ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓙꓵꓽ ꓢꓴ ꓧꓪ. ꓧꓪ.
ꓣꓳ ꓗꓳ ꓡꓳ ꓗꓪ ꓐꓯ ꓧꓪ. ꓘꓶ ꓕꓲꓽ ꓘꓶ ꓑ ꓙꓽ ꓠꓬꓲˍ ꓡꓳ꓿ ꓠꓴ ꓟꓴꓽ ꓗꓪ ꓗꓴꓷꓼ ꓗꓪ ꓙꓰ ꓠꓲ, ꓫꓵˍ ꓡ? ꓟꓴꓽ ꓗꓪ ꓗꓴꓷꓼ ꓗꓪ ꓙꓰ ꓠꓲ, ꓫꓵˍ ꓠꓬ ꓪꓴ‐ꓢ ꓔꓯ ꓙꓵꓻ ꓕꓲ ꓖˍ ꓓꓻꓳ꓿ ꓪꓴ‐ꓢ ꓔꓯ ꓙꓵꓻˍ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓬꓰˍ ꓥꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻˍ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓬꓰˍ ꓥꓳ꓾ ꓐꓰ ꓣꓳ ꓑ ꓙꓽ ꓠꓬꓲˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓱ ꓟ ꓠꓬ ꓮ ꓡꓲ ꓫꓵꓽ ꓦꓬꓼ ꓠꓬꓲ ꓥ ꓡ ꓐꓯ ꓟ ꓣꓳ ꓠ ꓠ, ꓓꓴ ꓬꓰ ꓡꓯ꓿ ꓢ. ꓠꓯ ꓠꓽ ꓦꓬꓼ ꓠꓬꓲ ꓗꓪ ꓣꓳ ꓑ ꓙꓽ ꓪˍ ꓟ ꓢꓲꓽ ꓫꓬ ꓕꓳꓽ ꓶ ꓠꓬ ꓕꓱ ꓟ ꓬꓲ ꓚꓱ, ꓔꓯ ꓟꓳ. ꓥ ꓡꓳ꓿ ꓟ‐ꓘꓳ ꓕꓳꓽ ꓶ 10ꓽ17‐31 ꓗꓪ ꓡꓽ ꓞꓳ ꓕꓲ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓡ ꓢꓲ ꓠꓬꓲ꓾ ꓟ. ꓒꓽꓳ꓾ ꓕꓲꓽ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶ ꓠ, ꓟ ꓮ ꓡꓲ ꓬꓰ ꓠꓯ, ꓡ꓾ ꓐꓰ ꓠ ꓠꓬꓲˍ ꓡꓳ꓿ ꓢꓲ ꓒ ꓬꓰ‐ꓢꓴ ꓡꓰ ꓬꓲ ꓔꓯ ꓕꓱ ꓡꓱ ꓒꓳ, ꓖꓶˍ ꓡꓳ꓿ ꓠꓴ ꓠꓬ ꓪꓴ‐ꓢ ꓙꓵꓽ ꓗ 10 ꓙꓰꓽ ꓟ ꓔꓯ ꓛꓳꓻ꓿ ꓡ ꓞꓳ ꓕꓽ ꓢꓰꓼ꓾ ꓕꓽ ꓘꓴꓽ ꓕꓽ ꓠꓯꓻ꓾ ꓟꓽ ꓔꓱ, ꓟ ꓔꓯ ꓢꓷ. ꓙ ꓟꓳ ꓙ ꓢꓴ ꓕꓽ ꓬꓰ꓾ ꓐ, ꓐ ꓟ, ꓟ ꓔꓯ ꓒꓵꓽ꓾ ꓢꓴ ꓤ ꓖꓴꓽ ꓢꓴ ꓤ ꓟꓶ ꓔꓯ ꓕꓽ ꓠꓲ, ꓦꓯ.꓾ ꓕꓱ ꓡꓱ ꓐꓯ ꓖꓶˍ ꓡꓳ꓿
ꓖꓳ ꓕꓯ ꓞꓳ ꓡꓱ ꓤ ꓖꓳ ꓟ “ꓥꓪ ꓞꓲꓼ ꓣꓳˍ ꓕꓯ ꓡꓰ ꓕꓱ ꓟ ꓔꓯ ꓖꓼ ꓛꓳ ꓗꓳ. ꓡꓻꓳ” ꓐꓯ ꓖꓶˍ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓔꓯ ꓠꓲ, ꓠꓵ ꓢꓲ ꓠꓬꓲ “ꓠꓴ ꓐꓲ ꓜꓲꓼ ꓠꓲ, ꓫꓵˍ ꓠꓬ ꓠꓴ ꓔꓯ ꓙꓳˍ ꓟ ꓮ ꓙꓵꓽ ꓞꓳ ꓫ. ꓔꓯ ꓖꓶ꓿ ꓖꓳ ꓡꓱ ꓢꓲ ꓥꓪ ꓗ ꓠꓯ. ꓛꓳꓻ ꓡꓯ” ꓐꓯ ꓖꓶˍ ꓡꓳ꓿ ꓞꓳ ꓡꓱ ꓤ ꓖꓳ ꓟ ꓠꓬ ꓒꓬꓱꓽ ꓟꓬ ꓐꓬ ꓡꓰ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓔꓯ ꓟꓽ ꓖꓼ ꓙꓰꓳ꓿ ꓔꓲ. ꓒꓳ, ꓬꓲꓼ ꓙꓰꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓔꓯ ꓒꓴ ꓫꓵꓺ ꓮ ꓟꓬ, ꓙꓳˍ ꓟ ꓑꓶ. ꓓꓴ ꓥ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓞꓳ ꓡꓱ ꓤ ꓕꓱ ꓕꓲꓽ ꓣꓳ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓠꓲ, ꓫꓵˍ ꓡꓳ꓿ ꓬꓲ ꓚꓱ, ꓠꓬ ꓮ ꓡꓲ ꓥ ꓡ ꓐꓰ ꓢꓲ ꓒ ꓬꓰ‐ꓢꓴ ꓔꓯ ꓬꓲ ꓠ ꓠꓬꓲˍ ꓡꓳ꓿ ꓢꓲ ꓒ ꓬꓰ‐ꓢꓴ ꓡꓰ ꓬꓲ ꓔꓯ ꓫꓬꓽ ꓫꓬꓽ ꓡꓰꓽ ꓐꓯ ꓟꓳ. ꓖꓶˍ ꓡꓳ꓿ ꓪꓴ‐ꓢ ꓙꓵꓽ ꓗ ꓔꓯ ꓛꓳꓻ꓿ ꓝꓮꓲ ꓢꓲ‐ꓒ ꓬꓰ‐ꓢꓴ ꓔꓯ ꓙꓵꓻ꓾ ꓬꓲ ꓔꓯ ꓖꓼ ꓡꓯ ꓐꓰ ꓐꓯ ꓡꓳ꓿
ꓢꓲ ꓒ ꓬꓰ‐ꓢꓴ ꓔꓯ ꓙꓵꓻ ꓕꓲ ꓖ ꓟꓴꓽ ꓗꓪ ꓗꓴꓷꓼ ꓗꓪ ꓛꓲꓺ ꓬꓰ ꓐ ꓡˍ ꓡ ꓐꓯ ꓟ ꓠ ꓠꓬꓲ ꓘꓶꓽ ꓕꓱ ꓟ ꓠꓬ ꓟ. ꓟꓲꓽ ꓝꓲ. ꓗꓪ ꓓꓵˍ ꓡꓳ꓾ ꓐꓰ ꓡꓳ. ꓟꓳꓻˍ ꓡꓳ꓿ ꓟꓴꓽ ꓗꓪ ꓗꓴꓷꓼ ꓗꓪ ꓛꓲꓺ ꓬꓰ ꓠꓲ, ꓫꓵˍ ꓥꓳ ꓐꓯ ꓠꓬ ꓣꓳ ꓬꓰ ꓠ ꓔ ꓟ ꓠꓬ ꓪꓴ‐ꓢ ꓐꓯ ꓘꓶ ꓔꓯ ꓛꓳꓻ ꓢꓲ ꓠꓬꓲ ꓬꓲ ꓔꓯ ꓙꓵꓻ ꓠ, ꓟ ꓥꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓐꓯ ꓡꓳ꓿ ꓗ ꓠꓯ. ꓬꓲ ꓗ ꓠꓯ. ꓖꓼ ꓠ, ꓟ꓾ ꓙꓵꓻ ꓗ ꓔꓯ ꓣꓳ ꓡꓳ. ꓠꓬꓲˍ ꓕꓯ ꓕꓽ ꓬꓰ ꓕꓽ ꓬꓰ ꓡꓰꓽ ꓐꓯ ꓔ ꓡꓳ꓿ ꓖꓳ ꓟ ꓕꓽ ꓬꓰ꓾ ꓕꓱ ꓟ ꓕꓽ ꓬꓰ꓿ ꓖꓳ ꓡꓱ ꓠꓬꓲ ꓟꓽ ꓙꓲꓻ ꓟ ꓟꓽ ꓬꓰ ꓕꓲ ꓖ ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓟꓽ ꓓꓻ ꓢꓰꓽ꓿ ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓠ, ꓟ ꓐꓱ ꓶ ꓟꓽ ꓙꓲꓻ꓾ ꓟꓽ ꓔꓱ, ꓟꓽ ꓜꓳꓽ ꓟ ꓟꓽ ꓬꓰ꓾ ꓝꓮꓲ ꓙꓲꓻˍ ꓟ ꓬꓰ ꓠ ꓔ ꓡꓳ꓿ ꓟꓽ ꓙꓲꓻ ꓟ ꓟꓽ ꓬꓰ ꓕꓲꓽ ꓖ ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓟꓽ ꓓꓻ꓿ ꓮ ꓡꓲ ꓬꓰ ꓠ ꓔ ꓡ? ꓟꓽ ꓙꓲꓻ ꓟ ꓔꓯ ꓟꓽ ꓬꓰ꓾ ꓙꓲꓻˍ ꓟ ꓔꓯ ꓬꓰ ꓠ ꓔ ꓡꓳ꓾ ꓐꓰ ꓐꓯ ꓠꓲ, ꓫꓵˍ ꓟ ꓥ ꓡꓳ꓿
ꓞꓳ ꓡꓱ ꓤ ꓖꓳ ꓟ ꓙꓲꓻˍ ꓟ ꓬꓰ ꓠ, ꓟ ꓐꓱ ꓶ ꓬꓲ ꓠꓬ ꓬꓰ ꓟꓽ ꓑꓶ.꓿ ꓕꓲ ꓚꓱ, ꓐꓯ ꓠꓬ ꓬꓲ ꓔꓯ ꓒꓴ ꓫꓵꓺ ꓮ ꓟꓬ, ꓙꓳˍ ꓟ ꓑꓶ. ꓓꓴ ꓬꓲ ꓠꓬ ꓚꓱ, ꓬꓲꓼ ꓙꓰˍ ꓡꓳ꓿ ꓢꓲ ꓒ ꓠꓯꓸꓼ ꓗꓪ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓠꓴ ꓥꓪ ꓪꓴ‐ꓢ ꓙꓵꓽ ꓗ ꓔꓯ ꓛꓳꓻ ꓕꓲ ꓖ ꓟꓴꓽ ꓗꓪ ꓗꓴꓷꓼ ꓗꓪ ꓛꓲꓺ ꓬꓰˍ ꓥꓳ ꓐꓰ ꓓꓵꓽ ꓙꓽˍ ꓥꓳ ꓐꓯ ꓠꓬ ꓠꓴ ꓓꓵꓽ ꓙꓽ ꓚꓱ, ꓠꓬ ꓟꓽ ꓜꓳꓽ ꓢꓰꓽ꓿ ꓪꓴ‐ꓢ ꓙꓵꓽ ꓗ ꓔꓯ ꓛꓳꓻ ꓢꓲ ꓟꓽ ꓙꓲꓻ ꓟ ꓟꓽ ꓬꓰ ꓟ ꓡꓰꓽ ꓟꓽ ꓞꓲꓺ꓾ ꓙꓲꓻˍ ꓟ ꓬꓰ ꓠ ꓔ ꓡꓳ꓿ ꓮ ꓡꓲ ꓫꓵꓽ ꓙꓲꓻˍ ꓟ ꓥ ꓡ? ꓠꓶꓽ ꓛꓳꓽ ꓕꓲꓽ ꓛꓳꓽ ꓔꓯ ꓠꓲ, ꓠꓵꓻ꓿ ꓪꓴ‐ꓢ ꓔꓯ ꓕꓲ ꓠꓲ, ꓟ ꓡꓱꓸꓼ ꓕꓲ ꓙꓽ ꓠꓲ, ꓡꓱꓸꓼ ꓠꓲ, ꓠꓵꓻ ꓐꓯ ꓟ ꓥ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓠꓬꓲ. ꓠꓬꓲ ꓠꓴ ꓐꓰ ꓥꓪ ꓔꓯ ꓘꓴꓻ ꓔꓬ ꓡꓳ꓿ ꓮ ꓡꓲ ꓐꓰ ꓘꓴꓻ ꓔꓬ ꓡ? ꓪꓴ‐ꓢ ꓔꓯ ꓙꓵꓻ ꓠ, ꓟ ꓐꓱ ꓶ꓾ ꓮ ꓡꓲ ꓙꓵꓻ ꓠꓯ, ꓟ ꓥ ꓡ? ꓙꓲꓻˍ ꓟ ꓬꓲ ꓟꓬꓱ ꓗꓪ ꓐꓰ ꓙꓲꓻˍ ꓟ ꓬꓰ ꓠ, ꓟ ꓐꓱ ꓶ꓾ ꓣꓳ ꓔꓯ ꓙꓳˍ ꓟ ꓮ ꓙꓵꓽ ꓪꓴꓽ ꓗꓷ ꓢꓲ ꓠꓬꓲ ꓬꓲ ꓗ ꓠꓯ. ꓛꓳꓻ ꓠ, ꓟ ꓐꓱ ꓶ ꓥ ꓡꓳ꓿
ꓥ ꓡꓳ꓾ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳꓽ ꓔꓯ ꓙꓳˍ ꓟ ꓮ ꓙꓵꓽ ꓪꓴꓽ ꓗꓷ ꓐꓯˍ ꓟ ꓬꓲ. ꓬꓲ ꓢꓲ ꓠꓬ꓾ ꓮ ꓟꓶ ꓠꓴ ꓔꓬ ꓟ ꓦꓲꓻ ꓠꓴ ꓜꓽ ꓓꓴ ꓮ ꓙꓵꓽ ꓪꓴꓽ ꓗꓷ ꓢꓲ ꓠꓬꓲ ꓕꓱ ꓡꓱ ꓚꓳꓻ ꓙꓰ ꓐꓯˍ ꓟ ꓟꓽ ꓥ꓿ ꓣꓳ ꓠꓲ, ꓟ ꓠꓬ ꓬꓲ ꓔꓯ ꓡꓰꓽ ꓥꓳꓺ ꓓ, ꓠ, ꓟ ꓐꓱ ꓶ꓾ ꓕꓲꓽ ꓙꓽ ꓠꓲ, ꓡꓱꓸꓼ ꓕꓲ ꓶ ꓟꓬ ꓡꓱꓸꓼ ꓢꓲ ꓒ ꓬꓰ‐ꓢꓴ ꓥꓳꓺ ꓞ, ꓠ, ꓟ ꓐꓱ ꓶ ꓬꓲ ꓠꓲ, ꓡꓶ ꓙꓳˍ ꓟ ꓥ ꓡꓳ꓿ ꓣꓳ ꓐꓰ ꓪꓴ‐ꓢ ꓠꓬꓲꓽ ꓗꓴ. ꓚꓸꓼ ꓗꓪ ꓗꓽ ꓞ, ꓓ, ꓟ ꓮ ꓙꓵꓽ ꓔꓯ ꓡꓳ ꓩꓴ ꓗꓷ ꓠ, ꓟ ꓐꓱ ꓶ ꓬꓲ ꓡꓰ ꓣꓳꓽ ꓔꓯ ꓓꓰꓽ ꓬꓰ ꓟ ꓥ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓠꓴ ꓐꓰ ꓥꓪ ꓓꓵꓽ ꓙꓽ ꓠꓬꓲ ꓡꓯ꓿ ꓠꓴ ꓠꓬ ꓪꓴ‐ꓢ ꓙꓵꓽ ꓗ ꓔꓯ ꓛꓳꓻ ꓔꓬꓳ꓿ ꓝꓮꓲ ꓪꓴ‐ꓢ ꓐꓰ ꓒ ꓕꓲꓺ ꓠꓶꓽ ꓠ, ꓟ ꓐꓱ ꓶ꓾ ꓢꓲ ꓒ ꓬꓰ‐ꓢꓴ ꓐꓰ ꓒ ꓕꓲꓺ ꓙꓻ ꓫꓱꓽ ꓠ, ꓟ ꓐꓱ ꓶ ꓠꓴ ꓐꓰ ꓬꓲ ꓠꓬꓲꓽ ꓗꓴ. ꓚꓸꓼ ꓗꓪ ꓮ ꓫꓵꓽ ꓗꓽ ꓕ. ꓓꓴ ꓙꓳˍ ꓡ꓿ ꓗ ꓠꓯ. ꓢꓲ ꓗꓪ ꓮ ꓫꓵꓽ ꓛꓲꓺ ꓓꓴꓽ ꓖꓳꓻ ꓓꓴ ꓥꓳ ꓓꓴ ꓙꓳˍ ꓡ ꓐꓯ ꓟ ꓔꓯ ꓓꓵꓽ ꓙ ꓢꓲ ꓠꓬꓲ꓾ ꓕꓱ ꓟ ꓔꓯ ꓪꓴ‐ꓢ ꓔꓯ ꓡꓯꓼ ꓙꓱ ꓗꓷ ꓢꓲ ꓠꓬꓲ꓾ ꓡꓳꓻ ꓡꓳꓻ ꓢꓻ ꓢꓻˍ ꓐꓰ ꓞꓳ ꓙꓳ ꓙꓰ ꓠ, ꓟ ꓐꓱ ꓶ ꓢꓯꓼ ꓕꓵꓼ ꓙꓰ ꓡꓯ꓿
