ꓡꓴ‐ꓘ 11ꓽ47‐54
ꓙꓵꓽ ꓗ ꓒ ꓐꓴ ꓗꓪ ꓟ ꓕꓲ ꓣꓳ ꓡꓰ ꓬꓰ‐ꓢꓴ ꓔꓯ ꓟ. ꓒꓽꓳ꓾ ꓠꓴ ꓕꓱ ꓡꓱ ꓐꓯˍ ꓟ ꓠꓬ ꓥꓪ ꓠꓴꓽ ꓔꓯˍ ꓟꓲ ꓕꓼ ꓬꓯꓼˍ ꓡꓳ꓾ ꓐꓯˍ ꓡꓳ꓿ ꓖꓳ ꓕꓯ ꓬꓰ‐ꓢꓴ ꓡꓰ꓾ ꓙꓵꓽ ꓗ ꓒ ꓐꓴ ꓠꓴ ꓪˍ ꓟꓲ ꓫ. ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪ ꓠꓽ ꓢꓴ ꓔꓯ ꓫ.ˍ ꓟ ꓶꓻ ꓟꓯꓻ ꓝꓲ ꓢꓲ꓾ ꓠꓴ ꓪ ꓚꓲ ꓛꓬ ꓠꓽ ꓶꓻ ꓟꓯꓻ ꓙ ꓠ, ꓟ ꓡꓯꓼ ꓠꓬꓲ ꓕꓲ ꓠꓬꓲˍ ꓟꓲ ꓡꓵ ꓠꓲ, ꓟꓽ ꓫꓵ꓿
ꓠꓴ ꓪ ꓠꓽ ꓫ. ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪ ꓒꓵꓽ ꓒ ꓐꓴ ꓡꓰ ꓢꓰꓼ ꓗꓷ ꓟ꓾ ꓟꓷꓽ ꓠꓷ, ꓝ. ꓢꓴ ꓐꓴ ꓡꓱꓸꓼ ꓜꓴ ꓔꓯ ꓠꓴ ꓪ ꓫꓬ, ꓜꓶˍ ꓡꓳ꓿ ꓠꓴ ꓪ ꓡꓰ ꓠꓴ ꓪ ꓒꓵꓽ ꓒ ꓐꓴ ꓡꓰ ꓢꓰꓼ ꓗꓷ ꓟ ꓟꓷꓽ ꓠꓷ, ꓝ. ꓢꓴ ꓐꓴ ꓡꓱꓼ ꓜꓴ ꓔꓯ ꓫꓬ, ꓜꓶˍ ꓟ ꓠꓬ꓾ ꓬꓲ ꓪ ꓡꓰ ꓬꓰ ꓗꓷ ꓟ ꓔꓯ ꓢꓷ. ꓙ ꓟꓳ ꓙˍ ꓟ ꓐꓰ ꓓꓽ ꓔꓳ,ˍ ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓪꓴ‐ꓢ ꓬꓲ ꓙ ꓗꓴ. ꓠꓲ, ꓡꓰ ꓫ. ꓕꓱ ꓗꓷ ꓢꓲ꓾ ꓥꓪ ꓠꓽ ꓬꓲ ꓪ ꓔꓯ ꓟꓷꓽ ꓠꓷ, ꓝ. ꓢꓴˍ ꓐꓰ ꓝꓲ ꓓꓴ ꓝꓲ ꓩꓴ ꓗꓷˍ ꓥꓳ꓿ ꓬꓲ ꓪ ꓠꓽ ꓕꓲ ꓐꓱ ꓔꓯ ꓢꓰꓼ ꓗꓷˍ ꓥꓳ꓾ ꓕꓲ ꓐꓱ ꓔꓯ ꓗ. ꓧꓪˍ ꓥꓳ꓾ ꓐꓯˍ ꓡꓳ꓿ ꓖꓳ ꓟ ꓑꓶ. ꓓꓴ ꓟꓵꓽ ꓔꓶ ꓟꓲ ꓔꓶ ꓕ ꓑꓳ.꓾ ꓮ‐ꓐꓱ ꓬꓲ ꓫꓵꓽ ꓗꓪ ꓐꓰ ꓔꓲ ꓖꓴˍ ꓐꓰ ꓢꓲ ꓫꓬ ꓦꓲ ꓠꓬꓲꓽ ꓗꓴ. ꓚꓸꓼ ꓗꓪ ꓫꓵꓻ ꓗꓷ ꓢꓴ ꓢ‐ꓚꓬ‐ꓡꓲ‐ꓬ ꓬꓲ ꓫꓵꓽ ꓗꓪ ꓛꓲ꓾ ꓟꓷꓽ ꓠꓷ, ꓝ. ꓢꓴ ꓐꓴ ꓫꓵꓽ ꓧꓳ. ꓡꓰ ꓝꓲ ꓟ ꓝꓴꓲ ꓠꓬ ꓕꓱ ꓕꓲ ꓤꓶ ꓢꓴ ꓔꓯ ꓟꓯꓻ ꓝꓲˍ ꓥꓳ꓿ ꓥ ꓡꓳ꓾ ꓠꓴ ꓪ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓕꓱ ꓕꓲ ꓤꓶ ꓢꓴ ꓔꓯ ꓟꓯꓻ ꓝꓲˍ ꓥꓳ꓿
ꓙꓵꓽ ꓗ ꓒ ꓐꓴꓳ꓾ ꓠꓴ ꓪ ꓠꓽ ꓫ. ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪ ꓡꓰ ꓢꓷ. ꓠꓲ, ꓜꓳ ꓜꓴ ꓔꓯ, ꓙꓰ ꓢꓲ꓾ ꓠꓴ ꓪ ꓚꓲ ꓛꓬ ꓠꓽ ꓟꓽ ꓓꓵꓽ ꓙꓰ꓿ ꓓꓵꓽ ꓙꓰˍ ꓐꓰ ꓬꓰ ꓔꓬ ꓢꓴ ꓔꓯˍ ꓟꓲ ꓠꓴ ꓪ ꓗꓽ ꓔ ꓡꓳ꓾ ꓐꓯˍ ꓡꓳ꓿ ꓬꓰ‐ꓢꓴ ꓖꓳ ꓗꓪ ꓐꓰ ꓓꓳ ꓙꓰˍ ꓕꓯ꓾ ꓙꓵꓽ ꓗ ꓟ. ꓒ ꓐꓴˍ ꓐꓰ ꓒ‐ꓡꓲ‐ꓢꓷ ꓐꓴ ꓠꓬ ꓬꓰ‐ꓢꓴˍ ꓐꓰ ꓦꓶ ꓦꓶˍ ꓡꓰ ꓧꓳꓺ ꓡꓯ ꓘꓳ ꓡ ꓢꓲ꓾ ꓬꓲ ꓔꓯ ꓮꓽ ꓟꓬ, ꓫꓵ ꓜꓶ ꓜꓶ ꓟꓵ ꓟꓵ ꓠ ꓠꓬꓲ ꓢꓲ ꓠꓬꓲ꓾ ꓬꓲ ꓐꓯ ꓘꓶ ꓗꓪ ꓐꓰ ꓬꓲ ꓔꓯ ꓠ. ꓣꓴ ꓠ, ꓟ ꓢꓯꓼ ꓕꓵꓼˍ ꓡꓳ꓿
