ꓖꓳ ꓓꓱꓽ ꓔꓲꓹ ꓟꓶ ꓔ ꓢꓴ ꓮ ꓙꓵꓽ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓪ ꓠꓹ ꓟ ꓡꓯꓼ ꓟ꓾ ꓥ ꓠꓬ꓾ ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓠꓹ ꓟ ꓘꓴꓻ ꓔ ꓟ ꓕꓳꓽ ꓶ ꓟꓶ ꓡꓰ ꓢꓴ ꓐꓴˍ ꓡꓰꓽ ꓥ ꓡꓳ= ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓙꓰˍ ꓡ? ꓟꓽ ꓓꓵꓽ ꓙꓰ ꓡ? ꓐꓯˍ ꓟ ꓠꓬ ꓣꓳꓽ ꓙ ꓫꓱꓽ ꓔꓬ ꓟ ꓚꓱꓹ ꓗꓪˍ ꓡꓰꓽ ꓗꓴꓸ ꓙꓲ ꓙꓳˍ ꓟ ꓥ ꓡꓳ= ꓟꓴꓽ ꓗꓪ ꓗꓴꓷꓼ ꓗꓪ ꓚꓵ ꓚꓵ ꓓꓵꓽ ꓪ ꓠꓹ ꓟ ꓚꓱꓹ ꓠꓬ ꓙꓲꓻ ꓫꓬ ꓢꓲ ꓔꓱꓹ ꓚꓵˍ ꓟ ꓙꓲ-ꓢꓴ ꓢꓲ ꓤ ꓤꓶꓻ ꓠꓯꓸꓼ ꓗꓪ ꓚꓲꓸ ꓛꓬ ꓤꓶꓻ ꓔꓯ ꓞꓳ ꓙꓳ ꓢꓯꓸ ꓔꓬ ꓠꓹ ꓟ ꓡꓰꓽ ꓥ ꓡꓳ=
ꓖꓳ ꓡꓱ ꓥˍ ꓟꓲ ꓟꓲ ꓠꓯ ꓗꓪ ꓙꓳ ꓫꓵꓽ ꓙꓳ ꓙꓰꓽ ꓕꓯꓽ ꓢꓲ ꓮ ꓘꓶꓸ ꓠꓲꓹ ꓥꓳꓺ ꓡꓰ ꓕꓯ ꓠꓽ ꓙꓲˍ ꓟ ꓔꓯ ꓡꓰꓽ ꓟꓽ ꓞꓲꓺ꓾ ꓟꓽ ꓓ ꓙꓲꓻ ꓓꓰ ꓡꓰˍ ꓟ ꓐꓴ ꓔꓯˍ ꓟꓲ ꓡꓲꓹ ꓗꓷˍ ꓥꓳ=
ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲ ꓒ ꓬꓰ-ꓢꓴ ꓡꓰ ꓐꓯ ꓔ ꓟ ꓦ ꓟꓲ ꓕꓲ ꓡꓯꓼ ꓠꓬ ꓟꓲ ꓠꓯ ꓖꓴꓽ ꓙꓴꓽ ꓔꓯ ꓔꓯꓺ ꓔ ꓟ ꓥ ꓢꓲ꓾ ꓮ ꓠꓬꓲꓽ ꓠꓬ ꓙꓵꓽ ꓪ ꓐꓰ ꓤ ꓟꓶ ꓘꓴˍ ꓟ ꓠꓬ ꓟꓲ ꓠꓯ ꓞꓳ ꓤ ꓫꓵꓽ ꓠꓲꓹ ꓡꓶꓽ ꓐꓴ ꓔꓯ ꓔꓯꓺ ꓔ ꓟ ꓥ ꓡꓳ= ꓟꓲ ꓠꓯ ꓖꓴꓽ ꓙꓴꓽ꓾ ꓙꓵꓽ ꓪ ꓐꓰ ꓚꓲꓸ ꓛꓬ ꓫꓵꓽ ꓧꓪꓽ ꓠꓲꓹ ꓡꓶꓽ ꓗ ꓠꓯꓸ ꓗꓪ ꓡꓰꓽ ꓠꓲꓹ ꓥꓳ ꓢꓲ ꓮ ꓕꓯ ꓟꓲ ꓖꓼ ꓛꓳ ꓔꓬ ꓕꓯ ꓠꓽ꓾ ꓣꓳ ꓐꓴ ꓠꓬ ꓡꓳꓹ ꓬꓰˍ ꓕꓯ ꓕꓲ ꓞꓲꓼ ꓕꓲ ꓑ ꓢꓲꓺ ꓡꓲ ꓗꓹ ꓛꓲꓽˍ ꓟ ꓔꓯˍ ꓟꓲ ꓡꓲꓹ ꓗꓷˍ ꓗꓪ ꓛꓲ ꓗꓷ ꓡꓰˍ ꓥꓳ= ꓚꓲꓸ ꓛꓲ ꓠꓲꓹ ꓡꓶꓽ ꓔꓯ ꓡꓰꓽ ꓖꓼ ꓛꓳ ꓔꓬ ꓕꓯ ꓟꓲ ꓠꓯ ꓐꓰ ꓗꓴꓸ ꓙꓲ ꓙꓳˍ ꓟ꓾ ꓟꓽ ꓙꓲꓻ ꓟꓽ ꓜꓳꓽ ꓠꓯꓸꓼ ꓗꓪ ꓓꓵꓽ ꓡꓰ ꓢꓲ ꓖꓳ ꓗꓪ ꓐꓰ ꓡꓲꓹ ꓓꓳ ꓟꓽ ꓐ ꓡ ꓕꓯ ꓠꓽ ꓙꓲˍ ꓟ ꓔꓱꓹˍ ꓟ ꓐꓴ ꓔꓯ ꓢꓲꓺ ꓣꓴ ꓢꓲ ꓛꓳ ꓫꓱꓽ ꓠꓹ ꓟ ꓮ ꓘꓶꓸ ꓫꓸ ꓡꓰˍ ꓥꓳ=
ꓖꓳ ꓡꓱ ꓠꓬꓲ ꓣꓳ ꓐꓴ ꓠꓬ ꓪꓴ-ꓢ ꓡꓰ ꓘꓴꓻ ꓔ ꓟ ꓟꓴꓽ ꓗꓪ ꓗꓴꓷꓼ ꓟ ꓜ ꓫꓳ ꓑꓮꓲꓽ ꓗꓪ ꓓꓵ ꓪ ꓠꓹ ꓟ ꓐꓱ ꓶ ꓟꓲ ꓠꓯ ꓗꓪ ꓞꓳ ꓙꓳ ꓔꓬ ꓕꓯ ꓟꓲ ꓠꓯ ꓐꓳ ꓶ꓾ ꓙꓵꓽ ꓪ꓾ ꓚꓲꓸ ꓛꓬ ꓠꓲꓹ ꓡꓶꓽ ꓢꓶꓸ ꓟꓽ ꓞꓲꓺ ꓪꓴ-ꓢ ꓐꓯ ꓘꓶꓽ ꓔꓯ ꓠꓻ ꓠꓹ ꓢꓲ ꓛꓳ ꓫꓱꓽ ꓠꓹ ꓟ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓐꓴ ꓔꓯ ꓬꓲꓼ ꓠꓬꓲꓸ ꓖꓶ ꓡ ꓔꓬ ꓡꓳ=
