ꓖꓳ ꓡꓱ ꓠꓬ ꓬꓰ-ꓢꓴ ꓡꓰ꓾ ꓪꓴ-ꓢ ꓗꓴꓷꓼ ꓠꓬ ꓮꓸ ꓫꓵˍ ꓡꓰ ꓐꓰ ꓗꓹ ꓡ? ꓥꓪ ꓠꓬ ꓮꓸ ꓫꓵ ꓕꓲ ꓫꓵꓽ ꓔꓯ ꓔꓯꓺ ꓠꓯꓹ ꓡ? ꓪꓴ-ꓢ ꓗꓴꓷꓼ ꓠꓬ ꓪꓳꓽ ꓒꓲꓻ ꓫꓵꓸ ꓕꓲ ꓢꓶꓽˍ ꓡꓰ ꓐꓰ ꓗꓹ ꓡꓳ꓿ ꓕꓱ ꓟ ꓔꓯ ꓡꓽ ꓞꓳ ꓕꓲ ꓣꓳ ꓡꓰ ꓚꓲꓸ ꓛꓬ ꓪꓳꓽ ꓐꓱ ꓗꓪ ꓫꓵꓸ ꓔ ꓠꓬ ꓪꓴꓽ ꓡ ꓢꓲ꓾ ꓢꓲꓹ ꓜꓲꓻ ꓕꓲ ꓜꓲ ꓒꓬꓱꓼ ꓡ ꓡꓳ꓿ ꓖꓳ ꓕꓯ ꓟꓵꓽ ꓪꓴꓽ ꓗꓪ ꓟ ꓠꓬꓹ ꓤˍ ꓟꓲ ꓬꓲ ꓡꓯꓼ ꓗꓸ ꓗꓪ ꓬꓲ ꓘꓶꓻ ꓘꓶꓻ ꓡ ꓡꓳ꓾ ꓐꓯˍ ꓡꓳ꓿
ꓝꓮꓲ ꓠꓬ ꓬꓲ ꓡꓰ꓾ ꓥꓪ ꓠꓬ ꓮꓸ ꓫꓵ ꓕꓲ ꓫꓵꓽ ꓡꓰ ꓪꓴ-ꓢ ꓗꓴꓷꓼ ꓔꓯ ꓔꓯꓺ ꓠꓯꓹ ꓡ? ꓟꓴꓽ ꓗꓪ ꓗꓴꓷꓼ ꓠꓬ ꓤ ꓟꓶ ꓤ ꓕꓲ ꓣꓳ ꓡꓰ ꓫꓪꓺ ꓧꓶꓽ ꓮꓽ ꓙꓵ ꓡꓱꓸꓼ ꓙꓵꓽ ꓡ ꓗꓪ ꓛꓲ꓾ ꓫꓪ ꓧꓶ ꓢ ꓙꓳꓻ ꓠꓯꓸꓼ ꓗꓪ ꓚꓵꓺ ꓔ ꓟ ꓙꓵꓽ ꓧꓶꓽˍ ꓡꓰ ꓐꓰ ꓗ ꓡꓳ꓾ ꓐꓯˍ ꓡꓳ꓿
ꓠꓬꓲ. ꓠꓬꓲ ꓪꓴ‐ꓢ ꓐꓱ ꓶ ꓮ ꓘꓶ. ꓣꓳˍ ꓟ ꓠꓴ ꓔꓲꓺ ꓖꓶ ꓓꓴ ꓠꓬ ꓮ ꓫꓵꓽ ꓥ ꓡ?
ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ꓾ ꓢꓲ ꓒ ꓬꓰ‐ꓢꓴ ꓠꓬ ꓪꓴ‐ꓢ ꓗꓴꓷꓼ ꓔꓯ ꓪꓳꓽ ꓒꓲꓻ ꓫꓵ. ꓐꓰ ꓔꓯ ꓔ ꓡꓳ꓿ ꓪꓳꓽ ꓒꓲꓻ ꓫꓵ. ꓖꓳ ꓟ ꓠꓬ ꓬꓲ ꓫꓵ. ꓫꓵ. ꓗꓷ ꓗ ꓠꓯ. ꓪꓴꓽ ꓡˍ ꓕꓯ꓾ ꓟꓵꓽ ꓪꓴꓽ ꓗꓪ ꓟ ꓠꓬ, ꓐꓴ ꓠꓻ ꓐ ꓡˍ ꓟ ꓬꓲ ꓜꓲ ꓒꓬꓱꓼ ꓡˍ ꓡꓳ꓿ ꓬꓲ ꓪꓴ. ꓕꓯ ꓮ ꓘꓶ. ꓣꓳˍ ꓐꓯ ꓥˍ ꓟꓲ ꓮ ꓘꓶ. ꓪꓴꓽˍ ꓟ ꓒꓬꓱꓼ ꓡ ꓐ ꓡˍ ꓡꓳ꓾ ꓐꓰ ꓣꓳ ꓔꓯ ꓟ. ꓖꓶ ꓡ ꓔꓬ ꓡꓳ꓿
ꓣꓳ ꓐꓴ ꓠꓬ ꓙꓲ‐ꓢꓴ ꓢꓲ ꓒ ꓗ ꓠꓯ. ꓛꓳꓻ ꓢꓲ ꓠꓬꓲ꓾ ꓬꓲ ꓔꓯ ꓣꓳ ꓤꓶꓻ ꓔꓲ ꓖꓶ ꓠꓲ, ꓫꓵˍ ꓟ ꓠꓲ, ꓡꓶꓽ ꓙꓳˍ ꓕꓯ꓾ ꓣꓳ ꓐꓴ ꓠꓬ ꓚꓲ. ꓛꓬ ꓚꓳꓽ ꓚꓲ. ꓛꓬ ꓔꓯ ꓱ ꓡꓰ ꓝꓲ ꓢꓲ꓾ ꓣꓳ ꓔꓯ ꓙꓳˍ ꓟ ꓣꓱꓽ ꓛꓰꓽ ꓣꓳ ꓬꓰ ꓗꓴ.ˍ ꓟ ꓢꓷ.ˍ ꓟ ꓮ ꓙꓵꓽ ꓠꓬ ꓪꓴ‐ꓢ ꓔꓯ ꓔꓲꓺ ꓖꓶ ꓠ, ꓟ ꓠꓬ ꓟꓽ ꓒꓵꓽ ꓐꓰ ꓣꓳꓽ ꓓꓵꓽ ꓙꓽ ꓟꓶˍ ꓡꓳ꓿ ꓕꓲ ꓖ ꓕꓲ ꓧꓪ, ꓗꓪ ꓣꓳ ꓠꓬ ꓪꓴ‐ꓢ ꓔꓯ ꓔꓲꓺ ꓖꓶ ꓠ, ꓟ ꓔꓲꓺ ꓓꓴ ꓣꓳ ꓔꓯ ꓕꓲ ꓙꓰꓽˍ ꓟꓲ ꓟꓽ ꓙꓳ꓾ ꓐꓰˍ ꓟꓲ ꓓꓵꓽ ꓙꓽ ꓔꓬ ꓗꓴ.ˍ ꓡꓳ꓿
ꓖꓳ ꓡꓱ ꓥˍ ꓟꓲ ꓣꓳ ꓔꓲꓺ ꓓꓴ ꓠꓬ ꓣꓳ ꓠꓲ, ꓟ ꓗꓪ ꓐꓰ ꓚꓵ ꓚꓵ ꓡˍ ꓟ ꓥ ꓕꓯ ꓠꓽ꓾ ꓪꓴ‐ꓢ ꓡꓰ ꓪꓴꓽ ꓡ ꓝꓲ ꓟꓽ ꓐ ꓡ ꓟ ꓕꓲ ꓫꓵꓽˍ ꓟꓲ ꓟꓽ ꓙꓳ꓿ ꓣꓳ ꓔꓲꓺ ꓖꓶˍ ꓟ ꓔꓲ ꓓꓴ ꓠꓬ ꓣꓳˍ ꓥˍ ꓟꓲ ꓪꓴꓽˍ ꓥˍ ꓟꓲ ꓖꓳ ꓟ ꓮ ꓙꓵꓽ ꓔꓯ ꓪꓴ‐ꓢ ꓡꓰ ꓮ ꓟꓬ, ꓟꓬꓽ ꓡ ꓝꓲ ꓐ ꓡˍ ꓟ ꓥ ꓡꓳ꓿ ꓙꓲꓻ ꓫꓬ ꓢꓴ ꓔꓰꓣꓰꓢꓮ ꓡꓰ ꓕꓱ ꓡꓱ ꓐꓯ ꓔ ꓡꓳ꓿ “ꓪꓴ‐ꓢ ꓒꓬꓱꓽ ꓕꓯꓽ ꓗꓪ ꓪꓴ‐ꓢ ꓟꓲꓽ ꓙꓬ ꓗꓪ ꓣꓳˍ ꓟ ꓕꓲ ꓫꓵꓽˍ ꓟꓲ ꓟꓽ ꓙꓳ꓿ ꓠꓴ ꓬꓰ ꓠ ꓔ ꓟ ꓮ ꓙꓵꓽ ꓔꓯ ꓠꓵꓻ ꓠꓲ, ꓡꓰ ꓬꓰ” ꓐꓰ ꓐꓯ ꓔ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓔꓯ ꓙꓳˍ ꓟ ꓣꓱꓽ ꓛꓰꓽ ꓔꓯ ꓪꓴ‐ꓢ ꓐꓱ ꓶ ꓔꓲꓺ ꓖꓶ ꓠ, ꓟ꓾ ꓣꓳ ꓢꓷ.ˍ ꓟ ꓬꓰ ꓗꓴ.ˍ ꓟ ꓕꓲ ꓒꓳ, ꓗꓪ ꓐꓰ ꓟꓲ ꓠꓯ ꓐꓱ ꓶ ꓣꓱꓽ ꓙ ꓐ ꓡ ꓢꓴ ꓒꓬꓱꓼ ꓡ ꓠ, ꓟ ꓐꓱ ꓶ ꓢꓯꓼ ꓕꓵꓼ ꓙꓰ ꓡꓯ꓿ ꓖꓳ ꓕꓯ ꓪꓴ‐ꓢ ꓠꓬ ꓮ ꓘꓶ. ꓣꓳˍ ꓟ ꓣꓳ ꓔꓯ ꓙꓳˍ ꓟ ꓣꓱꓽ ꓛꓰꓽ ꓠꓬ ꓔꓯꓺ ꓟꓽ ꓠ ꓗꓪ ꓛꓲ ꓪꓴꓽ ꓡ ꓟꓴ ꓡˍ ꓥꓳ꓿
