ꓒ‐ꓡꓲ‐ꓢꓷ ꓐꓴ ꓔꓯ ꓕꓼˍ ꓟ (ꓡꓴ‐ꓘ꓿11ꓽ37‐41)
ꓬꓰ-ꓢꓴ ꓫꓸ ꓕꓱ ꓓꓳ ꓡꓰ ꓕꓯ꓾ ꓒ-ꓡꓲ-ꓢꓷ ꓕꓲ ꓣꓳ ꓡꓰ ꓬꓲ ꓔꓯ ꓜ ꓜꓽ ꓡꓯ꓾ ꓐꓰ ꓘꓴˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓓꓵꓽ ꓡꓰ ꓢꓲ ꓜ ꓜꓽˍ ꓐꓰ ꓠꓬꓲꓸ ꓠꓸˍ ꓡꓳ꓿ꓜꓻ ꓟꓽ ꓜꓽ ꓧꓶꓸ ꓕꓯꓽ ꓬꓰ-ꓢꓴ ꓡꓯꓼ ꓒꓯꓹ ꓟꓽ ꓞꓲꓽˍ ꓟ ꓔꓯ ꓒ-ꓡꓲ-ꓢꓷ ꓖꓳ ꓕꓲ ꓣꓳ ꓟꓳꓻ ꓗꓷ ꓠꓬ ꓓꓵꓽ ꓙꓽ ꓟꓶˍ ꓡꓳ꓿
ꓖꓳ ꓕꓯ ꓢꓲ ꓒꓽ ꓡꓰ꓾ ꓮ ꓟꓶ ꓠꓴ ꓪꓽ ꓒ-ꓡꓲ-ꓢꓷ ꓐꓴ ꓠꓬ꓾ ꓡꓴꓻ ꓗꓶˍ ꓐꓰ ꓐꓯꓻ ꓕꓯꓽ ꓢꓲ ꓕꓲ ꓒꓳꓹ ꓔꓯ ꓫꓬꓻ ꓫꓬˍ ꓡꓰ ꓞꓲꓽˍ ꓡꓳ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓯꓸꓼ ꓗꓪ ꓠꓽ꓾ ꓢꓴ ꓔꓯ ꓜꓲꓻ ꓞꓳꓹ ꓜꓽˍ ꓟ ꓐꓰ ꓥꓶˍ ꓟ ꓐꓲ ꓞꓹ ꓡꓳ꓿ ꓞꓳ ꓙꓲꓽ ꓐꓴꓳ꓾ ꓕꓯꓽ ꓢꓲ ꓗꓪ ꓟ ꓔꓯ ꓚꓰꓼ ꓢꓴ ꓡꓰ ꓠꓯꓸꓼ ꓗꓪ ꓟˍ ꓟꓲ ꓚꓰꓼ ꓔ ꓡꓳ ꓟꓽ ꓥ ꓡ? ꓠꓴ ꓪꓽ ꓠꓬ ꓫꓸ ꓢꓴ ꓔꓯ ꓓꓰꓽ ꓖꓶˍ ꓕꓯ꓾ ꓠꓯꓸꓼ ꓗꓪ ꓟ ꓠꓲꓹ ꓙꓽ ꓟꓬ ꓗꓳˍ ꓟ ꓡꓰ ꓖꓶ꓿ ꓖꓳ ꓡꓱ ꓠꓬ ꓠꓴ ꓪꓽ ꓐꓱ ꓶ ꓮꓸ ꓫꓵˍ ꓟꓲ ꓫꓬꓻˍ ꓟ ꓒꓬꓱꓼ ꓡ ꓥꓳ꓾ ꓐꓯˍ ꓡꓳ꓿
ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓠꓬ꓾ ꓕꓯꓽ ꓢꓲ ꓟꓳꓻ ꓓꓻˍ ꓟ ꓕꓲ ꓒꓳ, ꓔꓯ ꓡꓰꓽ ꓡꓳ. ꓢꓲ ꓐꓯ ꓟꓴ ꓟꓽ ꓘꓶ ꓠ, ꓟ꓾ ꓟꓽ ꓐꓯ ꓞꓷ, ꓠ, ꓟ ꓐꓯ ꓖꓶ ꓡ ꓔꓬ ꓟ ꓥ ꓡꓳ꓿ ꓣꓳꓽ ꓮ ꓙꓵꓽ ꓠꓬ ꓪꓴ‐ꓢ ꓬꓲ ꓤ ꓠꓱˍ ꓡꓰꓽ ꓥ ꓡꓳ꓿ ꓪꓴ‐ꓢ ꓡꓰ ꓬꓲ ꓕꓲ ꓞꓲꓼ ꓕꓲ ꓑ ꓟ ꓟꓴꓽ ꓗꓪ ꓗꓴꓷꓼ ꓡꓯ ꓪ ꓖꓶ ꓠꓲ, ꓫꓵˍ ꓟ ꓬꓲ ꓮ ꓐꓲ ꓮ ꓟꓲꓽ ꓐꓴ ꓡꓰꓽ ꓥ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓠꓬ ꓕꓲ ꓣꓳ ꓛꓳꓽ ꓕꓲ ꓣꓳ ꓟꓽ ꓐꓯ ꓞꓷ, ꓠ, ꓟ꓾ ꓝꓴꓲ. ꓟꓽ ꓓꓰ ꓠ, ꓟ꓾ ꓣꓳ ꓐꓰ ꓟꓽ ꓫꓱ. ꓢꓴ꓾ ꓣꓳ ꓔꓯ ꓟꓽ ꓪꓽ ꓢꓴ ꓔꓯ ꓐꓯ ꓟꓴ ꓟꓽ ꓘꓶ ꓠ, ꓟ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ꓿ ꓪꓴ‐ꓢ ꓠꓬ ꓐꓯ ꓟꓴ ꓫꓬ, ꓒ ꓓꓽ ꓟ ꓥ ꓢꓲ ꓠꓬꓲ꓾ ꓪꓴ‐ꓢ ꓬꓲ ꓐꓯ ꓟꓴ ꓫꓬ, ꓟ ꓠꓯꓸꓼ ꓗꓪ꓾ ꓣꓳ ꓕꓲ ꓣꓳ ꓡꓰ ꓕꓲ ꓣꓳ ꓠꓬ ꓪꓴ‐ꓢ ꓬꓲ ꓠꓵꓻ ꓠꓲ, ꓘꓳ ꓣꓴ ꓒꓵꓽ ꓢꓴ ꓡꓰꓽ ꓥ ꓡꓳ꓾ ꓐꓰ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓢꓯꓼ ꓪ ꓖꓶ ꓡ ꓔꓬ ꓟ ꓥ ꓡꓳ꓿
