Luke 12:36-38
ꓢꓲ ꓒ ꓬꓰ-ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓕꓱ ꓡꓱ ꓐꓯ ꓡꓳ= ꓠꓴ ꓪ ꓠꓬ꓾ ꓤ ꓟꓶ ꓝꓱˍ ꓟ ꓑꓮꓲ ꓗꓪ ꓐꓰ ꓬꓲꓼ ꓡˍ ꓟ ꓬꓲ ꓢꓲ ꓒ ꓔꓯ ꓡꓳꓸ ꓔꓬ ꓟ ꓚꓳ ꓑꓸˍ ꓡꓰ ꓐꓰ꓾ ꓬꓲ ꓡꓰꓼ ꓡ ꓢꓲ ꓗ ꓘꓶꓽ ꓲ’ꓼ ꓡ ꓠꓬ꓾ ꓞꓼ ꓐꓰ ꓬꓲ ꓔꓯ ꓗ ꓘꓶꓽ ꓒꓴ ꓖꓶ ꓠꓹ ꓟ ꓙꓽ ꓖꓶ ꓔ= ꓢꓲ ꓒꓽ ꓡˍ ꓕꓯ ꓧꓪꓸ ꓛꓲꓽ ꓐꓰ ꓔꓬ ꓟ ꓚꓳ ꓑꓸ ꓐꓴ ꓠꓽ ꓶꓼ ꓙꓳ ꓫꓱꓹ ꓙꓳˍ ꓥꓳ= ꓠꓴ ꓪ ꓔꓯ ꓥꓪ ꓔꓱꓹ ꓔꓱꓹˍ ꓐꓯ ꓖꓶˍ ꓠꓬꓲ꓾ ꓬꓲ ꓠꓬ ꓚꓳ ꓑꓸ ꓔꓯ ꓜ ꓜꓽ ꓠꓹ ꓟ ꓗꓳ ꓔ ꓝꓲ ꓢꓲ꓾ ꓬꓲ ꓚꓲ ꓛꓬ ꓠꓬ ꓙꓽ ꓧꓷꓹ ꓧꓷꓹ ꓢꓲ ꓠꓬꓲ ꓬꓲ ꓪ ꓔꓯ ꓑꓶ ꓖꓶ ꓜꓽˍ ꓥꓳ= ꓬꓲ ꓠꓬ ꓢ ꓘꓪ ꓔꓱ ꓫꓵ꓾ ꓥ ꓠꓬ ꓠꓯꓼ ꓝꓲꓸ ꓗꓪ ꓡˍ ꓟꓲ꓾ ꓕꓱ ꓡꓱ ꓧꓪꓸ ꓛꓲꓽ ꓐꓰ ꓦꓴ ꓠꓬꓹ ꓔꓬ ꓟ ꓚꓳ ꓑꓸ ꓐꓴ ꓠꓽ ꓶꓼ ꓙꓳ ꓫꓱꓹ ꓙꓳˍ ꓥꓳ=
ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓠꓬ ꓣꓳ ꓐꓴ ꓔꓯ ꓢꓲ ꓒ ꓛꓲ ꓡˍ ꓟ ꓔꓯ ꓙꓽ ꓖꓶ ꓔ ꓠꓯꓹ ꓟ ꓐꓯ ꓖꓶ ꓡ ꓔꓬ ꓡꓳ= ꓢꓲ ꓒ ꓛꓲ ꓡ ꓢꓲ ꓗ ꓘꓶꓽ ꓲ’ꓼ ꓡˍ ꓕ ꓑꓳꓸꓼ ꓬꓲ ꓐꓱ ꓶ ꓗꓹ ꓘꓶꓽ ꓒꓴ ꓖꓶ ꓐ ꓡ ꓠꓹ ꓟ ꓣꓳꓽ ꓔꓯ ꓘꓴ ꓔꓬ ꓡꓳ= ꓣꓳ ꓤꓶꓻ ꓡꓳꓹ ꓬꓰˍ ꓕꓯ ꓢꓲ ꓒ ꓛꓲ ꓡˍ ꓥꓳ ꓐꓰ ꓣꓳ ꓓꓵꓽ ꓙ ꓔ ꓥ ꓟꓲ꓾ ꓚꓵ ꓚꓵ ꓢꓲ ꓒ ꓠꓬ ꓣꓳ ꓤꓶꓻ ꓗ ꓘꓶꓽ ꓔꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓲ’ꓼ ꓔꓬ ꓡꓳ= ꓪꓴ-ꓢ ꓠꓬ ꓬꓲ ꓚꓲꓸ ꓛꓬ ꓡꓰ ꓜ ꓜꓽ ꓑꓮꓲꓽ ꓫꓬꓹ ꓢꓲ ꓬꓲ ꓚꓳ ꓑꓸ ꓐꓴ ꓔꓯ ꓜꓽ ꓜ ꓝꓲˍ ꓥꓳ= ꓑꓮꓲꓽ ꓕꓱ ꓟ ꓗꓪ ꓓꓵꓽ ꓐ ꓡ ꓠꓹ ꓟ ꓕꓲ ꓙꓰꓽˍ ꓡꓰꓽ ꓬꓰ ꓛꓵˍ ꓡꓳ= ꓕꓱ ꓟ ꓠꓬ ꓢꓲ ꓒ ꓛꓲ ꓡˍ ꓟ꓾ ꓢꓲ ꓒ ꓬꓲꓼ ꓡˍ ꓟ ꓙꓵꓹ ꓔꓯ ꓟꓽ ꓬꓲꓼ ꓟꓶ ꓟꓶ ꓡꓳꓸ ꓔꓬ ꓠ ꓗꓹ ꓡꓳ꓾ ꓦꓴꓻ ꓠꓬꓹ ꓔꓬ ꓠ ꓗꓹ ꓡꓳ꓾ ꓐꓰ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓯ ꓔ ꓡꓳ=
