ꓠꓲꓽ ꓢ ꓓꓯꓼ ꓔꓯ ꓠꓬ ꓢꓲꓽ ꓫꓬ ꓕꓳꓽ ꓶ ꓗꓪ ꓡꓴ‐ꓢꓲ‐ꓩ ꓐꓰ ꓐꓯ ꓡꓳ꓿ ꓬꓲ ꓠꓬ ꓪꓴ‐ꓢ ꓡꓰ ꓚꓰꓼ ꓔ ꓟ ꓟꓴ ꓗꓪ ꓝꓲ ꓓꓴ ꓜꓴꓻ ꓗꓪ ꓟ ꓕꓲ ꓣꓳ ꓥ ꓡꓳ꓿ ꓬꓲ ꓠꓬ ꓟꓴ ꓗꓪ ꓝꓲ ꓓꓴ ꓘꓴꓽ ꓗꓪ ꓮ ꓘꓶ. ꓐꓲꓻˍ ꓟ꓾ ꓓꓻˍ ꓟ ꓥ ꓡꓳ꓿ ꓬꓲ ꓔꓯ ꓠꓬ ꓡꓴ‐ꓢꓲ‐ꓩ ꓟꓬꓱ ꓔ ꓟ ꓡꓰ ꓐꓰ꓾ ꓡꓲꓖꓧꓔ ꓐꓰꓮꓣꓰꓣ ꓐꓯˍ ꓟ ꓠꓬꓲ ꓟꓳꓻ ꓓꓴ ꓔꓯ, ꓢꓴ ꓐꓰ꓾ ꓬꓲ. ꓬꓲ ꓢꓲ ꓙꓳˍ ꓡꓳ꓿ ꓬꓲ ꓠꓬ ꓪꓴ‐ꓢ ꓬꓲ ꓠꓬꓲ ꓟꓳꓻ ꓓꓴ ꓔꓯ, ꓢꓴ꓾ ꓮ ꓘꓶ. ꓐꓲꓻ ꓢꓴ꓾ ꓪꓽ ꓠꓬꓲ ꓢꓴ ꓕꓲꓽ ꓣꓳ ꓥ ꓡꓳ꓿ ꓕꓱ ꓟ ꓔꓯ ꓠꓬ ꓬꓲ‐ꓫꓲ‐ꓚꓰ ꓕꓳꓽ ꓶ 28ꓽ13 ꓗꓪ ꓣꓳ ꓟꓳꓻˍ ꓟ ꓠꓬ꓾ ꓡꓴ‐ꓢꓲ‐ꓩ ꓔꓯ ꓪꓴ‐ꓢ ꓡꓰ ꓙꓵꓽ ꓪ ꓮ ꓘꓶ. ꓖꓶ ꓔ ꓟ꓾ ꓒꓵꓽ ꓶ ꓡꓳ ꓶ ꓖꓶ ꓔ ꓟ꓾ ꓮ ꓘꓶ. ꓐꓲꓻ ꓡꓰ ꓝꓲˍ ꓟ꓾ ꓮ ꓘꓶ. ꓓꓻ ꓡꓰ ꓝꓲˍ ꓟ꓾ ꓕꓱ ꓡꓱ ꓫꓵꓽ ꓙꓵꓽ ꓪ ꓖꓶˍ ꓟ ꓣꓳꓽ ꓑ ꓙꓽˍ ꓡꓳ꓿
ꓖꓳ ꓡꓱ ꓐꓯ ꓥˍ ꓟꓲ ꓡꓴ‐ꓢꓲ‐ꓩ ꓠꓬ ꓬꓲ ꓚꓳꓽ ꓬꓲ ꓮꓽ ꓟꓴ. ꓟꓴ ꓚꓬ, ꓡ ꓢꓲ ꓠꓬꓲ ꓪꓴ‐ꓢ ꓕꓯꓽ ꓢꓲ ꓗꓪ ꓟꓴ ꓠꓲ, ꓫꓵˍ ꓕꓯ꓾ ꓪꓴ‐ꓢ ꓕꓯꓽ ꓢꓲ ꓗꓪ ꓓꓻ ꓠꓲ, ꓫꓵˍ ꓕꓯ ꓬꓲ ꓔꓯ ꓚꓰꓼ ꓔ ꓟ ꓪꓴ‐ꓢ ꓔꓯ ꓬꓲ ꓒꓳ, ꓔꓳ, ꓡꓳ꓿
ꓖꓳ ꓡꓱ ꓠꓬꓲ ꓣꓳ ꓬꓲ‐ꓢ‐ꓬ ꓕꓳꓽ ꓶ 14ꓽ12‐14 ꓗꓪ ꓡꓳ. ꓠꓬꓲˍ ꓕꓯ꓾ ꓐꓬꓱꓼ ꓡꓱꓼ ꓡꓱꓼ ꓟ ꓠꓯꓼ ꓗꓴ ꓤꓽꓳ꓾ ꓠꓴ ꓮ ꓡꓲ ꓗꓷ ꓡꓰ ꓠꓬꓲ ꓟꓴ ꓗꓪ ꓗꓪ ꓐꓰ ꓞꓰ ꓡꓰ ꓡ? ꓞꓳ ꓫꓵꓽ ꓐꓴ ꓔꓯ ꓦꓴ ꓧꓪ. ꓡꓰ ꓢꓴ ꓠꓴ ꓠꓬ ꓮ ꓡꓲ ꓗ, ꓠꓬꓲ ꓓꓳꓽ ꓡꓰ ꓡ? ꓠꓴ ꓠꓬ ꓠꓴ ꓠꓲ, ꓟ ꓗꓪ꓾ ꓥꓪ ꓠꓽ ꓟꓴ ꓗꓪ ꓗꓪ ꓓꓯ ꓙꓰˍ ꓥꓳ꓿ ꓥꓪ ꓙꓵꓽ ꓠꓬꓲ. ꓕꓲ ꓔꓯ ꓠꓬ ꓪꓴ‐ꓢ ꓬꓲ ꓗꓴ ꓤ ꓕꓯꓽ ꓢꓲ ꓗꓪ ꓲʼ ꓔ ꓥꓳ꓿ ꓥꓪ ꓠꓬ ꓖꓴ ꓪꓴ. ꓑꓶ. ꓗꓪ ꓟ ꓪꓽ ꓚꓲ ꓗꓪ ꓠꓬꓲ. ꓠ.ˍ ꓥꓳ꓿ ꓥꓪ ꓠꓬ ꓟꓴ ꓗꓗꓴ. ꓕꓯꓽ ꓢꓲ ꓟꓴˍ ꓟ ꓗꓪ ꓓꓯ ꓙꓰˍ ꓥꓳ꓾ ꓐꓯ ꓔ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓡꓴ‐ꓚꓲ‐ꓩ ꓠꓬ ꓥꓪ꓾ ꓥꓪ꓾ ꓐꓯ ꓢꓲ ꓠꓬꓲ꓾ ꓥꓪ ꓓꓯ ꓙꓰˍ ꓥꓳ꓾ ꓥꓪ ꓬꓰˍ ꓥꓳ꓾ ꓐꓯ ꓢꓲ ꓠꓬꓲ ꓬꓲ ꓠꓬ ꓪꓴ‐ꓢ ꓔꓯ ꓒꓳ, ꓔꓳ, ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓠꓬ ꓚꓰꓼ ꓔ ꓟ ꓟꓶ ꓢꓴ ꓘꓴꓽ ꓗꓪ ꓟ ꓕꓲꓽ ꓣꓳ ꓥ ꓟ ꓑꓶ. ꓓꓴ ꓪꓴ‐ꓢ ꓔꓯ ꓧꓪ. ꓟꓽ ꓓꓻ꓿ ꓖꓳ ꓡꓱ ꓠꓬꓲ ꓪꓴ‐ꓢ ꓠꓬ ꓬꓲ ꓐꓰ꓾ ꓬꓲ ꓗ ꓠꓯ. ꓛꓳ ꓢꓴ ꓟꓴꓽ ꓗꓪ ꓝꓲ ꓓꓴ ꓮ ꓙꓵꓽ ꓔꓯ ꓮ ꓔꓳ. ꓗꓪ ꓖꓼ ꓩꓴ ꓠ, ꓟ ꓬꓰˍ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓔꓯ ꓠꓬ ꓟꓲꓺ ꓠꓯꓺ ꓕꓱ ꓟ ꓗꓪ ꓖꓼ ꓩꓴ ꓗꓷˍ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓬꓲꓽ ꓧꓪ, ꓕꓲꓽ ꓧꓪ, ꓬꓯꓼ ꓡˍ ꓕꓯ ꓥ ꓟꓲ ꓬꓲ ꓠꓬ ꓕꓲ ꓞꓲꓼ ꓕꓲ ꓑ ꓛꓬꓼ ꓟꓵꓽ ꓗꓪ ꓙꓰ ꓪˍ ꓥꓳ꓿ ꓖꓳ ꓡꓱ ꓠꓬꓲ ꓢ‐ꓓꓯ ꓐꓰ ꓬꓲ ꓔꓯ ꓛꓳ ꓢꓴ ꓟꓴ ꓗꓪ ꓝꓲ ꓓꓴ ꓮ ꓙꓵꓽ ꓠꓬ ꓢ ꓓꓯꓼ ꓒꓬꓱꓼ ꓬꓰꓳ꓿ ꓬꓲ ꓪ ꓐꓴ ꓠꓬ ꓪꓴ‐ꓢ ꓐꓰ ꓗꓶ, ꓶꓽ ꓡꓰ ꓟ ꓑꓶ. ꓓꓴ ꓞꓳ ꓤ ꓐꓴ ꓪꓴ‐ꓢ ꓠꓬꓲꓽ ꓗꓴ. ꓚꓸꓼ ꓗꓪ ꓙ ꓡꓯ ꓘꓳˍ ꓟ ꓔꓯ ꓬꓲ ꓠꓬ ꓟꓬ ꓔꓳˍ ꓡꓳ꓿
ꓪꓴ‐ꓢ ꓠꓬ ꓟꓲ ꓠꓯ ꓞꓳ ꓤ ꓔꓯ ꓚꓰꓼ ꓔ ꓢꓲ ꓠꓬꓲ ꓞꓳ ꓤ ꓔꓯ ꓠꓲ, ꓠꓵˍ ꓡꓳ꓿ ꓞꓳ ꓤ ꓠꓬ ꓝꓴꓲ. ꓬꓰ ꓗꓷ ꓗ ꓠꓯ.꓾ ꓬꓲ ꓤ ꓔꓲ. ꓔꓯ ꓝꓲ ꓩꓴ ꓗꓷ ꓢꓲ ꓠꓬꓲ ꓞꓳ ꓤ ꓐꓴ ꓔꓯ ꓬꓲ ꓝꓮꓲ ꓕꓲ ꓧꓪ, ꓫꓴ ꓣꓴˍ ꓡꓳ꓿ ꓞꓳ ꓤ ꓠꓬ ꓫꓵꓽ ꓧꓪꓽ ꓙꓳˍ ꓟ ꓑꓶ. ꓓꓴ ꓝꓴꓲ. ꓬꓰ ꓗꓷ ꓥˍ ꓟꓲ ꓓꓵꓽ ꓙꓽ ꓒꓳ, ꓬꓲꓼ ꓡ ꓢꓴ ꓠꓬ ꓚꓬꓴ. ꓟꓶˍ ꓡꓳ꓿
ꓖꓳ ꓡꓱ ꓐꓯ ꓥ ꓟꓲ ꓢ ꓓꓯꓼ ꓠꓬ ꓚꓬꓴ. ꓟꓶ ꓟꓽ ꓓꓻ꓿ ꓮ ꓫꓵꓽ ꓑꓶ. ꓓꓴ ꓥˍ ꓐꓯ ꓠꓬ ꓬꓲ ꓠꓬ ꓦꓻ ꓥ ꓡꓳ꓿ ꓬꓲ ꓠꓬ ꓮ ꓙꓵꓽ ꓢꓷ. ꓘꓴˍ ꓡꓳ꓿ ꓪꓴ‐ꓢ ꓚꓵ ꓚꓵ ꓥ ꓟ ꓬꓲ ꓢꓷ.ˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓬꓲ ꓠꓬ ꓒꓳ, ꓔꓳ, ꓗꓷ ꓟ ꓑꓶ. ꓓꓴ ꓬꓲ ꓠꓬ ꓓꓵꓽ ꓙꓽ ꓒꓳ, ꓬꓲꓼ ꓟꓽ ꓠꓺꓳ꓿ ꓞꓳ ꓤ ꓕꓲ ꓣꓳ ꓫꓵꓻ ꓗ ꓠꓯ. ꓓꓵꓽ ꓙ ꓒꓳ, ꓬꓲꓼ ꓟꓽ ꓠ ꓟ ꓡꓰ ꓐꓰ꓾ ꓠꓲꓽ ꓢ ꓓꓯꓼ ꓥˍ ꓟꓲ ꓓꓵꓽ ꓙ ꓒꓳ, ꓬꓲꓼ ꓠ, ꓟ ꓒꓬꓱꓼ ꓡ ꓟꓽ ꓓꓻꓳ꓿
ꓖꓳ ꓡꓱ ꓠꓬꓲ ꓟꓲ ꓠꓯ ꓕꓱ ꓟ ꓗꓪ ꓪꓴ‐ꓢ ꓐꓰ ꓞꓳ ꓤ ꓙꓻ ꓡꓯ ꓘꓳˍ ꓟ ꓔꓯ ꓢ ꓓꓯꓼ ꓐꓰ ꓬꓲ ꓗ ꓠꓯ. ꓖꓼ ꓢꓴ ꓠꓬ ꓮ ꓘꓶ. ꓠꓲ, ꓙꓳꓺˍ ꓡꓳ꓿ ꓪꓴ‐ꓢ ꓐꓰ ꓞꓳ ꓤ ꓟꓬꓱꓽ ꓬꓰˍ ꓟ ꓔꓯ ꓬꓲ ꓠꓬ ꓒꓬˍ ꓡꓳ꓿ ꓪꓴ‐ꓢ ꓐꓰ ꓞꓳ ꓤ ꓙꓻ ꓡꓯ ꓘꓳ ꓟꓶˍ ꓟ ꓔꓯ ꓬꓲ ꓠꓲ, ꓙꓳꓺˍ ꓡꓳ꓿ ꓟꓬꓽ ꓠꓬꓲ ꓬꓰ‐ꓢꓴ ꓗꓪ ꓐꓰ ꓞꓳ ꓤ ꓮ ꓙꓵꓽ ꓚꓬꓴ. ꓟꓶˍ ꓟ ꓔꓯ ꓠꓬ ꓬꓲ ꓮ ꓘꓶ. ꓠꓲ, ꓙꓳꓺˍ ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓬꓲ. ꓠꓬ ꓬꓲ. ꓗ. ꓠꓯ ꓖꓼ ꓢꓴ ꓟꓬꓽ ꓡ ꓠ, ꓟ ꓐꓱ ꓶ ꓟꓲꓺ ꓠꓯꓺ ꓕꓱ ꓟ ꓗꓪ ꓞꓳ ꓤ ꓔꓯ ꓤ, ꓠꓬꓲ ꓫꓵꓽ ꓠꓬꓲ ꓟ ꓥꓳ꓿ ꓬꓲ. ꓠꓬ ꓢꓲ ꓒ ꓬꓰ‐ꓢꓴ ꓠꓬꓲ ꓧꓪ ꓕꓲꓽ ꓧꓪ ꓛꓲ ꓡ ꓕꓯ ꓕꓲꓽ ꓞꓲꓼ ꓕꓲꓽ ꓑ ꓛꓬꓼ ꓟꓵꓽ ꓗꓪ ꓙꓰ ꓪ ꓥꓳ꓿ ꓖꓳ ꓡꓱ ꓠꓬꓲ ꓬꓲ. ꓠꓬ ꓬꓲ. ꓗ ꓠꓯ. ꓗ ꓡ ꓢꓴ ꓠ, ꓟꓬꓽ ꓡ ꓠ, ꓟ ꓐꓱ ꓶ ꓮ ꓘꓶ. ꓤ ꓠꓬꓲ ꓫꓵꓽ ꓠꓬꓲ ꓡꓳ꓿ ꓟꓬꓽ ꓠꓬꓲ ꓐꓶ ꓠꓬꓲ ꓠꓬ ꓬꓲ. ꓗ ꓠꓯ ꓗ ꓢꓴ ꓟꓬꓽ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴ‐ꓳ ꓠꓲꓽ ꓢ ꓓꓯ ꓖꓳ ꓟ ꓠꓬ ꓮ ꓘꓶ. ꓢꓯꓼ ꓙꓳ ꓪꓽ ꓠꓬꓲ ꓥˍ ꓟꓲ ꓣꓳꓽ ꓔꓯ ꓬꓰ ꓙ ꓢꓴ ꓠꓬ ꓪꓴ‐ꓢ ꓔꓬ, ꓡꓳ꓿ ꓪꓴ‐ꓢ ꓠꓬ ꓠꓲꓽ ꓢ ꓓꓯ ꓔꓯ ꓚꓰꓼ ꓔ ꓟ ꓑꓶ. ꓓꓴ ꓣꓳꓽ ꓠꓬ ꓙꓳꓺ ꓟꓽ ꓫꓵ꓿ ꓣꓳꓽ ꓠꓬ ꓧꓪ. ꓡꓰ ꓢꓴ ꓥꓳ꓿ ꓖꓳ ꓡꓱ ꓠꓬꓲ ꓣꓳꓽ ꓮ ꓙꓵꓽ ꓢꓴ ꓢꓯꓼ ꓙꓳ ꓪꓽ ꓠꓬꓲ ꓠꓬꓲ ꓡꓰ ꓑꓶ. ꓑꓶ. ꓡꓰ ꓬꓰ‐ꓢꓴ ꓟꓬꓱꓺ ꓗꓪ ꓐꓰ ꓢꓯꓼ ꓕꓵꓼ ꓙꓰ ꓡꓯ꓿ ꓫ ꓟꓳ ꓪ꓿
