ꓟ‐ꓘꓳ꓿12ꓽ28‐34
ꓙꓵꓽ ꓗ ꓟ. ꓒ ꓕꓲꓽ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓔꓬ ꓗꓪ ꓡ ꓢꓲ ꓠꓬꓲ꓾ ꓙꓵꓽ ꓗ ꓘꓴꓽ ꓠꓯꓸꓼ ꓗꓪ ꓮ ꓡꓲ ꓙꓵꓽ ꓗ ꓠꓬ ꓪꓴꓽ ꓓꓰˍ ꓟ꓾ ꓠ ꓠꓬꓲˍ ꓡꓳ꓿ ꓢꓲ ꓒ ꓬꓰ‐ꓢꓴ ꓡꓰ ꓬꓲ ꓔꓯ꓾ ꓠꓴ ꓪ ꓐ, ꓐ ꓪꓴ‐ꓢ ꓔꓯ ꓕꓲ ꓠꓲ, ꓟ ꓡꓱꓸꓼ꓾ ꓕꓲ ꓙꓽ ꓠꓲ, ꓡꓱꓸꓼ꓾ ꓕꓲ ꓶ ꓟꓬ ꓡꓱꓸꓼ ꓢꓯꓼ ꓙꓳˍ ꓕ ꓑꓳꓸꓼ ꓠꓲ, ꓠꓵ꓿ ꓝꓮꓲ ꓠꓴ ꓠꓶ ꓛꓳꓽ ꓕꓲ ꓛꓳꓽ ꓔꓯ ꓥˍ ꓟꓲ ꓠꓴ ꓖꓳ ꓓꓱꓽ ꓕꓲ ꓡꓰ, ꓐꓰ ꓠꓲ, ꓠꓵ꓾ ꓐꓰ ꓐꓯ ꓖꓶˍ ꓡꓳ꓿ ꓖꓳ ꓕꓱ ꓙꓵꓽ ꓗ ꓟ. ꓒ ꓖꓳ ꓟ ꓠꓬ꓾ ꓟ. ꓒꓽꓳ꓾ ꓠꓴ ꓠꓬ ꓐꓯ ꓜꓳꓽˍ ꓡꓳ꓾ ꓐꓯ ꓖꓶˍ ꓡꓳ꓿ ꓢꓲ ꓒ ꓬꓰ‐ꓢꓴ ꓡꓰ ꓬꓲ ꓔꓯ ꓒꓳ, ꓖꓶ ꓢꓲ ꓠꓬꓲ꓾ ꓠꓴ ꓠꓬ ꓟꓴ ꓗꓪ ꓗꓴꓷꓼ ꓐꓰ ꓶ ꓤ ꓟꓽ ꓗꓷ, ꓞ, ꓓ,ꓳ꓾ ꓐꓰ ꓐꓯ ꓖꓶˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲꓽ ꓫꓬ ꓕꓳꓽ ꓶ ꓕꓱ ꓟ ꓔꓯ ꓣꓳ ꓡꓳ. ꓠꓬꓲˍ ꓕꓯ ꓬꓲ ꓪꓴ. ꓕꓲ ꓫꓵꓽ ꓟ ꓠꓬ ꓪꓴ‐ꓢ ꓙꓵꓽ ꓗ ꓔꓯ ꓣꓳ ꓪꓴ. ꓠꓶ. ꓗꓪ ꓐꓰ ꓢꓷ.ˍ ꓕꓲ ꓖ꓾ ꓟꓴ ꓗꓪ ꓗꓴꓷꓼ ꓗꓪ ꓟꓽ ꓛꓲ ꓬꓰ꓾ ꓐꓰ ꓣꓳ ꓢꓷ. ꓪˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓒ‐ꓡꓲ‐ꓢꓷ ꓖꓳ ꓕꓲ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓫꓵꓽ ꓠꓬꓲˍ ꓡꓳ꓿ ꓙꓵꓽ ꓗ ꓮ ꓙꓵꓽ ꓡꓱꓸꓼ ꓘꓴꓽ ꓗꓪ ꓪꓴꓽ ꓓꓰ ꓡꓰ ꓟ ꓠꓬ ꓕꓱ ꓠꓬꓲꓽ ꓫꓵꓽ ꓥ ꓡꓳ꓿ ꓙꓵꓽ ꓗ ꓮ ꓙꓵꓽ ꓠꓬ ꓕꓱ ꓠꓬꓲꓽ ꓫꓵꓽ ꓗꓪ ꓚꓳ ꓓ, ꓡꓳ꓾ ꓐꓯ ꓟ ꓒ‐ꓡꓲ‐ꓢꓷ ꓖꓳ ꓕꓲ ꓣꓳ ꓢꓷ.ˍ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓠꓬꓲ ꓢꓲ ꓒ ꓬꓰ‐ꓢꓴ ꓔꓯ ꓫꓵꓽ ꓠꓬꓲˍ ꓟ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓥˍ ꓟꓲ ꓬꓲ ꓔꓯ ꓔꓱ, ꓔꓱ,ˍ ꓐꓰ ꓒꓳ, ꓖꓶˍ ꓡꓳ꓿ ꓠꓴ ꓐ, ꓐ ꓪꓴ‐ꓢ ꓔꓯ ꓕꓲ ꓠꓲ, ꓟ ꓡꓱꓸꓼ꓾ ꓕꓲ ꓙꓽ ꓠꓲ, ꓡꓱꓸꓼ꓾ ꓕꓲ ꓶ ꓟꓬ ꓡꓱꓸꓼ ꓠꓲ, ꓠꓵꓻ꓾ ꓠꓴ ꓠꓶꓽ ꓛꓳꓽ ꓕꓲ ꓛꓳꓽ ꓔꓯ ꓥ ꓟꓲ ꓠꓴ ꓖꓳ ꓓꓱꓽ ꓕꓲ ꓡꓰ, ꓐꓰ ꓠꓲ, ꓠꓵꓻ꓾ ꓐꓰ ꓢꓲ ꓒ ꓬꓰ‐ꓢꓴ ꓒꓳ, ꓖꓶˍ ꓡꓳ꓿
ꓙꓵꓽ ꓗ ꓥ ꓕ ꓑꓳꓸꓼ ꓔꓯ ꓣꓳ ꓡꓳ. ꓠꓬꓲˍ ꓕꓯ ꓮ ꓡꓲ ꓙꓵꓽ ꓗ ꓥˍ ꓟꓲ ꓠꓵꓻ ꓠꓲ, ꓘꓴꓽ ꓠꓯꓸꓼ ꓗꓪ ꓡꓰꓽ ꓔꓶ ꓓ, ꓟ ꓔꓯ ꓣꓳ ꓟꓳꓻˍ ꓡꓳ꓿ ꓪꓴ‐ꓢ ꓙꓵꓽ ꓗ (10) ꓙꓰꓽ ꓔꓯ ꓡꓳ. ꓠꓬꓲˍ ꓥ ꓟꓲ꓾ ꓬꓲ ꓪꓴ. ꓗꓪ ꓚꓳ. ꓢ ꓡꓲ ꓚꓱ, ꓗꓪ ꓛꓲ ꓠꓬ ꓪꓴ‐ꓢ ꓔꓯ ꓠꓲ, ꓠꓵꓻ ꓠ, ꓟ꓾ ꓪꓴ‐ꓢ ꓔꓯ ꓡꓰꓽ ꓙꓵꓻ ꓠ, ꓟ ꓟꓬꓽˍ ꓡꓳ꓿ ꓤꓰ ꓞ, ꓟ ꓠꓬ ꓠꓶꓽ ꓛꓳꓽ ꓕꓲ ꓛꓳꓽ ꓔꓯ ꓠꓲ, ꓠꓵ ꓠ, ꓟ ꓥ ꓡꓳ꓿
ꓙꓵꓽ ꓗ ꓮ ꓡꓲ ꓕꓲ ꓟ ꓔꓯ ꓡꓳ. ꓠꓬꓲˍ ꓥ ꓟꓲ ꓠꓵꓻ ꓠꓲ, ꓠꓯꓸꓼ ꓗꓪ ꓔꓶ ꓔ ꓟ ꓥ ꓡꓳ꓿ ꓢꓴ ꓤ ꓖꓴꓽ ꓢꓴ ꓤ ꓟꓶ ꓔꓯ ꓕ ꓠꓲ, ꓦꓯ. ꓐꓰ ꓐꓯˍ ꓟ ꓥ ꓟꓲ꓾ ꓠꓵꓻ ꓠꓲ, ꓠꓯꓸꓼ ꓗꓪ ꓔꓶ ꓔ ꓡꓳ꓿ ꓮ ꓡꓲ ꓕꓲ ꓟ ꓥˍ ꓟꓲ ꓠꓵꓻ ꓠꓲ, ꓙ ꓖꓴ ꓗꓪ ꓐꓰ ꓗꓳ. ꓙꓰˍ ꓟ ꓟꓽ ꓙꓳ꓿ ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓡꓰ ꓙꓵꓽ ꓗ ꓟ. ꓒ ꓖꓳ ꓕꓲ ꓣꓳ ꓔꓯ ꓒꓳ, ꓖꓶˍ ꓡꓳ꓾ ꓠꓴ ꓠꓬ ꓟꓴ ꓗꓪ ꓟꓴꓷꓼ ꓐꓰ ꓶ ꓤ ꓟꓽ ꓗꓷ, ꓓ,ꓳ꓾ ꓐꓰ ꓒꓳ, ꓖꓶˍ ꓡꓳ꓿
ꓙꓵꓽ ꓗ ꓟ. ꓒ ꓖꓳ ꓕꓲ ꓣꓳ ꓠꓬ ꓙꓵꓽ ꓗ ꓔꓯ ꓬꓲ ꓢꓷ.ˍ ꓡꓳ꓿ ꓮ ꓡꓲ ꓟ ꓙꓵꓽ ꓗ ꓪꓴꓽˍ ꓟ꓾ ꓮ ꓡꓲ ꓟ ꓔꓯ ꓠꓬ ꓛꓳ ꓫꓱꓽ ꓠ, ꓟ ꓠꓬ ꓪ ꓜꓲ ꓬꓳ. ꓚꓰꓽˍ ꓟ ꓔꓯ ꓬꓲ ꓢꓷ.ˍ ꓡꓳ꓿ ꓖꓳ ꓡꓱ ꓐꓯ ꓥˍ ꓟꓲ ꓬꓲ ꓠꓬ ꓚꓵ ꓚꓵ ꓛꓳ ꓫꓱꓽ ꓟꓽ ꓘꓴꓻ ꓢꓰꓽ꓾ ꓐꓯ ꓟ ꓣꓳ ꓡꓳ. ꓟꓳꓻˍ ꓡꓳ꓿ ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓡꓰ ꓬꓲ ꓔꓯ ꓠꓴ ꓠꓬ ꓟꓴꓽ ꓗꓪ ꓗꓴꓷꓼ ꓐꓰ ꓟꓽ ꓶꓽꓳ꓾ ꓐꓰ ꓐꓯ ꓖꓶˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓤꓶꓻ ꓗꓪ ꓓꓵꓽ ꓙ ꓠꓬꓲˍ ꓕꓯ ꓣꓳ ꓪꓴ‐ꓢ ꓠꓲ, ꓡꓶ ꓔꓯ ꓢꓷ.ˍ ꓟ ꓮ ꓟꓬ, ꓙꓳˍ ꓡꓳ꓿ ꓖꓳ ꓡꓱ ꓥ ꓟꓲ ꓣꓳ ꓛꓳ ꓫꓱꓽ ꓟꓽ ꓐ ꓡ ꓟ ꓮ ꓟꓬ, ꓙꓳˍ ꓡꓳ꓿ ꓝꓮꓲ ꓕꓲ ꓙꓰꓽ ꓠꓬ꓾ ꓣꓳ ꓙꓵꓻˍ ꓕꓲ ꓖ꓾ ꓕꓱ ꓡꓱ ꓙꓵꓻ ꓢꓲ ꓔꓬ ꓕꓲ ꓖ ꓠꓬ ꓪꓴ‐ꓢ ꓣꓱꓽ ꓛꓰꓽ ꓟꓽ ꓟꓶ꓾ ꓐꓯ ꓟ ꓣꓳ ꓡꓳ. ꓟꓳꓻˍ ꓡꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻ ꓕꓲ ꓖ꓾ ꓣꓳ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓟꓽ ꓛꓲ ꓬꓰ꓿ ꓢꓲ ꓒ ꓬꓰ‐ꓢꓴ ꓐꓯ ꓟ ꓡꓰ ꓐꓰ ꓪꓴ‐ꓢ ꓔꓯ ꓕꓲ ꓠꓲ, ꓟ ꓡꓱꓸꓼ ꓕꓲ ꓙꓽ ꓠꓲ, ꓡꓱꓸꓼ ꓠꓲ, ꓠꓵ ꓢꓲ꓾ ꓠꓶ ꓛꓳꓽ ꓕꓲ ꓛꓳꓽ ꓔꓯ ꓥˍꓟꓲ ꓠꓲ, ꓠꓵ ꓠ, ꓟ꓾ ꓕꓱ ꓡꓱ ꓛꓳ ꓫꓱꓽ ꓢꓴˍ ꓡꓰ ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓬꓰˍ ꓡꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓐꓯ ꓡꓳ꓿
ꓢꓲ ꓒ ꓬꓰ‐ꓢꓴ ꓡꓰ ꓥꓪ ꓔꓯ ꓢꓲ ꓒꓽꓳ꓾ ꓢꓲ ꓒꓽꓳ꓾ ꓘꓴꓻ ꓢꓴ ꓥ ꓕ ꓑꓳꓸꓼ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓬꓰˍ ꓟ ꓟꓽ ꓥ꓿ ꓮ ꓡꓲꓳ ꓐꓯ ꓠꓬ ꓟꓴ ꓗꓪ ꓗꓪ ꓥꓪ ꓐ, ꓐ ꓠꓲ, ꓡꓶ ꓛꓳ ꓢꓴˍ ꓡꓰꓽ ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓬꓰˍ ꓡꓳ꓾ ꓐꓰ ꓣꓳ ꓔꓯ ꓐꓯ ꓖꓶ ꓡˍ ꓡꓳ꓿
ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓙꓵꓻ ꓠꓲ, ꓠꓬ ꓚꓵ ꓚꓵ ꓠꓵꓻ ꓠꓲ, ꓚꓬꓼˍ ꓟ ꓙꓵꓻ ꓠꓲ, ꓥ ꓡ꓾ ꓣꓳꓽ ꓛꓳ ꓫꓱꓽˍ ꓟ ꓤꓶꓻ ꓙꓲ‐ꓢꓴ ꓢꓲ ꓤ ꓤꓶꓻ ꓠꓬ ꓠꓵꓻ ꓠꓲ, ꓠꓯꓸꓼ ꓗꓪ ꓔꓶ ꓔ ꓟ ꓤꓶꓻ ꓥ ꓡ꓾ ꓐꓯ ꓟ ꓣꓳ ꓡꓳ. ꓠꓬꓲ ꓡꓯ꓿ ꓖꓳ ꓡꓱ ꓟꓽ ꓥ ꓢꓰꓽ ꓕꓯ ꓠꓬ꓾ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓙꓵꓽ ꓗ ꓟ. ꓒ ꓖꓳ ꓕꓲ ꓣꓳ ꓔꓯ ꓐꓯ ꓖꓶˍ ꓟ ꓡꓰ ꓐꓰ꓾ ꓠꓴ ꓠꓬ ꓟꓴ ꓗꓪ ꓗꓴꓷꓼ ꓐꓰ ꓟꓽ ꓶꓽꓳ꓾ ꓐꓰ ꓣꓳ ꓔꓯ ꓐꓯ ꓡˍ ꓥꓳ꓿ ꓟꓴ ꓗꓪ ꓗꓴꓷꓼ ꓠꓬ ꓠꓴ ꓐꓱ ꓶ ꓥ ꓡꓳ꓾ ꓐꓰ ꓐꓯ ꓐ ꓡ ꓠ, ꓟ ꓐꓱ ꓶ ꓣꓳ ꓠꓬ ꓠꓵꓻ ꓠꓲ, ꓠꓯꓸꓼ ꓗꓪ ꓚꓲ. ꓛꓬ ꓝꓴꓲ. ꓐꓱ ꓶ ꓓꓵꓽ ꓙ ꓒꓳ, ꓬꓲꓼ ꓡ ꓢꓲ ꓠꓬꓲ ꓞꓳ ꓙꓳˍ ꓥꓳ ꓐꓯ ꓠꓬ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ꓾ ꓟꓴ ꓗꓪ ꓗꓴꓷꓼ ꓠꓬ ꓠꓴ ꓐꓰ ꓔꓬ ꓡꓳ꓾ ꓐꓰ ꓣꓳ ꓔꓯ ꓐꓯ ꓖꓶ ꓡˍ ꓥꓳ꓿ ꓢꓲꓽ ꓫꓬ ꓕꓳꓽ ꓶ ꓗꓪ ꓢ‐ꓘꓰ‐ꓬꓴ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓬꓲ ꓦꓲꓻ ꓗꓪ ꓘꓳ ꓣꓴˍ ꓕꓯ ꓢꓲ ꓒ ꓬꓰ‐ꓢꓴ ꓡꓰ ꓬꓲ ꓔꓯ꓾ ꓠꓬꓲ. ꓠꓬꓲ ꓟꓴ ꓗꓪ ꓗꓴꓷꓼ ꓠꓬ ꓠꓴ ꓦꓲꓻ ꓗꓪ ꓛꓲ ꓡꓺꓳ꓾ ꓐꓰ ꓐꓯ ꓖꓶˍ ꓡꓳ꓿ ꓕꓱ ꓟˍ ꓡꓰ ꓐꓰ ꓠꓬꓲ. ꓠꓬꓲ ꓣꓳ ꓠꓲ, ꓟ ꓡꓶ. ꓢꓲ ꓝꓴꓲ. ꓗꓪ ꓐꓰ ꓓꓵꓽ ꓙ ꓒꓳ, ꓬꓲꓼ ꓡ ꓢꓲ ꓠꓬꓲ꓾ ꓢꓲ ꓒ ꓬꓰ‐ꓢꓴ ꓔꓯ ꓘꓳ ꓣꓴˍ ꓥꓳ ꓐꓯ ꓠꓬ ꓢꓲ ꓒ ꓬꓰ‐ꓢꓴ ꓠꓬ꓾ ꓟꓴ ꓗꓪ ꓗꓴꓷꓼ ꓠꓬ ꓠꓴ ꓦꓲꓻ ꓗꓪ ꓛꓲꓺ ꓡꓺꓳ꓾ ꓐꓰ ꓣꓳ ꓔꓯ ꓐꓯ ꓖꓶ ꓡˍ ꓥꓳ꓿ ꓮ ꓙꓵꓽ ꓢꓴ ꓢꓯꓼ ꓕꓵꓼ ꓙꓰ ꓡꓯ꓿
