ꓗꓪ ꓗꓴꓷꓼ ꓗꓪ ꓓꓯꓻ ꓙꓰˍ ꓕꓯ ꓬꓲ ꓝꓲ ꓓꓴ ꓐꓴ ꓔꓯ꓾ ꓥꓪ ꓠꓬ ꓝꓮꓲ ꓕꓲ ꓧꓪ, ꓡˍ ꓢꓰꓽ ꓥꓳ꓾ ꓐꓰ ꓐꓯ ꓔ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓚꓵ ꓚꓵ ꓝꓮꓲ ꓕꓲꓽ ꓧꓪ, ꓡˍ ꓢꓰꓽ ꓥꓳ꓿
ꓢ. ꓠꓯ ꓢꓲ‐ꓒ‐ꓦꓬꓼ‐ꓠꓬꓲ ꓗꓪ ꓣꓳ ꓑ ꓙꓽ ꓪˍ ꓟ ꓢꓲꓽ ꓫꓬ ꓕꓳꓽ ꓶ ꓠꓬ (ꓟ‐ꓘꓳ 13ꓽ24‐32) ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓟꓵꓽ ꓘꓳꓼ ꓖꓴ ꓡꓰˍ ꓟ ꓦꓬꓼ ꓠꓬꓲ ꓗꓪ꓾ ꓟꓲ ꓠꓯ ꓕꓱ ꓟ ꓐꓬ ꓡꓰˍ ꓟ ꓦꓬꓼ ꓠꓬꓲ ꓗꓪ ꓮ ꓡꓲ ꓬꓰ ꓗ, ꓡ ꓐꓯˍ ꓟ ꓔꓯ ꓬꓲ ꓢꓷ. ꓡꓰ ꓓꓴ ꓐꓯ ꓟꓳ. ꓖꓶˍ ꓡꓳ꓿
ꓖꓳ ꓕꓯ ꓟ ꓦꓬꓼ ꓠꓬꓲ ꓗꓪ ꓟꓲꓽ ꓟꓲ ꓥˍ ꓟꓲ ꓟꓽ ꓓꓳ ꓡꓺꓳ꓿ ꓦ ꓐ ꓛꓲ ꓥˍ ꓟꓲ ꓟꓽ ꓣꓳꓺ ꓡꓺꓳ꓿ ꓕꓱ ꓟˍ ꓡꓰ ꓐꓰ ꓟꓴꓽ ꓗꓪ ꓗꓪ ꓟ ꓗꓴ ꓤ ꓥˍ ꓟꓲ ꓞꓰꓻ ꓡˍ ꓥꓳ꓾ ꓐꓰ ꓐꓯ ꓔ ꓡꓳ꓿ ꓢꓲ ꓒ ꓬꓰ‐ꓢꓴ ꓡꓰ “ꓘꓶꓽ ꓢꓶꓽ ꓜꓲ ꓬꓲ ꓒꓬꓽ ꓔꓯ ꓡꓳ. ꓠꓬꓲ꓾ ꓬꓲ ꓒꓬꓽ ꓖꓳ ꓟ ꓧꓳꓽ ꓡꓰˍ ꓠꓬ ꓞꓻ ꓝꓲ. ꓛꓲ ꓡꓺꓳ ꓐꓰ ꓠꓴ ꓪ ꓢꓷ.ˍ ꓡꓳ꓿ ꓕꓱ ꓡꓱ ꓫꓵꓽ ꓦꓬꓼ ꓠꓬꓲ ꓓꓳ ꓡˍ ꓕꓯ꓾ ꓢꓲ ꓒ ꓬꓰ‐ꓢꓴ ꓥꓪ ꓬꓯꓼ ꓡˍ ꓟ ꓬꓲ ꓙꓵ, ꓛꓲ ꓡˍ ꓥꓳ꓾” ꓐꓰ ꓐꓯ ꓖꓶ ꓡˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳꓽ Sign of the Time ꓐꓰ ꓐꓯˍ ꓟ ꓦꓬꓼ ꓠꓬꓲ ꓬꓲ ꓚꓱ, ꓔꓯ ꓣꓳꓽ ꓟꓬ ꓢꓶꓽ ꓒꓴ ꓢꓲ ꓡꓳ. ꓠꓬꓲ ꓡꓯ꓿ ꓮ ꓫꓵꓽ ꓥˍ ꓟꓲ ꓓꓳ ꓡˍ ꓕ ꓑꓳꓸꓼ ꓠꓬ ꓬꓲ ꓚꓰꓺ ꓐꓯˍ ꓟ ꓙꓳˍ ꓡꓳ꓿ ꓧꓪꓽ ꓒꓴ ꓫꓵꓽ ꓥꓳꓽ ꓗꓪ ꓐꓰ ꓐꓯˍ ꓠꓬ Cause and Effect ꓐꓰ ꓐꓯˍ ꓟ “ꓓꓳ ꓡˍ ꓟ ꓐꓰ ꓬꓲ ꓚꓰꓺ” ꓕꓱ ꓡꓱ ꓠꓬꓲꓽ ꓙꓰꓽ ꓙꓳˍ ꓡꓳ꓿
ꓮ ꓟꓶ ꓣꓳꓽ ꓗꓳ ꓡꓳ ꓗꓪ ꓡꓳ. ꓠꓬꓲˍ ꓕꓯ꓾ ꓟꓯꓼ ꓓꓶꓽ ꓡꓯꓽ ꓘꓳ ꓢꓰꓼ ꓡꓯꓽ ꓘꓳˍ ꓟ ꓦꓬꓼ ꓠꓬꓲ꓾ ꓞꓳ ꓘꓴꓽ ꓛꓬꓽ ꓔꓳ. ꓟꓬꓽˍ ꓟ ꓦꓬꓼ ꓠꓬꓲ꓾ ꓕꓱ ꓡꓱ ꓫꓵꓽ ꓔꓳ, ꓜꓳꓽ ꓔꓬ ꓡꓳ꓿ ꓕꓱ ꓟ ꓡꓰꓽ ꓟꓽ ꓞꓲ ꓣꓳ ꓟꓽ ꓑ ꓙꓽ ꓠꓬꓲ ꓟ ꓠꓻ ꓫꓵꓽ ꓠꓻ ꓙꓰꓽ ꓬꓲ ꓫꓵꓽ ꓬꓲ ꓙꓰꓽ ꓮ ꓟꓬ, ꓓꓳ ꓡˍ ꓟ ꓙꓳˍ ꓡꓳ꓿ ꓕꓱ ꓟ ꓔꓯ ꓡꓳ. ꓠꓬꓲ ꓢꓲ꓾ ꓣꓳ ꓠꓬ ꓮ ꓡꓲ ꓬꓰ ꓠꓯ, ꓡ ꓐꓯ ꓟ ꓔꓯ꓾ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟ. ꓖꓶ ꓡ ꓔꓬ ꓡꓳ꓿
ꓣꓳ ꓠꓬ ꓕꓱ ꓡꓱ ꓮ ꓠꓱ ꓕꓲꓽ ꓞꓲꓼ ꓟꓽ ꓔꓳ, ꓜꓳꓽ ꓠꓬꓲ ꓟ ꓔꓳ, ꓜꓳꓽ ꓡ ꓕꓯ ꓣꓳꓽ ꓢꓷ. ꓠ ꓔ ꓟ ꓠꓬ꓾ ꓦꓬꓼ ꓠꓬꓲ ꓖꓳ ꓟ ꓠꓶꓽ ꓡ ꓔꓬꓳ꓾ ꓐꓰ ꓐꓯˍ ꓟ ꓥ ꓡꓳ꓿ ꓦꓬꓼ ꓠꓬꓲ ꓖꓳ ꓟ ꓠꓬ ꓮ ꓕꓯ ꓥ ꓣꓳꓽ ꓟꓽ ꓢꓷ.꓿ ꓟꓳꓼ ꓡꓳ ꓥ꓾ ꓢ ꓘꓪ ꓥ꓾ ꓣꓳꓽ ꓟꓽ ꓢꓷ.꓿ ꓣꓳ ꓠꓬ ꓩꓼ ꓔ ꓢꓲ ꓠꓬꓲ꓾ ꓧꓪ. ꓛꓲꓽ ꓢꓲ ꓠꓬꓲ ꓔꓬ, ꓠ ꓗ, ꓡꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓐꓯˍ ꓡꓳ꓿
ꓢꓲ ꓒ ꓬꓰ‐ꓢꓴ ꓔꓯ ꓣꓳꓽ ꓠꓬꓲꓽ ꓚꓱ, ꓗꓪ ꓐꓰ ꓟꓳꓻ ꓓ, ꓡꓳ꓿ ꓬꓲ ꓪꓴ. ꓕꓲ ꓚꓱ, ꓟ ꓠꓬ꓾ ꓢꓲ ꓒ ꓬꓰ‐ꓢꓴ ꓝꓮꓲ ꓕꓲ ꓧꓪ, ꓛꓲ ꓡˍ ꓕꓯ ꓫꓵꓻ ꓢꓴ ꓢꓯ. ꓢꓴ ꓮ ꓙꓵꓽ ꓠꓬ ꓪꓴ‐ꓢ ꓟꓲꓽ ꓙꓬ ꓗꓪ ꓦꓰꓼ ꓞ, ꓢꓲ ꓠꓬꓲ ꓐꓯ ꓟꓴ ꓘꓶꓽˍ ꓟ ꓟꓶˍ ꓥꓳ꓿ ꓖꓳ ꓕꓯ ꓕꓲ ꓧꓪ, ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓟꓳꓻˍ ꓡꓳ꓿ ꓝꓮꓲ ꓕꓲ ꓧꓪ, ꓟ ꓠꓬ꓾ ꓟꓴꓽ ꓗꓪ ꓟꓲ ꓠꓯ ꓕꓱ ꓟ ꓟꓽ ꓖꓴ ꓡꓰ ꓥˍ ꓟꓲ ꓣꓳ ꓤꓶꓻ ꓖꓴ ꓡꓰˍ ꓥˍ ꓟꓲ꓾ ꓣꓳ ꓐꓱ ꓶ ꓣꓳ ꓟꓴꓽ ꓗꓪ ꓖꓴ ꓡꓰˍ ꓟ ꓕꓲꓽ ꓡꓰ, ꓥꓳ꓿ ꓟꓳꓼ ꓡꓳ ꓢ ꓘꓪ ꓮ ꓕꓯ ꓥ ꓟꓽ ꓢꓷ. ꓐꓯ ꓟ ꓠꓬ꓾ ꓣꓳ ꓤꓶꓻ ꓥˍꓟꓲ ꓣꓳ ꓮ ꓕꓯ ꓫꓵꓻˍ ꓥ ꓟꓽ ꓢꓷ.꓿ ꓢ. ꓠꓯ ꓢ. ꓖꓶ ꓟꓬꓱꓽ ꓬꓰ ꓠ, ꓟ ꓣꓳꓽ ꓙꓽ ꓖꓶ ꓔ ꓥ ꓟꓲ꓾ ꓢ. ꓠꓯ ꓪ ꓠꓬꓲ ꓕꓳꓽ ꓶ ꓢꓳ ꓠ, ꓟ꓾ ꓖꓪ ꓙꓱ ꓜꓲꓼ ꓓꓴ ꓬꓰ ꓠ, ꓟ꓾ ꓟꓬꓱꓽ ꓬꓰ ꓠ, ꓟ꓾ ꓫꓵ ꓓꓵꓽ ꓠ, ꓟ ꓙꓽ ꓖꓶ ꓔ ꓥˍ ꓟꓲ꓾ ꓠꓬꓲ. ꓟꓰ ꓟꓶꓽ ꓘꓶꓽ ꓣꓳ ꓢꓯꓼ ꓟꓬ ꓖꓴ ꓡꓰˍ ꓟ ꓦꓬꓼ ꓠꓬꓲ ꓥˍ ꓟꓲ ꓙꓳ ꓡˍ ꓥꓳ꓿
ꓖꓳ ꓡꓱ ꓠꓬ ꓢꓲ ꓒ ꓬꓰ‐ꓢꓴ ꓡꓰ ꓣꓳꓽ ꓔꓯ꓾ ꓙꓽ ꓖꓶ ꓢꓲ ꓔꓬ꓾ ꓐꓰ ꓐꓯ ꓔ ꓡꓳ꓿ ꓮ ꓫꓵꓽ ꓗꓪ ꓥˍ ꓟꓲ ꓟꓬ ꓢꓶꓽ ꓒꓴ ꓔ ꓢꓲ ꓔꓬ꓿ ꓟꓽ ꓙꓽ ꓜꓲꓼ ꓜꓲꓼ ꓟꓽ ꓧꓪ. ꓛꓲꓽ ꓛꓲꓽ ꓕꓽ ꓬꓲꓼ ꓟꓶ ꓔꓬ꓾ ꓐꓰ ꓣꓳ ꓔꓯ ꓐꓯ ꓖꓶ ꓡˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢ. ꓠꓯ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡˍ ꓟ ꓠꓬ꓾ ꓮ ꓡꓲ ꓟ ꓔꓯ ꓥˍ ꓟꓲ ꓙꓵꓻ ꓠꓲ, ꓟꓬ ꓢꓶꓽ ꓗꓪ ꓐꓰ ꓡꓳ. ꓠꓬꓲ꓿ ꓮꓽ ꓔꓳ ꓕꓽ ꓔꓬ꓾ ꓮꓽ ꓔꓳ ꓕꓽ ꓙ ꓬꓰ ꓝꓲ꓿ ꓮ ꓫꓵꓽ ꓕꓲ ꓟ ꓣꓳ ꓤꓶꓻ ꓗꓪ ꓔꓳ, ꓜꓳꓽˍ ꓥ ꓟꓲ ꓕꓱ ꓟ ꓮ ꓫꓵꓽ ꓬꓲ. ꓬꓲ ꓢꓲ ꓥ ꓡ꓾ ꓐꓰ ꓬꓲ ꓚꓰꓺ ꓟꓰ, ꓠꓬꓲ꓿ ꓫꓵꓽ ꓪꓴ ꓕꓱ ꓟ ꓗꓪ ꓐꓰ ꓪꓴ‐ꓢ ꓥꓪ ꓔꓯ ꓮ ꓫꓵꓽ ꓐꓯ ꓖꓶ ꓡ ꓔꓬ ꓡ꓾ ꓥꓪ ꓟꓽ ꓓꓵꓽ ꓙꓽ ꓔ ꓟ ꓔꓳ, ꓜꓳꓽˍ ꓟ ꓕꓲ ꓑ, ꓗꓪ ꓐꓰ ꓪꓴ‐ꓢ ꓠꓬ ꓥꓪ ꓔꓯ ꓮ ꓫꓵꓽ ꓬꓰ ꓝꓲ ꓠꓲ, ꓫꓵˍ ꓡ꓾ ꓐꓯˍꓟ ꓔꓯ ꓮ ꓕꓯ ꓥˍ ꓟꓲ ꓠꓺ ꓠꓬꓲ ꓢꓲ ꓠꓬꓲ꓾ ꓧꓪ. ꓛꓲꓽ ꓢꓲ ꓔꓬ꓿ ꓖꓳ ꓡꓱ ꓔꓬ, ꓠꓬ ꓣꓳꓽ ꓠꓬ ꓢꓲ ꓒ ꓬꓰ‐ꓢꓴ ꓡˍ ꓕꓯ ꓟꓬꓱꓽ ꓬꓰ ꓔꓬ ꓟ ꓚꓳ ꓑ. ꓔꓯ ꓫꓱ.ˍ ꓥꓳ꓿
ꓢꓲ ꓒ ꓬꓰ‐ꓢꓴ ꓐꓯ ꓔ ꓡꓳ꓾ ꓢꓲ ꓒ ꓬꓲꓼ ꓡˍ ꓕꓯ ꓟꓬꓱꓽ ꓬꓰ ꓔꓬ ꓟ ꓚꓳ ꓑ. ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ꓾ ꓐꓰ ꓐꓯ ꓔ ꓡꓳ꓿ ꓢꓲ ꓒ ꓬꓰ‐ꓢꓴ ꓢ. ꓠꓯ ꓪ ꓠꓬꓲ ꓮ ꓕꓯ ꓛꓲ ꓡˍ ꓥ ꓐꓯ ꓟ ꓔꓯ ꓠꓲ, ꓟ ꓪꓴꓽ ꓧꓶ ꓢꓲ ꓠꓬꓲ ꓣꓳ ꓡꓳ. ꓠꓬ, ꓔꓬ ꓟꓽ ꓛꓵ꓿ ꓣꓳ ꓕꓲ ꓠꓬꓲ ꓬꓰ ꓠ, ꓟ ꓕꓲ ꓠꓬꓲ ꓜꓳꓽ ꓜꓳꓽ ꓐꓰ ꓙꓵꓻ ꓠꓲ, ꓗꓪ ꓐꓰ ꓬꓰˍ ꓥꓳ꓾ ꓙꓵꓻ ꓠꓲ, ꓗꓪ ꓐꓰ ꓞꓳ ꓙꓳˍ ꓥꓳ ꓐꓯ ꓠꓬ ꓣꓳꓽ ꓠꓬ꓾ ꓢꓲ ꓒ ꓬꓰ‐ꓢꓴ ꓟꓲꓽ ꓙꓬ ꓗꓪ ꓑꓶ. ꓑꓶ. ꓡꓰꓽ ꓦꓰꓼ ꓞ, ꓐ ꓡˍ ꓥꓳ꓾ ꓐꓰ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓳ. ꓖꓶ ꓡ ꓔꓬ ꓡꓳ꓿ ꓮ ꓙꓵꓽ ꓢꓴ ꓣꓳꓽ ꓕꓲ ꓠꓬꓲ ꓕꓲ ꓠꓬꓲ ꓬꓰ ꓙꓲꓽ ꓙꓳˍ ꓟ ꓘꓴꓽ ꓠꓯꓸꓼ ꓗꓪ ꓙꓵꓻ ꓠꓲ, ꓗꓷ ꓢꓲ ꓠꓵꓻ ꓠꓲ, ꓗꓷ ꓢꓲ꓾ ꓢꓲ ꓒ ꓬꓰ‐ꓢꓴ ꓔꓯ ꓥꓳ ꓡꓳ. ꓢꓲ ꓠꓬꓲ ꓞꓳ ꓙꓳ ꓙꓰ ꓡꓯ꓿ ꓮ ꓙꓵꓽ ꓔꓯ ꓪꓴ‐ꓢ ꓶꓼ ꓤ ꓫꓱ, ꓤ ꓡꓴꓽ ꓖꓶ ꓡ ꓝꓲ꓿
